ប្រធានាធិបតីសហរដ្ឋអាមេរិកលោក Donald Trump គ្រោងនឹងប្រកាសនៅថ្ងៃព្រហស្បតិ៍នេះអំពីសំណើច្បាប់អន្តោប្រវេសន៍របស់លោកដែលគេទន្ទឹងរង់ចាំជាយូរមកហើយ។
មន្ត្រីជាន់ខ្ពស់មួយរូបនៃរដ្ឋបាលរបស់លោក Trump បាននិយាយថា គម្រោងនេះនឹងបង្កើនសន្តិសុខព្រំដែន និងបង្កើតនូវប្រព័ន្ធមួយដែលផ្អែកលើភាពល្អត្រឹមត្រូវពិតប្រាកដ។
សំណើរបស់លោក Trump នេះ នឹងកំណត់ចំនួននៃការផ្ដល់ប័ណ្ណរស់នៅអចិន្ត្រៃយ៍ ដែលហៅថា green cards ឲ្យនៅត្រឹមតែប្រហែល ១ លាន ១ សែនកាតប៉ុណ្ណោះជារៀងរាល់ឆ្នាំ ប៉ុន្តែនឹងផ្ដល់អាទិភាពនៃការផ្ដល់ប័ណ្ណនេះដល់អ្នកដែលមានជំនាញ និងការអប់រំខ្ពស់ ដែលមានបំណងចង់ធ្វើការ ឬក៏វិនិយោគផ្សេងៗ ជាជាងផ្ដល់អាទិភាពដល់អ្នកដែលទំនាក់ទំនងគ្រួសារជាមួយនឹងពលរដ្ឋអាមេរិកាំង ឬក៏តម្រូវការមនុស្សធម៌នានា។
នាពេលបច្ចុប្បន្ននេះ ជនអន្តោប្រវេសន៍ ១២ ភាគរយ នឹងត្រូវផ្ដល់សិទ្ធិឲ្យមករស់នៅសហរដ្ឋអាមេរិក ផ្អែកលើជំនាញរបស់ពួកគេ ហើយ ៦៦ ភាគរយផ្អែកលើទំនាក់ទំនងសមាជិកគ្រួសារដែលរស់នៅស្របច្បាប់នៅក្នុងសហរដ្ឋអាមេរិក។
ប៉ុន្តែនៅក្រោមគម្រោងនេះ ទិដ្ឋាការអន្តោប្រវេសន៍ ៥៧ ភាគរយ នឹងផ្ដល់ជូនអ្នកដែលមានជំនាញ ឬអ្នកដែលគេជ្រើសរើសឲ្យធ្វើការ ហើយទិដ្ឋាការអន្តោប្រវេសន៍នេះតែ ៣៣ ភាគរយប៉ុណ្ណោះនឹងត្រូវផ្ដល់ជូនអ្នកដែលមានទំនាក់ទំនងគ្រួសារ។ ចំណែកឯទិដ្ឋាការដែលផ្ដល់ជូនផ្អែកលើតម្រូវការមនុស្សធម៌នឹងត្រូវកាត់បន្ថយពី ២២ ភាគរយ មកនៅត្រឹម ១០ ភាគរយ។
សំណើច្បាប់នេះនឹងលុបចោលទាំងស្រុងនូវកម្មវិធីអន្តោប្រវេសន៍តាមរយៈឆ្នោតផ្សងសំណាង ដែលហៅថា Diversity Immigrant Visa Program ដោយនៅពេលបច្ចុប្បន្ននេះ កម្មវិធីនេះផ្ដល់ប័ណ្ណរស់នៅអចិន្ត្រៃយ៍ចំនួន ៥ ម៉ឺនប័ណ្ណជារៀងរាល់ឆ្នាំ ដល់ប្រទេសដែលមានអត្រាអន្តោប្រវេសន៍ទាបនៅក្នុងសហរដ្ឋអាមេរិក៕
