ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មន្ត្រី​បក្ស​កាន់​អំណាច៖ ការ​ស្លាប់​អតីត​មេ​បះបោរ​​ CFF គឺ​ដោយសារ​ជំងឺ​កូវីដ​១៩ តែ​រដ្ឋាភិបាល​កម្ពុជា​​នៅ​តែ​​ប្រយ័ត្ន​នឹង​ក្រុម​ចង់​បះបោរ


រូបឯកសារ៖ លោក រីឆាដ គិរី គីម (Richard Kiri Kim) (រូបកណ្តាលពាក់វ៉ែនតា) អតីត​មេដឹកនាំ​ចលនា​កងទ័ព​សេរីជាតិ​កម្ពុជា ដើរចេញ​ពី​សាលា​ដំបូង​រាជធានី​ភ្នំពេញ​កាលពី​ថ្ងៃទី២២ ខែមិថុនា ឆ្នាំ២០០១។

ការ​ស្លាប់​របស់​លោក រីឆាដ​ គិរី គីម​ (Richard Kiri Kim)​ ជា​ពលរដ្ឋ​ខ្មែរ​អាមេរិកាំង​ម្នាក់​ដែល​ត្រូវ​បាន​កាត់​ទោស​ឲ្យ​ជាប់​ពន្ធនាគារ​អស់​មួយ​ជីវិត​នៅ​កម្ពុជា គឺ​ជា​ហេតុ​ផល​ជំងឺ​កូវីដ​១៩ មិន​ពាក់​ព័ន្ធ​នឹង​រឿង​នយោ​បាយ​ទេ។ ប៉ុន្តែ​រដ្ឋាភិបាល​នៅ​តែ​ប្រុង​ប្រយ័ត្ន​ខ្ពស់​ចំពោះ​ចលនា​នានា​ដែល​មាន​បំណង​ប៉ុនប៉ង​ផ្តួល​រដ្ឋាភិបាល​ទីក្រុង​ភ្នំពេញ។ នេះ​ជា​ការ​បញ្ជាក់​របស់​មន្ត្រី​អ្នក​នាំពាក្យ​គណ​បក្ស​ប្រជាជន​កម្ពុជា លោក សុខ ឥសាន។

អតីត​មេដឹកនាំ​ចលនា​កងទ័ព​សេរី​ជាតិ​កម្ពុជា​គឺ​លោក ​រីឆាដ គិរី​ គីម​អាយុ​៧២​ឆ្នាំ ដែល​ត្រូវ​បាន​កាត់​ទោស​ដាក់​ពន្ធនាគារ​អស់​មួយ​ជីវិត​កាល​ពី​ឆ្នាំ​២០០១​ក្នុង​ប្រទេស​កម្ពុជា បាន​ស្លាប់​កាល​ពី​ថ្ងៃ​ព្រហស្បតិ៍​សប្តាហ៍​មុននៅក្នុង​ពន្ធនាគារ ដោយ​សារ​ជំងឺ​កូវីដ​១៩។ នេះ​បើ​តាម​ការ​បញ្ជាក់​របស់​អ្នក​នាំ​ពាក្យ​នៃ​អគ្គ​នាយកដ្ឋាន​ពន្ធនាគារ។

លោក សុខ ឥសាន​ សមាជិក​ព្រឹទ្ធសភា​និង​ជា​អ្នក​នាំពាក្យ​គណបក្ស​ប្រជាជន​កម្ពុជា​ប្រាប់​វីអូអេ​កាល​ពី​ថ្ងៃ​អាទិត្យ​ថា​លោក រីឆាដ គិរី​ គីម ស្ថិត​ក្នុង​ចំណោមជន​រង​គ្រោះ​ដោយ​សារ​ជំងឺ​កូវីដ​១៩ ខណៈ​លោក​ជា​អ្នក​នយោបាយ​ដែល​មាន​និន្នាការ​ប្រឆាំង​នឹង​រដ្ឋាភិបាល និង​បាន​ជាប់​ឃុំ​ក្នុង​ពន្ធនា​គារ​កម្ពុជា ក្រោយ​បង្កើត​ចលនា​ផ្តួល​រំលំ​មួយ​មិន​បាន​សម្រេច។

