មនុស្សយ៉ាងតិច២៣នាក់ដែលភាគច្រើនជាស្រ្តីក្រីក្រ បានស្លាប់ក្នុងសោកនាដកម្មរត់ជាន់គ្នាមួយ នៅភាគខាងជើងនៃប្រទេសបង់ក្លាដែស កាលពីថ្ងៃសុក្រ ទី១០ ខែកក្កដា បន្ទាប់ពីពួកគេបានជួបជុំគ្នាក្នុងកម្មវិធីសប្បុរសធម៌ថ្ងៃបុណ្យរ៉ាម៉ាដាន់ (Ramadan)។
ឧប្បត្តិហេតុនេះបានកើតទ្បើងនៅក្នុងក្រុង Mymensingh ភាគខាងជើងប្រទេសបង់ក្លាដែស នៅវេលាម៉ោងប្រមាណ៥ទៀបភ្លឺ នៅពេលដែលមនុស្សប្រមាណ១.៥០០នាក់ បានប្រជ្រៀតគ្នាចូលទៅក្នុងបរិវេណរោងចក្រផលិតថ្នាំសម្រាប់បៀមមួយ ដោយបានឆ្លងតាមក្លោងទ្វារតូចចង្អៀតមួយដើម្បីទៅទទួលយកអំណោយជាសម្លៀកបំពាក់។
មនុស្សម្នាជាច្រើនហូរហែមកពីសំណង់អនាធិបតេយ្យនិងភូមិជិតៗនោះ ដែលភាគច្រើនជាស្រ្តី បានរង់ចាំពេញមួយយប់នៅពីមុខរោងចក្រផលិតថ្នាំនោះ។ នៅពេលដែលកម្មកររោងចក្របើកទ្វាររបងរោងចក្រដើម្បីចែកចាយសម្លៀកបំពាក់ ហ្វូងមនុស្សម្នាទាំងនោះបានស្ទុះរុលទៅមុខព្រមគ្នា។
លោក Emran Ali មន្រ្តីប៉ូលិសជាន់ខ្ពស់ក្នុងក្រុង Mymensingh បានប្រាប់ VOA ថា៖«មកទល់នឹងពេលនេះ ពួកយើងប្រមូលបានសាកសពចំនួន២៣នាក់ ក្នុងនោះមានសាកសពចំនួន២១នាក់ជាស្រី្ត ហើយ២នាក់ទៀតជាកុមារតូចៗ។ ពួកគេមើលទៅក្រីក្រខ្លាំងណាស់។ មនុស្សមួយចំនួនបានរងរបួស ហើយកំពុងសម្រាកព្យាបាលនៅមន្ទីរពេទ្យ។ សាកសពខ្លះត្រូវបានសាច់ញាតិនាំយកចេញភ្លាមៗ បន្ទាប់ពីសោដកនាកម្មនោះបានកើតទ្បើង។ ចំនួនអ្នកស្លាប់សរុបចុងក្រោយអាចនឹងមានចំនួនច្រើនជាងនេះ»។
ខ្សែវីដេអូចេញពីទូរទស្សន៍ថតនៅកន្លែងកើតហេតុបានបង្ហាញពីស្ថានភាពវឹកវរមួយ ដោយរួមមានស្បែកជើងរាប់រយគូដាច់រប៉ាត់រប៉ាយពេញមុខក្លោងទ្វាររបងរោងចក្រ។ នៅខណៈដែលក្រុមគ្រួសារមកទទួលយកសាកសពជនរងគ្រោះ ពួកគេមួយចំនួនបានបន្ទោសទៅលើអ្នករៀបចំកម្មវិធីសប្បុរសធម៌នោះនិងមន្ត្រីប៉ូលិសក្នុងមូលដ្ឋានចំពោះសោកនាដកម្មនោះ។
លោក Ali ដែលជាមន្តី្រប៉ូលិសបាននិយាយថា កងកម្លាំងរបស់លោកមិនត្រូវបានគេជូនដំណឹងទេ នៅមុនពេលកម្មវិធីចែកអំណោយខោអាវសប្បុរសធម៌នោះបានប្រព្រឹត្តឡើង ឬសូម្បីតែការប្រមូលផ្តុំគ្នាយ៉ាងច្រើនកុះករបែបនេះក៏គ្មានគេជូនដំណឹងដែរ ដែលជាហេតុធ្វើឲ្យមន្ត្រីប៉ូលិសរបស់លោកគ្មានវត្តមាននៅទីនោះ។
លោកបានបន្ថែមទៀតថា អ្នកគ្រប់គ្រងរោងចក្រនោះក៏ប្រហែលជាមិនបានគិតថា នឹងមានហ្វូងមនុស្សយ៉ាងច្រើនកុះករបែបនេះមកទទួលយកអំណោយទេ។
លោក Kamul Islam មន្ត្រីទទួលបន្ទុកគ្រប់គ្រងប៉ុស្តិ៍ប៉ូលិសក្នុងស្រុកមួយ បានឲ្យដឹងថា ឧប្បត្តិហេតុដែលនាំឲ្យមានមនុស្សស្លាប់និងរងរបួសយ៉ាងច្រើននាក់នេះនឹងត្រូវធ្វើការស៊ើបអង្កេតបន្តទៀត។
«យើងបានឃាត់ខ្លួនមនុស្ស៨នាក់ ក្នុងនោះរួមមានទាំងម្ចាស់រោងចក្រ គឺលោក Shamim Talukdar ដែលជាអ្នករៀបចំកម្មវិធីចែកអំណោយសប្បុរសធម៌នោះ។ គណៈកម្មាការស៊ើបអង្កេតរបស់ប៉ូលិសបាននិងកំពុងចាប់ផ្តើមធ្វើការស៊ើបអង្កេតទៅលើឧប្បត្តិហេតុនៅរោងចក្រនោះហើយ ហើយនៅដើមសប្តាហ៍នេះ របាយការណ៍ការស៊ើបអង្កេតនោះនឹងត្រូវចេញហើយ»។
កម្មវិធីសប្បុរសធម៌បែបសាសនាអ៊ីស្លាមដែលត្រូវបានគេស្គាល់ថា Zakat នេះ ជាសកម្មភាពមួយដែលគេរៀបចំឡើងជាទូទៅ ឆ្ពោះទៅកាន់ថ្ងៃបញ្ចប់នៃខែបុណ្យរ៉ាម៉ាដាន់។
ទោះបីជាយ៉ាងណាក៏ដោយ នៅក្នុងប្រទេសបង់ក្លាដែសដែលប្រជាជនភាគច្រើនកាន់សាសនាអ៊ីស្លាម ហើយមួយភាគបួននៃប្រជាជនសរុបទាំង១៦០លាននាក់រស់នៅក្រោមបន្ទាត់ភាពក្រីក្រ យូរៗម្តង កម្មវិធីសប្បុរសធម៌ Zakat បែបនេះ បានបង្កឲ្យមានការរត់ជាន់គ្នាដ៏ប្រល័យ។
នៅក្នុងឆ្នាំ២០០២ មនុស្សប្រមាណ៤០នាក់ ដែលភាគច្រើនជាស្រ្តីនិងកុមារ បានស្លាប់នៅក្នុងសោកនាដកម្មរត់ជាន់គ្នាមួយ ក្នុងកម្មវិធីចែកអំណោយសប្បុរសធម៌នៅខាងក្រៅទ្វារចូលរោងចក្រមួយក្នុងក្រុង Gaibandha ភាគខាងជើងប្រទេសបង់ក្លាដែស។
កាលពីឆ្នាំទៅមិញ ស្ត្រី២នាក់បានស្លាប់ក្នុងការរត់ជាន់គ្នាមួយផ្សេងទៀត នៅក្នុងកម្មវិធីចែកអំណោយសប្បុរសធម៌ Zakat ក្នុងរោងចក្រមួយនៅសង្កាត់ Manikganj ភាគកណ្តាលប្រទេសបង់ក្លាដែស៕
ប្រែសម្រួលដោយ រស់ ពុទ្ធិនាថ
