សង្គមស៊ីវិលដែលធ្វើការលើផ្នែកលើកស្ទួយសិទ្ធិមនុស្នើ ស្នើឲ្យមានការពង្រីកលំហសេរីភាពសារព័ត៌មានបន្ថែមទៀតនៅកម្ពុជា ក្រោយពីមានការថ្លែងសរសើរពីសំណាក់លោកនាយករដ្ឋមន្រ្តី ហ៊ុន សែន ចំពោះភាពសកម្មរបស់អ្នកសារព័ត៌មាន និងស្ថាប័នព័ត៌មានក្នុងស្រុកដែលធ្វើសេចក្តីរាយការណ៍ពាក់ព័ន្ធនឹងវិធានការឆ្លើយតបនានារបស់រដ្ឋាភិបាល អំឡុងពេលមានការឆ្លងរាតត្បាតធ្ងន់ធ្ងរនៃជំងឺកូវីដ១៩។
នៅក្នុងសារលិខិតដែលធ្វើឡើងបីថ្ងៃមុនការប្រារព្ធវេទិកានិពន្ធនាយកសារព័ត៌មានកម្ពុជាស្តីពី«កូវីដ១៩៖ បញ្ហា ប្រឈម និងឱកាសសម្រាប់អ្នកសារព័ត៌មាន» នៅថ្ងៃទី១១ ខែធ្នូ ឆ្នាំ២០២១ លោក ហ៊ុន សែន បានបង្ហាញការពេញចិត្តចំពោះភាពសកម្មរបស់អ្នកកាសែត និងអង្គភាពសារព័ត៌មាន ក្នុងការផ្សព្វផ្សាយ និងចែករំលែកព័ត៌មានបានរហ័ស ដើម្បីឲ្យពលរដ្ឋដឹងនិងស្វែងយល់ពីសភាពការណ៍ពិតនៅកម្ពុជា និងនៅលើសាកលលោក ក៏ដូចជា វិធានការផ្សេងៗពាក់ព័ន្ធនឹងជំងឺកូវីដ១៩។
លោកនាយករដ្ឋមន្ត្រីហ៊ុន សែន ក៏បានសង្កត់ធ្ងន់ថា កិច្ចសហការល្អក្នុងការប្រយុទ្ធប្រឆាំងព័ត៌មានមិនពិត និងព័ត៌មានក្លែងក្លាយ បានធ្វើឲ្យរដ្ឋាភិបាលប្តេជ្ញាចិត្តក្នុងការលើកកម្ពស់ភាពជាដៃគូជាមួយស្ថាប័នព័ត៌មានដើម្បីរក្សា«សន្តិភាព និងការអភិវឌ្ឍ»ផងដែរ។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជាហៅកាត់ថា ខេមបូចា លោក ណុប វី បានប្រាប់វីអូអេនៅថ្ងៃចន្ទនេះថា កន្លងមក អ្នកសារព័ត៌មានមួយចំនួនបានប្រឈមនឹងការរឹតត្បិតផ្សេងៗក៏ដូចជាចំណាត់ការផ្លូវច្បាប់ក្នុងការរាយការណ៍ព័ត៌មានអំឡុងពេលមានវិបត្តិជំងឺកូវីដ១៩ ខណៈលោកលើកឡើងថា ច្បាប់ស្តីពីសេរីភាពសារព័ត៌មាននៅមិនត្រូវបានប្រកាន់ខ្ជាប់បានពេញលេញនៅឡើយ។
លោកបានថ្លែងថា៖ «ការរឹតត្បិតនេះគឺ យើងឃើញមានរហូតទៅដល់អ្នកសារព័ត៌មានមួយចំនួនហ្នឹង គឺត្រូវបានចាប់ដាក់ពន្ធនាគារទៅទៀត។ ក្រៅពីនេះទៀតយើងឃើញថា អ្នកសារព័ត៌មានមួយចំនួនទៀតក៏ទទួលរងនូវការដកអាជ្ញាបណ្ណពីខាងក្រសួងព័ត៌មានដែរ។ នេះ គឺជាការរឹតត្បិតមួយដែលយើងឃើញថា ខាងសមត្ថកិច្ចក៏ដូចជា ក្រសួងយើងមិនបានអនុវត្តនូវជាពិសេស ច្បាប់ស្តីពីរបបសារព័ត៌មានហ្នឹង គឺយើងមិនមានការយកមកអនុវត្តទេនៅក្នុងអំឡុងពេលហ្នឹង»។
