ឯកអគ្គរាជទូតកម្ពុជាប្រចាំប្រទេសសិង្ហបុរីលោក ងួន សុខវេង នៅសប្តាហ៍នេះបានប្រតិកម្មតបទៅនឹងស្ថានីយ៍ទូរទស្សន៍ព័ត៌មាន (Channel News Asia-CNA) ដែលបានចេញផ្សាយអំពីសកម្មភាពវិនិយោគយ៉ាងគំហុករបស់ចិននៅកម្ពុជា ដោយផ្តោតលើតំបន់មាត់សមុទ្ររបស់ខេត្តព្រះសីហនុ ទីដែលបានស្រូបយកកម្លាំងពលកម្មរបស់ជនជាតិចិនជាច្រើនពាន់នាក់។
ឯកអគ្គរាជទូតកម្ពុជា ក៏អះអាងផងដែរថា សេចក្តីរាយការណ៍មានចំណងជើងថា «ពិនិត្យស៊ីជម្រៅ៖ការទូតមូលប្បទានប័ត្ររបស់ចិន»ឬ (Insight: China's Chequebook Diplomacy) ដែលចេញផ្សាយនាពេលថ្មីៗនេះ បានធ្វើឲ្យមតិសាធារណៈយល់ខុស និងប៉ះពាល់ដល់មុខមាត់និងកិត្តិនាមរបស់ប្រទេសកម្ពុជា។
ក្នុងលិខិតផ្ញើជូនលោកស្រី ថាំ ឡុកខេង ប្រធានប្រតិបត្តិសារជីវកម្មរបស់ Channel News Asia ចុះថ្ងៃទី១២ ខែមិថុនា និងទើបតែចេញផ្សាយដោយក្រសួងការបរទេសកម្ពុជា កាលពីថ្ងៃទី១៣ ខែមិថុនានោះ លោកឯកអគ្គរាជទូត ងួន សុខវេង បានបង្ហាញការអាក់អន់ចិត្តចំពោះសេចក្តីរាយការណ៍ជាភាពយន្តឯកសាររបស់ Channel News Asia ដោយសារតែស្ថានីយ៍ទូរទស្សន៍ដែលមានមូលដ្ឋានក្នុងប្រទេសសិង្ហបុរីមួយនេះបាន«ឈរលើតែព័ត៌មានមួយផ្នែកនិងការវិភាគមិនបានស៊ីជម្រៅ» ជាពិសេសទាក់ទងនឹងការអភិវឌ្ឍទីក្រុងព្រះសីហនុ។
អមជាមួយនឹងការស្តីបន្ទោសទូរទស្សន៍ Channel News Asia លោក ងួន សុខវេង បានថ្លែងការពារថា វិនិយោគ និងប្រាក់កម្ចីចិនបានរួមចំណែកយ៉ាងច្រើនដល់ការទ្រទ្រង់សកម្មភាពសេដ្ឋកិច្ចនៅប្រទេសកម្ពុជា។
លោកសរសេរក្នុងន័យដើមថា៖«ការវិនិយោគនិងទេសចរចិន បានរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ចសង្គមរបស់កម្ពុជា តាមរយៈបង្កើតការងារដល់ប្រជាជនកម្ពុជា នៅក្នុងវិស័យជាច្រើន រួមមានឧស្សាហកម្ម វាយនភ័ណ្ឌ សម្លៀកបំពាក់ និងសេវាកម្ម»។
លោកបានបន្ថែមថា៖
«លើសពីនេះទៅទៀត ជំនួយនិងកម្ចីសម្បទានរបស់ចិនបានដើរតួនាទីជាសារវ័ន្ត ក្នុងការគាំទ្រការអភិវឌ្ឍកម្ពុជាលើវិស័យជាច្រើន ជាពិសេសការតភ្ជាប់ហេដ្ឋារចនាសម្ព័ន្ធ»។
ឯកអគ្គរាជទូតរូបនេះ បានវាយតម្លៃសេចក្តីការណ៍របស់ CNA [Channel News Asia] ថា មិនបានខិតខំបង្ហាញឲ្យបានគ្រប់ជ្រុងជ្រោយទេ អំពីការណ៍ពិតស្តីពី ការវិនិយោគ និងវត្តមានចិននៅក្រុងព្រះសីហនុ ហើយផ្ទុយទៅវិញលើកតែទស្សនៈអវិជ្ជមាន ផ្អែកតាមការយល់ឃើញរបស់ប្រជាជនមូលដ្ឋានតែពីរនាក់។
