ជនជាតិជប៉ុន ១៩ នាក់ ដែលត្រូវបានឃាត់ខ្លួនតាំងពីខែមករា ឆ្នាំ២០២៣ ក្នុងខេត្តព្រះសីហនុ ត្រូវបានបណ្តេញចេញពីប្រទេសកម្ពុជា នារសៀលថ្ងៃអង្គារនេះ តាមជើងយន្តហោះដាច់ដោយឡែកមួយ ដោយមានការយាមកាមដោយនគរបាលជប៉ុនដោយផ្ទាល់។
ការបញ្ជូនពួកគេទៅក្រៅប្រទេសនេះមានការសហការជាមួយអាជ្ញាធរជប៉ុន ដោយនគរបាលជប៉ុនប្រមាណ ៥០ នាក់បានមកប្រទេសកម្ពុជាដោយផ្ទាល់ ដើម្បីពិនិត្យមើលជនជាតិជប៉ុនទាំងនោះ។
ជនជាតិជប៉ុនទាំងនោះត្រូវបានបញ្ជូនចេញតាមច្រកអាកាសយានដ្ឋានអន្តរជាតិភ្នំពេញ តាមជើងយន្តហោះដាច់ដោយឡែកមួយ។
ស្ថានទូតជប៉ុនប្រចាំនៅកម្ពុជាប្រាប់វីអូអេតាមសារអ៊ីម៉ែលនៅថ្ងៃអង្គារនេះថា មូលហេតុដែលអាជ្ញាធរកម្ពុជាបញ្ជូនជនជាតិជប៉ុនទៅកាន់ប្រទេសជប៉ុនវិញ ដោយសារតែពួកគេស្នាក់នៅខុសច្បាប់នៅក្នុងប្រទេសកម្ពុជា។
នៅពេលសួរថា តើពួកគេទាំង១៩នាក់នោះជាជនរងគ្រោះ ឬជនប្រព្រឹត្តបទល្មើស ស្ថានទូតជប៉ុនបានបដិសេធមិនផ្តល់មតិយោបល់ ដោយសារតែករណីនេះកំពុងស្ថិតនៅក្នុងការស៊ើបអង្កេតនៅឡើយ។
ជនជាតិជប៉ុនទាំង១៩នាក់នោះត្រូវបានឃាត់ខ្លួនក្នុងខេត្តព្រះសីហនុ កាលពីថ្ងៃទី២៦ ខែមករា ឆ្នាំ២០២៣ នៅសណ្ឋាគារមួយឈ្មោះថា Mary Beach Hotel and Resort។
ស្នងការខេត្តព្រះសីហនុ លោក ជួន ណារិន្ទ ប្រាប់វីអូអេថា ក្រោយទទួលបានបណ្តឹងតាមរយៈទំព័រហ្វេសប៊ុករបស់រដ្ឋមន្ត្រីក្រសួងមហាផ្ទៃ ប៉ូលិសខេត្តបាននាំគ្នាចុះត្រួតពិនិត្យ ហើយឃាត់ខ្លួនពួកគេនៅក្នុងសណ្ឋាគារមួយ។
បើតាមស្នងការរូបនេះ ដោយសារតែសមត្ថភាពរបស់សមត្ថកិច្ចខេត្តនៅមានកម្រិត ហេតុនេះជនជាតិជប៉ុនទាំង ១៩ នាក់ត្រូវបានបញ្ជូនមកថ្នាក់លើដើម្បីវាយតម្លៃ។
លោកថ្លែងថា៖ «សូមអធ្យាស្រ័យព្រោះពួកខ្ញុំមិនអាចវាយតម្លៃច្បាស់លាស់អំពីល្បែងអីខ្លះទេ ព្រោះខ្ញុំអត់មានបច្ចេកទេសជំនាញហ្នឹង»។