លោក​បន្ត​ថា​រដ្ឋាភិបាល​បច្ចុប្បន្ន មិន​មាន​ក្តី​បារម្ភ​ចំពោះ​ចលនា​យោធា​ដែល​អាច​កើត​មាន​នៅ​ពេល​អនាគត​នោះ​ទេ​តែ​ការ​ប្រុង​ប្រយ័ត្ន​ចំពោះ​ចលនា​នេះ ​នៅ​តែ​មាន​ជានិច្ច​ក្នុង​ពេល​គណបក្ស​ប្រជាជន​កម្ពុជា​កំពុង​គ្រប់គ្រង​ប្រទេស។​

រូប​ឯកសារ៖ លោក​ សុខ ឥសាន​ អ្នក​នាំ​ពាក្យគណបក្សប្រជាជនកម្ពុជា​ ផ្តល់​បទ​សម្ភាសន៍​ជាមួយ​ VOA​ នៅ​ឯទីស្នាក់ការគណបក្ស ​ក្នុង​រាជធានី​ភ្នំពេញ​ កាល​ពី​ថ្ងៃ​ទី​១២​ ខែ​តុលា​ ឆ្នាំ​២០១៦​។ ​(ហ៊ាន​ សុជាតា​/ VOA​)
រូប​ឯកសារ៖ លោក​ សុខ ឥសាន​ អ្នក​នាំ​ពាក្យគណបក្សប្រជាជនកម្ពុជា​ ផ្តល់​បទ​សម្ភាសន៍​ជាមួយ​ VOA​ នៅ​ឯទីស្នាក់ការគណបក្ស ​ក្នុង​រាជធានី​ភ្នំពេញ​ កាល​ពី​ថ្ងៃ​ទី​១២​ ខែ​តុលា​ ឆ្នាំ​២០១៦​។ ​(ហ៊ាន​ សុជាតា​/ VOA​)

លោក សុខ ឥសាន បញ្ជាក់​ថា៖ «យើង​មិន​មាន​ការ​ព្រួយ​បារម្ភ​ទេ​ប៉ុន្តែ​ការ​ប្រុង​ប្រយ័ត្ន​តែង​តែ​មាន​អាហ្នឹង​ពាក្យ​ចាស់​យើង​ថា​គឺ​ថា​ប្រុង​ប្រយ័ត្ន​អាហ្នឹង​វា​ការ​ល្អ។ បើ​យើង​និយាយ​ពាក្យ​សាមញ្ញ​ទៅ​គឺ​ថា​ការ​ការពារ​វា​ល្អ​ជាង​ប្រសើរ​ជាង​ព្យាបាល​មិន​ឲ្យ​ជំងឺ​នេះ​វា​កើត​ឡើង​បាន​ទេ។ បើ​និយាយ​ពាក្យ​សាមញ្ញ​ឲ្យ​ស្រួល​ស្តាប់​ទៀត​យើង​មិន​អាច​បណ្តែត​បណ្តោយ​ឲ្យ​រងើក​ភ្លើង​មួយ​ដុំ​ ពីរ​ដុំ​តូច​ឬ​កន្ទុយ​បារី​ដែល​ឆេះ​ហ្នឹង​អាច​បង្កើត​បាន​ជា​អគ្គិភ័យ​បាន​ទេ។ វា​ត្រូវ​តែ​មាន​ការ​ប្រុង​ប្រយ័ត្ន​ជាប់​ជានិច្ច​ដើម្បី​ទប់​ស្កាត់​កុំ​ឲ្យ​វា​មាន​ករណី​អវិជ្ជ​មាន​ហ្នឹងកើត​ឡើង»។​

លោក រីឆាដ គិរី​ គីម ជា​ពលរដ្ឋ​ខ្មែរ​អាមេរិកាំង​ដែល​នៅ​រដ្ឋ​Oregon​កំពុង​ជាប់​ទោស​អស់​មួយ​ជីវិត​នៅ​ពន្ធនាគារ​ព្រៃស​ក្នុង​ប្រទេស​កម្ពុជា​ពាក់ព័ន្ធ​នឹង​ការធ្វើ​រដ្ឋប្រហារ​មិន​បាន​សម្រេច កាលពី​ចុង​ឆ្នាំ​២០០០។

