សហរដ្ឋអាមេរិកបានដាក់បម្រាមលើការនាំចូលពីក្រុមហ៊ុនផលិតស្រោមដៃកៅស៊ូធំជាងគេបង្អស់នៅលើពិភពលោក ខណៈដែលអ្នកបម្រើការផ្នែកសុខាភិបាលកំពុងប្រឈមមុខនឹងការកើនឡើងសារជាថ្មីនៃករណីឆ្លងវីរុសកូរ៉ូណានៅតាមបណ្តារដ្ឋមួយចំនួន។
ទីភ្នាក់ងារការពារព្រំដែន និងគយសហរដ្ឋអាមេរិកបានដាក់ចេញបទបញ្ជា «ផ្អាកការចាំចូល» ទំនិញពីក្រុមហ៊ុនចំណុះចំនួនពីរនៃរោងចក្រ Top Glove នៅប្រទេសម៉ាឡេស៊ី កាលពីថ្ងៃទី១៥ ខែកក្កដា កន្លងទៅនេះ ដោយសារភស្តុតាងបង្ហាញពីពលកម្មដោយបង្ខំនៅតាមរោងចក្រមួយនេះ។
ម៉ាឡេស៊ីផលិតស្រោមដៃកៅស៊ូចំនួនប្រមាណពីរភាគបីនៃស្រោមដៃកៅស៊ូសរុបនៅលើពិភពលោក ដែលស្រោមដៃកៅស៊ូជា គ្រឿងប្រដាប់ការពារដ៏សំខាន់មួយសម្រាប់អ្នកធ្វើការនៅជួរមុខក្នុងវិស័យសុខាភិបាល ដើម្បីទប់ទល់នឹងការរាតត្បាតនៃវីរុសកូរ៉ូណា។ ក្រុមហ៊ុន Top Glove ផលិតប្រមាណ ២០ភាគរយនៃស្រោមដៃកៅស៊ូសរុបនៅលើពិភពលោក។
ទីភ្នាក់ងារការពារព្រំដែន និងគយសហរដ្ឋអាមេរិកបានលើកឡើងនៅក្នុងសេចក្តីថ្លែងការណ៍មួយថា៖ «ភស្តុតាងបានបង្ហាញតាមរយៈសុចនាកររបស់អង្គការពលកម្មពិភពលោកពាក់ព័ន្ធនឹងករណីពលកម្មដោយបង្ខំ ដែលរួមមាន អន្ទាក់បំណុល ការធ្វើការលើសម៉ោងច្រើនជ្រុល ការដកហូតឯកសារអត្តសញ្ញាណ និងការរំលោភបំពានលក្ខខណ្ឌធ្វើការ និងរស់នៅជាដើម»។
សេចក្តីថ្លែងការណ៍ខាងលើបានបន្ថែមថា ការដាក់បម្រាមទៅលើការនាំចូលនេះ «បង្ហាញជាសារយ៉ាងច្បាស់ និងដោយផ្ទាល់ទៅកាន់ក្រុមហ៊ុននាំចូលទៅកាន់សហរដ្ឋអាមេរិកថា ការប្រព្រឹត្តអំពើទាសភាពសម័យទំនើប ដែលខុសច្បាប់ គ្មានមនុស្សធម៌ និងកេងប្រវញ្ច គឺមិនអាចទទួលយកបាននោះទេនៅក្នុងខែ្សសង្វាក់ផ្គត់ផ្គង់ទៅកាន់សហរដ្ឋអាមេរិក»។
ទីភ្នាក់ងារការពារព្រំដែន និងគយសហរដ្ឋអាមេរិកក៏បានបន្ថែមថា ខ្លួនបានដឹងពីតម្រូវការចាំបាច់សម្រាប់ស្រោមដៃកៅស៊ូអំឡុងពេលមានការរាតត្បាតវីរុសកូរ៉ូណា និងថា ការដាក់បម្រាមលើក្រុមហ៊ុន Top Glove នេះ«នឹងមិនមានផលប៉ះពាល់ធ្ងន់ធ្ងរទៅលើការនាំចូលស្រោមដៃកៅស៊ូសរុបរបស់សហរដ្ឋអាមេរិកនោះទេ»។
ក្រុមហ៊ុន Top Glove បានព្យាយាមនិយាយសម្រាលពីផលប៉ះពាល់នៃដាក់បម្រាមនេះ ដោយកត់សម្គាល់ថា នៅតែមានទីផ្សារសម្រាប់ក្រុមហ៊ុនផលិតស្រោមដៃកៅស៊ូ ខណៈដែលករណីឆ្លងជំងឺកូវីដ១៩ កំពុងបន្តកើនឡើងនៅសហរដ្ឋអាមេរិក និងប្រទេសដទៃទៀត។
លោក Lim Wee Chai នាយកប្រតិបត្តិរបស់ក្រុមហ៊ុន Top Glove បានថ្លែងប្រាប់ក្រុមអ្នកសារព័ត៌មាននៅប្រទេសម៉ាឡេស៊ីកាលពីថ្ងៃទី១៦ ខែកក្កដាថា៖ «បណ្តាប្រទេសដទៃទៀតអាចបំពេញចន្លោះលើការបញ្ជាទិញស្រោមដៃកៅស៊ូយ៉ាងស្រួល»។
