សេតវិមានប្រធានាធិបតីអាមេរិកកំពុងលើកទឹកចិត្តសមាជិករដ្ឋសភានានាឲ្យអនុម័តលើច្បាប់ថវិកាបណ្ដោះអាសន្នមួយ ដែលអាចបង្វែងមិនឲ្យមានការបិទរដ្ឋាភិបាលមួយផ្នែកបាន។
សភាមានពេលរហូតដល់ថ្ងៃសុក្រស្អែកក្នុងការអនុម័តលើច្បាប់ថវិកា សម្រាប់ការចំណាយរបស់រដ្ឋាភិបាលរហូតដល់ថ្ងៃទី ២២ ខែធ្នូនេះ។ ប្រសិនបើច្បាប់នេះមិនត្រូវបានអនុម័ត នោះផ្នែកមួយចំនួនរបស់រដ្ឋាភិបាលអាចត្រូវបង្ខំចិត្តបិទទ្វាររហូតទាល់តែគម្រោងថវិកានេះត្រូវបានអនុម័ត។
សេតវិមានបានចេញនូវសេចក្ដីប្រកាសមួយកាលពីថ្ងៃពុធម្សិលមិញ ដោយលើកឡើងថា លោកប្រធានាធិបតី Donald Trump នឹងចុះហត្ថលេខាលើច្បាប់ថវិកានេះ ប្រសិនបើរដ្ឋសភាអនុម័តច្បាប់នេះ។
គម្រោងបច្ចុប្បន្នសម្រាប់ការចំណាយភាគច្រើនរបស់រដ្ឋាភិបាលសហព័ន្ធគឺនឹងផុតកំណត់នៅថ្ងៃសៅរ៍ខាងមុខនេះ។
ប្រសិនបើច្បាប់ថវិកានេះត្រូវបានអនុម័ត នោះគម្រោងចំណាយបណ្ដោះអាសន្ននេះនឹងពង្រីកការចំណាយរបស់រដ្ឋាភិបាលក្នុងកម្រិតបច្ចុប្បន្ននេះ ដោយមិនមានការផ្លាស់ប្ដូរចំពោះគោលនយោបាយអន្តោប្រវេសន៍ ឬក៏ការចំណាយចំពោះវិស័យយោធានោះទេ។ ហើយការអនុម័តច្បាប់ថវិកានេះក៏នឹងផ្គត់ផ្គង់ការចំណាយដល់កម្មវិធីធានារ៉ាប់រងសុខភាពកុមាររហូតដល់ចុងខែធ្នូនេះផងដែរ។
កាលពីព្រឹកថ្ងៃពុធម្សិលមិញ លោក Trump បានព្រមានថា ការបិទរដ្ឋាភិបាលអាចកើតឡើង និងបានបន្ទោសគណបក្សប្រជាធិបតេយ្យពាក់ព័ន្ធនឹងការទាមទាររបស់ពួកគេទាក់ទិននឹងបញ្ហាអន្តោប្រវេសន៍៕
