លោក Abdolnasser Hemmati ដែលជាអតីតនាយកធនាគារកណ្ដាលប្រកាន់ទស្សនៈកណ្ដាលនិយមបានសុខចិត្តចុះចាញ់លោក Ebrahim Raisi ដែលជាប្រធានចៅក្រមប្រកាន់ទស្សនៈអភិរក្សនិយមជ្រុល នៅក្នុងការបោះឆ្នោតប្រធានាធិបតីប្រទេសអ៊ីរ៉ង់។
លោក Hemmati បានបញ្ជាក់នៅក្នុងលិខិតមួយច្បាប់ថា៖ «ខ្ញុំសង្ឃឹមថា រដ្ឋាភិបាលរបស់លោកនៅក្រោមការដឹកនាំរបស់មេដឹកនាំកំពូលលោក Ayatollah Ali Khamenei នឹងនាំមកនូវសេចក្ដីសុខសប្បាយនិងវិបុលភាពជូនប្រទេសជាតិរបស់យើង»។ នេះបើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយនានា។
ការបោះឆ្នោតប្រធានាធិបតីអ៊ីរ៉ង់បានធ្វើឡើងកាលពីថ្ងៃសុក្រកន្លងទៅនេះ ដោយមានអ្នកចេញមកបោះឆ្នោតក្នុងចំនួនតិច និងខ្វះបេក្ខជនខ្លាំងក្លាសម្រាប់ប្រជែងជាមួយនឹងលោក Raisi។
ក្រសួងមហាផ្ទៃអ៊ីរ៉ង់មិនទាន់បានធ្វើការប៉ាន់ប្រមាណផ្លូវការណាមួយអំពីចំនួនអ្នកចេញមកបោះឆ្នោតនៅឡើយទេ នៅពេលដែលការិយាល័យបោះឆ្នោតនានាបានបិទនៅម៉ោង ២ ព្រឹក ម៉ោងនៅក្នុងប្រទេសអ៊ីរ៉ង់ កាលពីថ្ងៃសៅរ៍ម្សិលមិញ។
អាជ្ញាធរបានបន្ថែមពេលបោះឆ្នោតពីរម៉ោងទៀតក្រោយផុតម៉ោងបិទបញ្ចប់ការិយាល័យបោះឆ្នោតដែលបានកំណត់ត្រឹមពាក់កណ្ដាលយប់ ក្នុងក្ដីសង្ឃឹមថានឹងមានអ្នកបោះឆ្នោតបន្ថែមទៀតចេញមកបោះឆ្នោត។
ទីភ្នាក់ងារព័ត៌មាន Fars ដែលជាទីភ្នាក់ងារព័ត៌មានពាក់កណ្ដាលផ្លូវការរបស់ប្រទេសអ៊ីរ៉ង់បានរាយការណ៍ថា នៅត្រឹមម៉ោង ៧:៣០ ល្ងាច ម៉ោងក្នុងប្រទេសអ៊ីរ៉ង់ មានអ្នកបោះឆ្នោតចំនួន ៣៧% ក្នុងចំណោមអ្នកមានសិទ្ធិបោះឆ្នោតចំនួន ៥៩ លាននាក់ បានបោះឆ្នោតរួចរាល់។ ក្រសួងមហាផ្ទៃអ៊ីរ៉ង់ដែលជាអ្នករៀបចំចាត់ចែងការបោះឆ្នោតនេះមិនបានបញ្ជាក់អះអាងណាមួយអំពីតួលេខនេះនៅឡើយទេ។
កាលពីរសៀលថ្ងៃសៅរ៍ម្សិលមិញ រដ្ឋមន្ត្រីក្រសួងមហាផ្ទៃអ៊ីរ៉ង់លោក Abdolreza Rahmani Fazli បាននិយាយថា លោក Raisi ទទួលបានការគាំទ្រចំនួនជាង ១៧ លាន ៩ សែន សំឡេង ដែលស្មើនឹងជិត ៦២% នៃសន្លឹកឆ្នោតជិត ២៩ លានសំឡេងដែលបានបោះ។
លោក Rahmani Fazli បានប្រាប់អ្នកកាសែតថា៖ «ក្នុងចំណោមអ្នកមានសិទ្ធិបោះឆ្នោតសរុប ដែលមានចំនួន ៥៩.៣១០.៣០៧ នាក់ ចំនួនសន្លឹកឆ្នោតសរុបដែលបានបោះមានចំនួន ២៨.៩៣៣.០០៤ សំឡេង ដែលចំនួននេះបង្ហាញថា អ្នកចេញមកបោះឆ្នោតមានចំនួន ៤៨,៨%»។
លោក Mohsen Rezaei អតីតមេបញ្ជាការកងទ័ពឆ្មាំបដិវត្តន៍អ៊ីរ៉ង់ដ៏ស្វាហាប់ គឺជាបេក្ខជនដែលទទួលបានសំឡេងឆ្នោតគាំទ្រលំដាប់ទីពីរដែលមានចំនួន ១១,៨%។ បន្ទាប់មកគឺលោក Hemmati ដែលទទួលបានសំឡេងឆ្នោតគាំទ្រចំនួន ៨,៤%។ ចំណែកឯលោក Amirhossein Ghazizadeh-Hashemi ដែលជាបេក្ខជនអភិរក្សនិយមជ្រុលវិញ ស្ថិតក្នុងលំដាប់ថ្នាក់ចុងក្រោយគេដោយទទួលបានសំឡេងឆ្នោតគាំទ្រចំនួន ៣,៥%។
