លោក ហ៊ុន សែន បានដាក់«ទិវាឈ្នះឈ្នះ»ជាបុណ្យជាតិក្នុងប្រតិទិនផ្លូវការរបស់រដ្ឋប្រចាំឆ្នាំ និងតម្រូវឱ្យមានការប្រារព្ធនៅគ្រប់ទីកន្លែងជាមួយសារ«អរគុណសន្ដិភាព» តែអ្នកវិភាគថា លោកនាយករដ្ឋមន្ត្រី កំពុងចារឹកកេរដំណែលនយោបាយផ្ទាល់ខ្លួនរបស់លោកជាផ្លូវការ។
លោកនាយករដ្ឋមន្ត្រី ហ៊ុន សែន បានកំណត់ថ្ងៃទី២៩ ខែធ្នូ ថា ជាទិវាឈ្នះ ឈ្នះ ដាក់ក្នុងប្រតិទិនប្រចាំឆ្នាំ ដោយមិនមានការឈប់សម្រាកទេ។ ប៉ុន្តែ តម្រូវឲ្យស្ថាប័នរដ្ឋ និងឯកជនទាំងអស់រៀបចំពាក្យស្លោក ដែលមានខ្លឹមសារថា «អរគុណសន្តិភាព! អរគុណនយោបាយឈ្នះឈ្នះ! ដឹងគុណស្ថាបនិក មគ្គុទេសក៍ឯក និងប្រតិបត្តិករនយោបាយឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញ!»។នេះ បើតាមសារាចរណែនាំរបស់រាជរដ្ឋាភិបាលកម្ពុជា ចុះថ្ងៃទី១៤ ខែមករា ឆ្នាំ២០២២ នេះ។
ការដាក់បញ្ចូលនេះ គឺនឹងត្រូវអនុវត្តចាប់ពីឆ្នាំ២០២២ នេះតទៅ។
បើតាមលោក ហ៊ុន សែន ការកំណត់ដាក់ថ្ងៃ២៩ ខែធ្នូ ចូលក្នុងប្រតិទិននេះ គឺដើម្បី«ដឹងគុណ កត្តញ្ញូ និងចងចាំគុណូបការៈដ៏ថ្លៃថ្លា»នៃនយោបាយឈ្នះឈ្នះរបស់លោក ហ៊ុន សែន។ លោក ហ៊ុន សែន បានបង្ហាញចេតនាដំបូងក្នុងការបញ្ចូលទិវាឈ្នះ ឈ្នះ ថ្ងៃ២៩ធ្នូនេះ ជាបុណ្យជាតិ អំឡុងពេលលោកថ្លែងសុន្ទរកថានៅទីស្តីការក្រសួងការពារជាតិថ្មី កាលពីថ្ងៃទី២៩ ខែធ្នូ ឆ្នាំ២០២១។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា ប្រាប់វីអូអេថា ការដាក់ថ្ងៃទី២៩ ខែធ្នូ ក្នុងប្រតិទិន ដោយមិនឈប់សម្រាកនេះ គឺមិនមានការប៉ះពាល់អ្វីដល់ផលិតភាពសេដ្ឋកិច្ចនោះទេ។ ហើយការណ៍នេះ គឺជាការរំឭកពីស្នាដៃនយោបាយរបស់លោកនាយករដ្ឋមន្ត្រី ដែលធ្វើឲ្យមានឯករាជ្យ និងឯកភាពទឹកដីប្រទេសកម្ពុជា។
លោកថ្លែងថា៖ «អាហ្នឹងជាទិវានយោបាយមួយ ដែលរំឭកឲ្យយើងនឹកឃើញ តែប៉ុណ្ណឹង នូវអ្វីដែលនឹកឃើញអំពីថា ៥០០ឆ្នាំកន្លងមក យើងមិនដែលទទួលបានឯករាជ្យ ឬក៏ឯកភាពទឹកដីទូទាំងប្រទេសរបស់កម្ពុជានោះទេ»។
ដោយឡែក អ្នកវិភាគនយោបាយ លោក សេង សារី មើលឃើញថា ពាក្យស្លោកថ្មី «អរគុណសន្តិភាព» គឺជាការខំបង្កើតឡើងរបស់អ្នកនយោបាយ ដែលចង់ទាញប្រយោជន៍នយោបាយ និងលើកស្ទួយស្នាដៃបុគ្គល តែប៉ុណ្ណោះ។ ខណៈថ្ងៃបុណ្យជាតិ៧ មករា ដែលតែងតែត្រូវបានគេលើកឡើងថា ជា«ថ្ងៃកំណើតទី២» និងបង្កើតឡើងដោយសមូហភាពនោះ ហាក់បីដូចជាស្ងប់ស្ងាត់ក្នុងមួយរយៈពេលចុងក្រោយនេះ។
