ប្រទេសអ៊ីស្រាអែលបានធ្វើការវាយប្រហារនៅមុនថ្ងៃរះទៅលើប្រទេសអ៊ីរ៉ង់នៅព្រឹកថ្ងៃសុក្រនេះម៉ោងនៅក្នុងស្រុក។ នេះបើយោងលើការផ្សព្វផ្សាយរបស់សារព័ត៌មានអាមេរិក ដែលបានស្រង់សម្តីមន្ត្រីអ៊ីស្រាអែលនិងអាមេរិកដោយមិនបញ្ចេញឈ្មោះ។
កាសែតThe New York Times និងកាសែត Washington Post របស់អាមេរិក បានស្រង់សម្តីមន្ត្រីអ៊ីស្រាអែល ដោយបាននិយាយថា អ៊ីស្រាអែលបានធ្វើការវាយប្រហារតាមអាកាសមួយទៅក្នុងប្រទេសអ៊ីរ៉ង់។ មន្ត្រីអាមេរិកមួយចំនួនត្រូវបានស្រង់សម្តីដោយសារព័ត៌មានជាច្រើនថា បានហៅការវាយប្រហារនោះថា ជាការបាញ់គ្រាប់មីស៊ីលរបស់អ៊ីស្រាអែល។
ទីតាំងឬគោលដៅនៃការវាយប្រហាររបស់អ៊ីស្រាអែលទៅលើអ៊ីរ៉ង់នោះ នៅមិនទាន់ត្រូវបានដឹងភ្លាមៗនោះឡើយ។
ប្រហែលមួយម៉ោងក្រោយការចេញផ្សាយនូវព័ត៌មាននៃការវាយប្រហាររបស់អ៊ីស្រាអែលលើអ៊ីរ៉ង់នេះ អ្នកនាំពាក្យយោធាអ៊ីស្រាអែលមួយរូប ដែលត្រូវបានវីអូអេទាក់ទងសាកសួរបាននិយាយថា លោកគ្មានអត្ថាធិប្បាយទេនៅពេលនេះទេ។
គេក៏នៅមិនទាន់ឃើញមានការធ្វើអត្ថាធិប្បាយជាសាធារណៈពីរដ្ឋបាលរបស់លោក Biden ផងដែរ លើការវាយប្រហាររបស់អ៊ីស្រាអែលទៅលើអ៊ីរ៉ង់នេះ។
ទីភ្នាក់ងារសារព័ត៌មានរដ្ឋអ៊ីរ៉ង IRNA និងFars បាននិយាយថា ប្រព័ន្ធការពារដែនអាកាសរបស់អ៊ីរ៉ង់ត្រូវបើកឱ្យដំណើរការនៅជិតកណ្តាលទីក្រុង Isfahan ដើម្បីឆ្លើយតបទៅនឹងគ្រាប់ដែលបាញ់ចូលមក។ ទីភ្នាក់ងារសារព័ត៌មានរដ្ឋអ៊ីរ៉ង់ទាំងពីរនេះក៏បានរាយការណ៍ផងដែរថា គេក៏ឮសូរសំឡេងផ្ទុះនៅភាគខាងកើតជាយក្រុងនេះផងដែរ ប៉ុន្តែមិនបានបញ្ជាក់ទេថា តើការផ្ទុះនោះកើតឡើងពីការស្ទាក់បាញ់នៅលើអាកាសដោយប្រព័ន្ធការពារដែនអាកាសអ៊ីរ៉ង់ ឬមួយក៏ជាការផ្ទុះដែលគ្រាប់បាញ់ចូលមកនោះបានធ្លាក់ដល់ដីនោះឡើយ។
នាយកទីភ្នាក់ងារអវកាសអ៊ីរ៉ង់និយាយថា កងកម្លាំងការពារដែនអាកាសអ៊ីរ៉ង់ បានបាញ់ទម្លាក់ដ្រូនជាច្រើនគ្រឿង។
ប្រព័ន្ធផ្សព្វផ្សាយព័ត៌មានអ៊ីរ៉ង់ បានព្យាយាមធ្វើសេចក្តីរាយការណ៍ភ្លាមៗថា ហេតុការណ៍នេះមិនសូវសំខាន់ទេ ដោយនិយាយថា ទីតាំងរោងចក្រនុយក្លេអ៊ែរអ៊ីរ៉ង់ក្នុងទីក្រុង Isfahan មិនមានគ្រោះថ្នាក់អ្វីឡើយ។ ទីភ្នាក់ងារសារព័ត៌មាននេះក៏បាននិយាយផងដែរថា អាកាសយានដ្ឋានអន្តរជាតិ Imam Khomeini ក្នុងទីក្រុងតេហេរ៉ង់ និងអាកាសយានដ្ឋានក្នុងស្រុក Mehrabad បានត្រឡប់ទៅរកស្ថានភាពដូចធម្មតាវិញហើយនៅថ្ងៃសុក្រនេះ គឺចំនួនជាច្រើនម៉ោងក្រោយពីជើងហោះហើរនានា ត្រូវបានផ្អាក ដែលទំនងដោយសារតែមានការវាយប្រហារតាមអាកាសរបស់អ៊ីស្រាអែលនេះឯង។
នេះជាការកត់សម្គាល់នូវជម្លោះសង្គ្រាមជាសម្ងាត់រវាងប្រទេសទាំងពីរក្នុងរយៈពេលមួយឆ្នាំ ដែលបានឡើងកម្តៅតានតឹងយ៉ាងខ្លាំងក្នុងខែនេះ។ អ៊ីស្រាអែលបានព្រមានអ៊ីរ៉ង់ថា ខ្លួននឹងធ្វើការសងសឹកចំពោះការវាយប្រហារមិនធ្លាប់មានរបស់អ៊ីរ៉ង់មកលើទឹកដីខ្លួនកាលពីអាទិត្យកន្លងទៅ ដោយអ៊ីរ៉ង់បានបាញ់ដ្រូននិងគ្រាប់មីស៊ីលជាច្រើនគ្រាប់មកលើអ៊ីស្រាអែល។
ក្នុងរឿងដាក់ដោយឡែកមួយទៀតនៅមុនព្រឹត្តិការណ៍ចុងក្រោយនេះ ទីភ្នាក់ងារព័ត៌មាន AP បានរាយការណ៍ថា សហរដ្ឋអាមេរិកនិងចក្រភពអង់គ្លេសបានដាក់ទណ្ឌកម្មថ្មីៗលើប្រទេសអ៊ីរ៉ង់នៅពេលមានកំណើនកង្វល់ថា ការវាយប្រហារមិនធ្លាប់មានពីមុនបែបនេះរបស់រដ្ឋាភិបាលក្រុងតេហេរ៉ង់លើអ៊ីស្រាអែលអាចនាំឱ្យមានសង្គ្រាមរាលដាលជាងមុនក្នុងតំបន់មជ្ឈិមបូព៌ា។
សកម្មភាពកាលពីថ្ងៃព្រហស្បតិ៍នេះបានយកជាទីដៅអង្គភាពនិងបុគ្គលនានានៅក្នុងប្រទេសអ៊ីរ៉ង់ដែលមានទាក់ទិននឹងការផលិតដ្រូន។
ការដាក់ទណ្ឌកម្មទាំងនេះ សំដៅធ្វើឱ្យអ៊ីរ៉ង់មានការទទួលខុសត្រូវដល់ការវាយប្រហាររបស់ខ្លួនកាលពីចុងសប្តាហ៍កន្លង និងដើម្បីបង្អាក់សកម្មភាពបែបនេះទៀត។ ប៉ុន្តែផលប៉ះពាល់ទំនងជាមានកម្រិតពីព្រោះក្រុមហ៊ុនដែលត្រូវយកធ្វើជាទីដៅទាំងនោះបានរងទណ្ឌកម្មរបស់អាមេរិករួចស្រេចហើយ ហើយពួកបុគ្គលដែលត្រូវចុចឈ្មោះសម្រាប់ការដាក់ទណ្ឌកម្មថ្មីៗមិនទំនងជាមានធនធានក្នុងដែនយុត្តាធិការសហរដ្ឋអាមេរិកទេ៕