ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណបក្ស​របស់​លោក Imran Khan ដែល​ទើប​ឈ្នះ​ការ​បោះ​ឆ្នោត​នៅ​ប៉ាគីស្ថាន​ប្រឈម​នឹង​ការ​ចោទ​ប្រកាន់​ថា​មាន​ការ​លួច​បន្លំ


បុរស​ប៉ាគីស្ថាន​ម្នាក់​ថត​រូប​ជាមួយ​នឹង​លោក Imran Khan (រូប​កណ្តាល) នៅ​ពេល​លោក​ចាកចេញ​ពី​កិច្ចប្រជុំ​បក្ស​នៅ​ក្នុង​ក្រុង​អ៊ីស្លាម៉ាបាដ ប្រទេស​ប៉ាគីស្ថាន កាលពី​ថ្ងៃទី៦ ខែសីហា ឆ្នាំ២០១៨។

គណបក្ស​នយោបាយ​នានា​បាន​ចោទ​ប្រកាន់​គណៈកម្មការ​រៀបចំ​ការ​បោះ​ឆ្នោត​របស់​ប្រទេស​ប៉ាគីស្ថាន​ថា​បាន​សហការ​ជាមួយ​នឹង​យោធា​ដ៏​មាន​ឥទ្ធិពល​ដើម្បី​ជួយ​ឲ្យ​គណបក្ស PTI របស់​លោក Imran Khan ឈ្នះ​ការ​បោះ​ឆ្នោត។

មេដឹកនាំ​នៃ​គណបក្ស​នយោបាយ​ធំៗ​ ជា​ច្រើន​របស់​ប្រទេស​ប៉ាគីស្ថាន បាន​ប្រមូល​ផ្ដុំ​គ្នា​នៅ​ក្នុង​រដ្ឋធានី​អ៊ីស្លាម៉ាបាដ​កាល​ពី​ថ្ងៃ​ទី ២ ខែ​សីហា ដើម្បី​បញ្ជាក់​ថា​ការ​បោះ​ឆ្នោត​កាល​ពី​ខែ​កក្កដា​កន្លង​ទៅ​នេះ​មាន​ការ​លួច​បន្លំ។

អ្នកស្រី Sherry Rehman នៃ​គណបក្ស​ប្រជាជន​ប៉ាគីស្ថាន បាន​និយាយ​ថា៖ «យើង​សូម​បដិសេធ​លទ្ធផល​នៃ​ការ​បោះ​ឆ្នោត​នេះ ក៏ដូចជា​ជំទាស់​ទៅ​នឹង​គណៈកម្មការ​រៀបចំ​ការ​បោះឆ្នោត​ផង​ដែរ។ យើង​នឹង​បន្ត​ធ្វើ​ការ​តវ៉ា​ចំពោះ​លទ្ធផល​នៃ​ការ​បោះ​ឆ្នោត​នេះ​ទាំង​នៅ​ក្នុង​និង​ក្រៅ​រដ្ឋសភា»។

គណបក្ស​នយោបាយ​នានា​បាន​បញ្ជាក់​ថា ពួកគេ​នឹង​ដាក់​បេក្ខជន​ផ្ទាល់​របស់​ពួកគេ​សម្រាប់​បេក្ខភាព​ជា​នាយក​រដ្ឋមន្ត្រី​ដើម្បី​ប្រជែង​ជាមួយ​នឹង​លោក Imran Khan មក​ពី​គណបក្ស PTI ដែល​បាន​ឈ្នះ​ការ​បោះ​ឆ្នោត​កាល​ពី​ខែ​កក្កដា​កន្លង​មក​នេះ។

គណបក្ស​ទាំង​នេះ​បាន​ចោទ​ប្រកាន់​គណៈកម្មការ​រៀបចំ​ការ​បោះ​ឆ្នោត​របស់​ប្រទេស​ប៉ាគីស្ថាន​ថា​បាន​ធ្វើការ​ជាមួយ​នឹង​យោធា​ដ៏​មាន​ឥទ្ធិពល​ដើម្បី​ជួយ​ឲ្យ​គណបក្ស PTI របស់​លោក Imran Khan ឈ្នះ​ការ​បោះ​ឆ្នោត។ មន្ត្រី​យោធា​ប្រហែល ៣ សែន ៧ ម៉ឺន​នាក់ ត្រូវ​បាន​ចាត់​តាំង​ដើម្បី​ផ្ដល់​ការ​ការពារ​ក្នុង​អំឡុង​ពេល​បោះ​ឆ្នោត។

