ក្រសួងកសិកម្ម រុក្ខាប្រមាញ់ និងនេសាទបានចេញលិខិតប្រតិកម្មមួយទៅនឹងអត្ថបទដែលចេញផ្សាយជាភាសាអង់គ្លេសរបស់សារព័ត៌មានខេមបូចា ដោយប្រាប់ឱ្យសារព័ត៌មាននេះគោរពតាមក្រមសីលធម៌វិជ្ជាជីវៈ ខណៈព្រមានថានឹងមានវិធានការផ្លូវច្បាប់ដូចសារព័ត៌មានវីអូឌី ដែលត្រូវបានដកអាជ្ញាបណ្ណកាលពីដើមឆ្នាំ២០២៣។
ប្រតិកម្មរបស់ក្រសួងកសិកម្ម ដែលដឹកនាំដោយលោករដ្ឋមន្រ្តី ឌិត ទីណា កើតឡើងក្រោយសារព័ត៌មានខេមបូចា កាលពីថ្ងៃទី១៤ ខែកញ្ញា បានចុះផ្សាយអត្ថបទមួយ និយាយអំពីការវាយដំសកម្មជនម្នាក់ឈ្មោះ នី ណាក់ ដែលតែងតែរិះគន់វិស័យកសិកម្ម និងមន្រ្តីក្រសួងកសិកម្ម រួមទាំងរដ្ឋមន្រ្តីផងដែរ។
លិខិតដែលផ្ញើទៅកាន់សារព័ត៌មានខេមបូចា និងផ្សព្វផ្សាយជាសាធារណៈកាលពីថ្ងៃចន្ទ ក្រសួងកសិកម្មបានកត់សម្គាល់ទៅលើអត្ថបទព័ត៌មានរបស់សារព័ត៌មានខេមបូចាដែលមានចំណងជើង«គ្រួសារអ្នករិះគន់រដ្ឋាភិបាលត្រូវបានវាយដំដោយហិង្សា ហើយស្វែងរកយុត្តិធម៌»។ លិខិតនេះលើកឡើងថា មានការចោទប្រកាន់មិនច្បាស់លាស់ ដោយពុំមានអំណះអំណាងត្រឹមត្រូវ និងមានលក្ខណៈចោទប្រកាន់ទៅលើរដ្ឋមន្រ្តីក្រសួងកសិកម្ម។
លិខិតរបស់ក្រសួងកសិកម្មបញ្ជាក់ថា អត្ថបទមួយនេះបញ្ចូលឈ្មោះរដ្ឋមន្ត្រីដោយផ្ទាល់នៅក្នុងសាច់រឿង ទោះបីជាឈ្មោះរដ្ឋមន្រ្តីមិនដែលត្រូវបានលើកឡើងក្នុងការបង្ហោះក្នុងហ្វេសប៊ុកណាមួយរបស់លោក នី ណាក់ នាពេលថ្មីៗនេះក៏ដោយ។
នៅក្នុងលិខិតរបស់ក្រសួងកសិកម្មដដែលនោះ ក្រសួងកសិកម្មក៏បានជំរុញឱ្យសារព័ត៌មានខេមបូចាកែសម្រួលដោយត្រូវគោរពតាមក្រមសីលធម៌វិជ្ជាជីវៈ ក៏ដូចជាតម្រូវឱ្យលុបឈ្មោះរដ្ឋមន្រ្តីក្រសួងកសិកម្មចេញពីអត្ថបទផងដែរ។ ក្រសួងកសិកម្មក៏បានព្រមានចំណាត់វិធានការផ្លូវច្បាប់ទៅលើសារព័ត៌មានខេមបូចា ដែលអាចនឹងមានរូបភាព ឬលទ្ធផលដែលកើតមានឡើងដូចទៅនឹងសារព័ត៌មានវីអូឌី (VOD) ដែលត្រូវបានក្រសួងព័ត៌មានដកអាជ្ញាបណ្ណកាលពីខែកុម្ភៈ ក្រោយមានប្រតិកម្មពីលោក ហ៊ុន ម៉ាណែត និងលោក ហ៊ុន សែន។
