មន្ត្រីនៅក្នុងប្រទេសម៉ាឡេស៊ីបាននិយាយថា ក្រុមហ៊ុនផលិតស្រោមដៃកៅស៊ូធំជាងគេបំផុតក្នុងពិភពលោក នឹងបិទរោងចក្ររបស់ខ្លួនចំនួន ២៨ បន្ទាប់ពីកម្មករជាង ២.០០០ នាក់ ធ្វើតេស្តឃើញថា ឆ្លងជំងឺកូវីដ១៩។
រដ្ឋាភិបាលម៉ាឡេស៊ីបានបញ្ជាឲ្យក្រុមហ៊ុន Top Glove បិទរោងចក្រទាំងនោះតាមដំណាក់កាល ដើម្បីអនុញ្ញាតឲ្យកម្មករទាំងអស់ទទួលបានការធ្វើតេស្តរកជំងឺកូវីដ១៩ និងការធ្វើចត្តាឡីស័កចំពោះអ្នកណាដែលបានឆ្លងជំងឺនេះ។
ក្រសួងសុខាភិបាលបានរាយការណ៍ថា កម្មករចំនួន ២.៤៥៣ នាក់ ត្រូវបានរកឃើញថាឆ្លងជំងឺកូវីដ១៩ បន្ទាប់ពីមានការធ្វើតេស្តលើកម្មករជាង ៥.៧០០ នាក់មក។
រដ្ឋាភិបាលម៉ាឡេស៊ី បានរាយការណ៍អំពីការកើនឡើងខ្លាំងនៃករណីឆ្លងជំងឺកូវីដ១៩ នៅក្នុងតំបន់ឧស្សាហកម្មក្រៅទីក្រុងគូឡាឡាំពួរ ដែលជាតំបន់ទីតាំងរបស់រោងចក្រផលិតស្រោមដៃទាំងនេះ និងកន្លែងស្នាក់នៅរបស់កម្មកររោងចក្រ។
ក្រុមហ៊ុន Top Glove បានឲ្យដឹងនៅក្នុងសេចក្ដីថ្លែងការណ៍ថា ខ្លួននឹង «សហការយ៉ាងពេញទំហឹងជាមួយនឹងអាជ្ញាធរពាក់ព័ន្ធ ដើម្បីអនុវត្តការបិទរោងចក្រជាបណ្ដោះអាសន្ន» និងថា ដំណើរការបិទរោងចក្រទាំងនេះ បានចាប់ផ្ដើមហើយ។ ក្រុមហ៊ុននេះបានឲ្យដឹងទៀតថា នឹងមានការពន្យារពេលបញ្ជូនទំនិញទៅគោលដៅពី ២ ទៅ ៤ សប្ដាហ៍ ដោយសារការបិទរោងចក្រនេះ។
ក្រុមហ៊ុន Top Glove បានបញ្ជាក់ថា ខ្លួនផលិតស្រោមដៃបានចំនួន ៩០ ពាន់លានស្រោមដៃក្នុងមួយឆ្នាំ ហើយគ្រប់គ្រងជាង ២៥% នៃចំណែកទីផ្សារស្រោមដៃវះកាត់នៅក្នុងពិភពលោក។ ក្រុមហ៊ុននេះ មានកម្មករប្រមាណ ២១.០០០ នាក់នៅក្នុងប្រទេសម៉ាឡេស៊ី ថៃ វៀតណាម និងចិន ហើយនាំចេញផលិតផលរបស់ខ្លួនទៅកាន់ប្រទេសចំនួន ១៩៥៕