ចលនា​កង​ទ័ព​សេរី​ជាតិ​កម្ពុជា​ឬ Cambodia Freedom Fighters (CFF) ដែល​លោក រីឆាដ គិរី​ គីម​ ដឹក​នាំ​ជាមួយ​លោក ឈុន យ៉ាសិទ្ធ​ដែល​ជា​ពលរដ្ឋ​ខ្មែរ​អាមេរិកាំង​ម្នាក់​ទៀត​បាន​បើក​ការ​ប្រយុទ្ធ​នៅ​ពេល​ព្រឹក​ព្រលឹម​ស្រាងៗ នា​ថ្ងៃ​ទី​២៤​ខែ​វិច្ឆិកា ​ឆ្នាំ​២០០០ នៅ​រាជធានី​ភ្នំពេញ​ដោយ​សំដៅ​លើ​ទីស្តី​ការ​គណៈ​រដ្ឋមន្ត្រី ក្រសួង​ការពារ​ជាតិ​និង​អង្គភាព​អង្គរក្ស​«ង​៧០»។

ទីភ្នាក់ងារ​សារព័ត៌មាន​AP បាន​រាយការណ៍​ថា​ការ​វាយប្រហារ​នោះ បាន​បណ្តាល​ឲ្យ​មនុស្ស​ស្លាប់​៧​នាក់​ក្នុង​នោះ​៦​នាក់​ជា​អ្នកវាយ​ប្រហារ​និង​១​នាក់​ជា​ជន​ស៊ីវិល​និង​រងរបួស​យ៉ាង​ហោច​ណាស់​១២​នាក់។

អាជ្ញាធរ​កម្ពុជា​បាន​បង្ក្រាបភ្លាមៗ​និង​ចាប់​ខ្លួន​អ្នក​វាយប្រហារ​បាន​ជាច្រើន​នាក់​នៅ​ពេល​យប់​នោះ។​លោក រីឆាដ​ គិរី​ គីម​ត្រូវ​បាន​អាជ្ញាធរ​ចាប់​ខ្លួន​នៅ​ខេត្ត​សៀមរាប​ក្នុង​ពេល​ត្រៀម​ឡើង​យន្ត​ហោះ​ទៅ​ប្រទេស​ថៃ។

តុលាការ​កម្ពុជា​បាន​ចោទ​ប្រកាន់​មនុស្ស​ចំនួន​៣២​នាក់​ពី​បទ​ភេរវកម្ម ចារកម្ម​ ពាក់ព័ន្ធ​នឹង​ក្រុម​ប្រដាប់​អាវុធ​និង​ចូលរួម​ពាក់ព័ន្ធ​ក្នុង​ការ​វាយ​ប្រហារ​នោះ។ នៅ​ថ្ងៃ​ទី​២២ ខែ​មិថុនា​ឆ្នាំ​២០០១ តុលាការ​រាជធានី​ភ្នំពេញ​បាន​កាត់​ទោស​លោក រីឆាដ គិរី​ គីម​និង​មេដឹកនាំ​៤​នាក់​ទៀត ឲ្យ​ជាប់​ពន្ធនាគារ​អស់​មួយ​ជីវិត។ មនុស្ស​ចំនួន​២៥​នាក់​ទៀត​ត្រូវ​បាន​កាត់ទោស​ឲ្យ​ជាប់ពន្ធនាគារ​ពី​៣​ឆ្នាំ​ដល់​២០​ឆ្នាំ​និង​២​នាក់​ទៀត​ត្រូវ​បាន​ទម្លាក់​ចោល​ការ​ចោទ​ប្រកាន់។

លោក នុត​ សវនា អ្នកនាំពាក្យ​អគ្គ​នាយកដ្ឋាន​ពន្ធនា​គារ​នៃ​ក្រសួង​មហាផ្ទៃ មាន​ប្រសាសន៍​ថានៅ​ពេលជាប់ពន្ធនាគារ​លោក រីឆាដ គិរី​ គីម​មាន​ឥរិយាបថ​ទន់​ភ្លន់​និង​តែង​តែ​អប់រំ​អ្នក​ស្ថិត​ក្នុង​ពន្ធនា​គារ​ឲ្យ​សាង​សេចក្តី​ល្អ។

