ភ្ជាប់​ទៅ​គេហទំព័រ​ទាក់ទង

អ្នក​វិភាគ៖ ការ​សម្របសម្រួល​លើ​បញ្ហា​យុត្តិធម៌​និង​កំណែទម្រង់​អាច​បញ្ចប់​ភាព​ជាប់​គាំង​នយោបាយ

  • សុខ ខេមរា

ក្រុម​អ្នកវិភាគ​បាន​អះអាង​ថា ​ការ​ចរចា​មិន​បាន​ជោគជ័យ​គឺ​កើត​ឡើង​ដោយសារ​ ការ​មិន​ទុកចិត្ត​គ្នា​ ការ​សង្ស័យ​គ្នា​ និង​ការ​មិន​លះបង់​ដើម្បី​ដាក់​ផល​ប្រយោជន៍​ ជាតិ​ឲ្យ​ធំ​ជាង​ផល​ប្រយោជន៍​គណបក្ស។
គណបក្ស​ប្រជាជន​កម្ពុជា​និង​គណបក្ស​សង្គ្រោះ​ជាតិ​បាន​បង្ហាញ​ឲ្យ​ឃើញ​ពី​ បំណង​ចង់​ជួប​ចរចា​គ្នា​ជា​ថ្មី​មែន​ តែ​គណបក្ស​ទាំង​ពីរ​នៅ​មាន​គម្លាត​ឆ្ងាយ​ពី​គ្នា​ នៅ​ឡើយ​ក្នុង​ការ​ឈាន​ដល់​កិច្ចព្រម​ព្រៀងគ្នា​នោះ។​ ក្រុម​អ្នក​វិភាគ​ខ្លះ​ចង់​ឃើញ​មេដឹកនាំ​គណបក្ស​ទាំង​ពីរ​បន្ទន់​ជំហរ​រៀងខ្លួន​ដើម្បី​ទទួល​យក​ការ​សម្របសម្រួល​លើ​បញ្ហា​យុត្តិធម៌​និង​កំណែ​ទម្រង់​ស្ថាប័ន​ជាតិ​ធំៗ​ដើម្បី​ឈាន​ដល់​កិច្ច​ព្រមព្រៀង​មួយ។

គណបក្ស​ប្រជាជន​កម្ពុជា​និង​គណបក្ស​សង្គ្រោះ​ជាតិ​ព្យាយាម​កេង​យក​ចំណេញ​ ផល​ប្រយោជន៍​នយោបាយ​រៀងៗ​ខ្លួន​ពី​ការ​ចរចា​ស្តី​ពី​ការ​ជាប់គាំង​នយោបាយ​ ចេញ​ពី​វិវាទ​នៃ​ការ​បោះឆ្នោត​សម្រាប់​ពេល​បច្ចុប្បន្ន​និង​សម្រាប់​ពេល​អនាគត។ គម្លាត​ដ៏​ធំ​ដែល​មិន​អាច​មាន​កិច្ច​ព្រម​ព្រៀង​ជាមួយ​គ្នា​គឺ​បញ្ហា​រក​យុត្តិធម៌​ឬ​ការ​មិន​ស៊ើបអង្គេត​ភាព​អំពី​មិន​ប្រក្រតី​នៃ​ការ​បោះឆ្នោត​ ហើយ​នឹង​រឿង​កំណែ​ទម្រង់​ដែល​មាន​ន័យ​ថា​ប្រទេស​កម្ពុជា​ត្រូវ​រួម​គ្នា​កែទម្រង់​ស្ថាប័ន​ជាតិ​សំខាន់ៗ​ឲ្យ​មាន​គុណភាព ​ឯករាជ្យ ​និង​អព្យាក្រឹត។

ក្រុម​អ្នកវិភាគ​បាន​អះអាង​ថា ​ការ​ចរចា​មិន​បាន​ជោគជ័យ​គឺ​កើត​ឡើង​ដោយសារ​ ការ​មិន​ទុកចិត្ត​គ្នា​ ការ​សង្ស័យ​គ្នា​ និង​ការ​មិន​លះបង់​ដើម្បី​ដាក់​ផល​ប្រយោជន៍​ ជាតិ​ឲ្យ​ធំ​ជាង​ផល​ប្រយោជន៍​គណបក្ស។

