លោក វ្លាឌីមៀរ ពូទីន (Vladimir Putin) មេដឹកនាំប្រទេសរុស្ស៊ីបានបើកការវាយប្រហារលើប្រទេសអ៊ុយក្រែនចាប់តាំងពីថ្ងៃទី២៤ ខែកុម្ភៈ ដែលរហូតមកដល់ពេលនេះ គឺមានរយៈពេល ៧ ថ្ងៃមកហើយ។
ប្រជាជនលើពិភពលោកចាប់អារម្មណ៍យ៉ាងខ្លាំងលើសង្គ្រាមឈ្លានពានមួយនេះ ដោយក្នុងនោះរួមទាំងប្រជាជនកម្ពុជាផងបានចំណាយពេលតាមដានព័ត៌មាន ខ្លះបញ្ចេញមតិលើបណ្តាញសង្គម និងខ្លះមានការជជែកនៅហាងគុយទាវហាងកាហ្វេ និងទីប្រជុំជនមួយចំនួនមិនដាច់។
អ្នកប្រើប្រាស់បណ្តាញសង្គមហ្វេសប៊ុកមួយចំនួនបានប្តូររូបប្រូហ្វាល់ដោយដាក់រូបទង់ជាតិ និងរូបប្រធានាធិបតីអ៊ុយក្រែន ខ្លះបន្ថែមរូបទង់ជាតិអ៊ុយក្រែនលើរូបប្រូហ្វាល់របស់ពួកគេជាដើម។ ចំណែកអ្នកប្រើហ្វេសប៊ុកខ្លះក៏បានបង្ហោះសារចែករំលែកព័ត៌មានពាក់ព័ន្ធនឹងសង្គ្រាមឈ្លានពានរបស់រុស្ស៊ីលើអ៊ុយក្រែន ដោយមានការបញ្ចេញមតិ និងជជែកគ្នាយ៉ាងផុសផុលផងដែរ។
បុរសម្នាក់គេចចេញពីរថយន្តដែលរងការបំផ្លិចបំផ្លាញដោយសារការប្រយុទ្ធគ្នារវាងទាហានឈ្លានពានរុស្ស៊ី និងទាហានអ៊ុយក្រែន នៅតំបន់ Brovary ជាយក្រុង Kyiv ប្រទេសអ៊ុយក្រែន ថ្ងៃទី ១ ខែមីនា ឆ្នាំ ២០២២។
ស្របពេលដែលប្រជាជនកម្ពុជាមួយចំនួនកំពុងសកម្មនឹងការតាមដានព័ត៌មាន អំពីសង្គ្រាមឈ្លានពានពីសំណាក់ប្រទេសរុស្ស៊ីលើប្រទេសអ៊ុយក្រែនដែលជាប្រទេសសម្បូរធនធានរ៉ែ ប្រេង និងឧស្ម័នដែលបាននឹងកំពុងបន្តធ្វើឡើង ប្រជាជនកម្ពុជាមួយចំនួនបារម្ភថា កម្ពុជាអាចនឹងរងឥទ្ធិពលពីអាវុធនុយក្លេអ៊ែរ និងវិបត្តិសេដ្ឋកិច្ចដែលបណ្តាលមកពីសង្គ្រាមក្នុងប្រទេសទាំងពីរនោះ។
កំពុងអង្គុយលើម៉ូតូដែលចតចាំភ្ញៀវលើខឿនផ្លូវមួយ ស្ថិតក្នុងសង្កាត់ដូនពេញ រាជធានីភ្នំពេញ លោក ខែម សុខឿន អ្នករត់ម៉ូតូឌុបម្នាក់ប្រាប់ VOA កាលពីថ្ងៃទី ២៨ ខែកុម្ភៈនេះថា ការឈ្លានពានរបស់រុស្ស៊ីលើអ៊ុយក្រែន បាននិងកំពុងធ្វើឲ្យប៉ះពាល់ដល់សេដ្ឋកិច្ចលើពិភពលោក ហើយចំណែកកម្ពុជាក៏កំពុងរងផលប៉ះពាល់ពីអស្ថិរភាពសេដ្ឋកិច្ចនេះផងដែរ។