លោក​ថ្លែង​ថា៖ «ខ្ញុំ​សូម​ជម្រាប​អី​ចេះ​លោក រីឆាដ​ កាល​គាត់​មិន​ទាន់​ស្លាប់គាត់​នៅ​រស់​គាត់​មាន​ទំនាក់​ទំនង​ល្អ​ជាមួយ​មន្ត្រី​យើង​ណាស់។ និយាយ​ទៅ​ទាំង​ប្រធាន​មណ្ឌល​ទាំងមន្ត្រី​យើង​មាន​ការ​ស្រឡាញ់​ចូលចិត្ត​គាត់​ដោយ​សារ​គាត់​ជា​មនុស្ស​ស្លូតបូត​ហើយ​គាត់​ចាស់​ទុំ។ គាត់​តែង​តែ​ជួយ​ប្រដៅ​ក្មេង​ៗ​នៅ​ហ្នឹង​ជំនួស​យើង។ អីចឹង​យើង​យក​ចិត្ត​ទុក​ដាក់​ជាមួយ​គាត់​ណាស់​តាមពិត​ទៅ​ហើយ​មុន​នឹង​គាត់​ស្លាប់​ហ្នឹង​ក៏​និយាយ​ទៅ​យើង​ព្យាបាល​ខ្លាំង​ណាស់​ដែរ​ព្យាយាម​ជួយ​សង្គ្រោះ​គាត់​ហ្នឹង​ហើយ​ដល់​ពេល​គាត់​មាន​សភាព​ធ្ងន់ធ្ងរ​ហ្នឹង ក៏​យើង​បញ្ជូន​គាត់​ទៅ​ពេទ្យ​រុស្សី​ទៅ​ពេទ្យ​ខ្មែរ​សូវៀត​ហ្នឹង»។​

កូន​ស្រី​បង្កើត​លោក រីឆាដ គិរី​ គីម​ គឺ​អ្នកស្រី គីម​ សេរី​លក្ខិណា​សុំ​មិន​ផ្តល់​ការ​អធិប្បាយ​ជុំវិញ​ការ​ស្លាប់​របស់​ឪពុក ក្នុង​ពេល​កំពុង​កាន់​ទុក្ខហើយ​ថា​ក្រុម​គ្រួសារ​កំពុង​រង់ចាំ​ទទួល​ធាតុ​របស់​រីឆាដ​គិរី គីម​ដែល​ទទួល​បាន​ការ​រៀប​ចំ​បូជា​ដោយ​ក្រុម​បុគ្គលិក​សុខាភិបាល។

នាយក​រង​ទទួល​បន្ទុក​ឃ្លាំមើល​និង​ការពារ​សិទ្ធិ​មនុស្ស​នៃ​អង្គការ​លីកាដូ លោក អំ សំអាត​បង្ហាញ​ការ​បារម្ភ​ចំពោះ​សុវត្ថិភាព​នៃ​សុខភាព​អ្នក​ជាប់​ក្នុង​ពន្ធនាគារ​ក្រោយ​ការ​ស្លាប់​លោក រីឆាដ​គិរី គីម។

បើ​តាម​លោក អំ​ សំអាត​រដ្ឋាភិបាល​ គួរ​ពិចារណា​ដោះលែង​អ្នក​ជាប់​ឃុំ​ដោយ​មាន​លក្ខខណ្ឌ​ចំពោះ​អ្នកជាប់ឃុំ​រូប​ណា​ដែល​រង​ការ​ចោទប្រកាន់​ស្រាលៗ ឬ​អ្នក​ដែល​ជិត​រួច​ពី​ការ​អនុវត្ត​ទោស​ក្នុង​ពន្ធនាគារ ដើម្បី​កាត់​បន្ថយ​ភាព​ចង្អៀត​ណែន​ក្នុង​ពន្ធនាគារ។

