ខណៈកំណើនសេដ្ឋកិច្ចកម្ពុជាមានសន្ទុះខ្សោយជាងមុន ដែលអាចធ្វើឲ្យប៉ះពាល់លើការសម្រេចចក្ខុវិស័យរបស់កម្ពុជា ក្នុងការក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០ នោះ ការកែលម្អបរិយាកាសធុរកិច្ច ការធ្វើឲ្យប្រសើរឡើងនូវហេដ្ឋារចនាសម្ព័ន្ធ និងការបង្កើតកម្លាំងពលកម្មដែលមានសមត្ថភាពគឺជាវិធីដើម្បីឆ្ពោះទៅមុខ។ នេះបើតាមអ្នកជំនាញសេដ្ឋកិច្ចរបស់ធនាគារពិពភពលោក។
បើតាមអត្ថបទរបស់អ្នកជំនាញដែលមានចំណងជើងថា៖ «កម្ពុជាឆ្នាំ ២០៣០៖ ការធ្លាក់ល្បឿនសេដ្ឋកិច្ចជាឱកាសសម្រាប់បង្កើនល្បឿនកំណែទម្រង់» ការកែលម្អបន្ថែមទៀតលើបរិយាកាសធុរកិច្ច មានសារៈសំខាន់ណាស់សម្រាប់ជំរុញផលិតភាព និងការប្រកួតប្រជែងរបស់ក្រុមហ៊ុននៅកម្ពុជា តាមរយៈការសម្រួលលក្ខខណ្ឌតម្រូវស្មុគស្មាញ និងតឹងរ៉ឹងសម្រាប់ការបើកធុរកិច្ច ជាពិសេសការចេញអាជ្ញាបណ្ណ និងការអនុញ្ញាតសម្រាប់ការធ្វើអាជីវកម្ម។
អត្ថបទដដែលបន្ថែមថា ការធ្វើឲ្យប្រសើរឡើងនូវហេដ្ឋារចនាសម្ព័ន្ធ និងឡូហ្ស៊ីស្ទិករបស់កម្ពុជា គឺជាមូលដ្ឋានគ្រឹះដ៏សំខាន់ សម្រាប់ការបង្កើនផលិតភាព និងសមត្ថភាពប្រកួតប្រជែងអន្តរជាតិ និងថា កម្ពុជាត្រូវបង្កើនលទ្ធផលនៃការរៀនដើម្បីឆ្លើយតបទៅនឹងកង្វះជំនាញ បង្កើតកម្លាំងពលកម្មដែលមានសមត្ថភាពត្រៀមសម្រាប់អនាគត និងជំរុញកំណើនផលិតភាពរបស់ប្រទេស។
«កំណើនផលិតភាពពលកម្មបានធ្លាក់ចុះយ៉ាងគំហុកក្នុងអំឡុងប្រាំឆ្នាំចុងក្រោយនេះ ហើយបណ្តាក្រុមហ៊ុនក៏បានរាយការណ៍ឲ្យដឹងដែរអំពីការកើនឡើងនៃកង្វះជំនាញ។ មានកុមារកម្ពុជាមិនច្រើនប៉ុន្មានទេដែលបានចុះឈ្មោះទទួលការអប់រំកូនក្មេង ដែលមានន័យថា ជាការបាត់បង់ឱកាសសម្រាប់ការវិវឌ្ឍរបស់កុមារក្នុងវ័យដំបូង ហើយវាក៏ជាឧបសគ្គដល់ការវិលត្រឡប់របស់ម្តាយទៅធ្វើការដើម្បីរកប្រាក់ចំណូលដែរ»។ នេះបើតាមអត្ថបទខាងលើ។
នាយករដ្ឋមន្ត្រីកម្ពុជា លោក ហ៊ុន ម៉ាណែត លើកឡើងកាលពីកន្លងទៅថា កម្ពុជានៅតែរក្សាមហិច្ឆតានៅក្នុងការក្លាយខ្លួនជាប្រទេសចំណូលមធ្យមកម្រិតខ្ពស់នៅឆ្នាំ ២០៣០ និងចំណូលខ្ពស់នៅឆ្នាំ ២០៥០។
ឆ្លើយតបទៅនឹងសំណួររបស់វីអូអេ អ្នកនាំពាក្យក្រសួងសេដ្ឋកិច្ច លោក មាស សុខសេនសាន លើកឡើងថា រដ្ឋាភិបាលតែងតែពិចារណាគ្រប់យោបល់របស់ដៃគូ។
លោកបញ្ជាក់ថា៖ «យើងធ្វើការជាមួយគ្រប់ដៃគូ យោបល់ទាំងអស់នឹងត្រូវយកមកពិនិត្យដើម្បីដាក់ចេញជាវិធានការបន្តបន្ទាប់ ជាមួយគ្រប់តួអង្គពាក់ព័ន្ធ»។