លោក ​ធន សារ៉ាយ​ នាយក​អង្គការ​សិទ្ធិមនុស្ស​អាដហុក​បាន​អះអាង​ថា៖ «អញ្ចឹង​ការ​រក​ដំណោះ​ស្រាយ​ជាមួយ​គ្នា​នេះ​ប្រហែល​ជា​អាច​ត្រូវការ​ពេលវេលា ​ថែម​ទៀត​ មិន​ដឹង​ថា​ពេលណា​បាន​អាច​ចប់ ​ព្រោះ​ថា​បញ្ហា​នេះ​វា​ជា​ឧបសគ្គ​ ដោយសារ​ថា​ គណបក្ស​ប្រជាជន​កម្ពុជា​ (CPP) ​គេ​មិន​និយាយ​ទេ​អំពី​បញ្ហា​ហ្នឹង​ រឿង​បញ្ហា​យុត្តិធម៌​បោះឆ្នោត​ហ្នឹង​ គេ​មិន​ឲ្យ​មាន​ការ​ជជែក​ពិភាក្សា​ឡើង​វិញ​ទេ។ ហើយ​បញ្ហា​រឿង​កំណែ​ទម្រង់​ឲ្យ​មាន​ការ​ជជែក​គ្នា​ក៏​ប៉ុន្តែ​យន្តការ​នៃ​ការ​អនុម័ត​កំណែ​ទម្រង់​ទាំង​អស់​នោះ​ស្ថិត​នៅ​លើ​ដៃ​គណបក្ស​កាន់​អំណាច​ទាំង​អស់»។

លោក ​ធន សារ៉ាយ ​បាន​អះអាង​ថា ​ដើម្បី​ផល​ប្រយោជន៍​គណបក្ស​ ការ​ទាញ​យក​ប្រជាប្រិយភាព​ឡើង​វិញ ​និង​ការ​រក្សា​អំណាច​ឲ្យ​បាន​នោះ​ ទំនង​ជា​ពិបាក​សម្រាប់​គណបក្ស​ប្រជាជន​ក្នុង​ការ​កែ​ទម្រង់​ស្ថាប័ន​សំខាន់ៗ​មួយ​ចំនួន។

«ដូច​ជា​ឧទារហរណ៍​តុលាការ​ តើ​គាត់​ព្រលែង​ឲ្យ​តុលាការ​ហ្នឹង​ឯករាជ្យ​ទេ? គ.ជ.ប.​ តើ​គាត់​ហ៊ាន​ព្រលែង​ឲ្យ​ឯករាជ្យ​ទេ? ​ដំណើរការ​បោះឆ្នោត​ហ្នឹង​អាច​ឲ្យ​មាន​តម្លាភាព​ខ្លាំងក្លា​ទេ?​ ប្រព័ន្ធ​សារព័ត៌មាន​ តើ​គាត់​ហ៊ាន​បើក​ឲ្យ​ទូលាយ​មាន​សេរីភាព​ពិត​ប្រាកដ​បាន​ទេ? ​មក​ដល់​ពេល​នេះ ​វិទ្យុ ​ទូរទស្សន៍​ទាំងឡាយ​នៅ​ក្នុង​ កណ្តាប់​ដៃ​គណបក្ស​កាន់​អំណាច​ តើ​គាត់​ហ៊ាន​បើក​ឲ្យ​មាន​បញ្ហា​ជជែក​ដេញ​ ដោល​គ្នា​ឲ្យ​បាន​ទូលំទូលាយ​ទេ។​ ហើយ​ការ​មាន​មតិ​យោបល់​នៅ​ក្នុង​សភា​ហ្នឹង​តើ​អាច​យក​មក​ចាក់​ផ្សាយ​នៅ​ក្នុង​វិទ្យុ ​ទូរទស្សន៍​ហ្នឹង​ឲ្យ​បាន​ត្រឹមត្រូវ​ទេ? ​ហើយ​តើ​គណបក្ស​ប្រឆាំង​អាច​មាន​លទ្ធភាព​បង្កើត​ទូរទស្សន៍​ខ្លួនឯង​ ហើយ​អង្គការ​សង្គម​ស៊ីវិល​មាន​ឯករាជ្យ​ហ្នឹង​តើ​អាច​ធ្វើ​បាន​ទេ?​ ទាំង​អស់​នេះ​សុទ្ធតែ​ជា​រឿង​ ដែល​យើង​មាន​ការ​សង្ស័យ​ថា​មិន​អាច​ទៅ​រួច»។

