សភាប្រជាជនចិនកំពុងបើកសម័យប្រជុំប្រចាំឆ្នាំរបស់ខ្លួនក្នុងសប្តាហ៍នេះ ដើម្បីពិភាក្សាបញ្ហាសេដ្ឋកិច្ចនិងបញ្ហាសំខាន់ៗមួយចំនួនទៀត ដែលប្រទេសនេះកំពុងប្រឈមដែលក្នុងនោះក៏រួមមានវិបត្តិអចលនទ្រព្យដ៏សំខាន់ផងដែរ ក្រោយពីមានការ រីកចម្រើនអស់៤ទសវត្សរ៍កន្លងទៅ ដែលបានរុញប្រទេសនេះទៅក្នុងមហាអំណាចសេដ្ឋកិច្ចនិងភូមិសាស្ត្រនយោបាយ។
បញ្ហាដ៏សំខាន់បំផុតមួយ ដែលគ្របដណ្តប់លើសម័យប្រជុំសភារបស់ចិនសម្រាប់ឆ្នាំ ២០២៤ដែលកំពុងដំណើរការក្នុងពេលនេះ គឺបញ្ហាសេដ្ឋកិច្ចរបស់ខ្លួន។
សមាជជាតិរបស់ប្រជាជនចិនដែលបានបើកធ្វើកាលពីថ្ងៃទី៥ ខែមីនានេះ កំពុងត្រូវបានតាមដានយ៉ាងយកចិត្តទុកដាក់ ក្រែងមានសញ្ញាបង្ហាញណាមួយទៅលើអ្វី ដែលគណបក្សកុម្មុយនីស្តរបស់ប្រទេសនេះ អាចនឹងអនុវត្តដើម្បីធ្វើឱ្យប្រសើរឡើងវិញនូវសេដ្ឋកិច្ចរបស់ខ្លួនដែលកំពុងធ្លាក់ចុះនៅក្រោមទម្ងន់នៃការគ្រប់គ្រងកាន់តែខ្លាំងឡើងរបស់រដ្ឋាភិបាល ក៏ដូចជាការផ្ទុះឡើងនូវវិបត្តិអចលនទ្រព្យផងដែរ។
បើទោះបីជាយ៉ាងនេះក្តី ក៏ការណ៍នេះមិនមានន័យថាបញ្ហាដទៃផ្សេងទៀត នឹងមិនត្រូវលើកយកមកពិភាក្សានោះឡើយ។ សំណើសុំបង្កើនអាយុចូលនិវត្តន៍ ក៏ត្រូវគេរំពឹង ទុកថាជាប្រធានបទក្តៅគគុកមួយផងដែរ។ នេះបើតាមការចេញផ្សាយរបស់កាសែតរដ្ឋចិន Global Times កាលពីចុងខែកុម្ភៈកន្លងទៅ។ អ្នកឃ្លាំមើលបញ្ហាប្រទេសចិននឹងអាចឃើញការពិភាក្សាលើថវិកាចំណាយការពារជាតិរបស់ចិន ក៏ដូចជាលទ្ធភាពនៃការតែងតាំងរដ្ឋមន្ត្រីការបរទេសចិនថ្មីមួយរូបផងដែរ។
ប៉ុន្តែបញ្ហាសេដ្ឋកិច្ចរបស់ចិនជាអ្វីដែលស្ថិតនៅក្នុងចិត្តរបស់មនុស្សស្ទើរតែទាំងអស់ នៅក្នុងប្រទេសមួយដែលនឹងអាចមានការផ្លាស់ប្តូរជាខ្លាំង ក្រោយពីរយៈពេល៤ទសវត្សរ៍នៃការរីកចម្រើន ដែលធ្វើឱ្យប្រទេសចិនក្លាយជាមហាអំណាចសេដ្ឋកិច្ចនិងភូមិសាស្ត្រនយោបាយ។ សម្រាប់ពលរដ្ឋចិនជាច្រើន ការបរាជ័យក្នុងការស្តារសេដ្ឋ កិច្ចចិនឡើងវិញក្រោយជំងឺរាតត្បាតកូវីដ១៩ ក្នុងឆ្នាំ២០២៣ កំពុងធ្វើឱ្យគេបារម្ភពីជំនឿចិត្តដែលមានជាយូរមកហើយក្នុងពេលអនាគត។