ទោះមានការចោទប្រកាន់ពីលោកឯកអគ្គរាជទូតបែបនេះក្តី ក្នុងសេចក្តីរាយការណ៍ព័ត៌មានបែបភាពយន្តឯកសារ ដែលមានរយៈពេលជិតមួយម៉ោងនោះ អ្នករាយការណ៍ព័ត៌មានរបស់ Channel News Asia បានជួបសម្ភាសន៍ជាមួយមនុស្សជាច្រើន រួមមានពលរដ្ឋរស់នៅក្នុងខេត្តព្រះសីហនុដែលជាអ្នករត់ម៉ូតូកង់បី និងម្ចាស់ហាងនៅមាត់សមុទ្រ អ្នកឃ្លាំមើលនយោបាយកម្ពុជា សកម្មជនដីធ្លី និងមន្ត្រីរដ្ឋាភិបាល ដែលមានលោក ផៃ ស៊ីផាន ជាអ្នកនាំពាក្យរដ្ឋាភិបាលកម្ពុជា និងលោក អ៊ី សុខឡេង អភិបាលក្រុងព្រះសីហនុ។
សេចក្តីរាយការណ៍ដែលចេញផ្សាយតាំងពីខែកុម្ភៈមកនោះ បានបង្ហាញពីសកម្មភាពសាងសង់អគារជាច្រើនក្នុងខេត្តព្រះសីហនុ និងប្រជាជនចិនដែលបានទៅធ្វើការ និងរកស៊ីក្នុងខេត្តជាប់ដែនសមុទ្រកម្ពុជា។ សេចក្តីរាយការណ៍បានបង្ហាញថា វត្តមានជនជាតិចិនបានធ្វើឲ្យតម្លៃនៃការរស់នៅនៅទីនោះមានការកើនឡើងខ្ពស់ ហើយជនជាតិចិនបានដណ្តើមយកមុខរបរតូចតាចពីប្រជាជនកម្ពុជា។
សេចក្តីរាយការណ៍ដដែលក៏បានរំលេចពីជម្លោះដីធ្លី ដែលបានកើតឡើងក្នុងពេលវិនិយោគចិនចូលកាន់តែច្រើនទៅក្នុងខេត្តព្រះសីហនុ។ អ្នកយកព័ត៌មានរបស់ Channel News Asia ក៏បានលើកពីបញ្ហានយោបាយការបរទេសកម្ពុជា ដោយបានលើកពីតួនាទីរបស់កម្ពុជាក្នុងជម្លោះដ៏ចម្រូងចម្រាសនៅសមុទ្រចិនខាងត្បូង។
លោកឯកអគ្គរាជទូត ងួន សុខវេង បានច្រានចោលបញ្ហាដីធ្លី ដែលបានលើកយកមកបង្ហាញក្នុងសេចក្តីរាយការណ៍របស់ទូរទស្សន៍ Channel News Asia និងបានការពារនយោបាយអព្យាក្រឹតកម្ពុជា ដែលមិនលម្អៀងទៅរកចិន ក្នុងជម្លោះនៅសមុទ្រចិនខាងត្បូងនោះ។
លោកបានសរសេរក្នុងន័យដើមថា៖«យើងពិតជាមានចម្ងល់ពីគោលបំណងនៃសេចក្តីរាយការណ៍របស់ CNA [Channel News Asia] លើបញ្ហានេះ ហើយយើងបានកត់សម្គាល់ថា របៀបប្រមូលព័ត៌មានលើបញ្ហាដីធ្លី ក៏គ្មានលក្ខណៈស៊ីជម្រៅដែរ។ ជាការពិត រាជរដ្ឋាភិបាលកម្ពុជា បានធ្វើការប្រឹងប្រែងយ៉ាងខ្លាំង ដើម្បីដោះស្រាយបញ្ហាដីធ្លីទូទាំងប្រទេស»។
លោកឯកអគ្គរាជទូតអះអាងថា មកដល់ខែឧសភា ឆ្នាំ២០១៩ កម្មសិទ្ធិដីធ្លីប្រមាណ ៥,២លាន ត្រូវបានរាជរដ្ឋាភិបាលប្រគល់ជូនដល់ប្រជាជនកម្ពុជា ដែលមានន័យថា ៧៤ភាគរយ នៃចំនួនកម្មសិទ្ធិប្រមាណ៧លាន ដែលរាជរដ្ឋាភិបាលកម្ពុជាតាំងចិត្ត ចុះបញ្ជីឲ្យបានសព្វគ្រប់នៅត្រឹមឆ្នាំ២០២១។