លោក​បញ្ជាក់​ថា៖ «សុំ​ឲ្យ​មាន​ការ​ដោះលែង​ដោយ​មាន​លក្ខខណ្ឌ​ចំពោះ​អ្នក​ជាប់​ឃុំ​មួយ​ចំនួន​ដូច​ជា​អ្នក​ជាប់​ឃុំ​បណ្តោះ​អាសន្ន​អ្នក​ដែល​ជិត​រួច​ផុត​ទោស​ជាដើម​ ហើយ​និង​ជំរុញ​នីតិវិធី​ក្នុង​ការ​ជំនុំ​ជម្រះ​រឿង​ក្តី​ឲ្យ​បាន​ឆាប់ ពីព្រោះ​អាច​នឹង​ជួយ​ដោះស្រាយ​ភាព​ចង្អៀតណែន​នៃពន្ធនាគារ​ព្រោះ​ភាព​ចង្អៀត​ណែន​នេះ​វាជា​ហានិភ័យ​ខ្ពស់​ណាស់​សម្រាប់​ការរីករាល​ដាល​នៃ​កូវីដ​១៩​នៅ​តាម​ពន្ធនាគារ​ហ្នឹង»។

ស្ថានទូត​សហរដ្ឋ​អាមេរិក​ប្រចាំ​កម្ពុជា​បដិសេធ​មិន​ផ្តល់​ការ​អធិប្បាយ​ចំពោះ​ការ​ស្លាប់​លោក រីឆាដ​ គិរី គីម។​

លោក​បណ្ឌិត​ អ៊ា សុផល ​សាស្ត្រាចារ្យ​ផ្នែក​ការទូត​និង​កិច្ចការ​អន្តរជាតិ​នៅ​មហាវិទ្យាល័យ​Occidental​ទីក្រុង ​Los Angeles​ នៅ​សហរដ្ឋ​អាមេរិក ប្រាប់​វីអូអេក្នុង​សារ​អ៊ីមែល​មួយ​ថា​ក្រុម​ចលនា​កងទ័ព​សេរី​ជាតិ​កម្ពុជា​បាន​ចាត់​ទុក​ក្រុម​ចលនា​របស់​លោក រីឆាត ជា​អ្នក​ប្រយុទ្ធ​ដើម្បី​សេរីភាព នៅ​ពេល​អាជ្ញាធរ​មើល​ឃើញ​ពួកគេ​ថា​ជា​ក្រុម​ភេរវ​ករ។

លោក​បន្ថែម​ថា ការ​វាយ​ប្រហារ​យោធា​ណាមួយ ដើម្បី​ដណ្តើម​អំណាច មិន​គួរ​ស្ថិត​ក្នុង​ជម្រើស​របស់​ក្រុម​អ្នក​នយោបាយ​ខ្មែរ បន្ទាប់​ពី​កម្ពុជា​បាន​ឃើញ​ភ្លើង​សង្គ្រាម​កាល​ពី​អតីត​កាល។

លោក​អធិប្បាយ​ថា៖ «កម្ពុជា​បាន​ឃើញ​ការបង្ហូរ​ឈាម​ច្រើន​មក​ហើយ​ហើយ​សង្គ្រាម​ក៏​មាន​ច្រើន​ណាស់​ដែរ។ យើង​មិន​ត្រូវ​វិល​ត្រឡប់​ទៅ​រក​សង្គ្រាម​វិញ​ទេ​ដូច្នេះ​យើង​មិន​ត្រូវ​បង្ក្រាប​ប្រជាជន​ទៀត​ទេ។​ការ​បង្ក្រាប​ប្រជាជន​នាំ​ទៅ​រក​សង្គ្រាម​ហើយ​ការ​បង្ក្រាប​ប្រជាជន​គឺ​ជា​អ្វី​ដែល​កំពុង​កើតឡើង​នៅ​កម្ពុជា​សព្វថ្ងៃ​នេះ»។​

