ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រទេស​បារំាង​និង​អាល្លឺម៉ង់​សម្តែង​ការ​គាំទ្រ​ខាង​នយោបាយ​និង​ហិរញ្ញវត្ថុ​ដល់​អង្គការ​សុខភាព​ពិភព​លោក


រដ្ឋ​មន្ត្រី​សុខាភិបាល​សហព័ន្ធ​អាល្លឺម៉ង់ លោក Jens Spahn (ឆ្វេង) ថ្លែង​ក្នុង​សន្និសីទ​សារព័ត៌មាន នៅ​ទីក្រុង​ហ្សឺណែវ ប្រទេស​ស្វ៊ីស កាល​ពី​ថ្ងៃ​ទី​២៥ មិថុនា ២០២០ នៅ​ក្បែ​រ​អគ្គនាយក​អង្គការ​សុខភាព​ពិភពលោក លោក Tedros Adhanom Ghebreyesus។

ប្រទេស​បារាំង​និង​អាល្លឺម៉ង់ បាន​សន្យា​កាល​ពី​ថ្ងៃ​ព្រហស្បតិ៍​ម្សិល​មិញ​ថា នឹង​រួម​វិភាគទាន​ថវិកា​កាន់​តែ​ច្រើន​ឡើង​ដល់​អង្គការ​សុខភាព​ពិភព​លោក (WHO) នៅ​ពេល​ដែល​អង្គការ​នេះ​ប្រយុទ្ធ​ប្រឆាំង​ការ​រាត​ត្បាត​នៃ​មេរោគ​កូរ៉ូណា។

ការ​សន្យា​នេះ​កើត​មាន​ឡើង​បន្ទាប់​ពី​លោក ​Tedros Adhanom Ghebreyesus​ អគ្គនាយក​អង្គការ​សុខភាព​ពិភព​លោក​ បាន​ជួប​ជាមួយ​រដ្ឋ​មន្រ្តី​សុខាភិបាល​មក​ពី​ប្រទេស​ទាំង​២​នៅ​ក្នុង​ទីក្រុង​ហ្សឺណែវ​ ដើម្បី​ពិភាក្សា​ពី​ការ​រាតត្បាត​និង​ការ​ឆ្លើយ​តប​សាកល។

ជំនួប​កាល​ពី​ថ្ងៃព្រហស្បតិ៍ ជួន​គ្នា​ជាមួយ​ការ​ប្រកាស​ដោយ​លោក​ Hans Kluge នាយក​ប្រចាំ​តំបន់​អឺរ៉ុប​របស់​អង្គការ​សុខភាព​ពិភព​លោក​ពី​«ការ​ផ្ទុះ​ឡើង​វិញ​យ៉ាង​ខ្លាំង​នូវ​មេរោគ​កូរ៉ូណា​នៅ​ទូទាំង​តំបន់​អឺរ៉ុប»។

លោក ​Jens Spahn​ រដ្ឋមន្រ្តី​ក្រសួង​សុខាភិបាល​សហព័ន្ធ​អាល្លឺម៉ង់ បាន​និយាយ​ថា​ អាល្លឺម៉ង់​ មាន​គោល​បំណង​ផ្តល់​ប្រាក់​ជាង​៥៦០​លាន​ដុល្លារ​និង​ឧបករណ៍​ដល់​អង្គការ​សុខភាព​ពិភព​លោក​នៅ​ឆ្នាំ​នេះ នៅ​ពេល​ដែល​អាល្លឺម៉ង់​ធ្វើ​ជា​ប្រធាន​សហភាព​អឺរ៉ុប។ការ​គាំទ្រ​ថ្មី​ដល់​អង្គការ​សុខភាព​ពិភព​លោក​ ត្រូវ​តែ​ទទួល​បាន​ការ​យល់​ព្រម​ជាមុន​សិន​ពី​សភា។ លោក ​Spahn​ និយាយ​បន្ថែ​ម​ទៀត​ថា ​រដ្ឋាភិបាល​មាន​សុទិដ្ឋិនិយម​ថា​ ការ​ជួយ​នេះ​នឹង​កើត​មាន​ឡើង​នៅ​ដើម​ខែ​កក្កដា។

ប្រទេស​បារាំង​បាន​ប្រាប់​ឲ្យ​ដឹង​ថា ខ្លួន​ នឹង​ផ្តល់​ថវិកា​ចំនួន​១០០​លាន​ដុល្លារ​ទៅ​ឲ្យ​មជ្ឈមណ្ឌល​ស្រាវ​ជ្រាវ​របស់​អង្គការ​សុខភាព​ពិភព​លោក​នៅ​ក្នុង​ទីក្រុង​លីយ៉ុង​ ហើយ​នឹង​រួម​វិភាគទាន​បន្ថែម​៥៦​លាន​ដុល្លារ​ទៀត។

ប្រធានា​ធិបតី​សហរដ្ឋ​អាមេរិក​លោក​ដូណាល់ ត្រាំ បាន​ប្រកាស​កាល​ពី​ខែ​មុន​ថា​ សហរដ្ឋ​អាមេរិក​ នឹង​បញ្ចប់​ទំនាក់​ទំនង​របស់​ខ្លួន​ជាមួយ​អង្គការ​សុខភាព​ពិភពលោក​ដែល​លោក​ប្រធានាធិបតី ​បាន​និយាយ​ថា​ អង្គការ​នេះ​ត្រូវ​បាន​ត្រួត​ត្រា​ដោយ​ប្រទេស​ចិន។ ករណី​ជំងឺ​កូវីដ១៩ ទី១​ បាន​ត្រូវ​រាយការណ៍​នៅ​ក្នុង​ទីក្រុង​វូហាន​នៃ​ប្រទេស​ចិន​កាល​ពី​ចុង​ឆ្នាំ​២០១៩៕

XS
SM
MD
LG