មន្ត្រីជាន់ខ្ពស់ក្រសួងមហាផ្ទៃបានឱ្យដឹងថា ការសន្និដ្ឋានបឋមរបស់សមត្ថកិច្ចជំនាញលើការវាយដំសកម្មជន លោក នី ណាក់ គឺជាហិង្សាមានស្ថានទម្ងន់ទោស ដោយចេតនាចង់យកទ្រព្យសម្បត្តិ ខណៈអាជ្ញាធរពាក់ព័ន្ធកំពុងស្វះស្វែងតាមចាប់ក្រុមជនដៃដល់។ គិតត្រឹមព្រឹកថ្ងៃសុក្រ ប៉ូលិសមិនទាន់ឃាត់បានជនសង្ស័យនៅឡើយទេ។
លោក ទូច សុឃៈ អ្នកនាំពាក្យក្រសួងមហាផ្ទៃ ប្រាប់វីអូអេនៅថ្ងៃសុក្រនេះថា ការវាយដំលើលោក នី ណាក់ តាមដងផ្លូវដោយក្រុមមិនស្គាល់អត្តសញ្ញាណ គឺសមត្ថកិច្ចជំនាញបានសន្និដ្ឋានបឋមថា ជាហិង្សាមានស្ថានទម្ងន់ទោស ក្នុងចេតនាចង់យកទ្រព្យសម្បត្តិ ព្រោះជនបង្កមានគ្នាច្រើនឬជាក្រុម និងមានឧបករណ៍គ្រោះថ្នាក់ក្នុងការប្រព្រឹត្តបទល្មើស។
លោកថ្លែងថា៖ «ចាំមើលនៅពេលដែលយើងក្រសោបបាននៅពេលខាងមុខនោះ ថាតើពួកគាត់នឹងឆ្លើយបែបណា អំពីបំណងពិតប្រាកដរបស់គាត់ទើបយើងអាចនិយាយបានតាមផ្លូវច្បាប់ថា វាជាករណីស្អី និងចេតនាទុច្ចរិតបែបណាឱ្យពិតប្រាកដ។ គ្រាន់តែថាជាបឋមនេះ គឺយើងមើលទៅលើកត្តាសត្យានុម័តិ បានន័យថា មើលអំពើប្រព្រឹត្តជាក់ស្តែង គឺជាការប្រើអំពើហិង្សាដោយមានស្ថានទម្ងន់ទោស ហើយក្នុងនោះ អាចមានចេតនាមួយចង់យកទ្រព្យសម្បត្តិ សម្ភាររបស់ជនរងគ្រោះអាចថាម៉ូតូ អីជាដើម»។
បើតាមលោក ទូច សុឃៈ ក្រោយកើតហេតុកាលពីថ្ងៃអង្គារ ភ្លាមៗនោះ អង្គភាពអគ្គស្នងការដ្នាននគរបាលជាតិ ស្នងការដ្ឋានរាជធានីភ្នំពេញ និងអធិការដ្ឋានខណ្ឌច្បារអំពៅ រួមទាំងកម្លាំងប៉ុស្តិ៍នៅកន្លែងកើតហេតុ បានធ្វើការងារយ៉ាងយកចិត្តទុកដាក់ ដោយចុះប្រមូលព័ត៌មានជុំវិញកន្លែងកើតហេតុ ពិនិត្យរាល់វត្ថុតាងនានា រួមទាំងមធ្យោបាយផ្សេងៗ ដែលអាចគ្រប់គ្រងមុខសញ្ញាបាន ដូចជាកាមេរ៉ាសុវត្ថិភាពតាមដងផ្លូវ។ លោកបន្តថា មកដល់ថ្ងៃសុក្រនេះ សមត្ថកិច្ចពាក់ព័ន្ធកំពុងស្វះស្វែងតាមរកជនបង្កទាំងនោះ។
លោកបញ្ជាក់ថា៖ «មកដល់ពេលនេះ គឺសមត្ថកិច្ចជំនាញនៅបន្តធ្វើការស្រាវជ្រាវយោងតាមជំនាញ ហើយនឹងក្រមនីតិវិធីព្រហ្មទណ្ឌ ពីព្រោះការស្រាវជ្រាវលើករណីមួយៗ ជាពិសេសករណីព្រហ្មទណ្ឌគឺយើងត្រូវការពេលវេលា ពីព្រោះរឿងខ្លះ វាមានលក្ខណៈស្មុគស្មាញ ដោយក្រុមជនបង្ក មានឧបាយកលទុច្ចរិត និងមានផែនការទុកជាមុន ដែលនាំឱ្យយើងក៏មានការលំបាកនៅក្នុងការស្វែងរកមុខសញ្ញាដែរ»។
លោក នី ណាក់ សកម្មជនសង្គមមួយរូប ដែលធ្លាប់ជាប់ពន្ធនាគារ និងតែងតែរិះគន់អំពីភាពអវិជ្ជមានសង្គម ត្រូវបានជនមិនស្គាល់អត្តសញ្ញាណមួយក្រុមវាយដំលើរាងកាយ និងក្បាលយ៉ាងដំណំ កាលពីរសៀលថ្ងៃអង្គារ នៅពេលលោក និងភរិយាធ្វើដំណើរតាមដងផ្លូវ នៅជិតវត្តព្រែកប្រា ខណ្ឌច្បារអំពៅ រាជធានីភ្នំពេញ។
