ភ្ជាប់​ទៅ​គេហទំព័រ​ទាក់ទង

AHRC ​ធ្វើ​យុទ្ធនាការ​តាម​អ៊ីនធឺណិត​ទាមទារ​ឱ្យ​ដោះលែង​សកម្មជន​និង​កម្មករ​២១​នាក់

  • ម៉ែន​ គឹមសេង

កម្មករ​កាត់ដេរ​រត់​គេច​បី​ការ​បង្ក្រាប​របស់​សមត្ថកិច្ច​នៅ​មុខ​រោងចក្រ​ Yak Jin នៅ​ជាយ​ក្រុង​ភ្នំេពញ។ (២ មករា ២០១៤)
គណៈកម្មការ​សិទ្ធិ​មនុស្ស​អាស៊ី​បាន​ប្រកាស​នៅ​ថ្ងៃ​ព្រហស្បតិ៍​ធ្វើ​យុទ្ធនាការ​តាម​បណ្តាញ​អ៊ីនធឺណិត​ ទាមទារ​ឱ្យ​មាន​ការ​ដោះលែង​សកម្មជន​សហជីព ​និង​កម្មករ​ចំនួន​២១​នាក់​ដែល​កំពុងជាប់​ឃុំ​ឃាំង​នៅពន្ធនាគារ​ក្នុង​តំបន់​ដាច់​ស្រយ៉ាល​នាខេត្ត​កំពង់ចាម។

ជនរងគ្រោះចំនួន​២៣​នាក់ត្រូវ​បាន​ចាប់​ខ្លួន​នៅ​ក្នុង​ប្រតិបត្តិ​ការ​បង្ក្រាប​ដែល​ធ្វើ​ឡើង​ដោយ​កងកម្លាំង​សន្តិសុខ​នៃ​រដ្ឋាភិបាល​របស់​លោក​នាយ​ក​រដ្ឋ​មន្ត្រី​ហ៊ុន សែន ​កាលពី​ដើម​ខែ​មករា​ក្នុង​ពេល​ដែល​ពួកគេ​តវ៉ា​ទាមទារ​ឱ្យ​មាន​ការ​ដំឡើង​ប្រាក់​បៀវត្សរ៍​១៦០ដុល្លារ​ដល់​កម្មករ​រោងចក្រកាត់​ដេរ។​ ប៉ុន្តែ​តុលាការ​ដោះលែង​ឱ្យ​នៅ​ក្រៅ​ឃុំ​ចំនួន​ពីរនាក់។

ញត្តិ​ដែល​បាន​ដាក់​ផ្សាយ​តាម​បណ្តាញ​អ៊ីនធឺណិត​បាន​សុំ​ឱ្យ​អ្នក​ដែល​ស្រឡាញ់​និង​គាំទ្រសិទ្ធិ​មនុស្ស​ចុះ​ហត្ថលេខា​ដើម្បីផ្ញើ​ទៅ​រដ្ឋាភិបាល​កម្ពុជា​ដោយ​«ទាមទារ​ឱ្យ​លើកលែង​ការ​ចោទ​ប្រកាន់​ពី​បទល្មើសព្រហ្មទណ្ឌ​លើ​ជន​ដែល​នៅ​ជាប់​ឃុំ​និង​ដោះលែង​ពួកគេ​ដោយ​គ្មាន​លក្ខខណ្ឌ​ពីព្រោះ​អ្នក​ដែល​គេ​ត្រូវ​ឃុំ​ខ្លួន​នេះ​គ្រាន់​តែ​ទាមទារ​ឱ្យ​រដ្ឋាភិបាល​ដំឡើង​ប្រាក់​បៀវត្សរ៍​ តែ​ប៉ុណ្ណោះ»។

ញត្តិ​នោះ​បាន​បន្ត​ថា៖ «ការបន្ត​ឃុំ​ខ្លួន​ពួកគេ​និង​កាត់​ទោស​ពួកគេ​ដោយ​គ្រាន់​តែ​ទាមទារ​ការដំឡើង​ប្រាក់​បៀវត្សរ៍​គឺ​ប្រទេស​កម្ពុជា​រំលោភ​កាតព្វកិច្ច​តាម​សន្ធិសញ្ញា​ដែល​ការពារ​សិទ្ធិ​ជាមូលដ្ឋាន​របស់​ពលរដ្ឋ។ ការឃុំ​ខ្លួន​របស់​ពួកគេ​ក៏នឹង​បន្ត​បង្ហាញ​នូវ​គំរូ​អវិជ្ជមាន​ដែល​ថា​អ្នក​ណា​ដែល​ហ៊ាន​ទាមទារ​ឱ្យ​មាន​ជីវភាព​រស់​នៅ​ល្អ​ប្រសើរ​ត្រូវ​ទទួល​លទ្ធផល​ជាប់​ពន្ធនាគារ​ទៅវិញ»។

បុរស​ទាំងនោះ ​ត្រូវបាន​តុលាការ​រាជធានី ​ភ្នំពេញ​ចោទ​ប្រកាន់​ពី​បទពាក់ព័ន្ធ​នឹង​ហិង្សា​ដោយ​ចេតនា​ដោយ​មានស្ថាន​ទម្ងន់​ទោស​ ធ្វើ​ឱ្យ​ខូចខាត​ដោយ​ចេតនា​ដោយ​មាន​ស្ថាន​ទម្ងន់​ទោស​ ប្រមាថ​ និង​ធ្វើ​ឱ្យ​ប៉ះពាល់​សណ្តាប់​ធ្នាប់​ចរាចរណ៍​សាធារណៈ​ដែល​ប្រព្រឹត្ត​នៅសួន​ឧស្សាហកម្ម​កាណាឌីយ៉ានិង​រោង​ចក្រយ៉ាក ជីង។