ដំណាលគ្នានេះដែរ លោក ណុប វី ក៏បានស្នើឲ្យមានការពង្រឹងច្បាប់ស្តីពីរបបសារព័ត៌មាន និងការគាំទ្រក៏ដូចជាការបង្ហាញឆន្ទៈពិតប្រាកដពីសំណាក់រដ្ឋាភិបាលក្នុងការសហការ និងផ្តល់ជាការគាំពារផ្នែកសុវត្ថិភាព និងសន្តិសុខដល់អ្នកសារព័ត៌មានផងដែរ។
បើតាមសមាគមខេមបូចា ក្នុងរយៈពេល១០ខែចុងក្រោយ គឺគិតពីខែមករាដល់ខែតុលា ឆ្នាំ២០២១ មានអ្នកកាសែតចំនួន ៨១នាក់ បានក្លាយជាគោលដៅនៃការយាយី ដែលក្នុងនោះ ពួកគេបានរងអំពើហិង្សា២០ករណី ការគំរាមកំហែង១៦ករណីប្រឈមនឹងវិធានការតុលាការ ៨ ករណី និងត្រូវបានឃុំខ្លួនដើម្បីសួរនាំចំនួន ៦ ករណីក្នុងនោះ មានស្ត្រីម្នាក់ផងដែរ។
អ្នកនាំពាក្យសមាគមសិទ្ធិមនុស្សអាដហុក លោក សឹង សែនករុណា សង្កេតឃើញថា សេរីភាពសារព័ត៌មាននៅកម្ពុជា នៅបន្តធ្លាក់ចុះ បន្ទាប់ពីស្ថានភាពនយោបាយចាប់ផ្តើមមានភាពអាប់អ៊ួរ។
លោកថ្លែងថា៖ «អ្នកសារព័ត៌មានដែលគាត់ជាអ្នកសារព័ត៌មានហ៊ានបញ្ចេញមតិរិះគន់រដ្ឋាភិបាល សរសេរពីភាពអសកម្មរបស់មន្រ្តីអាជ្ញាធរមួយចំនួនហ្នឹង នៅរងការរឹតត្បិតនៅឡើយ នៅរងការរើសអើងនៅឡើយ។ ហើយនៅទីតាំងមួយចំនួន មិនបានផ្តល់សិទ្ធិឲ្យគាត់បានចូលយកព័ត៌មានអីជាដើមអ៊ីចឹងទៅ។ នេះ គឺជាអ្វីដែលយើងបានកត់សម្គាល់»។
ស្របពេលដូចគ្នានេះ អ្នកការពារសិទ្ធិមនុស្សរូបនេះ បានអំពាវនាវឲ្យមានការបញ្ឈប់ការរឹតត្បិត និងការរើសអើងអ្នកសារព័ត៌មាន និងបានជំរុញឲ្យមានការបើកស្ថាប័នផ្សព្វផ្សាយព័ត៌មានមួយចំនួនឡើងវិញ ដែលត្រូវបានបង្ខំឲ្យបិទ បន្ទាប់ពីមានការបង្រ្កាបកាលពីពេលកន្លងមកនោះ។
វីអូអេ មិនអាចសុំការអធិប្បាយពីលោក មាស សុភ័ណ្ឌ អ្នកនាំពាក្យក្រសួងព័ត៌មានបាននៅឡើយទេ នៅថ្ងៃចន្ទនេះ។
គួរបញ្ជាក់ថា កម្ពុជាជាប់ចំណាត់ថ្នាក់លេខ ១៤៤ ក្នុងចំណោមប្រទេសចំនួន ១៨០ក្នុងសន្ទស្សន៍សេរីភាពសារព័ត៌មានឆ្នាំ២០២១ ដែលជាចំណាត់ថ្នាក់មិនផ្លាស់ប្តូរចាប់តាំងពីឆ្នាំ២០២០មក។ នេះ បើយោងតាមអង្គការអ្នកកាសែតគ្មានព្រំដែន (Reporters Without Borders)។ សេរីភាពសារព័ត៌មាន ត្រូវបានរិះគន់ថា បន្តធ្លាក់ចុះក្រោយមានការបិទសារព័ត៌មានឯករាជ្យ និងការចាប់ខ្លួនអ្នកសារព័ត៌មានឯករាជ្យ ចាប់តាំងពីឆ្នាំ២០១៧៕