ធនាគារពិភពលោក (World Bank) នៅថ្ងៃអង្គារនេះ បានចេញផ្សាយរបាយការណ៍មួយបង្ហាញថា គុណភាពការងារនៅកម្ពុជាកំពុងមានការកែលម្អរ ប៉ុន្តែចាំបាច់ត្រូវមានគោលនយោបាយថ្មីៗដើម្បីទាញអត្ថប្រយោជន៍ពីទីផ្សារសកល។
របាយការណ៍របស់ធនាគារពិភពលោក ស្តីពី «អនាគតការងារនៅប្រទេសកម្ពុជា៖ តំណភ្ជាប់ជាមួយសេដ្ឋកិច្ចនាពេលខាងមុខ»បង្ហាញថា កម្ពុជាមានការងារចំនួន៨លានកន្លែង។ ក្នុងនោះមាន៣៧ភាគរយ ជាការងារមានប្រាក់ឈ្នួល ដែលភាគច្រើនផ្តល់ប្រាក់ចំណូលខ្ពស់គ្រាន់បើ និងអត្ថប្រយោជន៍ការពារបន្ថែមដល់កម្មករ។ ប៉ុន្តែ៦៣ភាគរយទៀត នៅតែជាការងារបែបប្រពៃណី ដូចជាការងារដាំដុះ ឬអាជីវកម្មលក្ខណៈគ្រួសារ ដែលមិនសូវបានធ្វើសមាហរណកម្មចូលទៅក្នុងសេដ្ឋកិច្ចទំនើប និងផ្តល់ឱ្យកម្មករនូវប្រាក់ចំណូលទាប។
របាយការណ៍នោះបន្ថែមថា ពលរដ្ឋកម្ពុជាដែលធ្វើការក្នុងវិស័យឯកជនមានប្រាក់ឈ្នួល បានកើនឡើងពី១,១លាននាក់ ក្នុងឆ្នាំ២០០៩ ដល់ ២,៦លាននាក់ ក្នុងឆ្នាំ២០១៤។ ប៉ុន្តែពីរក្នុងចំណោមបីនាក់ គឺជាអ្នកធ្វើស្រែចម្ការ ដែលជាការងារគ្មានប្រាក់ឈ្នួល ឬធ្វើការក្នុងសហគ្រាស ឬអាជីវកម្មជាលក្ខណៈគ្រួសារ។ ក្នុងនោះបញ្ហាប្រឈមផ្នែកការងារនៅកម្ពុជាគឺការងារមិនចំជំនាញ ដែលនៅឆ្នាំ២០១៦ ក្រុមហ៊ុន៣៧,៦ភាគរយ បាននិយាយថា កម្លាំងពលកម្មដែលគ្មានការអប់រំគ្រប់គ្រាន់ គឺជាឧបសគ្គចម្បងដល់ការធ្វើអាជីវកម្ម។
លោក ទន់ សុភណ្ឌ អ្នកសម្របសម្រួលរបស់អង្គការអន្តរជាតិខាងការងារ (ILO) ប្រចាំប្រទេសកម្ពុជា ប្រាប់ VOA ថា ស្ថានភាពការងាររបស់កម្មករនិយោជិតក្នុងវិស័យវាយនភណ្ឌមានភាពប្រសើរជាងមុន ប៉ុន្តែសម្រាប់កម្មករក្រៅប្រព័ន្ធមិនទាន់ទទួលបានអត្ថប្រយោជន៍ ឬការការពារនៅឡើយ។
លោកបន្ថែមថា រដ្ឋាភិបាលគួរជំរុញការពង្រឹងសមត្ថភាព និងលក្ខខណ្ឌការងារសម្រាប់ប្រជាពលរដ្ឋជាទូទៅ វិនិយោគលើស្ថាប័នការងារ និងបង្កើតការងារសមរម្យដល់ពលរដ្ឋទាំងក្នុងប្រព័ន្ធនិងក្រៅប្រព័ន្ធ ។
«ការបណ្តុះបណ្តាលជំនាញ ធ្វើម៉េចឲ្យគាត់មានជំនាញមួយដែលត្រូវនឹងតម្រូវការទីផ្សារការងារ ដើម្បីបង្កើនឱកាសឲ្យយុវជននៅកម្ពុជាជាយើង អាចរកបានការងារធ្វើ ហើយការងារហ្នឹងចំជំនាញ ហើយអាចជួយបង្កើនផលិតភាពជាតិ និងឧត្តមភាពប្រកួតប្រជែងរបស់ប្រទេសកម្ពុជា លើគ្រប់វិស័យទាំងអស់»។
ក្នុងឆ្នាំ២០១៨ សហគ្រាស គ្រឹះស្ថានសេដ្ឋកិច្ចក្នុងប្រព័ន្ធដែលបានចុះបញ្ជីនៅក្រសួងការងារមានចំនួន ១២,២៨៧គ្រឹះស្ថាន និងមានកម្មករនិយោជិតសរុបចំនួនជាង១លាន៤សែននាក់ (១,៤៣៧,៧៩៤នាក់)។ នេះបើតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ។
អ្នកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្ពុជា លើកឡើងថា ស្ថានភាពការងាររបស់កម្មករនិយោជកតាមបណ្តារោងចក្រ នៅតែមានបញ្ហាប្រឈមជាច្រើននៅឡើយ ដោយសារការអនុវត្តច្បាប់របស់អ្នកពាក់ព័ន្ធនៅមានកម្រិត។
«ពាក់ព័ន្ធជាមួយការងាររបស់កម្មករដែលគាត់ធ្វើការងាររាល់ថ្ងៃនេះ នៅមានស្ថានភាពក្នុងការបង្ខិតបង្ខំគាត់ឲ្យធ្វើការងារ ហើយបន្ទាប់មកកម្មករមួយចំនួនត្រូវបានធ្វើការងារលើសម៉ោងលើសអីមួយចំនួនទៀត ហើយប្រាក់ឈ្នួលមិនត្រូវបានទទួលបានសមស្រប ឆ្លើយតបទៅនឹងតម្រូវការក្នុងការចាយវាយស្របតាមច្បាប់អីទេ បានន័យថានៅមានកម្រិតនៅឡើយ»។
របាយការណ៍របស់ធនាគារពិភពលោកនោះបានឲ្យដឹងបន្ថែមថា និន្នាការក្នុងស្រុក តំបន់ និងក្នុងសកលលោក កំពុងមានការផ្លាស់ប្តូរដែលរួមមានការកើនឡើងនៃចំណូល និងការប្រើប្រាស់ កម្លាំងពលកម្មកាន់តែរួមតូច សន្ធិសញ្ញាពាណិជ្ជកម្មថ្មីៗ និងបច្ចេកវិទ្យាជំនួសកម្លាំងពលកម្មជាដើម។ ទាំងនេះជាមូលហេតុនៃការតម្រូវឲ្យមានជំនាញកាន់តែច្រើនជាងមុន។
ធនាគារពិភពលោកបានផ្តល់អនុសាសន៍ថា កម្ពុជាចាំបាច់ត្រូវធ្វើការកែទម្រង់ជាក់លាក់ជាច្រើន ដើម្បីធានាឲ្យមានការងារកាន់តែច្រើន កាន់តែល្អនិងការលើកកម្ពស់ស្ថានភាពរបស់បុគ្គលក្នុងការចូលរួម និងទទួលផលពីសកម្មភាពសង្គមដោយមិនរើសអើង។ ការធ្វើកំណែទម្រង់ទាំងនោះរួមមាន ការធ្វើពិពិធកម្មវិស័យនាំចេញ បង្កើតបរិយាកាសធុរកិច្ចក្នុងស្រុក ពង្រឹងការតភ្ជាប់វិស័យការងារក្នុងស្រុក និងការនាំចេញ និងការវិនិយោគលើជំនាញអប់រំដល់កម្មករ។
VOA បានព្យាយាមទាក់ទងសុំការអត្ថាធិប្បាយពីលោក ហេង សួរ អ្នកនាំពាក្យក្រសួងការងារកម្ពុជា តែរហូតមកដល់ល្ងាចថ្ងៃចន្ទនេះ មិនទាន់មានការឆ្លើយតបនៅឡើយ។
វិស័យកាត់ដេរសម្លៀកបំពាក់ និងស្បែកជើងគឺជាក្បាលម៉ាស៊ីននៃការនាំចេញធំបំផុតលំដាប់ទី១របស់កម្ពុជា។ កាលពីឆ្នាំ២០១៨ ការនាំចេញសម្លៀកបំពាក់និងស្បែកជើងរបស់កម្ពុជាមានទំហំ១០ ពាន់លានដុល្លារអាមេរិក។ វិស័យនេះបានស្រូបយកកម្លាំងពលកម្មប្រមាណជាង៧០ម៉ឺននាក់ ដែលភាគច្រើនគឺជាប្រជាពលរដ្ឋមកពីបណ្តាខេត្ត និងជនបទ៕
