អ្នកស្រី Karine Jean-Pierre អ្នកនាំពាក្យសេតវិមានប្រធានាធិបតីអាមេរិក បានជំទាស់ទៅនឹងក្ដីកង្វល់ដែលថា សមាជិកសភាខាងគណបក្សសាធារណរដ្ឋនឹងមិនបន្តផ្ដល់ជំនួយដល់ប្រទេសអ៊ុយក្រែន ប្រសិនបើគណបក្សសាធារណរដ្ឋឈ្នះបានគ្រប់គ្រងរដ្ឋសភានៅក្នុងការបោះឆ្នោតពាក់កណ្ដាលអាណត្តិប្រធានាធិបតីនៅថ្ងៃទី៨ ខែវិច្ឆិកាខាងមុខ។
អ្នកស្រីបានប្រាប់អ្នកកាសែតកាលពីថ្ងៃពុធថា៖ «សហរដ្ឋអាមេរិកបានផ្ដល់ដល់ប្រទេសអ៊ុយក្រែននូវការគាំទ្រខ្លាំងក្លាពីគណបក្សទាំងពីរ។ យើងនឹងបន្តធ្វើការជាមួយនឹងសភាដូចដែលយើងបានធ្វើនៅក្នុងរយៈពេលជាច្រើនខែកន្លងមកនេះលើកិច្ចប្រឹងប្រែងទាំងនេះ និងគាំទ្រអ៊ុយក្រែនរហូតមិនថាយូរប៉ុណ្ណានោះទេ»។
សហរដ្ឋអាមេរិកបានអនុញ្ញាតឱ្យមានការផ្ដល់ជំនួយជាង ៦០ ពាន់លានដុល្លារដល់អ៊ុយក្រែន ដោយក្នុងនោះមានជំនួយផ្នែកសន្តិសុខចំនួនជាង ១៧ ពាន់លានដុល្លារ តាំងពីពេលដែលប្រទេសរុស្ស៊ីបានចាប់ផ្ដើមធ្វើសង្គ្រាមនៅក្នុងប្រទេសអ៊ុយក្រែនកាលពីខែកុម្ភៈមក។
ប៉ុន្តែ លោក Kevin McCarthy មេដឹកនាំគណបក្សសាធារណរដ្ឋនៃរដ្ឋសភាសហរដ្ឋអាមេរិក ដែលជាគណបក្សសំឡេងភាគតិច បានផ្ដល់សញ្ញាថា ជំនួយទាំងនេះអាចត្រូវកាត់បន្ថយ ប្រសិនបើគណបក្សសាធារណរដ្ឋអាចគ្រប់គ្រងរដ្ឋសភា។
លោក McCarthy បានប្រាប់សារព័ត៌មានអនឡាញ Punchbowl News កាលពីថ្ងៃអង្គារថា ដោយសារជិតមានបញ្ហាសេដ្ឋកិច្ចកើតឡើង សហរដ្ឋអាមេរិកនឹងមិនសរសេរ «មូលប្បទានបត្រទឹកប្រាក់» ដល់ប្រទេសអ៊ុយក្រែននោះទេ ដោយ «ពួកគេមិនអាចធ្វើដូច្នេះនោះឡើយ។ ...វាមិនមែនជាមូលប្បទានបត្រទឹកប្រាក់ដែលផ្ដល់ឱ្យទទេៗនោះទេ»។
ប្រជាពលរដ្ឋអ៊ុយក្រែនកំពុងតាមដានមើលដំណើរការបោះឆ្នោតពាក់កណ្ដាលអាណត្តិប្រធានាធិបតីនៅសហរដ្ឋអាមេរិកនេះ។ នេះបើតាមការបញ្ជាក់របស់អ្នកស្រី Olena Shuliak ប្រធានគណបក្ស «អ្នកបម្រើប្រជាពលរដ្ឋ» (Servant of the People Party) ដែលជាគណបក្សកាន់អំណាចនៅក្នុងប្រទេសអ៊ុយក្រែន៕
សេតវិមានជំទាស់នឹងក្ដីកង្វល់ដែលថា ការគាំទ្រអ៊ុយក្រែននឹងធ្លាក់ចុះបើបក្សសាធារណរដ្ឋអាចគ្រប់គ្រងរដ្ឋសភា
សេតវិមាន —
