ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការ​​ជជែក​​តទល់​​គ្នា​​របស់​​យុវជន​​អំពី​​បញ្ហា​​នយោបាយ​​នៅ​​កម្ពុជា​​មាន​​សារៈ​សំខាន់


កញ្ញា​ហឿន សុភ័ក្ត្រ ​អ្នកសម្រប​សម្រួល​ផ្នែក​ប្រព័ន្ធ​ផ្សព្វផ្សាយ​របស់​វិទ្យាស្ថាន​សាធារណរដ្ឋ​អន្តរជាតិ ​IRI​។
កញ្ញា​ហឿន សុភ័ក្ត្រ ​អ្នកសម្រប​សម្រួល​ផ្នែក​ប្រព័ន្ធ​ផ្សព្វផ្សាយ​របស់​វិទ្យាស្ថាន​សាធារណរដ្ឋ​អន្តរជាតិ ​IRI​។

ភ្នំពេញ -​ មន្ត្រី​អង្គការ​ក្រៅរដ្ឋាភិបាល​មួយ​ និយាយ​ថា សំឡេង​របស់​យុវជន​ អាចដាក់​សម្ពាធ​ដល់​រដ្ឋាភិបាល​ឲ្យ​ចាត់​វិធានការ​ទៅលើ​បញ្ហា​នានា​ដែល​ប្រទេស​ជាតិ​កំពុង​តែ​ប្រឈម​មុខ។​

កញ្ញា ហឿន សុភ័ក្ត្រ អ្នក​សម្របសម្រួល​ផ្នែក​ប្រព័ន្ធ​ផ្សព្វផ្សាយ​នៃវិទ្យាស្ថាន​សាធារណរដ្ឋ​អន្តរជាតី​បាន​ថ្លែង​យ៉ាង​ដូច្នេះ នៅក្នុង​នាទី​សំឡេង​យុវជន​នៃកម្មវិធី​ហេឡូ វីអូអេ កាល​ពី​ថ្ងៃ​ច័ន្ទ ទី​១០ ខែ​មិថុនា៖ «យុវជន​គឺ​មាន​សំឡេង​ច្រើន​នៅ​ក្នុង​ប្រទេស​យើង អញ្ចឹង​នៅ​ពេល​ដែល​ថ្នាក់​ដឹកនាំ​បាន​ឮ​ថា យុវជន​មិន​ពេញចិត្ត​នឹង​សកម្មភាព​អស់​ហ្នឹង​ទេ អញ្ចឹង​មិន​យូរ​មិន​ឆាប់​ វា​អាច​ធ្វើ​ឲ្យ​អ្នក​ដឹកនាំ នឹង​មាន​ការ​កែប្រែ ឬ​រក​ដំណោះស្រាយ​យ៉ាងណា​ ដើម្បី​ឲ្យ​បញ្ហា ​ទាំង​អស់​ហ្នឹង​ ត្រូវ​បាន​ដោះស្រាយ»។​

កញ្ញា​សុភ័ក្រ្ត​ ដែល​ជា​អ្នក​ផលិត​កម្មវិធី​ទូរទស្សន៍​មួយ​ឈ្មោះ​ថា "អ្នក​បន្តវេន" ​ដែល​ផ្តោត​លើ​ការ​ជជែក​ពិភាក្សារបស់​យុវជន​អំពី​បញ្ហា​នយោបាយ​ផងដែរ​នោះ មាន​ប្រសាសន៍​បន្ថែមថា៖

«បើសិន​ជាក្នុង​នាមគាត់​ជាយុវជន​ ហើយ​អត់ខ្វល់ខ្វាយ​នឹង​ប្រទេស​ទេ ​ហើយ​អត់​បាន​ទាមទារ​នូវ​អ្វី ​ដែល​ពួក​គាត់ចង់​បាន​ទេ​ តែបែរ​ជាឲ្យ​អ្នក​ដែល​មានវ័យ​ចំណាស់​គ្រប់គ្រង​ប្រទេស ​នោះ​គាត់​នឹង​ឲ្យ​គេ​សម្រេច​ចិត្ត​ជំនួស​គាត់»។ ​

អ្នក​ខ្លះ​និយាយ​ថា យុវជន​កាន់តែ​ច្រើន​ឡើង​ ពិត​ជា​ខ្វល់ខ្វាយ​នឹង​បញ្ហា​ស្រុក​ទេស​ ហើយ​តាម​ដាន​ព័ត៌មាន​អំពីអ្វី​ដែល​បាន​កើត​ឡើង ប៉ុន្តែកត្តា​សំខាន់​មួយ​ដែល​រារាំង​យុវជន​ខ្លះ​មិន​ឲ្យ​បញ្ចេញ​សំឡេង​បាន​ គឺ​ការ​ភ័យ​ខ្លាច។​

