មន្ត្រីអន្តោប្រវេសន៍និងគយអាមេរិក គ្រោងចាប់ផ្តើមវិធានការរឹតបន្តឹងច្បាប់អន្តោប្រវេសន៍ទ្រង់ទ្រាយធំ នៅថ្ងៃអាទិត្យនេះ ដោយរំពឹងថា នឹងចាប់បញ្ជូនខ្លួនជនអន្តោប្រវេសន៍ខុសច្បាប់ប្រមាណ ២,០០០នាក់ ដែលភាគច្រើនត្រូវបានចៅក្រមចេញដីកាបញ្ជូនខ្លួនទៅប្រទេសកំណើតរបស់ពួកគេវិញ និងជនអន្តោប្រវេសន៍ដែលមិនបានទៅបង្ហាញខ្លួននៅតុលាការទាក់ទងនឹងសំណុំរឿងអន្តោប្រវេសន៍របស់ពួកគេ។
ការចាត់វិធានការចាប់បញ្ជូនខ្លួនជនអន្តោប្រវេសន៍ខុសច្បាប់ទ្រង់ទ្រាយធំនេះ មិនទាន់ត្រូវបានបញ្ជាក់ឲ្យបានច្បាស់លាស់ដោយមន្ត្រីអន្តោប្រវេសន៍និងគយអាមេរិក ឬហៅថា (ICE) នៅឡើយទេ។ ការចាត់វិធានការនេះបានកើតឡើងបីសប្តាហ៍ ក្រោយពីលោកប្រធានាធិបតី ដូណាល់ ត្រាំ បានសន្យាថា នឹងចាប់ផ្តើមចាប់បញ្ជូនខ្លួន «ជនអន្តោប្រវេសន៍ខុសច្បាប់រាប់លាននាក់» ចេញពីសហរដ្ឋអាមេរិក។
លោក Matthew Bourke មន្ត្រី ICE បានសរសេរនៅក្នុងសេចក្តីថ្លែងការណ៍មួយថា៖ «ជាទូទៅ មន្ត្រីអន្តោប្រវេសន៍និងគយអាមេរិក ផ្តល់លទ្ធភាពចម្បងលើការចាប់ខ្លួន និងបញ្ជូនខ្លួនជនអន្តោប្រវេសន៍ខុសច្បាប់ ដែលបង្កការគំរាមកំហែងដល់សន្តិសុខជាតិ សណ្តាប់ធ្នាប់សាធារណៈ និងសន្តិសុខតាមព្រំដែន»។
លោក Bourke បានបដិសេធមិនផ្តល់ព័ត៌មានលម្អិតទាក់ទងនឹងវិធានការរឹតបន្តឹងច្បាប់អន្តោប្រវេសន៍ ដែលមិនទាន់ត្រូវបានអនុម័តជាផ្លូវការនេះនៅឡើយទេ ក៏ប៉ុន្តែ លោកបានលើកឡើងថា៖ «ជនគ្រប់រូបដែលបំពានច្បាប់អន្តោប្រវេសន៍ អាចនឹងត្រូវបានចាប់ខ្លួន ឃុំខ្លួន និងបញ្ជូនខ្លួនទៅប្រទេសកំណើតរបស់ពួកគេវិញ បើសិនជាពួកគេត្រូវបានរកឃើញថា ត្រូវបានចៅក្រមចេញដីកាបញ្ជូនខ្លួនចេញពីសហរដ្ឋអាមេរិក»។
កាសែត The New York Times បានរាយការណ៍មុនគេអំពីវិធានការចាប់បញ្ជូនខ្លួនទ្រង់ទ្រាយធំនេះនៅថ្ងៃព្រហស្បតិ៍។ យោងតាមកាសែតមួយនេះ វិធានការនេះនឹងកើតឡើងនៅក្នុងទីក្រុងធំៗចំនួន ១០ នៅសហរដ្ឋអាមេរិក ដែលនឹងចំណាយពេលជាច្រើនថ្ងៃ។