ភរិយារបស់ លោក នី ណាក់ ធ្លាប់ប្រាប់វីអូអេថា មនុស្សមួយក្រុមបានជិះម៉ូតូមកធាក់ម៉ូតូរបស់អ្នកស្រី និងស្វាមីពីក្រោយ កាលពីម៉ោងប្រមាណ ១រសៀលថ្ងៃទី ១២ ខែកញ្ញា រួចពួកគេរត់មកវាយ លោក នី ណាក់ ដោយសំដៅត្រង់ក្បាល ហើយប្រើដំបងដែក បើទោះបីជាស្វាមីអ្នកស្រីព្យាយាមរត់ចូលទៅកន្លែងលក់និងទិញអេតចាយក៏ដោយ។
រហូតមកដល់ថ្ងៃសុក្រនេះ ក្រុមគ្រួសាររបស់លោក នី ណាក់ មិនទាន់ទទួលបានតម្រុយអ្វីពីសមត្ថកិច្ចនៅឡើយទេ ពាក់ព័ន្ធនឹងការស៊ើបអង្កេតលើករណីនេះ។ នេះបើតាមអ្នកស្រី សុខ ស៊ីណែត ដែលជាភរិយារបស់ លោក នី ណាក់។
អ្នកស្រី សុខ ស៊ីណែត ប្រាប់វីអូអេថា នេះមិនមែនជាករណីប្លន់យកទ្រព្យសម្បត្តិអ្វីនោះទេ តែវាជាករណីវាយសម្លាប់តែម្តង ព្រោះអ្នកស្រី និងស្វាមីមិនបានបាត់បង់របស់របរអ្វីនោះទេ សូម្បីតែលុយកាក់ ទូរសព្ទ និងម៉ូតូដែលធ្វើដំណើរនោះ។
អ្នកស្រីប្រាប់វីអូអេថា៖ «សម្រាប់បង គឺមើលឃើញសកម្មភាពផ្ទាល់ គឺពួកគេប៉ុនប៉ងសម្លាប់ប្តីបង ធ្វើមនុស្សឃាត។ បងនិងស្វាមីអត់មានបាត់អ្វីទាំងអស់ ទ្រព្យសម្បត្តិដូចជា មានលុយកាកមួយចំនួននៅក្នុងកាបូប ទូរសព្ទ ហើយនិងម៉ូតូ គឺនៅទាំងអស់ និយាយទៅទ្រព្យសម្បត្តិ ដែលមានក្នុងខ្លួន គឺអត់មានបាត់បង់ទេ។
អ្នកស្រីជំរុញឱ្យអាជ្ញាធរចាប់ជនដៃដល់ឱ្យខាងតែបាន ព្រោះទាំងទីតាំងកើតហេតុ និងតាមដងផ្លូវសុទ្ធតែមានកាមេរ៉ាសុវត្ថិភាព ។
នៅថ្ងៃសុក្រនេះ លោក នី ណាក់ មិនទាន់បានចេញពីគ្លីនិកព្យាបាលត្រឡប់ទៅផ្ទះវិញទេ ព្រោះស្ថានភាពរបស់លោកទើបតែធូរបន្តិចតែប៉ុណ្ណោះ។ នេះបើតាមភរិយា។
លោក យី សុខសាន្ត មន្ត្រីស៊ើបអង្កេតជាន់ខ្ពស់របស់សមាគមការពារសិទ្ធិមនុស្សអាដហុក ដែលបានតាមដានជុំវិញករណីហិង្សានេះ ថ្លែងថា នៅពេលអាជ្ញាធរមិនរកឃើញ និងចាប់ជនបង្កមកផ្តន្ទាទោសតាមច្បាប់ទេ នោះនឹងធ្វើឱ្យនិទណ្ឌភាពកាន់តែច្រើនក្នុងប្រទេសកម្ពុជា។
លោកថ្លែងថា៖ «ជាការកត់សម្គាល់ ដែលការប្រើហិង្សាកន្លងមក ពីក្រុមជនស៊ីវិល មកលើមនុស្សណាដែលរិះគន់ ក៏ដូចជាសកម្មជនរបស់គណបក្សនយោបាយ ដែលមាននិន្នាការប្រឆាំង គឺហាក់ដូចជារដ្ឋាភិបាល ក៏ដូចជាសមត្ថកិច្ច អត់សូវអើពើក្នុងការស្រាវជ្រាវ វែកមុខរកឃាតកទេ។ អ៊ីចឹងហើយដែលធ្វើឱ្យនិទណ្ឌភាព ចេះតែកើតច្រើនឡើងៗ ដែលធ្វើឱ្យភាពអនាធិបតេយ្យ នៃការបង្កហិង្សាមកលើអ្នកដែលស្លូតត្រង់ មកលើអ្នកដែលមាននិន្នាការប្រឆាំង មិនត្រូវបានយកចិត្តទុកដាក់ពីសមត្ថកិច្ច»។
លោក យី សុខសាន្ត កត់សម្គាល់ថា នៅក្នុងករណីហិង្សាលើសកម្មជនសង្គម និងនយោបាយបែបនេះ អាជ្ញាធរកម្ររកឃើញជនប្រព្រឹត្ត៕