លោក ​អ៊ូ វីរៈ ​នាយក​មជ្ឃមណ្ឌល​សិទ្ធិ​មនុស្ស​កម្ពុជា​បាន​ថ្លែង​ថា​ ប្រជាពលរដ្ឋ​ ទូទៅ​ចង់​ឃើញ​កំណែ​ទម្រង់​ដោយ​មិន​ចង់​ដាក់​ទោស​អ្នក​នេះ​ឬ​ខឹង​សម្បារ​អ្នក​ណា​នោះ​ទេ​ គឺ​ពួក​គេ​ត្រូវ​ការ​កំណែទម្រង់​ដ៏​ពិត។

«ប្រសិន​បើ​មាន​កំណែ​ទម្រង់​ដែល​មិន​ឈាន​ដល់​ការ​បែង​ចែក​គ្នា​ជា​សត្រូវ​នោះ​ រឿង​ហ្នឹង​ វា​អាច​ធ្វើ​ឲ្យ​មាន​ស្ថិរភាព​ផង​ហើយ​វា​មាន​ផល​ប្រយោជន៍​ជាតិ​ទៅ​អនាគត​ផង។​ តែ​នៅ​ពេល​បច្ចុប្បន្ន​នេះ​បញ្ហា​កំណែ​ទម្រង់​ហ្នឹងនៅ​ត្រង់​ថា​គេ​អត់​ជឿ​ការ​សន្យារ​របស់​គណបក្ស​ប្រជាជន​ព្រោះ​គណបក្ស​ប្រជាជន​ធ្លាប់​សន្យា​ច្រើន​ឆ្នាំ​ ច្រើន​ទសវត្សរ៍​មក​ហើយៗ​ អញ្ចឹង​បើ​សិន​ជា​គណបក្ស​ប្រជាជន​ទាមទារ​ការ​ទុកចិត្ត​បាន​ទាល់តែ​គណបក្ស​ប្រជាជន​ចាប់​ផ្តើម​ហ៊ាន​អារ​កាត់​ធ្វើ​ការ​កំណែ​ទម្រង់​សំខាន់ៗ​មួយ​ចំនួន​ដែល​ត្រូវ​តែ​ធ្វើ​នៅ​ពេល​បច្ចុប្បន្ន​នេះ។​ បើ​សិន​ជា​អត់​ទេ​ពិបាក​បន្តិច​ហើយ»។

គណបក្ស​ជំទាស់​របស់​លោក​សម រង្ស៉ី​ និង​លោក ​កឹម សុខា​ បាន​ច្រាន​ចោល​លទ្ធផល​នៃ​ការ​បោះឆ្នោត​ថ្ងៃ​ទី​២៨​ខែកក្កដា​ ហើយ​ទាមទារ​ឲ្យ​មាន​ការ​ស៊ើប​អង្កេត​ដោយ​តម្លាភាព​លើ​ភាព​មិន​ប្រក្រតី​ដែល​ក្រុម​មេដឹក​នាំ​គណបក្ស​ជំទាស់​បាន​អះអាង​ថា ​ភាព​មិន​ប្រក្រតី​នេះ​បាន​ផ្លាស់ប្តូរ​លទ្ធផល​នៃ​ការ​បោះឆ្នោត​ដែល​ពួក​គេ​អះអាង​ថា​គេ​បាន​ឈ្នះ។​ សមាជិក​សភា​៥៥​រូប​របស់​គណបក្ស​ជំទាស់​ធ្វើ​ពហិការ​មិន​ចូលរួម​ស្បថ​ចូល​កាន់​មុខ​តំណែង​ដើម្បី​បំពេញ​ភាព​ស្រប​ច្បាប់​របស់​រដ្ឋាភិបាល​និង​សភា​នៅ​ឡើយ​ទេ ​ដោយសារ​តែ​គណ​បក្ស​ប្រជាជន​កម្ពុជា​មិន​ព្រម​ទទួល​យក​ការ​ស៊ើបអង្កេត​ដោយ​ស្ថាប័ន​ឯករាជ្យ​លើ​លទ្ធផល​បោះឆ្នោត។​តែ​គណបក្ស​ប្រជាជន​កម្ពុជា​ដែល​ឈ្នះ​បាន​៦៨​អាសនៈ​ក្នុង​ចំណោម​១២៣​អាសនៈ​នោះ​ បាន​បង្កើត​រដ្ឋាភិបាល​ម្នាក់​ឯង​ដោយ​មិន​ចាំ​ការ​ចូលរួម​ពី​គណបក្ស​ជំទាស់​ដែល​នៅ​តែ​បន្ត​តវ៉ា​នោះ​ឡើយ។

