ចំនួនអ្នកឆ្លងនិងអ្នកស្លាប់ពីជំងឺកូវីដ១៩សរុបរបស់ពិភពលោកបានបន្តកើនឡើង ដោយត្រឹមថ្ងៃសុក្រ នៅជុំវិញពិភពលោក ជំងឺដ៏ប្រល័យនេះបានឆ្លងដល់មនុស្សជាង៩,៦លាននាក់។
ទិន្នន័យពីសាកលវិទ្យាល័យ Johns Hopkins បង្ហាញថា សហរដ្ឋអាមេរិកមានការឆ្លងច្រើនជាងគេ ជាង២,៤លាននាក់ បន្ទាប់មកគឺប្រទេសប្រេស៊ីល ១,២ លាននាក់ និងទី៣ រុស្ស៊ីដែលមានអ្នកឆ្លងជាង៦១៣.០០០នាក់។
សហរដ្ឋអាមេរិកក៏ជាប្រទេសមានចំនួនអ្នកស្លាប់ពីជំងឺកូវីដ១៩ច្រើនជាងគេដែរ ដោយមានអ្នកស្លាប់រហូតដល់១២៤.០០០នាក់ ខណៈប្រទេសលំដាប់ទីពីរគឺប្រេស៊ីល ៥៥.០០០នាក់ និងទី៣គឺ ចក្រភពអង់គ្លេសមានអ្នកស្លាប់ជាង៤៣.០០០នាក់គិតត្រឹមថ្ងៃសុក្រ។
មន្ត្រីអង្គការ WHO និយាយកាលពីថ្ងៃព្រហស្បតិ៍ថា ប្រទេស៣០ នៅទ្វីបអឺរ៉ុបរួមទាំងប្រទេសស៊ុយអែតផងដែរ កំពុងមានការកើនឡើងជាថ្មីនៃចំនួនការឆ្លងប្រចាំថ្ងៃនៃកូវីដ១៩ ក្នុងរយៈពីរសប្តាហ៍ចុងក្រោយ។
អង្គការសុខភាពពិភពលោក WHO និយាយថា នៅទ្វីបអាហ្វ្រិក អត្រាឆ្លងកូវីដ១៩ក្នុងចំណោមអ្នកបម្រើការខាងសុខភាព បានកើនរហូតដល់២០៣% ដោយកត្តាជាច្រើនរួមទាំងកង្វះខាតសម្ភារៈការពារខ្លួន។
នៅពេលនេះ អង្គការមូលនិធិកុមាររបស់ អ.ស.ប.ហៅ កាត់ថា UNICEF និងអង្គការសុខភាពពិភពលោកបានចាប់ផ្តើមគម្រោងសាកលរួមគ្នាថ្មីមួយហៅថា គម្រោង«អនាម័យដៃសម្រាប់ទាំងអស់គ្នា» Hand Hygiene For All ដែលមានគោលដៅដើម្បីជួយជនក្រីក្រនៅជុំវិញពិភពលោកប្រយុទ្ធនឹងវីរុសកូរ៉ូណា។
អង្គការទាំងនេះថា វិបត្តិជំងឺរាតត្បាតកូវីដ១៩បានបង្ហាញថា មនុស្សជាច្រើននៅជុំវិញពិភពលោកមិនអាចឬមិនមានលទ្ធភាពលាងសម្អាតដៃឲ្យស្អាតបាន ដែលនេះមានសារៈសំខាន់សម្រាប់បង្ការជំងឺឆ្លងទៅអនាគតទៀត៕