យន្តហោះម៉ាឡេស៊ីមួយគ្រឿងចុះចតនៅអាកាសយានដ្ឋានអន្តរជាតិភ្នំពេញ ក្នុងរាជធានីភ្នំពេញ ប្រទេសកម្ពុជា នៅថ្ងៃអង្គារ ទី១១ ខែមេសា ឆ្នាំ២០២៣ មុនពេលដឹកជញ្ជូនពលរដ្ឋជប៉ុន ដែលត្រូវបានចាប់ខ្លួន ក្រោមការសង្ស័យពីបទឆបោកតាមទូរសព្ទ។
លោក កែវ វណ្ណថន អគ្គនាយករង និងជាអ្នកនាំពាក្យនៃអគ្គនាយកដ្ឋានអន្តោប្រវេសន៍ ថ្លែងថា ជនជាតិជប៉ុនទាំង១៩នាក់ត្រូវបានបណ្តេញចេញ ពីព្រោះពួកគេធ្វើការនិងស្នាក់នៅខុសច្បាប់នៅក្នុងប្រទេសកម្ពុជា។
លោកបញ្ជាក់ថា៖ «អ្នកខ្លះគាត់ស្នាក់នៅលើសទិដ្ឋាការ។ អាហ្នឹងខុសច្បាប់អន្តោប្រវេសន៍ ហើយអ្នកខ្លះគាត់ធ្វើការងារនៅកម្ពុជាដោយអត់មានបណ្ណការងារ។ អាហ្នឹងខុសច្បាប់»។
រដ្ឋលេខាធិការ និងជាអ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់វីអូអេថា ពួកគេទាំង១៩នាក់នោះត្រូវបានបណ្តេញចេញពីប្រទេសកម្ពុជានៅអង្គារនេះ ដោយសារតែពួកគេស្នាក់នៅខុសច្បាប់ ព្រោះមិនមានលិខិតស្នាមចូលមកកម្ពុជា។
លោកបញ្ជាក់ថា៖ «តាមសំណូមពររបស់គ្រួសារគឺយើងបញ្ជូនឱ្យគាត់ទៅវិញចុះ! អត់អីទេ។ ប៉ុន្តែការងារបញ្ជូនគឺយើងនឹងដាក់ក្នុងបញ្ជីខ្មៅ ប៉ុន្តែស្ថិតតែក្នុងការងារស៊ើបអង្កេតទេ ហើយគាត់មានបទល្មើសអីបែបម៉េច គឺដូចជប៉ុនថា មិនខុសទេ ស្ថិតនៅក្នុងការស៊ើបអង្កេតរបស់សមត្ថកិច្ចកម្ពុជា»។
ទោះជាយ៉ាងណា សារព័ត៌មានជប៉ុន NHK បានចេញផ្សាយកាលពីសប្តាហ៍មុនថា អាជ្ញាធរជប៉ុនបានទទួលដីកាចាប់ខ្លួនជនជាតិជប៉ុនទាំង ១៩ នាក់នោះ ដោយសង្ស័យពាក់ព័ន្ធនឹងការឆបោកតាមប្រព័ន្ធទូរសព្ទលើជនជាតិជប៉ុន ដោយប្រើប្រាស់ទីតាំងក្នុងប្រទេសកម្ពុជា។ សារព័ត៌មាន NHK ចុះផ្សាយទៀតថា ជនជាតិជប៉ុនទាំងនោះបានឆបោកប្រាក់ប្រមាណ ១.៩០០ ដុល្លារតាមប្រព័ន្ធអេឡិចត្រូនិកពីស្រ្តីជនជាតិជប៉ុនម្នាក់ វ័យ៦០ឆ្នាំ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់វីអូអេតាមប្រព័ន្ធតេឡេក្រាមថា បទល្មើសបច្ចេកវិទ្យាកំពុងកើនឡើងខ្លាំង ខណៈអាជ្ញាធរកម្ពុជាចាត់វិធានការជាបន្តបន្ទាប់ ប៉ុន្តែនៅមិនឃាត់មេខ្លោងធំបានទេ។