លោក ​ជាម យៀប ​មន្ត្រី​ជាន់​ខ្ពស់​គណបក្ស​ប្រជាជន​កម្ពុជា​បាន​អះអាង​ថា​ គណបក្ស​ប្រជាជន​នៅ​បើក​ទ្វារ​ចំហ​ តែ​ការ​ចរចា​អំពី​រឿង​សភា​អាច​ធ្វើ​ទៅ​បាន​ ទាល់​តែ​សមាជិក​សភា​គណបក្ស​សង្គ្រោះជាតិ​ស្បថ​ចូល​កាន់​តំណែង​សិន។

«បើ​សិន​ជា​និយាយ​អំពី​រឿង​រដ្ឋសភា​ សមាជិក​សភា​៥៥នាក់​ដែល​ជាប់​ឆ្នោត​ទៅ​ចូល​ធ្វើ​ពិធី​ស្បថ​សច្ចាប្រណិធាន​ដើម្បី​បំពេញ​លក្ខខណ្ឌ​ដែល​មាន​ចែង​នៅ​ ក្នុង​រដ្ឋ​ធម្មនុញ្ញ»។

លោក​ថ្លែង​ថា​ ការ​ចរចា​ត្រូវ​ធ្វើ​ឡើង​ដោយ​ថ្នាក់ដឹកនាំ​កំពូល​នៃ​គណបក្ស។​ មន្ត្រី​ថ្នាក់​ក្រោម​របស់​បក្ស​មិន​អាច​ចរចា​ដោះស្រាយ​បញ្ហា​ជាប់គាំង​នេះ​បាន​ទេ។

ប្រទេស​មួយ​ចំនួន​ទោះជា​ទទួល​ស្គាល់​ការ​បោះឆ្នោត​ក្តី​ក៏​នៅ​តែ​ជំរុញ​ឲ្យ​មេដឹកនាំ​គណបក្ស​ទាំង​ពីរ​ដោះស្រាយ​បញ្ហា​ភាព​មិន​ប្រក្រតី​ដោយ​សន្តិវិធី​និង​យុត្តិធម៌។​ គណបក្ស​ទាំង​ពីរ​គ្រោង​នឹងជួប​គ្នា​ជា​ថ្មី​ទៀត​ក្រោយ​ពេល​ដែល​ខកខាន​មិន​អាច​ឈាន​ដល់​កិច្ចព្រម​ព្រៀង​ពីរ​លើក​ចាប់​តាំង​ក្រោយ​ការ​ប្រកាស​លទ្ធផល​នៃ​ការ​បោះឆ្នោត​មក។

លោក ​អ៊ូ វីរៈ​បាន​អះអាង​ថា ​គណបក្ស​ប្រជាជន​និង​គណបក្ស​សង្គ្រោះ​ជាតិ​ត្រូវ​តែ​ បន្ត​ជួប​គ្នា​ទោះ​ជា​មិន​ទាន់​ត្រូវ​គ្នា​ក៏ដោយ។​ លោក​ថា​ នេះ​ជា​ជំហ៊ាន​ដ៏​ល្អ​បំផុត​ ហើយ​ថា​ បើ​គណបក្ស​ជំទាស់​មិន​មាន​លក្ខខណ្ឌ​ច្រើន ​ហើយ​គណបក្ស​ប្រជាជន​ដូច​ជា​បន្ទន់​ឥរិយាបទ​ដែរ​នោះ​ អាច​នឹង​មាន​ការ​ជួប​គ្នា​និង​ព្រមព្រៀង​គ្នា។

