ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

មេដឹកនាំ​គណបក្ស​ប្រឆាំង​នៅ​សំប៊ី​បាន​ប្រកាស​ជ័យ​ជម្នះ​ក្នុង​ការ​បោះឆ្នោត​ប្រធានាធិបតី


ប្រធានាធិបតី​ជាប់ឆ្នោត​របស់​ប្រទេស​សំប៊ី​ លោក Hakainde Hichilema ថ្លែង​សុន្ទរកថា នៅ​ក្នុង​សន្និសីទ​សារព័ត៌មាន​មួយ​នៅ​លំនៅដ្ឋាន​របស់​លោក​ក្នុង​រដ្ឋធានី Lusaka ប្រទេស​សំប៊ី ថ្ងៃទី១៦ ខែសីហា ឆ្នាំ២០២១។

មេដឹកនាំ​គណ​បក្ស​ប្រឆាំង​ដ៏​សំខាន់​របស់​ប្រទេស​សំប៊ី​លោក​ Hakainde Hichilema​ ត្រូវ​បាន​ប្រកាស​ថា ជា​អ្នក​ឈ្នះ​ការ​បោះឆ្នោត​ប្រធានាធិបតី​គឺ​ឈ្នះ​ជាង​៥០%​នៃ​សំឡេង​ឆ្នោត​ដោយ​មិនចាំបាច់​មាន​ការ​បោះឆ្នោតផ្តាច់ព្រ័ត្រ។

គណៈ​កម្មការ​រៀបចំ​ការ​បោះឆ្នោត​របស់​ប្រទេស​សំប៊ី​បាន​ប្រកាស​កាលពី​ថ្ងៃ​ច័ន្ទ​នៅ​ក្នុង​រដ្ឋធានី​ Lusaka ​ថា ​ លោក​ Hakainde Hichilema​ បាន​ទទួល​សន្លឹក​ឆ្នោត​ជាង​២,៨​លាន​សំឡេង​ ហើយ​ប្រធានាធិបតី​បច្ចុប្បន្ន​គឺ​លោក ​Edgar Lungu​ ទទួល​បាន​១,៨​លាន​សំឡេង។

លោក​ Hichilema​ អាយុ​៥៩​ ឆ្នាំ​ជាអ្នក​ជំនួញ​ដែល​មាន​ទ្រព្យ​សម្បត្តិ​ និង​ជា​មេដឹក​នាំ​គណបក្ស​រួបរួម​អភិឌ្ឍន៍​ជាតិ​កំពុង​ទាមទារ​តំណែង​ប្រធានាធិបតី​ក្នុង​ការ​ព្យាយាម​លើក​ទី៦​ របស់​គាត់។

ជ័យ​ជម្នះ​របស់​លោក​ Hichilema ​ត្រូវ​បាន​ជំរុញ​ដោយ​ការ​មិន​ពេញចិត្ត​រាលដាល ​ដោយសារ​សេដ្ឋកិច្ច​របស់​ប្រទេស​នេះ​ដួល​រលំ ដោយ​ការ​ធ្លាក់ចុះ​តម្លៃ​ទង់ដែង​ ដែល​ជាទំនិញ​នាំ​ចេញ​សំខាន់​ ការ​កើនឡើង​អតិផរណា​ និង​ភាព​អត់ការ​ងារ​ធ្វើ​ ​ ដោយធ្វើ​ឱ្យ​ប្រទេស​នេះ​ក្លាយ​ជា​ប្រទេស​នៅ​អាហ្វ្រិក​ដំបូង​បង្អស់​ក្នុង​កំឡុង​ពេល​មាន​ជំងឺ​រាតត្បាត​កូវីដ​១៩​ មិន​អាច​សង​បំណុល​បរទេស​កាលពី​ឆ្នាំ​មុន។​

លោក​ Lungu ​បាន​ថ្កោល​ទោស​ថា ​ការ​បោះឆ្នោត​នេះ​«មិន​សេរី​និង​យុត្តិធម៌» ​កាលពី​ថ្ងៃ​សៅរ៍​ ​បន្ទាប់ពី​លទ្ធផល​បោះឆ្នោត​ជុំទី​១​ត្រូវ​បាន​ប្រកាស​ ដោយ​លោក​ចោទ​ថា មាន​អំពើ​ហិង្សាលើ​អ្នក​គាំទ្រ​ និង​សមាជិក​នៃ​គណបក្ស​រណសិរ្ស​ស្នេហា​ជាតិ​របស់​លោក​ដែល​កំពុង​កាន់​អំណាច។ ប៉ុន្តែ​កងកម្លាំង​រដ្ឋាភិបាល​បាន​រារាំង​មិន​ឱ្យ​លោក​ Hichilema​ ធ្វើ​យុទ្ធនាការ​នៅ​ក្នុង​តំបន់​មួយ​ចំនួន ខណៈសកម្មជន​បាន​ចោទ​ប្រកាន់​រដ្ឋាភិបាល​ថា​ ​រឹតត្បិត​យ៉ាងខ្លាំង​ទៅ​លើការ​ធ្វើ​បាតុកម្ម​ជាសាធារណៈ។​

លោក ​Lungu ​ឈរឈ្មោះ​ធ្វើប្រធានាធិបតី​អាណត្តិ​ទី​២​ដោយ​បាន​ឈ្នះ​លោក​ Hichilema នៅ​ក្នុង​ការ​បោះឆ្នោត​កាលពី​ឆ្នាំ​២០១៦។​ គាត់​អួត​អំពី​គម្រោង​ហេដ្ឋា​រចនា​សម្ព័ន្ធ​ជាច្រើន​ដែល​រដ្ឋាភិបាល​របស់​គាត់​បាន​កសាង​ក្នុង​អំឡុង​ពេល​គាត់​កាន់​តំណែង៕


(ព័ត៌មាន​ខ្លះ​ក្នុង​សេចក្តី​រាយ​ការណ៍​នេះ​ត្រូវ​បាន​ដក​ស្រង់​ពី​ទីភ្នាក់ងារ​ព័ត៌មាន ​Associated Press, Reuters និង Agence France-Presse។)

XS
SM
MD
LG