«តែធ្វើសង្គ្រាម[មាន] ការប៉ះពាល់ហើយ។ ប៉ះពាល់មិនមែនប៉ះពាល់តែគេទេ ប៉ះពាល់ដល់ទាំងយើងទៀត។ ប៉ះពាល់ខាងសេដ្ឋកិច្ចដូចជាសាំងឡើងថ្លៃមនុស្សក៏មិនសូវមានធ្វើដំណើរ ចំណូលក៏មិនសូវមាន។ ដល់អ៊ីចឹងទៅវាប៉ះពាល់ទាំងអស់ និយាយរួមទៅ»។
ចំណែកកញ្ញាសែម សុភ័ក្ត្រ និស្សិតឆ្នាំទី ៤ ផ្នែកគីមីចំណីអាហារនៃសាកលវិទ្យាល័យភូមិន្ទភ្នំពេញនិយាយថា សម្រាប់កម្ពុជាដែលជាប្រទេសតូចមួយពឹងលើការនាំចូលទំនិញសំខាន់ៗជាច្រើនពីបរទេស។ ដូច្នេះកញ្ញាបារម្ភថា តម្លៃទំនិញនៅកម្ពុជានឹងឡើងថ្លៃកាន់តែខ្លាំងថែមទៀត។
«ប្រជាជនរបស់យើងគឺនឹងមានភាពលំបាកទាក់ទងទៅនឹងទំនិញដែលឡើងថ្លៃ។ នៅពេលដែលប្រទេសដូចថាអ៊ុយក្រែន រុស្ស៊ី គាត់មានសង្គ្រាមគឺគាត់រាំងស្ទះហើយ។ រាំងស្ទះទាំងទំនិញដែលគាត់ថាអាចបញ្ជូនលក់មកប្រទេសផ្សេងៗបាន គឺវាកកស្ទះ វាអត់មានទំនិញមក ទំនិញដែលស្តុកទុកនៅប្រទេសផ្សេងៗ គឺវាចាប់ផ្តើមឡើងថ្លៃ»។
កញ្ញា សែម សុភ័ក្ត្រ និស្សិតឆ្នាំទី៤ ផ្នែកគីមីចំណីអាហារនៃសាកលវិទ្យាល័យភូមិន្ទភ្នំពេញ ផ្តល់សម្ភាសន៍ដល់ VOA ក្នុងបរិវេណសាកលវិទ្យាល័យភូមិន្ទភ្នំពេញ នាថ្ងៃទី២៧ ខែកុម្ភៈ ឆ្នាំ២០២២។ (កាន់ វិច្ឆិកា/វីអូអេ)
លោក ភាព ឆេងមេង និស្សិតឆ្នាំទី៣ផ្នែកអគ្គិសនី នៅវិទ្យាស្ថានបច្ចេកវិទ្យាកម្ពុជា ផ្តល់សម្ភាសន៍ដល់ VOA នៅថ្ងៃទី២៧ ខែកុម្ភៈ ឆ្នាំ២០២២។ (កាន់ វិច្ឆិកា/វីអូអេ)
មួយថ្ងៃបន្ទាប់ពីរុស្ស៊ីបើកការវាយប្រហារលើប្រទេសអ៊ុយក្រែនកាលពីថ្ងៃទី ២៤ ខែកុម្ភៈ ទីផ្សារភាគហ៊ុនអាស៊ី បានធ្លាក់ចុះចន្លោះពី ២% ទៅ ៣% ខណៈតម្លៃប្រេងបានហក់ឡើងខ្ពស់។ បើតាមការរាយការណ៍របស់ VOA ដែលបានសម្ភាសន៍អ្នកជំនាញបង្ហាញថា រុស្ស៊ីជាប្រទេសផលិតប្រេងនិងឧស្ម័នធម្មជាតិដ៏ធំបង្អស់មួយរបស់ពិភពលោកដោយបាននាំចេញប្រេងប្រហែល ៤ លាន ៥ សែនធុង ក្នុងមួយថ្ងៃទៅកាន់ទីផ្សារសាកលលោកដែលមានប្រេងប្រហែល ១០០ លានធុង ក្នុងមួយថ្ងៃៗ។ ប្រសិនបើប្រេងមួយលានធុង ត្រូវគេដកចេញពីទីផ្សារដោយមូលហេតុណាមួយនោះតម្លៃប្រេងអាចកើនឡើងពី ២០ ទៅ ២៥ ភាគរយ។
