លោក Abe បាននិយាយដូច្នេះកាលពីយប់ថ្ងៃសៅរ៍ ដោយលោកឈរនៅជិតលោកប្រធានាធិបតី ស.រ.អា. ដូណាល់ ត្រាំ នៅក្នុងសន្និសីទកាសែតមួយត្រូវរៀបចំជាបន្ទាន់នៅក្នុងបន្ទប់មួយមានការលម្អឆើតឆាយនៅក្នុងគេហដ្ឋានធំមួយរបស់លោក ត្រាំ មានឈ្មោះថា Mar-a-Lago estate ក្នុងរដ្ឋ Florida ដែលនៅទីនោះលោក Abe បានទៅទស្សនាជាមួយលោក ត្រាំ កាលពីដំណាច់សប្តាហ៍នេះ។
មេដឹកនាំជប៉ុនរូបនេះបាននិយាយថា៖ «ប្រទេសកូរ៉េខាងជើងត្រូវតែគោរពពេញលេញតាមសេចក្តីសម្រេចចិត្តរបស់ក្រុមប្រឹក្សាសន្តិសុខអ.ស.ប.ដែលមានពាក់ព័ន្ធនឹងបញ្ហានេះ។ នៅក្នុងជំនួបកំពូលដែលខ្ញុំបានធ្វើជាមួយលោកប្រធានាធិបតី ត្រាំ លោកបានធានារ៉ាប់រងដល់ខ្ញុំថា ស.រ.អា. នឹងឋិតនៅ១០០ភាគរយជាមួយប្រទេសជប៉ុនជានិច្ច ហើយដើម្បីបង្ហាញការប្តេជ្ញារបស់លោក លោកនៅទីនេះជាមួយខ្ញុំក្នុងសន្និសីទសារព័ត៌មាននេះ»។
លោក ត្រាំ បាននិយាយនៅក្នុងអត្ថាធិប្បាយកំបុតកំបុយរបស់លោកនៅក្នុងសន្និសីទកាសែតនេះថា៖ «ខ្ញុំចង់ឱ្យអ្នកទាំងអស់គ្នាយល់និងដឹងដោយពេញលេញថា ស.រ.អា. ឈរ១០០ភាគរយពីក្រោយប្រទេសជប៉ុនដែលជាសម្ព័ន្ធមិត្តធំមួយរបស់ផងខ្លួន»។ ការបាញ់ពិសោធន៍កាំជ្រួចមីស៊ីលនេះដោយប្រទេសកូរ៉េខាងជើងបានត្រូវបកស្រាយថាជាការប្រឆាំងនឹងរដ្ឋបាលរបស់លោក ត្រាំ៕