លោកបានបន្តថា៖ «យើងក៏មានផែនការផ្សេងៗទៀតដែរ ប្រសិនបើសហរដ្ឋអាមេរិកមិនអនុញ្ញាតឲ្យមានការដឹកទំនិញចូលក្នុងប្រទេសរបស់ពួកគេ» ដោយលោកបានលើកឡើងថា ប្រទេសប្រេស៊ីល ដែលឥឡូវនេះកំពុងមានករណីឆ្លងជំងឺកូវីដ១៩ ច្រើនជាងគេទីពីរនៅលើពិភពលោក ក៏ជាជម្រើសថ្មីជំនួសឲ្យសហរដ្ឋអាមេរិកផងដែរ។
ការដាក់បម្រាមនេះមិនគ្របដណ្តប់ទៅលើការនាំចូលទាំងអស់របស់ក្រុមហ៊ុន Top Glove មកកាន់សហរដ្ឋអាមេរិកនោះទេ។ ក្រុមហ៊ុន Top Glove បាននិយាយថា សហរដ្ឋអាមេរិករ៉ាប់រងតែមួយភាគបួននៃការលក់សរុប ហើយថា ក្រុមហ៊ុនចំណុះរបស់ខ្លួនចំនួនពីរដែលរងការប៉ះពាល់ដោយសារការដាក់បម្រាមនេះរ៉ាប់រងត្រឹមតែពាក់កណ្តាលនៃការលក់សរុបនោះតែប៉ុណ្ណោះ។
ក្រុមគាំពារសិទ្ធពលកម្មបាននិយាយថា ចំណាត់ការនេះនឹងធ្វើឲ្យមានការព្រួយបារម្ភថា ក្រុមហ៊ុន Top Glove អាចនឹងមិនខ្វល់ខ្វាយពីការដាក់បម្រាម។
លោក Andy Hall សកម្មជនសិទ្ធិពលកម្មឯករាជ្យមួយរូប បាននិយាយថា នឹងមាន «ការតាមដានយ៉ាងដិតដល់ពីសំណាក់អ្នកមានភាគច្រើននៅក្នុងក្រុមហ៊ុន Top Glove ដើម្បីធានាថានឹងមានការបញ្ជាទិញពីកន្លែងផ្សេង ដើម្បីអាចឆ្លងផុតពីការដាក់បម្រាមលើការបញ្ជាទិញពីមន្ទីរគយ និងការពារព្រំដែនអាមេរិក» និងរក្សាការនាំចេញទៅសហរដ្ឋអាមេរិកឲ្យដូចមុនតាមរយៈក្រុមហ៊ុនចំណុះផ្សេងទៀត។
អាមេរិកលោកបានបន្ថែមថា ទោះបីយ៉ាងនេះក៏ដោយ ក្រុមហ៊ុន Top Glove នឹងជួបការលំបាកនៅក្នុងការដើរជៀសពីផលប៉ះពាល់នៃការដាក់បម្រាមនេះណាស់ ខណៈកេរ្តិ៍ឈ្មោះក្រុមហ៊ុននេះទាំងមូលកំពុងប្រឈមនឹងបញ្ហាធ្ងន់ធ្ងររួចទៅហើយ។
ទីភ្នាក់ងារការពារព្រំដែន និងគយសហរដ្ឋអាមេរិកមិនបានឆ្លើយតបនឹងសំណើសុំឲ្យមានការបកស្រាយបន្ថែមលើហេតុផលនៃការដាក់បម្រាមលើការនាំចូលពីក្រុមហ៊ុន Top Glove នេះនោះទេ។ ប៉ុន្តែក្រុមហ៊ុន Top Glove បានឆ្លើយតបនឹងការដាក់បម្រាមនេះ ដោយលើកឡើងនៅក្នុងសេចក្តីថ្លែងការណ៍មួយថា បញ្ហានេះប្រហែលទាក់ទងនឹងថ្លៃឈ្នួលដែលកម្មករចំណាកស្រុកមួយចំនួនបានបង់ឲ្យឈ្មួញកណ្តាលដើម្បីទទួលបានការងារធ្វើនៅតាមរោងចក្ររបស់ខ្លួន។
វិស័យផលិតស្រោមដៃកៅស៊ូនៅម៉ាឡេស៊ីពឹងផ្អែកលើកម្មករចំណាកស្រុកជាច្រើននាក់មកពីប្រទេសក្រីក្រនៅក្នុងតំបន់ ដែលត្រូវបានទាក់ទាញដោយប្រាក់ឈ្នួលខ្ពស់ជាងប្រាក់ឈ្នួលនៅប្រទេសកំណើតរបស់ពួកគេ។ ដើម្បីបានធ្វើការនៅក្នុងរោងចក្រ កម្មករចំណាកស្រុកមួយចំនួនបានជំពាក់បំណុលពួកឈ្មួញកណ្តាលដែលនាំពួកគេមកធ្វើការ ដែលបានទារថ្លៃឈ្នួលរហូតដល់ទៅ ៥០០០ដុល្លារ ដើម្បីទទួលបានការងារនៅរោងចក្រ។ ការណ៍នេះបានធ្វើឲ្យកម្មករចំណាកស្រុកទាំងនោះត្រូវជាប់នៅធ្វើការឲ្យម្ចាស់រោងចក្រ ដោយទទួលបានប្រាក់ឈ្នួលអប្បបរមា រហូតដល់ពួកគេអាចសងបំណុលរួច។