យុវជន ភាព ឆេងមេង និស្សិតឆ្នាំទី ៣ ផ្នែកអគ្គិសនី នៅវិទ្យាស្ថានបច្ចេកវិទ្យាកម្ពុជាលើកឡើងថា សង្គ្រាមរវាងប្រទេសរុស្ស៊ី និងអ៊ុយក្រែន ជះឥទ្ធិពលយ៉ាងខ្លាំងដល់ពិភពលោក ពាក់ព័ន្ធនឹងការនាំចេញរ៉ែគ្រប់ប្រភេទ ជាពិសេសប្រេង និងឧស្ម័ន ដែលជាតម្រូវការចាំបាច់សម្រាប់ការប្រើប្រាស់ប្រចាំថ្ងៃ។
យុវជនវ័យ ២៣ ឆ្នាំរូបនេះបន្ថែមថា នៅពេលដែលពិភពលោកប្រឈមនឹងបញ្ហាខ្វះខាតប្រេង និងឧស្ម័ន ជាទូទៅកម្ពុជា ក៏នឹងប្រឈមនឹងបញ្ហាសេដ្ឋកិច្ចដូចគ្នា។ យុវជន ឆេងមេង បន្ថែមថា ប្រទេសទាំងអស់មិនថាតូច ឬធំ គួរមានភាពអត់ធ្មត់ដោយជ្រើសយកផ្លូវចចារជាជាងការប្រើប្រាស់ការបង្ហូរឈាម។
«ការធ្វើសង្គ្រាមហ្នឹងវាមានផលប៉ះពាល់ដល់ប្រទេសអ៊ីចឹងហើយយើងមិនគួរណាបង្កើតនូវសង្គ្រាម។ ហើយបើសិនជាអាចយើងគួរតែធ្វើការចចាររវាងប្រទេសដែលថាធ្វើសង្រ្គាមជាមួយប្រទេសមួយអ៊ីចឹងទៅ។ មួយទៀតការធ្វើសង្គ្រាមវាតែងខូចហេដ្ឋារចនាសម្ព័ន្ធ វាប៉ះពាល់ដល់ជីវិតមនុស្ស បង្កភាពភ័យខ្លាច ហើយវាក៏ប៉ះពាល់ដល់វិស័យអប់រំយ៉ាងខ្លាំង»។
ជម្លោះប្រដាប់អាវុធរវាងយោធាអ៊ុយក្រែន និងរុស្ស៊ីដែលបានផ្ទុះតាំងពីថ្ងៃទី ២៤ ខែកុម្ភៈ កើតឡើងនៅពេលប្រធានាធិបតីរុស្ស៊ីលោក វ្លាឌីមៀរ ពូទីន បានប្រកាសធ្វើ «ប្រតិបតិ្តការយោធាពិសេស»មួយ មកលើប្រទេសអ៊ុយក្រែន ដោយនិយាយថា ជាការឆ្លើយតបទៅនឹងការគំរាមកំហែងមកពីអ៊ុយក្រែនហើយបានព្រមានប្រទេសផ្សេងៗទៀតកុំឲ្យធ្វើអន្តរាគមន៍។
ប្រទេសជាច្រើនលើពិភពលោក ដោយរួមមានអង្គការសហប្រជាជាតិផងបានថ្កោលទោសប្រទេសរុស្ស៊ី ចំពោះការវាយប្រហារប្រទេសអ៊ុយក្រែនដែលពួកគេហៅថាជាការឈ្លានពាន។
សហរដ្ឋអាមេរិកសហភាពអឺរ៉ុបនិងប្រទេសផ្សេងៗទៀតបានដាក់ទណ្ឌកម្មប្រឆាំងនឹងក្រុមមន្ត្រីរុស្ស៊ីនិងប្រព័ន្ធហិរញ្ញវត្ថុរបស់រុស្ស៊ី ហើយនឹងបញ្ឈប់គម្រោងបំពង់បង្ហូរឧស្ម័នរបស់រុស្ស៊ីផងដែរ។
រូបឯកសារ៖ ប្រធានាធិបតីរុស្ស៊ីលោក Vladimir Putin ដឹកនាំកិច្ចប្រជុំជាមួយម្ចាស់អាជីកម្មធំៗនៅរុស្ស៊ី នៅវិមានរដ្ឋាភិបាលក្នុងទីក្រុងមូស្គូ ប្រទេសរុស្ស៊ី កាលពីថ្ងៃទី ២៤ ខែកុម្ភៈ ឆ្នាំ ២០២២។
រូបឯកសារ៖ រថយន្តយោធារុស្ស៊ីត្រូវបានបំផ្លាញក្នុងពេលប្រយុទ្ធជាមួយកងទ័ពអ៊ុយក្រែន នៅក្រុង Kharkiv ប្រទេសអ៊ុយក្រែន កាលពីថ្ងៃទី ២៧ ខែកុម្ភៈ ឆ្នាំ ២០២២។