លោកថ្លែងថា៖ «ហើយចម្លែកមួយ ដែលជារឿងឲ្យគួរឲ្យចាប់អារម្មណ៍ ក្នុងរយៈពេល២ឆ្នាំចុងក្រោយនេះ។ យើងឃើញថា សូម្បីថ្ងៃ៧ មករា ក៏ហាក់មិនសូវជាបានចាប់អារម្មណ៍ខ្លាំងប៉ុណ្ណាដែរ ហើយពាក្យស្លោកដែលយើងនិយាយអំពីរឿង ៧មករា ជីវិតទី២ អរគុណ៧ មករា អរគុណអីជាដើមហ្នឹង គឺរៀងសាបរលាបទៅដែរ។ ក៏ប៉ុន្តែ យើងឃើញពាក្យស្លោកថ្មីមួយដែលផុសផុលប្រើហ្នឹង គឺពាក្យអរគុណសន្តិភាព»។
លោកបន្តថា៖ «ហើយបើយើងមើលប្រភពនៃពាក្យអរគុណសន្តិភាពមកពីណា ហើយវាមានចរិតនយោបាយបែបណា យើងសង្កេតឃើញហើយថា ៧ មករា ជាសម្បត្តិសមូហភាពរវាងអ្នកតស៊ូទាំងអស់នៅក្នុងចលនាតស៊ូប្រឆាំងនឹងរបប ប៉ុល ពត។ ក៏ប៉ុន្តែ អរគុណសន្តិភាពជាសម្បត្តិតែមួយគត់របស់លោកនាយករដ្ឋមន្ត្រី ហ៊ុន សែន ដែលប្រឹងប្រែងប្រើប្រាស់នយោបាយឈ្នះ ឈ្នះ។ ហើយអំឡុងពេលនេះ គាត់មានអំណាចពេញដៃ គាត់ត្រូវតែ Promote [ផ្សព្វផ្សាយ]។ គាត់ត្រូវតែលើកស្ទួយស្នាដៃរបស់គាត់ហើយ អាហ្នឹងជារឿងអ្នកនយោបាយកម្ពុជា តែងតែធ្វើកន្លងមក»។
លោក សេង សារី ចង់ឃើញអ្នកនយោបាយ និងរដ្ឋាភិបាលកម្ពុជា កំណត់យកស្តង់ដារនៃចំនួនបុណ្យជាតិឲ្យសមល្មម ដោយយកតែបុណ្យជាតិសំខាន់ៗ ដើម្បីឲ្យប្រជាពលរដ្ឋ រំឭក ចងចាំពីសាមគ្គីភាព និងការផ្សះផ្សាជាតិជាដើម។
យ៉ាងណាក្ដីលោក ផៃ ស៊ីផាន បានបកស្រាយថា ទិវាឈ្នះ ឈ្នះ ថ្ងៃ២៩ ធ្នូ នេះ គឺមានសារៈសំខាន់ និងជាផលប្រយោជន៍របស់ប្រទេសជាតិទាំងមូល។ លោកបន្តថា ទិវា៧ មករា និងទិវាបុណ្យជាតិផ្សេងៗទៀត ក៏មានសារៈសំខាន់ដូចគ្នាផងដែរ ដែលជាការរំឭកពីសារៈសំខាន់នៃព្រឹត្តិការណ៍នីមួយៗ។
លោក ហ៊ុន សែន និងអ្នកគាំទ្ររូបលោក តែងបានលើកឡើងថា កិច្ចព្រមព្រៀងក្រុងប៉ារីសឆ្នាំ១៩៩១ មិនបានបញ្ចប់សង្គ្រាមនៅកម្ពុជានោះទេ តែកិច្ចខិតខំប្រឹងប្រែងរបស់លោក ហ៊ុន សែន ផ្ទាល់ទៅវិញទេ ដែលបានបញ្ចប់អង្គការចាត់តាំងនយោបាយ និងយោធារបស់ខ្មែរក្រហម នៅដំណាច់ទសវត្សរ៍ទី១៩៩០។
សំណង់វិមានឈ្នះឈ្នះ ត្រូវបានកសាងឡើងនិងដាក់ឱ្យប្រើប្រាស់នៅប៉ែកខាងជើងរាជធានីភ្នំពេញ កាលពីឆ្នាំ២០១៨ ចំណាយទឹកប្រាក់១២លានដុល្លារ ហើយរដ្ឋគ្រោងនឹងបន្តសាងសង់ស្ដូបអនុស្សាវរីយ៍នេះនៅតាមបណ្ដាខេត្តនានាផងដែរ។ «អង្គភាពសេនាតេជោ»ត្រូវបានបង្កើតឡើងនៅក្រសួងការពារជាតិ ដើម្បីទទួលបន្ទុកថែទាំស្ដូបទាំងនោះ និងផ្សព្វផ្សាយនយោបាយឈ្នះឈ្នះ៕
