គោលដៅអភិវឌ្ឍន៍សហស្សវត្សរ៍របស់អង្គការសហប្រជាជាតិនឹងបញ្ចប់នៅខែកញ្ញានេះ ហើយក៏ជាការចាប់ផ្ដើមនៃគោលដៅអភិវឌ្ឍន៍ប្រកបដោយចីរភាពផងដែរ។ គោលដៅមួយនៃគោលដៅអភិវឌ្ឍន៍ដោយចីរភាពទាំង១៧ បានអំពាវនាវឲ្យមានការធានាលើការរស់នៅល្អ និងលើកម្ពស់សុខុមាលភាពសម្រាប់ប្រជាជនទូទៅ។ អង្គការក្រៅរដ្ឋាភិបាលមួយបាននិយាយថា ដើម្បីសម្រេចបាននូវគោលដៅនេះ គឺតម្រូវឲ្យមានការបង្កើតឡើងថ្មីៗ។
អង្គការ PATH ដែលជាអង្គការអន្តរជាតិមិនរកប្រាក់ចំណេញមួយ បានចេញរបាយការណ៍មួយស្ដីពីការទន្ទឹងរង់ចាំការបង្កើតថ្មីសម្រាប់ឆ្នាំ២០៣០ (Innovation Countdown 2030)។ លោកស្រី Claudia Harner-Jay ដែលជាមន្រ្តីជាន់ខ្ពស់នៃអង្គការនេះបានមានប្រសាសន៍ថា របាយការណ៍នេះបង្ហាញពីបច្ចេកវិទ្យាផ្សេងៗផ្នែកវជ្ជសាស្រ្តដែលមានលក្ខណៈអំណោយផល និងបានឆ្លងកាត់ការបញ្ជាក់ដ៏ត្រឹមត្រូវ។
វាជាការផ្តួចផ្តើមមួយដឹកនាំដោយអង្គការ PATH ដែលព្យាយាមបង្កើតវេទិកាមួយដើម្បីកំណត់និងវាយតំលៃ ព្រមទាំងបង្ហាញពីការបង្កើតថ្មីៗដែលអាចមានឥទ្ធិពលខ្លាំងក្លា អាចពន្លឿនការរីកចម្រើនឆ្ពោះទៅរកគោលដៅថ្មីនៃសុខភាពជាសកលនេះ ដែលគោលដៅនេះត្រូវបានដាក់បញ្ចូលទៅក្នុងគោលដៅអភិវឌ្ឍន៍ដោយចីរភាពរបស់អង្គការសហប្រជាជាតិ។
បច្ចេកវិទ្យាទាំងនេះបូករួមបញ្ចូលទាំងឱសថ ឧបករណ៍ប្រើប្រាស់ វ៉ាក់សាំង និងឧបករណ៍សម្រាប់ធ្វើរោគវិនិច្ឆ័យ។
«តើយើងកំពុងតែនិយាយអំពីទឹកប្រាក់ដ៏ច្រើនមែនទេ? តាមពិតទៅ យើងកំពុងនិយាយពីការបង្កើតថ្មីដ៏ធំជាច្រើន។ ខ្ញុំគិតថា វាអាស្រ័យលើដំណាក់កាលនៃការច្នៃប្រឌិតនោះ។ ជាឧទាហរណ៍ មានវ៉ាក់សាំងមួយចំនួនដែលបានដាក់បង្ហាញ ហើយវាក់សាំងទាំងនេះត្រូវការថវិកាជាច្រើនបន្ថែមទៀតដើម្បីឲ្យវាដំណើរការឆ្ពោះទៅមុខបាន។ ទន្ទឹមនឹងនោះ ក៏មានការបង្កើតថ្មីនៅដំណាក់កាលក្រោយៗទៀត ដែលនៅតែជួបបញ្ហាប្រឈមក្នុងការផលិតឲ្យចេញហើយមានប្រសិទ្ធភាពពិតប្រាកដ»។
លោកស្រី Harner-Jay បានបន្ថែមថា បច្ចេកវិទ្យាមួយដែលបានដាក់បញ្ចូលក្នុងរបាយការណ៍នេះ គឺឧបករណ៍បន្សុទ្ធទឹកធុនតូច។
នៅក្នុងរបាយការណ៍នេះដែរ មានការបង្កើតថ្មីមួយដែលគេហៅថា Zimba។ វាជាម៉ាស៊ីនលាយជាតិក្លូរីនដើរដោយស្វ័យប្រវត្តិ ដែលត្រូវបានបង្កើតឡើងនៅក្នុងប្រទេសឥណ្ឌា។ វាជាប្រភេទឧបករណ៍ដ៏រឹងមាំមួយដែលអាចដាក់នៅលើអណ្តូងស្នប់ដៃ ឬនៅលើក្បាលរ៉ូបីនេទឹកក្នុងសហគមន៍ ហើយវាអាចលាយសារធាតុក្លូរីនចូលទៅក្នុងទឹកនោះដោយស្វ័យប្រវត្តិ។
នៅក្នុងរបាយការណ៍របស់អង្គការ PATH គេបានដាក់បង្ហាញការបង្កើតថ្មីៗចំនួន៣០ មានដូចជា ម៉ាស៊ីនសម្រាប់ដាស់ទារកទើបកើតឲ្យដឹងខ្លួន ដើម្បីជួយដល់ការដកដង្ហើមរបស់ទារកឲ្យបានល្អ ឧបករណ៍វាស់ស្ទង់សម្ពាធឈាមដែលអាចកាន់នៅនឹងដៃសម្រាប់ត្រួតពិនិត្យការឈឺចាប់នៅពេលស្រ្តីសម្រាលកូន ហើយនិងរូបមន្តថ្មីៗក្នុងការផលិតសារធាតុអុកស៊ីតូស៊ីនដែលអាចបំបាត់ការឈឺចាប់ដ៏មានប្រសិទ្ធភាពដើម្បីគ្រប់គ្រងការហូរឈាមក្រោយពេលសម្រាលកូន។