កាលពីថ្ងៃអាទិត្យ ទី ២៧ ខែកុម្ភៈ ប្រធានាធិបតីរុស្ស៊ីលោក វ្លាឌីមៀរ ពូទីន បានបញ្ជាឲ្យកងកម្លាំងនុយក្លេអ៊ែររបស់រុស្ស៊ីត្រៀមខ្លួនរួចជាស្រេច ដើម្បីឆ្លើយតបទៅនឹងទណ្ឌកម្ម និងសេចក្តីថ្លែងការណ៍ថ្កោលទោសផ្សេងៗពីបណ្តាប្រទេសលោកខាងលិច។
លោក សុខឿន អ្នករត់ម៉ូតូឌុបវ័យ ៥៨ ឆ្នាំ បន្ថែមថា ក្រៅតែបារម្ភពីបញ្ហាសេដ្ឋកិច្ចលោកក៏បារម្ភថាសង្គ្រាមរវាងរុស្សី និងអ៊ុយក្រែន អាចនឹងមានការប្រើអាវុធនុយក្លេអ៊ែរ ដែលអាចធ្វើឲ្យប៉ះពាល់ដល់បណ្តាប្រទេសទូទាំងពិភពលោកផងដែរ។
«តែបាញ់ហើយ គ្រាប់វាមានភ្នែកឯណា វាចេះតែប៉ាតណាប៉ាតណីហើយ មិនដឹងធ្លាក់ទៅណាធ្លាក់ទៅណី បើមិនដល់ប្រទេសយើងដល់ប្រទេសជិតខាងក៏ប៉ះពាល់ដល់យើងដែរអាហ្នឹង»។
កាលពីថ្ងៃអាទិត្យ ក្រសួងមហាផ្ទៃអ៊ុយក្រែនបានលើកឡើងថា ជនស៊ីវិលអ៊ុយក្រែនចំនួន ៣៥២ នាក់ ត្រូវបានសម្លាប់អំឡុងពេលការចូលវាយលុកដោយរុស្ស៊ី ដែលក្នុងនោះរួមមានកុមារចំនួន ១៤ នាក់។នេះបើយោងតាមការរាយការណ៍របស់ទីភ្នាក់ងារសារព័ត៌មាន Associated Press។
សេចក្តីថ្លែងការណ៍របស់ក្រសួងមហាផ្ទៃអ៊ុយក្រែន បន្តថា មនុស្សចំនួន ១.៦៨៤ នាក់ ក្នុងនោះកុមារ ១១៦ នាក់ បានរងរបួស។ យ៉ាងណាក្តី សេចក្តីថ្លែងការណ៍នោះមិនបានបញ្ជាក់ពីចំនួនស្លាប់និងរបួសក្នុងចំណោមកងកម្លាំងប្រដាប់អាវុធអ៊ុយក្រែននោះទេ។
នៅថ្ងៃអាទិត្យទី ២៧ ខែកុម្ភៈ មនុស្សជាង ២០០.០០០ នាក់បានភៀសខ្លួនចេញពីប្រទេសអ៊ុយក្រែនដែលក្នុងនោះពាក់កណ្ដាលទៅកាន់ប្រទេសប៉ូឡូញ ហើយមនុស្សរហូតដល់ ៤ លាននាក់ទៀត អាចភៀសខ្លួន ប្រសិនបើស្ថានការណ៍កាន់តែអាក្រក់ឡើង។ នេះបើតាមការសន្និដ្ឋានរបស់ទីភ្នាក់ងារជនភៀសខ្លួនរបស់អង្គការសហប្រជាជាតិ។
សម្រាប់លោក សុខឿន ដែលជាអ្នករត់ម៉ូតូឌុបអស់រយៈពេលប្រមាណជា ៣០ ឆ្នាំមកហើយនោះ លោករំពឹងថា សង្គ្រាមរវាងរុស្ស៊ីនិងអ៊ុយក្រែន នឹងអាចបញ្ចប់ក្នុងឆាប់ៗ។
«គ្មាននរណាចង់ឲ្យអូសបន្លាយទេ ចង់ឲ្យឆាប់ៗ [ចប់] ទេ។ប៉ុន្តែរឿងគ្រាន់តែយើងចង់ទេ ប៉ុន្តែរឿងឆាប់មិនឆាប់នៅលើអ្នកធ្វើសង្គ្រាមទេ»៕