ភ្ជាប់​ទៅ​គេហទំព័រ​ទាក់ទង

អតីត​អ្នក​ជំនួយការ​សន្តិសុខ​ជាតិ​របស់​លោក ​ត្រាំ​ សារភាព​ទទួល​ទោស​ពី​ការ​កុហក​ FBI


រូបឯកសារ៖ លោក Michael Flynn អតីត​ទីប្រឹក្សា​ផ្នែក​សន្តិសុខ​ជាតិរបស់​សេត​វិមាន។

លោក ​Michel Flynn ​អតីត​ទីប្រឹក្សា​សន្តិសុខ​ជាតិ​របស់​ប្រធានា​ធិបតី​សហរដ្ឋ​អាមេរិក ​ដូណាល់ ត្រាំ​ បាន​សារភាព​ទទួល​ទោស​កាល​ពី​ថ្ងៃ​សុក្រ​ចំពោះ​ការ​ភូត​កុហក​ពួក​អ្នក​ស៊ើប​អង្កេត​សហព័ន្ធ​អំពីការ​ទាក់​ទង​របស់​លោក​ជាមួយ​ឯកអគ្គរដ្ឋ​ទូតរបស់​ប្រទេសរុស្ស៊ី​ប្រចាំ​នៅ​សហរដ្ឋ​អាមេរិក។

ការ​សារភាព​ទទួល​ទោស​របស់​លោក​ Flynn ​កាល​ពី​ថ្ងៃ​សុក្រ​ជា​ការ​ចង្អុល​បង្ហាញ​មួយ​ទៀត​ថា​ អតីត​ទីប្រឹក្សា​កំពុង​សហ​ប្រតិបត្តិការណ៍​ជាមួយ​ក្រុម​ប្រឹក្សា​ស៊ើប​អង្កេត​ពិសេស​ក្នុង​ការ​ជ្រៀត​ជ្រែក​របស់​ប្រទេស​រុស្ស៊ី​ក្នុង​ការ​បោះ​ឆ្នោត​ប្រធានាធិបតី​អាមេរិក​នៅ​ឆ្នាំ​២០១៦ ហើយ​និង​ពី​លទ្ធភាព​នៃ​ការ​ឃុប​ឃិត​គ្នា​ជាមួយ​យុទ្ធនាការ​ឃោសនា​បោះឆ្នោត​របស់លោក​ ដូណាល់ ​ត្រាំ។

ក្នុង​សេចក្តី​ថ្លែងការណ៍​មួយ​ដែល​បាន​ចេញ​ផ្សាយ​បន្ទាប់​ពី​ការ​បង្ហាញ​ខ្លួន​នៅ​តុលា​ការ ​លោក Flynn ​បាន​និយាយថា៖ «សកម្មភាព​ដែល​ខ្ញុំ​បាន​ទទួល​ស្គាល់​ក្នុង​តុលាការ​នៅ​ថ្ងៃ​នេះ​ជា​កំហុស​មួយ ​ហើយ​តាម​រយៈ​ព្រះ​ជាម្ចាស់ ​ខ្ញុំ​នឹង​ធ្វើ​ការ​ដើម្បី​កែ​តម្រូវ​កំហុស​នេះ‍»។

លោក​ Flynn ​បាន​រង​ការ​ចោទ​ប្រកាន់​ពី​ការ​ភូត​កុហក​អំពី​ការ​សន្ទនា​ជា​លក្ខណៈ​ឯកជន​២​ដែល​លោក​បាន​ធ្វើ​ជាមួយ​លោក​ Sergey Kislyak ឯកអគ្គរដ្ឋ​ទូត​រុស្ស៊ី​ប្រចាំ​នៅ​សហរដ្ឋ​អាមេរិក​ ជា​ការ​ចោទ​ប្រកាន់​មួយ​ដែល​អាច​ទទួល​ការ​ជាប់​គុករហូត​ដល់​៥ឆ្នាំ។

ឯកសារ​របស់​តុលាការ​ដែល​បាន​ចេញ​ផ្សាយ​កាល​ពី​ថ្ងៃ​សុក្រ​បង្ហាញ​ថា ការ​សន្ទនា​នោះ​ផ្តោត​លើ​ការ​ដាក់​ទណ្ឌ​កម្ម​របស់​សហរដ្ឋ​អាមេរិក​ដែល​ត្រូវ​បានដាក់​លើ​ប្រទេស​រុស្ស៊ី​ដោយ​រដ្ឋបាល​របស់ប្រធានា​ធិបតី​សហរដ្ឋ​អាមេរិក​បារ៉ាក់ ​អូបាម៉ា៕

XS
SM
MD
LG