ជនបរទេសសរុបប្រមាណ២១០០នាក់ត្រូវបានជួយសង្រ្គោះតាមរយៈពាក្យបណ្តឹងមករដ្ឋមន្រ្តីក្រសួងមហាផ្ទៃ គិតចាប់តាំងពីខែសីហា ឆ្នាំ២០២២ដែលមានការចុះបង្រ្កាបពាក់ព័ន្ធនឹងការជួញដូរកម្លាំងពលកម្មបរទេស និងការបង្ខាំងមនុស្សក្នុងប្រទេសកម្ពុជា។ នេះបើយោងតាមសារដែលបង្ហោះនៅលើហ្វេសប៊ុករបស់លោក ស ខេង រដ្ឋមន្រ្តីក្រសួងមហាផ្ទៃ កាលពីថ្ងៃទី៧ ខែមេសា ឆ្នាំ២០២៣។
បើតាមសារដែលបង្ហោះនោះ សមត្ថកិច្ចកម្ពុជា កាលពីពេលថ្មីៗនេះ បានធ្វើអន្តរាគមន៍ជួយសង្គ្រោះជនជាតិចិន៤នាក់នៅក្នុងខេត្តព្រះសីហនុ ដែលត្រូវបានជនជាតិចិនដូចគ្នាបោកបញ្ឆោតឱ្យមកធ្វើការខុសពីការសន្យា។ កិច្ចអន្តរាគមន៍នេះធ្វើឡើងក្រោយជនរងគ្រោះបានសរសេរពាក្យបណ្ដឹងចូលហ្វេសប៊ុករបស់លោក ស ខេង កាលពីថ្ងៃទី២៨ ខែមីនា ឆ្នាំ២០២៣។
ចាប់តាំងពីខែសីហា ឆ្នាំ២០២២ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានដាក់ចេញផែនការប្រតិបត្តិការ បង្កើនការប្រយុទ្ធប្រឆាំងគ្រប់ទម្រង់នៃអំពើជួញដូរមនុស្ស ជួញដូរកម្លាំងពលកម្ម និងអាជីវកម្មផ្លូវភេទ ព្រមទាំងបានបង្កើតគណៈបញ្ជាការដឹកនាំប្រតិបត្តិការ ដើម្បីធ្វើជាសេនាធិការក្នុងការដឹកនាំ និងបញ្ជាដោយផ្ទាល់នូវប្រតិបត្តិការបង្ក្រាប និងជួយសង្គ្រោះជនរងគ្រោះ។
លោក ស ខេង ដែលជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ក៏បានអំពាវនាវឱ្យសាធារណជន ជាតិ-អន្តរជាតិ ស្ថានតំណាងបរទេសប្រចាំកម្ពុជា និងអាជ្ញាធរមានសមត្ថកិច្ចនៃបណ្តាប្រទេសពាក់ព័ន្ធសហការផ្តល់ព័ត៌មានពាក់ព័ន្ធអំពើជួញដូរមនុស្ស និងឧក្រិដ្ឋកម្មឆ្លងដែនផ្សេងទៀត ដើម្បីបង្ការ ទប់ស្កាត់ និងបង្ក្រាបឱ្យបានទាន់ពេលវេលាប្រកបដោយប្រសិទ្ធភាព។
បើតាមរដ្ឋមន្រ្តីក្រសួងមហាផ្ទៃ គិតចាប់ពីថ្ងៃទី១៨ ខែសីហា ឆ្នាំ២០២២ ដល់ថ្ងៃទី៦ ខែមេសា ឆ្នាំ២០២៣ មានពាក្យបណ្ដឹងសុំកិច្ចអន្តរាគមន៍ចំនួន៨៣០ករណី ដែលពាក់ព័ន្ធនឹងជនបរទេសសរុប២០៩៤នាក់ ដែលមាន១៦សញ្ជាតិ ហើយភាគច្រើនជាជនជាតិចិន វៀតណាម និងឥណ្ឌូណេស៊ី។ ពាក្យបណ្ដឹងទាំងនោះបានប្ដឹងចូលទំព័រហ្វេសប៊ុករបស់រដ្ឋមន្រ្តីក្រសួងមហាផ្ទៃ អគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍។