សេតវិមានរបស់រដ្ឋបាលរបស់លោក ត្រាំ បានលើកឡើងអំពីវិធានការរឹតបន្តឹងច្បាប់អន្តោប្រវេសន៍នេះជាច្រើនខែមកហើយ។
កាលពីថ្ងៃពុធ លោក Ken Cuccinelli នាយកស្តីទីប្រចាំទីភ្នាក់ងារផ្តល់សិទ្ធិនិងអន្តោប្រវេសន៍អាមេរិក ឬហៅថា (USCIS) បានប្រាប់អ្នកសារព័ត៌មានថា ទីភ្នាក់ងាររបស់លោកនឹងចាត់វិធានការលើជនអន្តោប្រវេសន៍ប្រមាណ ១លាននាក់ ដែលត្រូវបានចៅក្រមចេញដីកាចាប់បញ្ជូនខ្លួនចេញពីសហរដ្ឋអាមេរិក។
មន្ត្រីអន្តោប្រវេសន៍និងគយអាមេរិក បានប្រាប់ VOA ថា ចំនួនជនអន្តោប្រវេសន៍សរុប ដែលអាចនឹងត្រូវបានចាប់បញ្ជូនខ្លួន ក្នុងនោះរួមមានអ្នកដែលត្រូវបានចៅក្រមចេញដីកាចាប់បញ្ជូនខ្លួន ឬដែលកំពុងរង់ចាំដំណើរការនីតិវិធីចាប់បញ្ជូនខ្លួននៅតុលាការ «មិនទាន់ត្រូវបានផ្សព្វផ្សាយភ្លាមៗ» នៅឡើយទេ។
ទីភ្នាក់ងារអន្តោប្រវេសន៍និងគយ បានរាយការណ៍ថា មានការបញ្ជូនខ្លួនជនអន្តោប្រវេសន៍ខុសច្បាប់ចំនួន ២៥៦,០៨៥នាក់ សម្រាប់ឆ្នាំ ២០១៨ និងចំនួន ២២៦,១១៩នាក់ សម្រាប់ឆ្នាំ ២០១៧។
យោងតាមកាសែត The New York Times ការចាត់វិធានការចាប់បញ្ជូនខ្លួនជនអន្តោប្រវេសន៍ខុសច្បាប់ទ្រង់ទ្រាយធំនេះ អាចនឹងជំរុញឲ្យមានការចាប់បញ្ជូនខ្លួនជនអន្តោប្រវេសន៍ខុសច្បាប់ ដែលមិនត្រូវបានកំណត់ជាគោលដៅនៅក្នុងដំណើរការចាប់បញ្ជូនខ្លួននេះ។ កាសែតមួយនេះ បានដកស្រង់ពាក្យសម្តីមន្ត្រីអន្តោប្រវេសន៍ដែលបានលើកឡើងថា ក្រុមគ្រួសារជនអន្តោប្រវេសន៍ដែលត្រូវបានឃុំខ្លួន នឹងត្រូវប្រមូលផ្តុំគ្នា និងបញ្ជូនខ្លួនទៅប្រទេសកំណើតរបស់ពួកគេភ្លាមៗតែម្តង។
លោក Chuck Schumer មេដឹកនាំសំឡេងភាគតិចប្រចាំព្រឹទ្ធសភាអាមេរិកមកពីគណបក្សប្រជាធិបតេយ្យ បានថ្កោលទោសការចាត់វិធានការបែបអមនុស្សធម៌នេះ។ លោកបានមានប្រសាសន៍ថា៖ «នេះមិនមែនជាកិច្ចខិតខំប្រឹងប្រែងចាប់បញ្ជូនខ្លួនជនដែលបង្កគ្រោះថ្នាក់ទេ។ នេះគឺជាសកម្មភាពចាប់បង្ខំបែបហិង្សា ដែលធ្វើឡើងដើម្បីធ្វើឲ្យភាពភ័យខ្លាចរីករាលដាលនៅក្នុងសហគមន៍ជនអន្តោប្រវេសន៍»៕
ប្រែសម្រួលដោយ ទែន សុខស្រីនិត