កាលពីថ្ងៃ​អង្គារ​ សាលា​ឧទ្ធរណ៍​បាន​បើក​សវនាការ​លើ​បណ្តឹង​ទាមទារ​សុំ​នៅ​ក្រៅឃុំ​របស់​ក្រុមអ្នក​ការពារ​សិទ្ធិ​មនុស្ស​និងកម្មករ​ទាំង២១នាក់ ​ប៉ុន្តែបាន​សម្រេច​ដម្កល់​ការ​សម្រេច​របស់​តុលាការ​រាជធានី​ភ្នំពេញ​ដែល​បន្ត​ឃុំ​ខ្លួន​ពួកគេ។

លោក​ ជា មុន្នី​ ប្រធាន​សហជីព​សេរី​កម្មករ​នៃ​ប្រទេស​កម្ពុជា​បញ្ជាក់​ថា​សភាព​ការណ៍​បាន​ដើ​រ​មក​ដល់​ពេល​ដែល​កម្មករ​ត្រូវ​ធ្វើ​សកម្មភាព​ខ្លាំង​ក្លា​ប៉ុន្តែ​មាន​លក្ខណៈ​ទន់​ភ្លន់​ជាងមុន​ហើយ​ដើម្បីដាក់​សម្ពាធ​មក​លើ​រដ្ឋាភិបាល​នោះ​គឺ​ការ​ធ្វើ​កូដ​កម្ម​នៅ​ទូទាំង​ប្រទេស។ ​

«យើង​ត្រូវ​ធ្វើ​ពហិការ​ដើម្បី ​ឱ្យ​មាន​ការ​ដោះលែង​អ្នក​ទាំង​២១​នាក់​ ឱ្យ​មាន​ការ​ចរចា​ដំឡើង​ប្រាក់​បៀវត្សរ៍ ​ហើយ​ប្រាក់​បៀវត្សរ៍​យើង​ចរចា​ទៅ ​ឱ្យ​គេ​ប៉ុន្មាន​គ្រប់​គ្រាន់? គេ​មិន​មែន​ថា​ទាមទារ​១៦០​នោះ​គេ​នៅ ១៦០​នោះ​ទេ។​ យើង​ចង់​មាន​តម្លា​ភាព​ថា​អ្នក​ឯង​ឱ្យ​ប៉ុន្មាន»។

កូដកម្ម​ដែល​កម្មករ​នឹង​ធ្វើ​គឺ​ការ​វិល​ត្រឡប់​ទៅ​លំនៅដ្ឋាន​នៅ​ស្រុកកំណើត​វិញ​ដោយ​មិន​ចូលរួមធ្វើ​ការ​រហូត​ដល់​មាន​ដំណោះស្រាយ។ យ៉ាង​ណា​ក៏​ដោយ​លោក​ ជា មុន្នី ​សម្តែង​នូវ​ការ​សង្ស័យ​លើ​ចេតនា​របស់​រដ្ឋាភិបាល​ក្នុង​ការ​ដោះស្រាយ​ការ​លំបាក​របស់​កម្មករ​ដោយ​លោក​ចោទ​ថា​មាន​មន្ត្រី​រដ្ឋាភិបាល​ជាន់​ខ្ពស់​ជាច្រើន​មាន​ផល​ប្រយោជន៍​ពី​ឧស្សាហកម្ម​កាត់​ដេរ​នេះ។

«យើង​ឃើញ​ហើយ​សូម្បី​តែ​កុំ​ថា​ឡើយ​កម្មករ​យើង​ជជែក​ទាម​ទារ​បៀវត្សរ៍​សូម្បី​តែ ​Buyers ​ដែល​ជា​អ្នក​កុម្មង់​ទំនិញ​គេ​មក​ជួប​រដ្ឋាភិបាល​ក៏​គេ​ដែរ។ អញ្ចឹង​ការ​គេចវេស​ហ្នឹង​ឯង​បង្ហាញ​ថា​គាត់​មាន​ភាព​មិន​ស្មោះត្រង់​ក្នុង​ការ​ដំឡើង​ប្រាក់​បៀវត្សរ៍​ឱ្យ​កម្មករ»។

ក្រុមហ៊ុនធំៗ​ដែល​បញ្ជាទិញ​ទំនិញ​ពី​ប្រទេស​កម្ពុជា​បាន​ស្នើ​សុំ​ជួប​រដ្ឋាភិបាល​កម្ពុជា​ដើម្បី​ជជែក​ពី​ស្ថាន​ភាព​ការងារ​និង​ប្រាក់​បៀវត្សរ៍​កម្មករ​នៅ​សប្តាហ៍​ទីមួយ​នៃ​ខែ​កុម្ភៈ​នេះ​ប៉ុន្តែ​ត្រូវ​បាន​រដ្ឋាភិបាល​បដិសេធ​មិន​ព្រម​ជួប​ដើម្បី​ដោះស្រាយ​ដោយ​មិន​បាន​ផ្តល់​ហេតុផល​ច្បាស់​លាស់៕
XS
SM
MD
LG