សាស្ត្រាចារ្យ​វិទ្យាសាស្ត្រន​យោបាយ​នៅ​ប្រទេស​កម្ពុជា​លោក ឯម សុវណ្ណារ៉ាប្រាប់​វីអូអេ​ថា​ការ​បង្ក្រាប​ចលនា​ CFF ​របស់​លោក រីឆាត ជា​មេរៀន​មួយ​របស់​អ្នក​នយោបាយ​ខ្មែរ​ដែល​ត្រូវ​យក​មក​ពិចារណា​ថា​តើ​ការប្រើ​យន្តការ​យោធា​មក​ដណ្តើម​អំណាច​អាច​ទទួល​ការគាំទ្រ​ពី​មហាជន​ឬ​ក៏​ត្រូវ​មហា​ជន​ឆ្លើយតប​មកវិញ​ជាមួយ​ចលនាប្រឆាំង​តវ៉ា​ដូច​អ្វី​ដែល​បាន​កើត​ឡើង​នៅ​ប្រទេស​មីយ៉ាន់ម៉ា ដែល​ក្រុម​យោធា​បាន​ធ្វើ​រដ្ឋប្រហារ​រដ្ឋាភិបាល​ឈ្នះ​ឆ្នោត ហើយ​ប្រជាជន​ចេញ​មក​ប្រឆាំង​នឹង​ការ​ដណ្តើម​អំណាច​នេះ។

លោក​ថ្លែង​ថា៖ «បើ​យើង​និយាយ​អំពី​ចលនា​នៃ​នៃ​ការ​បង្ក្រាប​CFF​នេះ​ចលនា​សេរី​មួយ​ដែល​ដណ្តើម​អំណាច​នេះ​វាមិន​បង្រៀន​តែ​មហាជន​ទេ​វា​បង្រៀន​អ្នកកាន់​អំណាច​ដែរ។ កាល​ណា​ប្រាស​ចាក​នឹង​គោល​ការណ៍​ច្បាប់​ក៏ពិបាក​ដែរ​បាន​ន័យថា​មហាជនអត់​គាំទ្រ​ដដែល​ទេ​បាន​ន័យ​ថា​ ឧទាហរណ៍​ថា​មាន​យន្តការ​ណា​មួយ​ដូច​នៅ​ភូមា​អីចឹង​ចុះ​ពេល​ដែល​បោះឆ្នោត​ចាញ់​ហើយ​ដណ្តើម​អំណាច​ហ្នឹង​គឺ​ចលនា​ភូមា​ឃើញ​ពលរដ្ឋ​ភូមា​មិន​គាំ​ទ្រ​ដូច​គ្នា​ទេ។ គ្រាន់​តែ​ពលរដ្ឋ​កម្ពុជា​ពុំមានចិត្ត​រួបរួម​គ្នា​ហ្នឹង​ពុំមាន​ចិត្ត​រួបរួម​គ្នា​និង​ក្លាហាន​ដូច​ពលរដ្ឋ​ភូមា​ទេ​ខ្ញុំ​ចាប់​អារម្មណ៍»។

បើ​តាម​លោក ឯម សុវណ្ណារ៉ា​ ការ​ស្លាប់​លោក​រីឆាដ គិរី​ គីម​បាន​បន្សល់​ទុក​មន្ទិល​ពាក់ព័ន្ធ​នឹង​ប្រភព​នៃ​អ្នក​ដែល​ផ្តួចផ្តើម​ឲ្យ​មាន​ចលនា ​CFF នេះ​ព្រោះ​សាធារណ​ជន​ទូទៅ​មិន​ទាន់​ដឹង​នៅ​ឡើយ​ថា​ក្រុម​ចលនា​ CFF ពិត​ជា​អង្គការ​ចាត់​តាំង​យោធា​ច្បាស់​លាស់​មួយ​ឬ​ក៏​គ្រាន់​តែ​ជា​ការ​បង្កើត​ព្រឹត្តិការណ៍​ដោយ​ក្រុម​ណា​មួយ​នោះ។

​អ្នកនាំពាក្យ​គណបក្ស​កាន់​អំណាចលោក សុខ​ ឥសាន​ព្រមាន​ថា​អ្នក​ដែល​ចង់​ឡើង​កាន់​អំណាច​ជំនួស​គណបក្ស​ប្រជាជន​កម្ពុជា​ត្រូវ​តែ​គោរព​ទៅ​ច្បាប់​ដែល​មាន​ចែង​ក្នុង​រដ្ឋធម្មនុញ្ញ។