អ្នកវិភាគបាននិយាយថា អ្នកបោះឆ្នោតភាគច្រើននៅប្រទេសអ៊ីរ៉ង់ហាក់លែងទុកចិត្តមេដឹកនាំឥស្លាមនានារបស់ពួកគេ ដោយសារតែមេដឹកនាំទាំងនោះដឹកនាំមិនបានល្អនូវសេដ្ឋកិច្ចដែលរងគ្រោះដោយសារទណ្ឌកម្មរបស់សហរដ្ឋអាមេរិក ជំងឺកូវីដ១៩ និងអំពើពុករលួយ។
អ្នករៀបចំការស្ទង់មតិដែលមានការអនុញ្ញាតដោយរដ្ឋរបស់ប្រទេសអ៊ីរ៉ង់បានទស្សន៍ទាយមុនការបោះឆ្នោតថា ចំនួនអ្នកចេញមកបោះឆ្នោតអាចមានចំនួនជាង ៤០% តិចតួច។
ចំនួននេះអាចជាចំនួនទាបបំផុតក្នុងប្រវត្តិសាស្ត្រសម្រាប់ការបោះឆ្នោតប្រធានាធិបតីអ៊ីរ៉ង់តាំងពីពេលបដិវត្តន៍ឥស្លាមឆ្នាំ ១៩៧៩ នៅក្នុងប្រទេសអ៊ីរ៉ង់មក។ នៅក្នុងបដិវត្តន៍នោះ បព្វជិតដឹកនាំសាសនាឥស្លាមនិកាយស៊ីអ៊ីត (Shiite) បានដណ្ដើមអំណាចពីរបបរាជានិយមដែលស្រុតចុះ។
ការបោះឆ្នោតប្រធានាធិបតីអ៊ីរ៉ង់ដែលមានចំនួនអ្នកចេញមកបោះឆ្នោតទាបបំផុតមុនការបោះឆ្នោតលើកនេះគឺបានធ្វើឡើងកាលពីឆ្នាំ ១៩៩៣ ដែលអ្នកចេញមកបោះឆ្នោតនៅពេលនោះមានចំនួន ៥០%។
សារបង្ហោះចេញពីប្រទេសអ៊ីរ៉ង់នៅលើប្រព័ន្ធទំនាក់ទំនងសង្គមអនឡាញនានាក៏បានបង្ហាញផងដែរថា អ្នកចេញមកបោះឆ្នោតមានចំនួនតិចតួចនៅតាមការិយាល័យបោះឆ្នោតនានានៅទូទាំងប្រទេស។
ស្ថានីយ៍ទូរទស្សន៍រដ្ឋរបស់អ៊ីរ៉ង់បានថតបង្ហាញឲ្យឃើញយ៉ាងជិតនូវជួរអ្នកបោះឆ្នោតនៅតាមការិយាល័យបោះឆ្នោតខ្លះ ស្របពេលដែលបុគ្គលនយោបាយនានាអង្វរពលរដ្ឋឲ្យចេញទៅបោះឆ្នោត។
ក្នុងចំណោមបុគ្គលនយោបាយទាំងនោះ គេក៏ឃើញមានផងដែរនូវមេដឹកនាំកំពូលអ៊ីរ៉ង់លោក Ayatollah Ali Khamenei ប្រធានាធិបតីចប់អាណត្តិលោក Hassan Rouhani និងលោក Raisi ដែលជា អ្នកដែលត្រួសត្រាយផ្លូវដោយលោក Khamenei។ លោក Raisi គឺជាបេក្ខជនដែលពលរដ្ឋអ៊ីរ៉ង់ជាច្រើនបានរំពឹងថានឹងឈ្នះការបោះឆ្នោតនេះដោយងាយស្រួល។
ក្រុមប្រឹក្សាគាំពារអ៊ីរ៉ង់ដែលជាក្រុមប្រឹក្សាធម្មនុញ្ញអ៊ីរ៉ង់ដែលមានកាតព្វកិច្ចសម្រេចលើបេក្ខភាពរបស់បេក្ខជនប្រធានាធិបតីនីមួយៗ បានអនុញ្ញាតឲ្យតែលោក Raisi និងអ្នកស្មោះស្ម័គ្រនឹងលោក Khamenei ៦ រូបផ្សេងទៀត ដែលគេមិនសូវស្គាល់តែប៉ុណ្ណោះ ឲ្យឈរឈ្មោះបោះឆ្នោត ដោយបានរារាំងបេក្ខជនរាប់រយនាក់ផ្សេងទៀតដែលចង់ឈរឈ្មោះ ដែលក្នុងនោះមានទាំងអ្នកនយោបាយមួយចំនួនដែលមានប្រវត្តិសាធារណៈក្រាស់ក្រែលផងដែរបើប្រៀបជាមួយនឹងលោក Raisi។
ការមិនអនុញ្ញាតឲ្យបេក្ខជនទាំងនោះចូលរួមប្រកួតនៅក្នុងការបោះឆ្នោតបានបង្កឲ្យមានយុទ្ធនាការតវ៉ារាប់សប្ដាហ៍ដែលធ្វើឡើងដោយក្រុមអ្នករិះគន់លោក Khamenei ដែលជាពលរដ្ឋអ៊ីរ៉ង់ទាំងក្នុងនិងក្រៅប្រទេស ដើម្បីលើកទឹកចិត្តអ្នកបោះឆ្នោតឲ្យធ្វើពហិការមិនចូលរួមនៅក្នុងការបោះឆ្នោតដែលពួកគេហៅថាជាការបោះឆ្នោតក្លែងក្លាយ៕
ប្រែសម្រួលដោយលោក ភី សុភាដា