ក្រុមហ៊ុន Top Glove បាននិយាយថា ខ្លួន «បានដោះស្រាយបញ្ហាទាំងនេះរួចហើយ» ក្នុងចំណោមកម្មករចំណាកស្រុករបស់ខ្លួន លើកលែងតែអ្នកដែលបង់ថ្លៃឲ្យឈ្មួញមុនឆ្នាំ ២០១៩។ ក្រុមហ៊ុននេះបាននិយាយថា ខ្លួនកំពុងតែរៀបចំផែនការមួយ ដែលអាចត្រូវចំណាយរហូតដល់ទៅ ១១.៧ លានដុល្លារអាមេរិក ដើម្បីផ្តល់សំណងដល់កម្មករទាំងនោះវិញ ហើយសង្ឃឹមថា នឹងអាចបញ្ចុះបញ្ចូលទីភ្នាក់ងារការពារព្រំដែន និងគយសហរដ្ឋអាមេរិកឲ្យដកបម្រាមលើការនាំចេញក្នុងរយៈពេលប៉ុន្មានសប្តាហ៍ក្រោយពីនេះ។
ទីភ្នាក់ងារការពារព្រំដែន និងគយសហរដ្ឋអាមេរិកធ្លាប់បានដាក់បម្រាមលើការនាំចូលដូចគ្នានេះទៅលើក្រុមហ៊ុនផលិតស្រោមដៃកៅស៊ូម៉ាឡេស៊ីមួយទៀតឈ្មោះថា WRP Asia Pacific កាលពីខែកញ្ញាឆ្នាំមុន ពាក់ព័ន្ធនឹងការព្រួយបារម្ភពីករណីពលកម្មដោយបង្ខំ ហើយបន្ទាប់មកបានដកបម្រាមនោះចេញកាលពីខែមីនាឆ្នាំនេះ ដោយលើកឡើងថា នាពេលបច្ចុប្បន្ន រោងចក្រនោះលែងមានការរំលោភបំពានពលកម្មទៀតហើយ។
កាលពីខែមិថុនាកន្លងទៅ ក្រុមហ៊ុន WRP បានដាក់ចេញនូវគម្រោងមួយដើម្បីផ្តល់សំណងលើថ្លៃឈ្នួលនាំមកធ្វើការងារឲ្យកម្មករចំណាកស្រុករបស់ខ្លួនសម្រាប់រយៈពេលពីរឆ្នាំកន្លះមកនេះ។
លោក Hall សកម្មជនសិទ្ធិពលកម្មឯករាជ្យ បានលើកឡើងថា ការដាក់បម្រាមលើក្រុមហ៊ុន WRP ដែលជាក្រុមហ៊ុនដំបូងគេមកពីតំបន់អាស៊ីអាគ្នេយ៍ ត្រូវបានចាត់ទុកជាការព្រមានទៅដល់ក្រុមហ៊ុនផលិតស្រោមដៃកៅស៊ូដទៃទៀត ឲ្យធ្វើការដោះស្រាយជាមួយនឹងកម្មករចំណាកស្រុករបស់ខ្លួន។ លោកមានជំនឿថា ក្រុមហ៊ុនផលិតស្រោមដៃកៅស៊ូភាគច្រើនមិនអើពើលើរឿងនេះ ដោយគិតថា សហរដ្ឋអាមេរិកនឹងមិនប្រថុយផ្តាច់ការផ្គត់ផ្គង់ស្រោមដៃកៅស៊ូអំឡុងពេលមានការរាតត្បាតជំងឺជាសាកលនោះទេ។ ស្របពេលដូចគ្នានេះដែរ លោករំពឹងថា ក្រុមហ៊ុនផ្សេងទៀតនឹងពិចារណាឡើងវិញ នៅពេលដែលក្រុមហ៊ុនផលិតស្រោមដៃកៅស៊ូឈានមុខគេនៅម៉ាឡេស៊ីត្រូវរងការដាក់បម្រាម។
លោក Hall បាននិយាយថា៖ «យើងរំពឹងថា ឥឡូវនេះ ក្រុមហ៊ុនផលិតស្រោមដៃកៅស៊ូទាំងអស់នឹងដោះស្រាយបញ្ហាពាក់ព័ន្ធនឹងថ្លៃឈ្នួលនាំកម្មករមកធ្វើការ ដើម្បីបញ្ចៀសការដាក់ទណ្ឌកម្មបន្តទៀត»៕
ប្រែសម្រួលដោយ ណឹម សុភ័ក្រ្តបញ្ញា