រដ្ឋមន្រ្តីក្រសួងមហាផ្ទៃបញ្ជាក់ក្នុងសារបង្ហោះលើហ្វេសប៊ុកថា៖ «ផ្អែកតាមលទ្ធផលនៃកិច្ចខិតខំប្រឹងប្រែងរបស់អាជ្ញាធរមានសមត្ថកិច្ចកម្ពុជា ភាគច្រើននៃបណ្ដឹងទាំងនោះត្រូវបានដោះស្រាយយ៉ាងមានប្រសិទ្ធភាព ពោលគឺទាំងការសង្គ្រោះជនរងគ្រោះ ការបិទទីតាំងអាជីវកម្មខុសច្បាប់ ការចាប់ជនល្មើសបញ្ជូនទៅតុលាការ និងការអនុវត្តនីតិវិធីបណ្ដេញចេញ»។
នៅក្នុងករណីដែលជនជាតិចិន៤នាក់ត្រូវបានជួយសង្រ្គោះ កាលពីពេលថ្មីៗនេះ ក្រសួងមហាផ្ទៃឱ្យដឹងថា ពួកគេចូលមកកម្ពុជាតាមច្រកអាកាសយានដ្ឋានអន្តរជាតិភ្នំពេញ ក្នុងគោលបំណងមកធ្វើការងារជាចុងភៅនៅខេត្តព្រះសីហនុ ដោយមានគេសន្យាផ្តល់ប្រាក់ជាង២ពាន់ដុល្លារ។ ប៉ុន្តែក្រុមហ៊ុនបែរជាតម្រូវឱ្យពួកគេធ្វើការផ្នែកអនឡាញ ខុសពីគោលបំណងដើមជាចុងភៅ។ ក្រសួងមិនបានបញ្ជាក់ថា តើផ្នែកអនឡាញនោះពាក់ព័ន្ធនឹងសកម្មភាពអ្វីនោះទេ។
រដ្ឋលេខាធិការ និងជាអ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់វីអូអេនៅថ្ងៃចន្ទនេះថា ជនរងគ្រោះជាង២០០០នាក់នេះត្រូវបានបញ្ជូនទៅកាន់មាតុភូមិរបស់ពួកគេវិញហើយ។
បើតាមអ្នកនាំពាក្យរូបនេះ ពួកគេខ្លះត្រូវបានរកឃើញនៅអគារដែលម្ចាស់ជាជនជាតិខ្មែរ ប៉ុន្តែមិនមានចំណាត់លើម្ចាស់អគារអ្វីឡើយ។
លោកបញ្ជាក់ថា៖ «ប៉ុន្តែទោះជាយ៉ាងណាក៏ដោយ ម្ចាស់អគារទីតាំង គេតែដាក់មិនប្រព្រឹត្តអំពើគ្រឿងញៀន និងអីផ្សេងៗទៀត នៅក្នុងកុងត្រា មិនឱ្យធ្វើខុសច្បាប់រដ្ឋ ទទួលខុសត្រូវខ្លួនឯង។ គេបានដាក់ទាំងអស់ហើយ អ៊ីចឹងយើងមិនអាចទៅចាប់ទោសអូសដំណើរអ្នកដែលជួលទីតាំងនោះទេ»។
អ្នកនាំពាក្យ និងជាអភិបាលរងខេត្តព្រះសីហនុ លោក ឡុង ឌីម៉ង់ លើកឡើងថា ភាគច្រើនម្ចាស់ផ្ទះមិនពាក់ព័ន្ធជាមួយការប្រព្រឹត្តអំពើទាំងនោះឡើយ ហេតុនេះក៏មិនមានចំណាត់ការអ្វីដែរ។