ក្រសួងកសិកម្មក៏បានប្រតិកម្មថា ឈ្មោះរបស់អ្នកសារព័ត៌មានជាជនបរទេសលោក Jack Brook មិនត្រូវបានបញ្ចូលទៅក្នុងអត្ថបទនោះទេ បើទោះអ្នកសារព័ត៌មានរូបនោះជាអ្នកដែលបានទាក់ទងសុំការអត្ថាធិប្បាយពីអ្នកនាំពាក្យក្រសួងកសិកម្មក៏ដោយ។
អ្នកនាំពាក្យក្រសួងកសិកម្ម កញ្ញា អ៊ឹម រចនា ប្រាប់វីអូអេថា ក្រសួងកសិកម្មនឹងរង់ចាំមើលថា តើសារព័ត៌មានខេមបូចានឹងមានការពិចារណាបែបណាចំពោះសំណើផ្សេងៗដែលក្រសួងកសិកម្មបានលើកឡើង។
កញ្ញាថ្លែងថា៖ «យើងនឹងរង់ចាំមើលពីខាងខេមបូចាមកវិញ ថាតើបន្ទាប់ពីបានទទួលលិខិតពីក្រសួងហើយ ខាងខេមបូចានឹងធ្វើការវិចារណាបែបណាដែរ ហើយនឹងសម្រេចចិត្តយ៉ាងណានៅរាល់សំណើដែលក្រសួងលើកឡើង»។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជាហៅកាត់ថា ខេមបូចា លោក ណុប វី លើកឡើងថា សារព័ត៌មានខេមបូចាបានកែតម្រូវកំហុសឆ្គងបច្ចេកទេសក្នុងអត្ថបទនោះ ដោយមានការកែសម្រួលឈ្មោះប្រភព និងអ្នកចូលរួមសរសេរនៅក្នុងអត្ថបទនោះតាំងពីល្ងាចថ្ងៃចន្ទ។
លោកបន្តថា ខេមបូចាបានសម្រេចដកឈ្មោះរបស់រដ្ឋមន្រ្តីក្រសួងកសិកម្មចេញពីក្នុងអត្ថបទ ក្រោយបានពិនិត្យមើលឡើងវិញនូវការបង្ហោះរបស់លោក នី ណាក់ នៅក្នុងបណ្តាញសង្គមរបស់លោក។
លោកថ្លែងថា៖ «យើងបានសម្រេចដកឈ្មោះចេញ ហើយចំពោះហេតុផលដែលយើងសម្រេចដកឈ្មោះចេញគឺដោយសារយើងពិនិត្យមើលឃើញថា នៅក្នុងអ្វីដែលជាការComment [ការបញ្ចេញមតិ] ហេ្វសប៊ុករបស់លោក នី ណាក់ គឺមិនបានបញ្ជាក់ឱ្យចំឈ្មោះរបស់ឯកឧត្តមរដ្ឋមន្រ្តីក្រសួងកសិកម្មទេ គ្រាន់តែបានបង្ហាញនូវរូបភាពនៅក្នុងការបង្ហោះនៅក្នុងហ្វេសប៊ុករបស់គាត់»។
គួរបញ្ជាក់ថា ក្រោយឡើងជារដ្ឋមន្រ្តីក្រសួងកសិកម្ម លោក ឌិត ទីណា ក៏ធ្លាប់បានប្រតិកម្មទៅនឹងអត្ថបទរបស់សារព័ត៌មានវីអូឌីផងដែរថា កង្វះវិជ្ជាជីវៈ ក្រមសីលធម៌ និងមាននិន្នាការនយោបាយទាក់ទងនឹងការចុះផ្សាយអំពីវិស័យកសិកម្ម៕