«យើងបានបង្ហាញគំរូឥទ្ធិពលនៃការបង្កើតថ្មីមួយចំនួនមកលើសុខភាពរបស់ម្តាយ ទារក និងទារកទើបកើតនៅឆ្នាំនេះ។ យើងបានប្រើឧបករណ៍ជំរុញគំរូសំខាន់ៗមួយចំនួននៃការបង្កើតថ្មីទាំងនោះដោយបង្ហាញពីដែនឥទ្ធិពល និងវត្តមាន ព្រមទាំងការប្រើប្រាស់ការបង្កើតថ្មីនោះនៅក្នុងលក្ខខណ្ឌពិតប្រាកដមួយ និងប្រកបដោយប្រសិទ្ធភាព។ បន្ទាប់មក យើងក៏បានប៉ាន់ប្រមាណពីជីវិតមនុស្សដែលអាចជួយសង្រ្គោះបាន ដោយពឹងផ្អែកលើការសន្មតមួយចំនួនទាក់ទងនឹងរបៀបដែលបុគ្គលម្នាក់ៗស្វែងរកសេវាថែទាំសុខភាព របៀបទទួលបានការបង្កើតឡើងថ្មីៗផ្នែកសេវាសុខភាព ក៏ដូចជាការបង្កើតថ្មីផ្សេងៗទៀត»។
អង្គការ PATH ក៏បានបង្ហាញត្រួសៗអំពីវ៉ាក់សាំងទប់ទល់នឹងមេរោគអេដស៍ ជំងឺគ្រុនចាញ់ និងការធ្វើតេស្តរោគវិនិច្ឆ័យជំងឺរបេងដោយត្រូវការរយៈពេលខ្លី ព្រមទាំងការបណ្តុះបណ្តាលបុគ្គលិកសុខាភិបាលកម្រិតទាបឲ្យចេះវិនិច្ឆ័យរោគនិងព្យាបាលជំងឺទឹកនោមផ្អែម និងចេះពិនិត្យជំងឺទាក់ទង់នឹងភ្នែកដូចជាបាយភ្នែក និងស្រវាំងភ្នែក ដោយចល័តពីកន្លែងមួយទៅកន្លែងមួយនិងមានតម្លៃសមរម្យ។
កិច្ចប្រជុំកំពូលរបស់អង្គការសហប្រជាជាតិដើម្បីអនុម័តរបៀបវារៈនៃការអភិវឌ្ឍន៍នៅក្រោយឆ្នាំ២០១៥ នឹងត្រូវធ្វើឡើងចាប់ពីថ្ងៃទី២៥ដល់ថ្ងៃទី២៧ ខែកញ្ញាខាងមុខ។
«ជាការពិត យើងយកចិត្តទុកដាក់លើការបង្កើតថ្មីដែលអាចពន្លឿនវឌ្ឍនភាពឆ្ពោះទៅរកគោលដៅទីបីនៃការអភិវឌ្ឍន៍ប្រកបដោយចីរភាព នោះគឺការធានាឲ្យមានជីវិតរស់នៅល្អ និងការលើកកម្ពស់សុខុមាលភាពសម្រាប់មនុស្សគ្រប់វ័យ។ ហើយគោលដៅដ៏ជាក់លាក់មួយទាក់ទង់នឹងសុខភាព គឺសង្កត់ធ្ងន់ទៅលើអត្រាមរណភាព។ ដូច្នេះ ការច្នៃបង្កើតឡើងថ្នីៗរួមមាន ការកាត់បន្ថយអត្រាមរណភាពរបស់មាតានៅទូទាំងពិភពលោកឲ្យនៅតិចជាង៧០នាក់ក្នុងចំណោមមាតា១០០.០០០នាក់ ឬបញ្ឈប់កុំឲ្យមានការស្លាប់របស់ទារកដែលទើបនឹងកើតនិងកុមារដែលមានអាយុក្រោមប្រាំឆ្នាំ»។
លោកស្រី Harner-Jay បាននិយាយថា អង្គការ PATH កំពុងសហការជាមួយសហគ្រិន វិនិយោគិន អ្នកបង្កើតថ្មី និងអ្នកជំនាញដើម្បីលើកកម្ពស់ការយល់ដឹងអំពីការបង្កើតថ្មីៗផ្នែកសុខាភិបាល ដើម្បីទាក់ទាញពួកគេអោយចូលរូមប្រើប្រាស់។ លោកស្រីបានបញ្ជាក់ដែរថា នៅស្របពេលដែលការបង្កើតថ្មីចំនួន៣០ត្រូវបានបង្ហាញត្រួសៗនៅក្នុងរបាយការណ៍នេះ ក៏មានការបង្កើតថ្មីជាច្រើនទៀតត្រូវបានបញ្ជូនមកកាន់អង្គការ PATH។ អង្គការ PATH មានបំណងដាក់បង្ហាញការបង្កើតថ្មីទាំងនោះតាមរយៈឧបករណ៍បង្ហាញទិន្នន័យដោយប្រើប្រាស់អ៊ីនធឺណិត ដើម្បីឲ្យសាធារណជនបានឃើញនិងយល់ដឹងអំពីដំណើរការនៃការបង្កើតថ្មីទាំងនោះ៕
ប្រែសម្រួលដោយ អ៊ុំ សូនីតា