សមាជរបស់ប្រជាជនចិនជាទូទៅគ្រាន់តែជានិមិត្តរូបតែប៉ុណ្ណោះ ដែលវាមិនមានអំណាចពិតប្រាកដដើម្បីសម្រេចលើច្បាប់ណាមួយទេ។ បើទោះជាសមាជិកសភាចិនធ្វើការបោះឆ្នោតលើច្បាប់ក៏ដោយ ក៏ប៉ុន្តែគ្រាន់តែជាការអនុម័តបង្គ្រប់កិច្ចក្នុងសំឡេងជាឯកច្ឆ័នឬស្ទើរតែឯកច្ឆ័នលើសេចក្តីសម្រេចផ្សេងៗ ដែលត្រូវបានស្នើឡើងដោយមេដឹកនាំបក្សកុម្មុយនីស្តចិននៅក្នុងកិច្ចប្រជុំបិទទ្វារតែប៉ុណ្ណោះ។
សមាជនេះអាចជាវេទិកាដើម្បីលើកជាសំណើនិងគំនិតពិភាក្សាផងដែរ។ សមាជិកសភាប្រជាជនចិនដែលមានចំនួនជិត៣ពាន់នាក់ត្រូវបានជ្រើសរើសឡើង ដើម្បីតំណាងក្រុមផ្សេងៗ រាប់តាំងពីមន្ត្រីរដ្ឋាភិបាលនិងសមាជិកបក្ស រហូតដល់ប្រជាកសិករនិងកម្មករចំណាកស្រុកជាដើម។
ប៉ុន្តែលោក Alfred Wu អ្នកជំនាញស្តីពីអភិបាលកិច្ចក្នុងប្រទេសចិនជឿថាតួនាទីសភាបានធ្លាក់ចុះដោយសារអំណាចមជ្ឈការប្រមូលផ្តុំនៅក្រោមមេដឹកនាំលោក Xi Jinping តែម្នាក់។
លោក Wu ដែលជាសាស្រ្តាចារ្យរងនៃសាកលវិទ្យាល័យជាតិសិង្ហបុរី និងជាអតីតអ្នកកាសែតផងដែរនោះបាននិយាយថា«គ្រប់គ្នាដឹងថាការណ៍នេះជាសញ្ញាមកពីថ្នាក់កំពូល។ នៅពេលដែលថ្នាក់កំពូលនិយាយរឿងអ្វីមួយ ខ្ញុំត្រូវតែនិយាយដូចនឹងដែរ។ នៅពេលដែលមេដឹកនាំថ្នាក់កំពូលនៅស្ងៀម ខ្ញុំក៏ត្រូវតែនៅស្ងៀមដែរ»។
ទោះបីជាយ៉ាងណាក៏ដោយ ក៏របាយការណ៍និងសុន្ទរកថាក្នុងអំឡុងពេលនៃមហាសន្និបាតអាចផ្តល់ការបង្ហាញទិសដៅក្នុងពេលអនាគតនៃគោលនយោបាយរដ្ឋាភិ បាល។
ខណៈដែលរបាយការណ៍និងសុន្ទរថាធ្វើឡើងក្នុងបំណងមានលក្ខណៈស្របទៅនឹងសេចក្តីប្រកាសក្នុងពេលកន្លងទៅ ក៏គំនិតផ្តួចផ្តើមសំខាន់ថ្មីៗ ត្រូវបានបង្ហាញនៅក្នុងមហាសន្និបាតនេះ ដូចជាសេចក្តីសម្រេចចិត្តឆ្នាំ២០២០ជាដើម ក្នុងការអនុវត្តច្បាប់សន្តិសុខជាតិសម្រាប់ក្រុងហុងកុង ក្រោយពីមានបាតុកម្មតវ៉ាធំៗជាច្រើនប្រឆាំងនឹងរដ្ឋាភិបាលនៅទីនោះក្នុងឆ្នាំ២០១៩៕
ប្រែសម្រួលដោយលោក ជ្រា វណ្ណរិទ្ធ
វេទិកាបញ្ចេញមតិ