ទាក់ទងទៅនឹងជម្លោះនៅសមុទ្រចិនខាងត្បូង លោក ងួន សុខវេង បានប្រាប់លោកស្រី ថាំ ឡុក ខេង ប្រធានប្រតិបត្តិសារជីវកម្មរបស់ Channel News Asia ថា កម្ពុជាគឺជាប្រទេសឯករាជ្យ និងអព្យាក្រឹត ហើយដូចប្រទេសសិង្ហបុរីដែរ កម្ពុជាមានសិទ្ធិអនុវត្តនយោបាយការបរទេស ដោយអនុលោមតាមរដ្ឋធម្មនុញ្ញរបស់កម្ពុជា និងច្បាប់ជាតិ និងអន្តរជាតិពាក់ព័ន្ធជាច្រើនទៀត។
លោកថា៖«កម្ពុជាតែងតែលើកទឹកចិត្ត និងអំពាវនាវដល់ភាគីពាក់ព័ន្ធផ្ទាល់ ឲ្យដោះស្រាយជម្លោះទឹកដី ដោយសន្តិវិធី តាមរយៈការពិគ្រោះយោបល់ និងការចរចាទ្វេភាគី»។
ទូរទស្សន៍ Channel News Asia មិនឆ្លើយតបទៅនឹងសំណួររបស់ VOA ដែលបានផ្ញើតាមសារអេឡិចត្រូនិក ឬអ៊ីម៉េលមកដល់ល្ងាចថ្ងៃសុក្រនេះ។
ឆ្លើយតបនឹងការអះអាងរបស់ប្រធានបេសកកម្មការទូតកម្ពុជាប្រចាំសិង្ហបុរីក្នុងបញ្ហាដីធ្លីនោះ លោក អំ សំអាតនាយករងទទួលបន្ទុកផ្នែកឃ្លាំមើលនិងការពារសិទ្ធិមនុស្សនៃអង្គការលីកាដូ (Licadho) ទទួលស្គាល់ថា ក្រសួងរៀបចំដែនដី នគរូបនីយកម្ម និងសំណង់នៃរដ្ឋាភិបាលកម្ពុជា បានធ្វើការយ៉ាងសកម្ម ដើម្បីជម្រះទំនាស់ដីធ្លីដែលបានកើតឡើងនៅទូទាំងប្រទេស។
ដោយឡែក លោកថា ទំនាស់ដីធ្លីក្នុងខេត្តព្រះសីហនុ នៅតែជាប្រធានបទក្តៅគគុកដដែល។
លោកប្រាប់ VOA នៅថ្ងៃសុក្រនេះថា៖
«ក្រោយពីមានការអភិវឌ្ឍ មានការណ៍ចិនចូលច្រើនមក បញ្ហាដីធ្លីនៅទីនោះវាមានក្លាយទៅជាក្តៅគគុកទៅវិញ យើងឃើញកើតឡើងជាបន្តបន្ទាប់ហើយ យើងឃើញថា មានការអនុវត្តសាលដីកា មានការបាញ់របួស ហើយក្រោយមកយើងឃើញថា មានការចាប់ខ្លួន ចាប់អីដោយសារតែបញ្ហាដីធ្លីនៅទីនោះ វាឡើងតម្លៃខ្ពស់ចឹងហើយ វាធ្វើឲ្យម្នាក់ៗ ចង់បានដីចង់បានធ្លីនៅទីនោះហ្នឹង វាបង្កឲ្យមានបញ្ហាកើតឡើងជាបន្តបន្ទាប់»។
VOA មិនទាន់អាចទាក់ទងសុំការអធិប្បាយពីលោក កេត សោផាន់ អ្នកនាំពាក្យក្រសួងការបរទេសបានទេនៅថ្ងៃសុក្រនេះ។
លោក ងួន សុខវេង ឯកអគ្គរាជទូតប្រទេសកម្ពុជាប្រចាំប្រទេសសិង្ហបុរី បានស្នើផងដែរឲ្យទូរទស្សន៍ Channel News Asia ចុះផ្សាយលិខិតរបស់លោកដែលមានកម្រាស់បីទំព័រទាំងស្រុង នៅក្នុងគេហទំព័ររបស់ទូរទស្សន៍ដែលអាចមើលឃើញនៅប្រទេសចំនួន២៩ ក្នុងតំបន់អាស៊ី។
លោកបានបង្ហាញក្តីសង្ឃឹមថា បទយកការណ៍នានាអំពីកម្ពុជានាពេលអនាគតរបស់ទូរទស្សន៍Channel News Asia នឹងជៀសវាងការបង្ហាញតែចំណុចអវិជ្ជមាន ដោយគ្មានតុល្យភាព ហើយទូរទស្សន៍នេះក៏យកការណ៍ពិតមកធ្វើជាមូលដ្ឋានដើម្បីធ្វើសេចក្តីរាយការណ៍របស់ខ្លួន៕