បើតាមអ្នកនាំពាក្យរូបនេះ មានជនបរទេសជាច្រើនដែលចាញ់បោកគេនៅក្នុងប្រទេសកម្ពុជា ដែលលោកថា វាធ្វើឱ្យប៉ះពាល់ដល់មុខមាត់ប្រទេសកម្ពុជា។
លោក ស៊ឹង សែនករុណា ជំរុញឱ្យមានការពង្រឹងបន្ថែមសមត្ថភាពរបស់អាជ្ញាធរ នៅក្នុងការស៊ើបអង្កេត។
លោកថ្លែងថា៖ «អ៊ីចឹងយើងគួរតែធ្វើយ៉ាងណាឱ្យបង្ហាញអំពីសមត្ថភាពនៃមន្ត្រី អនុវត្តច្បាប់របស់យើងឱ្យបានកាន់តែខ្លាំងក្លា ដោយបង្ហាញថា យើងមិនបានជាទីតាំង ឬក៏កន្លែងដែលផ្តល់ឱកាសទៅដល់ជនប្រព្រឹត្តបទល្មើសណាមួយឡើយ»។
មួយរយៈចុងក្រោយនេះ ប្រទេសកម្ពុជាត្រូវបានប្រើប្រាស់ជាកន្លែងបោកបញ្ឆោតតាមប្រព័ន្ធអ៊ីនធឺណិត (Scam) ដោយប្រើប្រាស់កម្លាំងពលកម្មបរទេសធ្វើការនៅតាមអគារខ្ពស់ៗនៅក្នុងប្រទេសកម្ពុជា រហូតមានសេចក្តីរាយការណ៍អំពីការបង្ខាំងទុកពួកគេមិនឱ្យមានសេរីភាព ការធ្វើទារុណកម្ម និងការជំរិតទារប្រាក់ជាដើម។ ឧក្រិដ្ឋជន ដែលភាគច្រើនជាជនបរទេស បានជួលអគារ ឬទីតាំងពីអ្នកជំនួញដែលជាជនជាតិខ្មែរដើម្បីប្រព្រឹត្តអំពើទាំងនោះ។
ជនបរទេសសរុបប្រមាណ២.១០០នាក់ត្រូវបានជួយសង្រ្គោះតាមរយៈពាក្យបណ្តឹងមករដ្ឋមន្រ្តីក្រសួងមហាផ្ទៃ គិតចាប់តាំងពីខែសីហា ឆ្នាំ២០២២ ដែលមានការចុះបង្រ្កាបពាក់ព័ន្ធនឹងការជួញដូរកម្លាំងពលកម្មបរទេស និងការបង្ខាំងមនុស្សក្នុងប្រទេសកម្ពុជា។ នេះបើយោងតាមសារដែលបង្ហោះនៅលើហ្វេសប៊ុករបស់លោក ស ខេង រដ្ឋមន្រ្តីក្រសួងមហាផ្ទៃ កាលពីថ្ងៃទី៧ ខែមេសា ឆ្នាំ២០២៣។ បើតាមរដ្ឋមន្រ្តីក្រសួងមហាផ្ទៃ គិតចាប់ពីថ្ងៃទី១៨ ខែសីហា ឆ្នាំ២០២២ ដល់ថ្ងៃទី៦ ខែមេសា ឆ្នាំ២០២៣ មានពាក្យបណ្ដឹងសុំកិច្ចអន្តរាគមន៍ចំនួន ៨៣០ ករណី ដែលពាក់ព័ន្ធនឹងជនបរទេសសរុប ២.០៩៤ នាក់ ដែលមាន ១៦ សញ្ជាតិ ហើយភាគច្រើនជាជនជាតិចិន វៀតណាម និងឥណ្ឌូណេស៊ី។ ពាក្យបណ្ដឹងទាំងនោះបានប្ដឹងចូលទំព័រហ្វេសប៊ុករបស់រដ្ឋមន្រ្តីក្រសួងមហាផ្ទៃ អគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍៕