រដ្ឋមន្រ្តីការពារជាតិរបស់ប្រទេសចិន លោក Wei Fenghe បានច្រានចោលការចោទប្រកាន់ថា ចិននឹងកសាងមូលដ្ឋានយោធានៅប្រទេសកម្ពុជា តាមរយៈគម្រោងអភិវឌ្ឍន៍ដ៏ធំមួយនៅក្នុងខេត្តកោះកុងដែលជាតំបន់សមុទ្រ។
លោកបានថ្លែងបែបនេះជាការឆ្លើយតបនឹងសំណួររបស់អ្នកចូលរួមម្នាក់នៅក្នុងកិច្ចប្រជុំកំពូលសន្តិសុខអាស៊ី ឬហៅថា Shangri-La Dialogue ដែលជាកិច្ចប្រជុំជាន់ខ្ពស់នៃថ្នាក់ដឹកនាំការពារជាតិប្រទេសអាស៊ី។ កិច្ចប្រជុំនេះបានធ្វើឡើងនៅប្រទេសសិង្ហបុរី ចាប់ពីថ្ងៃទី៣១ ខែឧសភា ដល់ថ្ងៃទី២ ខែមិថុនា។
លោករដ្ឋមន្រ្តីចិនរូបនេះបានថ្លែងថា៖ «ពុំមានករណីដែលប្រទេសចិននឹងបង្កើតវត្តមានយោធានៅកម្ពុជានោះទេ»។ ប៉ុន្តែលោកមិនបានឆ្លើយចំទៅនឹងសំណួរថាតើប្រទេសចិន «កំពុងស្វះស្វែងរក» ឲ្យមានវត្តមានយោធានៅប្រទេសកម្ពុជានោះទេ ខណៈខ្លួនកំពុងតែមានទំនាក់ទំនងយ៉ាងជិតស្និទ្ធជាមួយរដ្ឋាភិបាលរបស់លោក នាយករដ្ឋមន្ត្រីហ៊ុន សែន។
នៅក្នុងរបាយការណ៍របស់ក្រសួងការពារជាតិអាមេរិក ចុះថ្ងៃទី១ ខែមិថុនា ឆ្នាំ២០១៩
ដែលនិយាយអំពីយុទ្ធសាស្រ្តឥណ្ឌូប៉ាស៊ីហ្វិក សហរដ្ឋអាមេរិកបានបង្ហាញការព្រួយបារម្ភអំពីរបាយការណ៍ដែលថា ប្រទេសចិន «កំពុងស្វះស្វែងក្នុងការបង្កើតនូវមូលដ្ឋាន ឬក៏វត្តមានយោធានៅប្រទេសកម្ពុជា»។
របាយការណ៍បានបញ្ជាក់ថា ប្រសិនបើមានវត្តមានយោធានេះ នឹងមានការប្រឈមសន្តិសុខក្នុងតំបន់ និងបង្ហាញការផ្លាស់ប្តូរច្បាស់មួយនៅក្នុងនយោបាយការបរទេសរបស់កម្ពុជា។
នាពេលកន្លងទៅ លោកនាយករដ្ឋមន្រ្តី ហ៊ុន សែន និងរដ្ឋមន្រ្តីការពារជាតិរបស់កម្ពុជា លោក ទៀ បាញ់ បានច្រានចោលព័ត៌មាននេះជាបន្តបន្ទាប់ ដោយថារដ្ឋធម្មនុញ្ញរបស់កម្ពុជា មិនអនុញ្ញាតឲ្យមានវត្តមានយោធារបស់បរទេសនៅលើទឹកដីកម្ពុជា ហើយថា ការអភិវឌ្ឍរបស់ក្រុមហ៊ុនចិន Union Development Group (UDG) គឺធ្វើឡើងក្នុងគោលដៅទេសចរណ៍តែប៉ុណ្ណោះ។