«តែ​សំណួរ​សួរ​ថា​ តើ​ការ​ជួបគ្នា​ហ្នឹង​នឹង​ឈាន​ទៅ​ដល់​ការ​យល់​ព្រម​មួយ​ដែល​វា​ ច្បាស់​លាស់​ ហើយ​ការ​យល់​ព្រម​ហ្នឹង​ឈាន​ទៅ​ដល់​អ្វី​ជា​ដុំ​កំភួន​ឬ​អត់។ រឿង​ហ្នឹង​ជា​ការ​ព្រួយ​បារម្ភ​របស់​ខ្ញុំមួយ។​ រឿង​ជួប​និង​ការ​យល់​ព្រម​ប្រហែល​ជា​កើត​មាន​ តែ​ខ្លឹមសារ​នៃ​ការ​ព្រមព្រៀង​នោះ ​វាច្រើន​តែ​ជា​លក្ខណៈ​ស្មារតី​ ទូលំទូលាយ​ មិន​មាន​អី​លម្អិត។ ​អញ្ចឹង​បាន​ន័យ​ថា​ ព្រមព្រៀង​ហ្នឹង​ទោះបី​ជា​ព្រមព្រៀង​ក៏​មិនលម្អិត។​ ហើយ​បើ​មិនលម្អិត​ នៅ​ពេល​ជជែក​គ្នាលម្អិត​អាច​ធ្វើ​ឲ្យ​ មាន​ការ​ខុស​ផ្ទុយ​គ្នា​ទៀត។​ បើ​ផ្ទុយគ្នា​ទៀត​បាន​ន័យ​ថា​ ឈប់​ព្រមព្រៀង​គ្នា​វិញ​ ហើយ​បើ​ឈប់​ព្រមព្រៀង​គ្នា​វិញ​ វា​អាច​ឈាន​ទៅ​ដល់​ការ​មិន​ចុះ​សំរុង​គ្នា​ដដែល​ ហើយ​អាច​ត្រឡប់​មក​ដូច​ដើម​ដដែល»។

ចំណែក​លោក​ ធន សារ៉ាយ​ វិញ​បាន​បញ្ជាក់​ថា​ គណបក្ស​សង្គ្រោះ​ជាតិ​ហាក់​ដូច​ជា​សុខចិត្ត​បន្ទន់​ឥរិយាបទ​ ហើយ​គណបក្ស​ប្រជាជន​កម្ពុជា​គួរ​ត្រូវ​គិត​អំពី​រឿង​នេះ​ដែរ​រវាង​យុត្តិធម៌​នឹង​បញ្ហា​កែទម្រង់។

«បើ​សិន​មិន​ដោះស្រាយ​បញ្ហា​យុត្តិធម៌​ទេ​ គួរ​ឲ្យមាន​គម្រោង​ផែនការ​ជាក់លាក់​ មួយ​ឲ្យ​មាន​តួនាទី​របស់​គណបក្ស​ប្រឆាំង​នៅ​ក្នុង​សភា​ហ្នឹង​ឲ្យ​បាន​ច្បាស់លាស់​ ទៅ​ដើម្បី​ឲ្យ​មាន​ប្រព័ន្ធ​តុល្យភាព​អំណាច​ហ្នឹង​ ដើម្បី​ឲ្យ​គណបក្ស​ប្រឆាំង​ហ្នឹង​ លោក​មាន​លទ្ធភាព​ក្នុង​ការ​ជួយ​ត្រួត​ពិនិត្យ​នូវ​ការ​ធ្វើ​កំណែ​ទម្រង់​ដូច​ជា​ការ​ សម្រេច​ចិត្ត​នៃ​ការ​គ្រប់គ្រង​ទាំងឡាយ​ដែល​សម្រេច​ឡើង​ដោយ​រដ្ឋាភិបាល​ក្នុង​ ការ​គ្រប់គ្រង​រដ្ឋ​ឬ​ដឹកនាំ​ប្រទេស។​ នេះ​ហើយ​ជា​ចំណុច​សំខាន់​ដែល​ជា​និន្នាការ​ថ្មី​ ដែល​ជំរុញ​ឲ្យ​ឈាន​ទៅ​រក​ការ​ស្រុះស្រួល​គ្នា​មួយ»។