ចំណែកអ្នកនាំពាក្យក្រសួងការងារ លោក កត្តា អន ប្រាប់វីអូអេថា តាមការវាយតម្លៃរបស់អ្នកជំនាញ សេដ្ឋកិច្ចកម្ពុជានៅឆ្នាំ ២០២៤ នឹងកើនឡើងដល់ ៦,៦ ភាគរយ និងថា វិនិយោគក៏មានការកើនឡើងផងដែរ។ លោកបន្ថែមថា ដើម្បីដើរស្របទៅតាមទីផ្សារការងារ រដ្ឋាភិបាលបានបើកវគ្គបណ្តុះបណ្តាលវិជ្ជាជីវៈដល់យុវជនដើម្បីឆ្លើយតបទៅនឹងបញ្ហាកំពុងតែប្រឈម។
លោកថ្លែងថា៖ «យើងឃើញថា មានយុវជនប្រហែលបីម៉ឺននាក់បានចុះឈ្មោះ ហើយដំណាក់កាលដំបូងនៃការបើកការបណ្តុះបណ្តាលមាន ៧០០ ថ្នាក់។ អ៊ីចឹងចាប់ពីមួយថ្ងៃទៅមួយថ្ងៃ យុវជនយើងបន្តចុះឈ្មោះ ហើយយើងបន្តនៃការបើកថ្នាក់សិក្សា។ ដូច្នេះហើយចាប់ពីពេលនេះតទៅ យុវជនយើងនឹងមានជំនាញច្បាស់លាស់ក្នុងជីវិត និងមានជំនាញខ្ពស់ក្នុងការចូលទៅបម្រើការងារនៅក្នុងវិស័យរោងចក្រ សហគ្រាស ដែលជាតម្រូវការចាំបាច់របស់ប្រទេសជាតិចាប់ពីពេលនេះតទៅ»។
បើតាមអត្ថបទបែបវិភាគខាងលើ អ្នកជំនាញសេដ្ឋកិច្ចរបស់ធនាគារពិភពលោកអះអាងថា កំណើនសេដ្ឋកិច្ចកាន់តែខ្ពស់ គឺជាសេចក្តីប្រាថ្នាដែលអាចសម្រេចបាន។ វាគ្រាន់តែតម្រូវឲ្យកម្ពុជាងាកទៅរកគំរូកំណើនសេដ្ឋកិច្ចដែលមានចីរភាពជាងមុន ដែលយកផលិតភាពខ្ពស់ជាមូលដ្ឋាន មានភាពអង់អាចក្នុងការកែទម្រង់រចនាសម្ព័ន្ធ បង្កើនការវិនិយោគមានគុណភាពទៅលើហេដ្ឋារចនាសម្ព័ន្ធ និងធនធានមនុស្ស និងអនុវត្តគោលនយោបាយអភិវឌ្ឍន៍ដែលមានភាពឆ្លាតវៃផ្នែកអាកាសធាតុ។
គួររំឭកថា គិតចាប់តាំងពីការបង្កើតរដ្ឋាភិបាលថ្មីដែលមានសមាសភាពភាគច្រើនជាមនុស្សវ័យក្មេង កម្មវិធីនយោបាយថ្មីៗជាច្រើនត្រូវបានកំណត់ឡើង នៅក្រោមយុទ្ធសាស្ត្របញ្ចកោណដែលមានគោលដៅធ្វើឲ្យប្រទេសកម្ពុជាប្រែក្លាយខ្លួនជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងឆ្ពោះទៅសម្រេចបានចក្ខុវិស័យកម្ពុជាមានចំណូលខ្ពស់ឆ្នាំ ២០៥០។
ស្របពេលមានការដាក់ចេញគោលនយោបាយថ្មីៗរបស់រដ្ឋាភិបាលអាណត្តិទី ៧ នេះ អ្នកជំនាញសេដ្ឋកិច្ចរបស់ធនាគារពិភពលោកក៏បានផ្តល់ការធ្វើអត្ថាធិប្បាយកន្លងមកថា កម្ពុជាត្រូវប្រកាន់ជំហរបើកចំហទទួលយកការវិនិយោគដើម្បីទ្រទ្រង់កំណើនសេដ្ឋកិច្ចរបស់ខ្លួន នៅក្នុងបរិបទដែលពិភពលោកកំពុងប្រឈមមុខនឹងវិបត្តិនានា។ ហើយប្រទេសនេះក៏ត្រូវបន្តពង្រឹងវិស័យអប់រំចាប់តាំងពីការអប់រំនៅមុនវ័យកុមារភាព ដល់កម្រិតវិទ្យាល័យ ដើម្បីបង្កើនផលិតភាពការងារ និងភាពប្រកួតប្រជែងរបស់ខ្លួនទៅថ្ងៃខាងមុខ។
ធនាគារពិភពលោកក៏បានព្យាករផងដែរថា កំណើនសេដ្ឋកិច្ចកម្ពុជានឹងកើនដល់ ៥,៨ ភាគរយ ក្នុងឆ្នាំ ២០២៤ និង ៦,១ ភាគរយក្នុងឆ្នាំ ២០២៥ ជាមួយការរំពឹងទុកអំពីការកើនឡើងនូវការវិនិយោគហេដ្ឋារចនាសម្ព័ន្ធ និងអត្ថប្រយោជន៍ដែលនឹងកើតចេញពីកិច្ចព្រមព្រៀងពាណិជ្ជកម្មនានា ដែលកម្ពុជាមានជាមួយបណ្តាប្រទេសនៅក្នុងតំបន់៕
វេទិកាបញ្ចេញមតិ