ក្រុមហ៊ុន UDG បានទទួលដីសម្បទានពីរដ្ឋាភិបាលកម្ពុជាចំនួន ៤៥០០០ ហិកតាក្នុងស្រុកចំនួនពីរក្នុងខេត្តកោះកុង គឺស្រុកបុទុមសាគរ និងគីរីសាគរ តាំងពីឆ្នាំ ២០០៨ ដើម្បីអភិវឌ្ឍតំបន់មួយនេះទៅជាកន្លែងទេសចរដ៏ធំមួយឈ្មោះថា «តារាសាគរ»។ គម្រោងធំៗមានកាស៊ីណូ សណ្ឋាគារ កន្លែងវាយកូនហ្គោល តំបន់កម្សាន្តតាមឆ្នេរ ព្រលានយន្តហោះ និងកំពង់ផែសមុទ្រទឹកជ្រៅជាដើម។ គម្រោងដ៏ធំដែលមានតម្លៃ ៣៨០០ លានដុល្លារអាមេរិកនេះ ក៏បញ្ចូលដែនសមុទ្រខ្មែរចំនួន ២០ភាគរយផងដែរ។
តំណាងក្រុមហ៊ុន UDG ក៏បានច្រានចោលការចោទប្រកាន់នេះផងដែរ។ នេះបើយោងតាមលោក Wang Chao អនុប្រធានក្រុមហ៊ុន UDG ដែលបានប្រាប់កាសែតក្នុងស្រុកឈ្មោះ Khmer Times កាលចុងឆ្នាំ២០១៨។
លោកត្រូវបានដកស្រង់សម្តីកាលនោះថា៖ «វាមិនពិតទេ វាមិនពិតទេ។ ខ្ញុំគិតថានាយករដ្ឋមន្រ្តីបានលើកឡើងអ្វីជាការពិតរួចមកហើយ។ យើងធ្វើពាណិជ្ជកម្ម។ យើងមិនពាក់ព័ន្ធនឹងរឿងយោធាឡើយ»។តាមគម្រោង ក្រុមហ៊ុន UDG នឹងដាក់ឲ្យដំណើរការព្រលានយន្តហោះមួយដែលមានផ្លូវយន្តហោះចុះប្រវែង ៣,២០០ ម៉ែត្រ និងទទឹងប្រវែង ៦០ម៉ែត្រ នៅចុងខែឧសភា ឆ្នាំ២០២០ ខាងមុខនេះ។ ហើយបន្ទាប់មក ក៏នឹងមានការស្ថាបនាផែពាណិជ្ជកម្មចំនួនពីរទៀត បន្ថែមលើផែទេសចរណ៍ដែលមាននៅទីនោះ នេះបើយោងតាមលោក Wang Chao។
លោក Paul Chambers អ្នកវិទ្យាសាស្ត្រនយោបាយ និងជាសាស្ត្រាចារ្យនៃសាកលវិទ្យាល័យ Naresuan នៅប្រទេសថៃ បានថ្លែងនៅក្នុងសារអេឡិចត្រូនិកមកកាន់ VOA ថាក្រុមហ៊ុន UDG គឺជាបណ្តាញរបស់រដ្ឋចិន ហើយការចាប់អារម្មណ៍នៅក្នុងការអភិវឌ្ឍនៅខេត្តកោះកុង គឺដើម្បីពង្រីកអំណាចយោធា នយោបាយ និងសេដ្ឋកិច្ចរបស់រដ្ឋាភិបាលក្រុងប៉េកាំង។
លោកបានបញ្ជាក់បន្ថែមថា រដ្ឋាភិបាលកម្ពុជាត្រូវមានការប្រុងប្រយ័ត្ន ដើម្បីកុំឲ្យធ្លាក់ទៅក្នុង«អន្ទាក់របស់ចិន»។
លោកមានប្រសាសន៍ថា៖ «ការប្រែក្លាយប្រទេសកម្ពុជាឲ្យទៅជាប្រទេសដែលពឹងផ្អែកលើខ្លួន [ចិន] គ្រាន់តែឆ្លុះបញ្ចាំងនូវផ្នែកមួយនៃគោលនយោបាយគម្រោង BRI [គម្រោងខ្សែក្រវាត់ពាណិជ្ជកម្ម] ដែលមានលក្ខណៈវាតទីនិយមរបស់ចិន។ រដ្ឋាភិបាលកម្ពុជាត្រូវការពារខ្លួនកុំឲ្យធ្លាក់ទៅក្នុងអន្ទាក់របស់ចិន មុនពេលដែលវាហួសពេល គឺមុនពេលកម្ពុជាផុងខ្លួនរើមិនរួចពីសំណាញ់មហិច្ឆតាអាណានិគមបែបថ្មីរបស់ចិននៅទូទាំងពិភពលោក»៕