លោក​ ធន សារាយ​ បាន​អះអាង​ទៀត​ថា ​គណបក្ស​ទាំង​ពីរ​ត្រូវ​បង្ហាញ​ភាព​ស្មោះត្រង់​ចំពោះ​គ្នា​ទៅ​វិញ​ទៅ​មក។ ​ដោយ​ឡែក​គណបក្សកាន់​អំណាច​ត្រូវ​បង្ហាញ​ឆន្ទៈ​ពិត​ប្រាកដ​ក្នុង​ការ​ដោះ​ស្រាយ​បញ្ហា ​និង​កែ​ទម្រង់​ពិត​ប្រាកដ​គឺ​មិន​មែន​ដើម្បី​ឲ្យ​ខ្លួន​ឯង​អាច​នៅ​កាន់​អំណាច​ជា​រៀង​រហូត​នោះ​ទេ​ តែ​ដើម្បី​ការ​កែទម្រង់​ ការ​គ្រប់គ្រង​ប្រទេស​ឲ្យ​កាន់​តែ​ល្អ។​ លោក ​ធន សារាយ​បាន​អះអាង​ថា​ គណបក្ស​មួយ​ បុគ្គល​មួយ​ក្រុម​ មិន​អាច​ធ្វើ​ឲ្យ​មាន​លំនឹង​ដល់​ប្រទេស​បាន​ទេ​ ហើយ​ពលរដ្ឋ​កម្ពុជា​ក៏​មិន​ត្រូវការ​ការ​គ្រប់គ្រង​របៀប​នេះ​ដែរ។

«ប្រទេស​កម្ពុជា​មិន​មែន​ត្រូវការ​ស្ថិរភាព​មួយ​ដែល​រណប​តែ​បុគ្គល ​ហើយ​បុគ្គល​មិន​មែន​ជា​អមតៈ​ទេ។​ អញ្ចឹង​យើង​មិន​អាច​មាន​ស្ថិរភាព​ជាប់លាប់​បាន​ទេ​ប្រសិន​បើ​យើង​រណប​ទៅ​បុគ្គល​និង​ក្រុម​បុគ្គល។​ នេះ​ហើយ​ជា​ចំណុច​សំខាន់​ដែល​ យើង​ត្រូវ​ពិចារណា​ទាំង​អស់​គ្នា​ថា​ តើ​យើង​គួរ​កសាង​ប្រទេស​យើង​ឲ្យ​ខ្លាំងក្លា​ចាប់​ពី​ឥឡូវ​នេះ​ទៅ​ឬ​មួយ​ក៏​យ៉ាង​ណា? ​យើង​នៅ​តែ​ទុក​ឲ្យ​ស្ថាប័ន​ជាតិ​ហ្នឹង​នៅ​តែ​រណប​បុគ្គល ​នៅ​តែ​រយីក​រយៀក​ មិន​ឯករាជ្យ​តទៅ​ទៀត​ឬ​មួយ​ក៏​យ៉ាង​ម៉េច។ ​នេះ​ហើយ​ ដែល​ជា​បញ្ហា​សំខាន់។ ខ្ញុំ​ថា​គួរ​តែ​អ្នក​នយោបាយ​នាំ​គ្នា​ផ្តោត​យក​ចិត្ត​ទុក​ដាក់​ទៅ​លើ​ឧត្តមប្រយោជន៍​ជាតិ​ជា​ធំ»។

គណបក្ស​ជំទាស់​បាន​ធ្វើ​បាតុកម្ម​ដាក់​ញត្តិ​ទាមទារ​ដល់​មេដឹកនាំ​ពិភពលោក​រួម ទាំង​លោក​ប្រធានាធិបតីយ​សហរដ្ឋ​អាមេរិក ​ប៉ារ៉ាក់ អូបាម៉ា ​និង​បណ្តា​ប្រទេស​ហត្ថលេខី​នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស​ទាំង​១៨​ដើម្បី​ជួយ​ដោះស្រាយ​បញ្ហា​ជាប់​គាំង​នយោបាយ​ខ្មែរ​ក្រោយ​ការ​បោះឆ្នោត​ ហើយ​ក៏​បាន​អំពាវនាវ​ដល់​សហគមន៍​អន្តរជាតិ​ឲ្យ​ដាក់​សម្ពាធ​ទាំង​នយោបាយ​និង​សេដ្ឋកិច្ច​និង​កុំ​ឲ្យ​ទទួល​ស្គាល់​រដ្ឋាភិបាល​ថ្មី​និង​ធ្វើ​កិច្ចការ​ជាមួយ​នឹង​រដ្ឋាភិបាល​ថ្មី​ដែល​គណបក្ស​ជំទាស់​ចាត់ទុក​ថា​ជា​រដ្ឋាភិបាល​មិន​ស្រប​ច្បាប់៕

អត្ថបទ​ទាក់ទង

XS
SM
MD
LG