លោកថ្លែងថា៖ «អ៊ីចឹងយើងមានតែការផ្សព្វផ្សាយ បញ្ជ្រាបការយល់ដឹងបែបនេះដល់ម្ចាស់ទីតាំង ដើម្បីឱ្យគាត់ចូលរួមចំណែកក្នុងការផ្តល់ការសហការ ក្នុងការផ្តល់ព័ត៌មានផ្សេងៗមកដល់សមត្ថកិច្ចវិញ»។
លោកបន្ថែមថា ជនរងគ្រោះទាំងនោះត្រូវបានបញ្ជូនមកសមត្ថកិច្ចថ្នាក់លើដើម្បីចាត់វិធានការបន្ត។
លោក អំ សំអាត នាយករងទទួលបន្ទុកកម្មវិធីឃ្លាំមើលសិទ្ធិមនុស្សនៃអង្គការលីកាដូ ប្រាប់វីអូអេថា អង្គការសង្គមស៊ីវិលនៅតែមានការព្រួយបារម្ភពាក់ព័ន្ធនឹងការជួញដូរមនុស្សនៅកម្ពុជា ខណៈកម្ពុជាស្ថិតក្នុងចំណាត់ថ្នាក់ទាបក្នុងការបង្រ្កាបការជួញដូរមនុស្សនៅឡើយ។ លោកបន្ថែមថា រដ្ឋាភិបាលត្រូវតែមានឆន្ទៈពិតប្រាកដ និងការតាំងចិត្តខ្ពស់នៅក្នុងការដោះស្រាយបញ្ហានេះ ដើម្បីកុំឱ្យប៉ះពាល់មុខមាត់កម្ពុជា ជាពិសេសជះផលអាក្រក់ដល់ការវិនិយោគនៅក្នុងប្រទេស ។
លោកបញ្ជាក់ថា៖ «កម្ពុជាយើងត្រូវតែមានការខិតខំនិងការប្រឹងប្រែងទៅលើការបង្ក្រាបនិងទប់ស្កាត់ការជួញដូរមនុស្ស ពីព្រោះបញ្ហាទាំងអស់នេះវាជះឥទ្ធិពល ប៉ះពាល់ដល់កម្ពុជា មុខមាត់កម្ពុជាយើង»។
មួយរយៈចុងក្រោយនេះ ប្រទេសកម្ពុជាត្រូវបានប្រើប្រាស់ជាកន្លែងបោកបញ្ឆោតតាមប្រព័ន្ធអ៊ីនធឺណិត (Scam) ដោយប្រើប្រាស់កម្លាំងពលកម្មបរទេសធ្វើការនៅតាមអគារខ្ពស់ៗនៅក្នុងប្រទេសកម្ពុជា រហូតមានសេចក្តីរាយការណ៍អំពីការបង្ខាំងទុកពួកគេមិនឱ្យមានសេរីភាព ការធ្វើទារុណកម្ម និងការជំរិតទារប្រាក់ជាដើម។ ឧក្រិដ្ឋជន ដែលភាគច្រើនជាជនបរទេស បានជួលអគារ ឬទីតាំងពីអ្នកជំនួញដែលជាជនជាតិខ្មែរដើម្បីប្រព្រឹត្តអំពើទាំងនោះ។
គួរបញ្ជាក់ថា របាយការណ៍ប្រចាំឆ្នាំរបស់ក្រសួងការបរទេសអាមេរិកស្តីពីការជួញដូរមនុស្ស ចេញផ្សាយកាលពីខែកក្កដា ឆ្នាំ២០២២ បង្ហាញថា កម្ពុជាបានធ្លាក់ចំណាត់ថ្នាក់ពីកម្រិតពីរ (Tier 2) មកកម្រិតបី (Tier 3) ដែលជាចំណាត់ថ្នាក់ទាបបំផុតមួយ និងមានន័យថា រដ្ឋាភិបាលកម្ពុជាមិនបានខិតខំធ្វើអ្វីជាដុំកំភួនដើម្បីកែលម្អ ហើយមិនបានបំពេញតាមបទដ្ឋានអប្បបរមា ដូចដែលបានកំណត់។ របាយការណ៍នេះក៏បានលើកឡើងអំពីការកេងប្រវ័ញ្ចតាមប្រព័ន្ធអ៊ីនធឺណិត ឬហៅថា Scam ផងដែរ៕
