ការតវ៉ាប្រឆាំងបានធ្វើឡើងកាលពីថ្ងៃសៅរ៍នៅក្នុងទីក្រុងជាង១៣៥នៅក្នុងសហរដ្ឋអាមេរិកនិងនៅបរទេសទាមទារឲ្យមានការស៊ើបអង្កេតពីការឃុបឃិតរវាងយុទ្ធនាការឃោសនាបោះឆ្នោតរបស់ប្រធានាធិបតីនិងប្រទេសរុស្ស៊ីដែលមានអានុភាពលើការបោះឆ្នោតកាលពីឆ្នាំទៅ ដែលលោកត្រាំបានទទួលជ័យជម្នះ។
បាតុកម្មមានឈ្មោះថា «ដើរដើម្បីរកការពិត»ដែលបានរៀបចំឡើងដោយក្រុមសកម្មជនចម្រុះជាតិ១៧ រួមមានក្រុមដើរក្បួនស្រ្តីហើយនឹងក្រុមប្រជាធិបតេយ្យជឿនលឿនអាមេរិក។
ក្រុមចម្រុះនោះកំពុងទាមទារឲ្យបង្កើតគណៈកម្មការឯករាជ្យមួយដើម្បីពិនិត្យមើលការស៊ើបអង្កេតមិនលម្អៀងហើយនិងការស៊ើបអង្កេតរបស់សភាដែលកំពុងធ្វើឡើងត្រូវមានប្រភពត្រឹមត្រូវហើយមិនបម្រើគណបក្សណាមួយ។
មានការស៊ើបអង្កេតដោយសភា៤អំពីការជាប់ទាក់ទិនរបស់យុទ្ធនាការបោះឆ្នោតប្រធានាធិបតី ត្រាំ ទៅនឹងប្រទេសរុស្ស៊ីហើយនិងការជ្រៀតជ្រែករបស់រដ្ឋាភិបាលក្រុងមូស្គូនៅក្នុងការបោះឆ្នោត។ បន្ថែមពីនោះ ក្រសួងយុត្តិធម៌បានតែងតាំងលោក Robert Miller អតីតនាយក FBI ជាស្មាក្តីពិសេសដើម្បីស៊ើបអង្កេតថាតើពួកអ្នកជំនួយការឃោសនាបោះឆ្នោតរបស់ប្រធានាធិបតីត្រាំ មានការឃុបឃិតខុសច្បាប់ជាមួយប្រទេសរុស្ស៊ីដែរឬទេ។
ការស៊ើបអង្កេតបានចាប់ផ្តើមធ្វើឡើងបន្ទាប់ពីទីភ្នាក់ងារស៊ើបការណ៍សម្ងាត់សហរដ្ឋអាមេរិកបានសន្និដ្ឋានថា រុស្ស៊ីបានលួចចូលក្នុងប្រព័ន្ធកុំព្យូទ័ររបស់ គណៈកម្មាធិការជាតិប្រជាធិបតេយ្យកាលពីឆ្នាំនេះធ្វើឲ្យគ្រោះថ្នាក់លោកស្រី Hillary Clinton បេក្ខជនប្រធានាធិបតីខាងគណបក្សប្រជាធិបតេយ្យដែលពួកអ្នកវិភាគនយោបាយនិយាយថា ប្រធានាធិបតីរុស្ស៊ី Vladimir Putin បានស្អប់៕
