លោក Cho Myoung-gyun បានដើរតួដ៏សំខាន់កាលពីប៉ុន្មានឆ្នាំមុននៅក្នុងការផ្តួចផ្តើមគម្រោងសហប្រតិបត្តិការសេដ្ឋកិច្ចដែលត្រូវបានគេផ្អាកនាពេលឥឡូវនេះ។ ភ្លាមៗបន្ទាប់ពីលោកប្រធានាធិបតីកូរ៉េ Moon Jae-in បានតែងតាំងលោកជាអ្នកទទួលបន្ទុកបញ្ហាកូរ៉េខាងជើង កាលពីថ្ងៃទី១៣ ខែមិថុនាមក លោក Cho បានប្រាប់អ្នកសារព័ត៌មានថា «ប្រតិបត្តិការនៅតំបន់ឧស្សាហកម្មកែសុងគួរតែត្រូវបានស្តារឡើងវិញ។ ខ្ញុំនឹងនិយាយពីបញ្ហានេះ នៅក្រោយពេលដែលខ្ញុំពិនិត្យមើលព័ត៌មានលម្អិតឲ្យល្អិតល្អន់រួចរាល់»។
ការប្រកាសនេះបានបង្កឲ្យមានការរិះគន់នៅក្នុងរដ្ឋធានីវ៉ាស៊ីនតោន។ អ្នកវិភាគជាច្រើននិយាយថា ការស្តារសកម្មភាពសេដ្ឋកិច្ចទាំងនោះឡើងវិញអាចនឹងប៉ះពាល់ដល់ទំនាក់ទំនងរវាងរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងសេអ៊ូល ហើយអាចនឹងកាត់បន្ថយចំណងសម្ព័ន្ធភាពរបស់ពួកគេផងដែរ។ រដ្ឋាភិបាលក្រុងសេអ៊ូលបានបិទតំបន់សេដ្ឋកិច្ចកែសុងកាលពីខែកុម្ភៈ ឆ្នាំ២០១៦ ដើម្បីដាក់ទណ្ឌកម្មដល់ការសាកល្បងបាញ់អាវុធនុយក្លេអ៊ែរនិងរ៉ុក្កែតចម្ងាយឆ្ងាយរបស់កូរ៉េខាងជើង។
អ្នកស្រី Sue Mi Terry ដែលជាអតីតអ្នកវិភាគលើបញ្ហាកូរ៉េខាងជើងរបស់ភ្នាក់ងារ CIA បានថ្លែងប្រាប់ VOA ផ្សាយជាភាសាកូរ៉េថា «សម្រាប់ទស្សនៈវិស័យរបស់រដ្ឋាភិបាលក្រុងវ៉ាស៊ីនតោន ការបើកដំណើរការតំបន់ឧស្សាហកម្មកែសុងឡើងវិញគឺជាបញ្ហាខ្លាំងណាស់»។
តំបន់សេដ្ឋកិច្ចនេះត្រូវបានចាប់ផ្តើមនៅក្នុងឆ្នាំ២០០៤ ដើម្បីធ្វើឲ្យប្រសើរឡើងនូវសហប្រតិបត្តិការរវាងកូរ៉េទាំងពីរ។ តំបន់សេដ្ឋកិច្ចដែលគ្រប់គ្រងរួមគ្នានៅក្នុងក្រុង កែសុង បានផ្តល់ប្រាក់ឈ្នួលចំនួន១០០លានដុល្លារដល់ពលករកូរ៉េខាងជើងចំនួន៥៤.០០០នាក់ ហើយបានចូលរួមចំណែកដល់ពាណិជ្ជកម្មរបស់រដ្ឋាភិបាលក្រុងព្យុងយ៉ាងក្នុងទឹកប្រាក់ជិត២ពាន់លានដុល្លារ។
អ្នកស្រី Terry បានបន្ថែមថា វិធានការផ្សះផ្សាណាមួយនឹងធ្វើឲ្យមានផលប្រយោជន៍ផ្នែកហិរញ្ញវត្ថុដ៏ច្រើនសម្រាប់រដ្ឋាភិបាលក្រុងព្យុងយ៉ាង ដែលផ្ទុយទៅនឹងគោលនយោបាយទៅលើប្រទេសកូរ៉េខាងជើងរបស់រដ្ឋាភិបាលក្រុងវ៉ាស៊ីនតោន ដែលផ្តោតលើរារាំងដល់កម្មវិធីអាវុធនុយក្លេអ៊ែររបស់កូរ៉េខាងជើង តាមរយៈការរឹតត្បិតលើប្រភពចំណូលទាំងអស់ដែលកូរ៉េខាងជើងទទួលបាន តាមដែលអាចធ្វើទៅបាន។
លោក Thomas Countryman ដែលបានធ្វើការនៅក្រោមរដ្ឋបាលលោកអូបាម៉ា ក្នុងនាមជាឧបការីរដ្ឋមន្ត្រីទទួលបន្ទុកផ្នែកសន្តិសុខអន្តរជាតិ និងកម្មវិធីបញ្ឈប់ការផលិតអាវុធនុយក្លេអ៊ែរបាននិយាយថា ការចាប់ផ្តើមសកម្មភាពសេដ្ឋកិច្ចនៅតំបន់សេដ្ឋកិច្ច កែសុង អាចនឹងជាការលើកទឹកចិត្តដល់លោក Kim ក្នុងការផលិតអាវុធនុយក្លេអ៊ែរតទៅទៀត ហើយវាក៏បានជះឥទ្ធិពលដល់កិច្ចខិតខំប្រឹងប្រែងរបស់សហគមន៍អន្តរជាតិផងដែរ។
លោក Countryman បាននិយាយយ៉ាងដូច្នេះថា «ការណ៍នេះអាចនឹងមិនស្របទៅនឹងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ វាមិនអាចទៅរួចនោះទេដែលកូរ៉េខាងត្បូងអាចបញ្ចុះបញ្ចូលចិនឲ្យអនុវត្តឲ្យបានម៉ឺងម៉ាត់តាមសេចក្តីសម្រេចរបស់ក្រុមប្រឹក្សាសន្តិសុខ ប្រសិនបើកូរ៉េខាងត្បូងបើកតំបន់សេដ្ឋកិច្ចនេះឡើងវិញដើម្បីផ្តល់ប្រាក់រាប់លានដុល្លារជារៀងរាល់ឆ្នាំទៅឲ្យរបបដឹកនាំកូរ៉េខាងជើង»។
លោក Gary Samore នៅមជ្ឈមណ្ឌល Belfer Center នៃសាកលវិទ្យាល័យ Harvard ដែលជាអតីតអ្នកសម្របសម្រួលផ្នែកគ្រប់គ្រងអាវុធ និងអាវុធប្រល័យលោក ក្រោមរដ្ឋបាលលោកប្រធានាធិបតីអូបាម៉ា បានប្រាប់ VOA ថា រដ្ឋាភិបាលក្រុងសេអ៊ូលគួរមានយុទ្ធសាស្ត្រល្អជាងនេះ ហើយគួរប្រើប្រាស់តំបន់សេដ្ឋកិច្ចកែសុងជាមធ្យោបាយចរចាដើម្បីឆ្លើយតបចំពោះ ឬជាផ្នែកនៃកិច្ចព្រមព្រៀងជាមួយនឹងរដ្ឋាភិបាលក្រុងព្យុងយ៉ាងដើម្បីរឹតត្បិត និងលុបចោលសកម្មភាពនុយក្លេអ៊ែររបស់កូរ៉េខាងជើង៕
ប្រែសម្រួលដោយ ប៊ុន ប៉េងហ៊ុយ