កញ្ញាស្រី​ វឿន គឺ​ជា​អ្នក​ទូរស័ព្ទ​ចូលរួម​ក្នុង​កម្មវិធី​ម្នាក់​មក​ពី​ខេត្ត​ព្រៃវែង៖​

«ពួកគេ​គ្រាន់តែ​ខ្លាច​មិន​ហ៊ាន​បញ្ចេញ​មតិ​យោបល់​ទៅ​លើ​សកម្មភាព​ ឬ​ព្រឹត្ត​ការណ៍​ដែល​ទាក់ទង​នឹង​អ្នក​មាន​អំណាច​ខ្លះ ដោយសារ​ពួកគេ​ត្រូវ​ប្រឈម​នឹង​ហានិភ័យ​ចំពោះ​សុវត្ថិភាពផ្ទាល់​ខ្លួន»។​

អ្នក​ខ្លះ​ទៀត​និយាយថា​ ឪពុកម្តាយ​មួយ​ចំនួន​ក៏​បាន​រារាំង​កូនចៅ​របស់​ខ្លួន​មិន​ឲ្យ​និយាយ​អំពី​បញ្ហា​នយោបាយ។​

ឡេង គឹមលាង​បាន​សួរ​តាម​រយៈ​បណ្តាញ​ហ្វេសប៊ុក​របស់​វីអូអេ៖​ «សម័យ​នេះ​ ឪពុក​ម្តាយកើត​ជម្ងឺផ្លូវចិត្ត ហើយ​ពួកគាត់​ខ្លាច​ណាស់​ពាក្យ​ថា​ នយោបាយ។ តើ​មាន​វិធី​សាស្ត្រ​អ្វី​ខ្លះ​ ជួយ​យុវជន​ឲ្យ​យល់​ដឹង​ពី​នយោបាយ​ កុំ​ឲ្យពួក​គាត់​កើត​ជម្ងឺផ្លូវចិត្ត​ ដូច​ឪពុកម្តាយ​ពួក​គាត់?»​

កញ្ញា​ហឿន សុភ័ក្ត្រ​និយាយថា ប្រសិន​បើ​យុវជន​ខ្លាច​ខ្លាំង​ពេក​ចំពោះ​សុវត្ថិភាព​ផ្ទាល់​ខ្លួន រហូត​ដល់​មិន​ហ៊ាន​បញ្ចេញ​សំឡេង​របស់​ខ្លួន​នោះ នោះ​ប្រទេស​ជាតិ​នឹង​មិន​អាច​រីកចម្រើន​បាន​ទេ។

កញ្ញា​និយាយថា៖ «ក្នុង​ករណី​ដែល​យើង​គិត​បារម្ភ​ខ្លាំងពេក ហើយ​យើង​នៅ​តែ​មិន​ហ៊ាន ប្រទេស​យើង​គឺ​នៅ​តែ​ប៉ុណ្ណឹង»។​

កញ្ញា សុភ័ក្ត្រ​បន្ថែម​ទៀតថា យុវជន​ក៏​ជា​ម្ចាស់​ប្រទេស​នេះ​ដែរ ដូច្នេះ​ឪពុកម្តាយ​ក៏​គួរ​ចូលរួម​ចំណែក​លើក​ទឹកចិត្ត​កូនចៅ​របស់​ខ្លួន​ ឲ្យ​ហ៊ាន​និយាយ​ ជជែក​ពិភាក្សា​គ្នា​អំពី​បញ្ហា​ប្រទេស​ជាតិ​ដែល​ប៉ះពាល់​ដល់​ជីវភាព​របស់​ពួក​គេ​ផ្ទាល់។​

កញ្ញា​និយាយថា៖«ឥទ្ធិពល​ដែល​យើង​មាន គឺ​យើង​ធ្វើ​នៅ​ពេល​បោះឆ្នោត។ អញ្ចឹង​ខ្ញុំ​សង្ឃឹម​ថា នៅថ្ងៃ​បោះឆ្នោត​ខាង​មុខនេះ យុវជន​យើង​ទាំង​អស់​នឹង​ព្យាយាម​ចូលរួម​បោះ​ឆ្នោត ហើយ​ជ្រើស​រើស​យក​មេដឹកនាំ​ណា​ដែល​យើង​ពេញចិត្ត​ហើយ​គិត​ថា មាន​សមត្ថភាព»។​

ប្រជាជន​ខ្មែរ​ជាង​៩លាននាក់ ដែល​ប្រមាណ​ពាក់​កណ្តាល​នៃ​ចំនួន​នេះ គឺ​ជា​យុវជន ត្រូវ​គេ​រំពឹង​ថា​នឹង​ចូល​រួម​បោះឆ្នោត​ជាតិ ដើម្បី​ជ្រើសរើស​រដ្ឋាភិបាល​អាណត្តិ​ថ្មី នា​ថ្ងៃ​អាទិត្យ ទី​២៨ ខែ​កក្កដា ខាង​មុខនេះ៕

XS
SM
MD
LG