បេក្ខជន​ជា​ច្រើន​បាន​ត្អូញត្អែរ​ថា មន្ត្រី​យោធា​បាន​រំលោភ​លើ​អំណាច​តួនាទី​របស់​ខ្លួន និង​បាន​ជ្រៀតជ្រែក​ដោយ​ខុស​ច្បាប់​នៅ​ក្នុង​ដំណើរការ​រាប់​សន្លឹក​ឆ្នោត។ បេក្ខជន​ខ្លះ​បាន​ចាប់ផ្ដើម​រិះគន់​អំពី​រឿង​នេះ​នៅ​លើ​បណ្ដាញ​សង្គម Twitter បន្ទាប់ពី​ករណី​នេះ​បាន​កើត​ឡើង​ភ្លាមៗ។

លោក Jibran Nasir ដែល​ជា​សកម្មជន​សិទ្ធិ​មនុស្ស និង​ជា​បេក្ខជន​ឯករាជ្យ​មួយ​រូប បាន​និយាយ​ថា៖

«មន្ត្រី​សង្កេតការណ៍​បោះ​ឆ្នោត​នៅ​តាម​ការិយាល័យ​បោះ​ឆ្នោត​ជា​ច្រើន​ត្រូវ​បាន​គេ​ដេញ​ចេញ ហើយ​នៅ​តាម​មណ្ឌល​បោះ​ឆ្នោត​ជា​ច្រើន​ទៀត មន្ត្រី​យោធា​បាន​រំលោភ​លើ​តួនាទី​របស់​មន្ត្រី​ស៊ីវិល និង​បាន​ធ្វើ​ជា​អាជ្ញាធរ​អនុវត្ត​ច្បាប់។ ពួកគេ​មិន​បាន​ធ្វើ​តាម​ច្បាប់​របស់​គណៈកម្មការ​រៀបចំ​ការ​បោះ​ឆ្នោត​នោះ​ទេ»។

គណៈកម្មការ​រៀបចំ​ការ​បោះ​ឆ្នោត​បាន​ឲ្យ​ដឹង​ថា ការ​បោះ​ឆ្នោត​នេះ​មាន​លក្ខណៈ​សេរី និង​យុត្តិធម៌។ គណៈកម្មការ​នេះ​បាន​បន្ថែម​ថា ខ្លួន​បាន​ប្រើ​សិទ្ធិ​អំណាច​របស់​ខ្លួន​ដើម្បី​ព្យាយាម​ធ្វើ​យ៉ាង​ណា​ឲ្យ​មាន​ការ​ប្រកួត​ប្រជែង​ដោយ​ស្មើ​ភាព​សម្រាប់​គ្រប់​គណបក្ស​ទាំង​អស់។

លោក Babar Yaqoub ប្រធាន​គណៈកម្មការ​រៀបចំ​ការ​បោះ​ឆ្នោត​របស់​ប្រទេស​ប៉ាគីស្ថាន​បាន​និយាយ​ថា៖ «យើង​មិន​បាន​ទទួល​ពាក្យ​បណ្ដឹង​ជាក់​ច្បាស់​ណា​មួយ​ដែល​ចោទ​ប្រកាន់​ថា​មាន​ការ​លួច​បន្លំ​នៅ​ក្នុង​ការ​បោះ​ឆ្នោត​នោះ​ទេ។ បេក្ខជន​ណា​ដែល​សង្ស័យ​ថា​មាន​ការ​លួច​បន្លំ គួរតែ​ធ្វើ​តាម​នីតិ​វិធី​នានា​ដើម្បី​ទទួល​បាន​ដំណោះស្រាយ​អំពី​បញ្ហា​នេះ»។

លោក Imran Khan បាន​និយាយ​ថា លោក​នឹង​គាំទ្រ​កិច្ច​ប្រឹងប្រែង​នានា​ដែល​ជំរុញ​ឲ្យ​មាន​ការ​រាប់​សន្លឹក​ឆ្នោត​ឡើង​វិញ​នៅ​តាម​មណ្ឌល​បោះ​ឆ្នោត​ណា​ដែល​សង្ស័យ​ថា​មាន​ការ​លួច​បន្លំ​កើត​ឡើង៕

ប្រែ​សម្រួល​ដោយ ហេង រស្មី

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG