ធនាគារពិភពលោកផ្តល់ហិរញ្ញប្បទានចំនួន ៣៥ លានដុល្លារបន្ថែមលើគម្រោងថែទាំហេដ្ឋារចនាសម្ពន្ធ ដើម្បីធ្វើឱ្យផ្លូវថ្នល់ក្នុងខេត្តចំនួនបីនៃប្រទេសកម្ពុជាកាន់តែរឹងមាំដើម្បីទប់ទល់នឹងឥទ្ធិពលនៃប្រែប្រួលអាកាសធាតុ។ នេះបើតាមសេចក្តីប្រកាសព័ត៌មានចុះថ្ងៃទី ១៥ ខែមីនា ឆ្នាំ ២០២៤។
ខេត្តចំនួនបីដែលទទួលបានហិរញ្ញប្បទាននេះ រួមមានខេត្តក្រចេះ កំពង់ចាម និងត្បូងឃ្មុំ ដែលមានចំនួនប្រជាជនសរុបជាង ២ លាននាក់។ ការផ្តល់ឥណទានបន្ថែមនេះ គឺស្ថិតនៅក្នុងគម្រោង«កែលម្អការតភ្ជាប់ហេដ្ឋារចនាសម្ពន្ធផ្លូវថ្នល់»ក្នុងគោលដៅបង្កើនភាពធន់របស់ផ្លូវ សម្រាប់ប្រជាពលរដ្ឋប្រើប្រាស់ចូលទៅរកទីផ្សារ ទៅសាលារៀន និងទៅរកសេវាសុខាភិបាល។
បើតាមធនាគារពិភពលោក ៨០% នៃប្រជាជនក្នុងខេត្តទាំងបីដែលជាប់ទន្លេមេគង្គកំពុងរស់នៅតាមតំបន់ជនបទ ហើយការផ្តល់ហិរញ្ញប្បទាន ៣៥ លានដុល្លារបន្ថែម នោះ ជាផ្នែកមួយនៃគម្រោងដែលត្រូវបានអនុម័តកាលពីខែកក្កដា ឆ្នាំ ២០២០ ក្រោមហិរញ្ញប្បទានចំនួន ១០០ លានដុល្លារអាមេរិក។
ប្រធានគ្រប់គ្រងនៃធនាគារពិភពលោកប្រចាំនៅកម្ពុជា អ្នកស្រី ម៉ារីយ៉ាម សាលីម លើកឡើងនៅក្នុងសេចក្តីប្រកាសព័ត៌មានដែលចេញផ្សាយកាលពីថ្ងៃសុក្រថា៖ «លទ្ធភាពចូលទៅរកសេវាថែទាំសុខភាព និងសាលារៀន និងការដឹកជញ្ជូនទំនិញទៅកាន់ផ្សារ សុទ្ធតែជាបញ្ហាប្រឈមធំណាស់សម្រាប់ប្រជាពលរដ្ឋរស់នៅតាមទីជនបទ ជាពិសេសនៅក្នុងរដូវវស្សា។ មិនតែប៉ុណ្ណោះ ស្ថានភាពផ្លូវអន់ និងកាត់ផ្តាច់ដោយទឹកជំនន់ និងចំណាយខ្ពស់លើការដឹកជញ្ជូន បង្កឧបសគ្គធំៗដល់លទ្ធភាពទទួលបានសេវាថែទាំសុខភាព និងការសង្គ្រោះបន្ទាន់ សម្រាប់ស្ត្រីមានផ្ទៃពោះ»។
សេចក្តីប្រកាសព័ត៌មានដដែលរបស់ការិយាល័យធនាគារពិភពលោកប្រចាំនៅប្រទេសកម្ពុជា បានឱ្យដឹងទៀតថា ភាពងាយរងគ្រោះនៃបណ្តាញផ្លូវក្នុងខេត្តក្រចេះ កំពង់ចាម និងត្បូងឃ្មុំ បង្កហានិភ័យដល់លទ្ធភាពក្នុងការទទួលបានសេវាសំខាន់ៗមានដូចជា ការអប់រំ និងការថែទាំសុខភាព ជាមួយនឹងផលជះអវិជ្ជមានឥតស្រាកស្រាន្តទៅលើការរស់នៅរបស់ពលរដ្ឋក្នុងខេត្តទាំងបី។ ស្ថានភាពផ្លូវអន់ ក៏ជាហេតុនាំឱ្យមានចំណាយខ្ពស់លើការដឹកជញ្ជូន និងឡូហ្ស៉ិស្ទិកសម្រាប់កសិផលសំខាន់ៗនៅក្នុងខេត្តគោលដៅទាំងនេះដែរ។
អ្នកនាំពាក្យក្រសួងសាធារណៈការនិងដឹកជញ្ជូន លោក ផន រ៉ឹម បដិសេធមិនផ្តល់ការអត្ថាធិប្បាយដោយប្រាប់អ្នកសារព័ត៌មានវីអូអេឱ្យទាក់ទងទៅក្រសួងអភិវឌ្ឍន៍ជនបទវិញ។ វីអូអេមិនទាន់អាចសុំការអត្ថាធិប្បាយពីលោក ពិត ករុណា អ្នកនាំពាក្យក្រសួងអភិវឌ្ឍន៍ជនបទបាននៅឡើយទេ។
អ្នកជំនាញផ្នែកសេដ្ឋកិច្ចនៅរាជ្យបណ្ឌិត្យសភាកម្ពុជា លោក ហុង វណ្ណៈ ប្រាប់វីអូអេថា កម្ចីផ្តល់ដោយធនាគារពិភពលោក ដែលអាមេរិកជាម្ចាស់នៅពីក្រោយ នឹងរួមចំណែកនៅក្នុងការធ្វើឱ្យមានប្រសិទ្ធិភាពនៃគម្រោងថែទាំផ្លូវនៅក្នុងខេត្តទាំងបី ដែលនឹងមានការពង្រីកផ្លូវដើម្បីជំរុញសក្កានុពលសេដ្ឋកិច្ចនៅក្នុងផ្នែកដឹកជញ្ជូន និងបង្កើតការងារផ្សេងទៀតក្រៅពីការងារកសិកម្ម។
លោកបញ្ជាក់ថា៖ «សុទ្ធតែជាតំបន់ដែលមានកសិឧស្សាហកម្មជាខ្លាំងនិងកសិកម្មផងដែរ ដែលអាចជាប្រភពបង្កើតការងារក៏ដូចជាបង្កើតនូវប្រភពនៃការកសាងកម្លាំងផលិតកម្មនៃការពាក់ព័ន្ធជាច្រើនទៀតដែលនឹងអាចរួមចំណែកក្នុងការបង្កើតការងារនិងរួមចំណែកក្នុងការអភិវឌ្ឃសេដ្ឋកិច្ចរបស់កម្ពុជាយើងផងដែរ»។
ធនាគារពិពពលោកលើកឡើងនៅក្នុងសេចក្តីប្រកាសព័ត៌មានទៀតថា គម្រោងនេះនឹងជួយដល់ការអភិវឌ្ឍស្ថាប័នសំខាន់ៗនៅក្រោមក្រសួងសាធារណការ និងដឹកជញ្ជូន និងក្រសួងអភិវឌ្ឍន៍ជនបទ ដែលទាំងពីរជាភ្នាក់ងារអនុវត្តន៍គម្រោង៕
វេទិកាបញ្ចេញមតិ