លោក​បញ្ជាក់​ថា៖ «ស្ថិត​នៅ​ក្នុង​បរិបទ​នៃ​ប្រជាធិបតេយ្យ​សេរី​វា​ចៀស​មិន​រួច​អំពី​មាន​ក្រុម​ប្រឆាំង​មាន​គណ​បក្ស​ប្រឆាំង​ឬ​គណ​បក្ស​ប្រកួតប្រជែង​ទេ​តែ​ប្រកួត​ប្រជែង​ត្រូវ​ឲ្យ​ស្រប​ទៅតាម​ច្បាប់ ​គោល​ការណ៍​រដ្ឋ​ធម្មនុញ្ញ​ដែល​មាន​ចែង​ជា​ធរមាន។​ក៏ប៉ុន្តែ​នៅ​ក្នុង​នេះ​ យើង​យល់​ថា​ទោះ​បី​ថា​អតីត​បក្ស​ប្រឆាំង​ត្រូវ​បាន​រំលាយ​ចោល​ជា​ស្ថាពរ​ហើយ​ក៏​ពិត​មែន​ក៏​ប៉ុន្តែ​វា​នៅ​ព្រលឹង​ខ្លះ​ដែល​មាន​មេ​ខ្លោង​ដូច​ជា​ទណ្ឌិត​ សម រង្ស៊ី​កំពុង​រត់​គេច​ខ្លួន​នៅ​ក្រៅ​ប្រទេស​ហ្នឹង​ មិន​ទាន់​អស់​ចិត្ត​ក្នុង​ការ​ដែល​ប្រឆាំង​នឹង​រាជ​រដ្ឋាភិបាល។ អាហ្នឹង​ក្នុង​គំនិត​មួយ​បើ​ថា​អញ​មិន​បាន​កាន់​អំណាច​ឯង​នេះ​ក៏​មិន​អាច​កាន់​អំណាច​បាន​ស្រួល​ដែរ។ អីចឹង​ទេ បាន​ជា​រាជ​រដ្ឋាភិបាល​គណបក្ស​ប្រជាជន​កម្ពុជា​ជានិច្ចកាល​តែង​តែ​យក​ចិត្ត​ទុក​ដាក់​ក្នុង​ការ​ពង្រឹង​សន្តិភាព​ស្ថិរភាព​និង​សេចក្តី​សុខ​ក្សេមក្សាន្ត​របស់​ប្រជា​ពលរដ្ឋ​មិន​ឲ្យ​មហិច្ឆតា​របស់​កម្លាំង​នយោបាយ​ណា​ប្រឆាំង​ហ្នឹង​អាច​ធ្វើ​អ្វី​តាម​អំពើ​ចិត្តដែល​ល្មើស​ច្បាប់​នឹង​ល្មើស​រដ្ឋធម្មនុញ្ញ​បាន​ជា​ដាច់​ខាត»។

ការ​ស្លាប់​លោក​រីឆាដ​ គិរី គីម​គឺ​ជា​ករណី​ទី​ពីរ​នៃ​ការ​ស្លាប់​ដោយ​សារ​ជំងឺ​កូវីដ​១៩​នៅ​ក្នុង​ពន្ធនាគារ។ កន្លង​មក មានករណី​ស្លាប់​ស្ត្រី​ម្នាក់​ដោយ​សារ​ជំងឺ​កូវីដ​១៩​នៅ​ក្នុង​ពន្ធនាគារ​ខេត្ត​កំពង់​ស្ពឺ។

អ្នក​នាំពាក្យអគ្គ​នាយកដ្ឋានពន្ធនាគារនៃក្រសួង​មហាផ្ទៃ លោក នុត សវនា​ ថ្លែង​ថាបច្ចុប្បន្ន​នេះ ករណី​ឆ្លង​ជំងឺកូវីដ​១៩​ក្នុង​ពន្ធនាគារ​ទូទាំង​ប្រទេស មាន​ប្រមាណ​២០​%​នៃ​អ្នក​ជាប់​ឃុំ​ទាំង​អស់​សរុប​ប្រមាណ​៤ម៉ឺន​នាក់។ ប៉ុន្តែលោក​ថា​វាស្ថិត​ក្នុង​ភាព​អាច​គ្រប់​គ្រង​បាន​នៅ​ឡើយ៕

XS
SM
MD
LG