កិច្ចព្រមព្រៀងទីក្រុងមីនស្កិ៍ឆ្នាំ ២០១៤ និង ២០១៥ បានប៉ុនប៉ងបញ្ចប់សង្គ្រាមនៅក្នុងតំបន់ Donbass នៃភាគខាងកើតនៃប្រទេសអ៊ុយក្រែន រវាងអ៊ុយក្រែន និងពួកទាមទារបំបែករដ្ឋដែលនិយាយភាសារុស្ស៊ីនៅក្នុងតំបន់ Donetsk និង Luthansk ដែលមានជម្លោះ។
ក្នុងឆ្នាំ ២០១៤ អ្នកតំណាងនៃពួកទាមទារបំបែករដ្ឋអ៊ុយក្រែន និងរុស្ស៊ី បានព្រមព្រៀងគ្នាដល់កិច្ចព្រមព្រៀងឈប់បាញ់គ្នាដែលមាន ១២ ផ្នែកនៅក្នុងរដ្ឋធានីមីនស្កិ៍នៃប្រទេសបែលឡារុស។ កិច្ចព្រមព្រៀងនោះ រួមមានការដោះដូរអ្នកទោស ការផ្តល់ជំនួយមនុស្សធម៌ និងការដកអាវុធធន់ធ្ងន់ចេញពីតំបន់មានជម្លោះ។
ក៏ប៉ុន្តែ កិច្ចព្រមព្រៀងនោះ បានទទួលបរាជ័យភ្លាមៗ បន្ទាប់ពីភាគីទាំង ២ បានរំលោភលក្ខខណ្ឌនៃកិច្ចព្រមព្រៀងនោះ។
ភាគីទាំង ២ បានព្យាយាមម្តងទៀតនៅក្នុងឆ្នាំ ២០១៥ នៅពេលនេះជាមួយពួកអ្នកតំណាងអង្គការដើម្បីសន្តិសុខ និងកិច្ចសហប្រតិបត្តិការនៅអឺរ៉ុប ឬ (OSCE)។
នៅក្នុងកិច្ចព្រមព្រៀងលើកទី២នេះ កិច្ចព្រមព្រៀងមួយដែលមាន ១៣ ផ្នែក បានត្រូវចុះហត្ថលេខាដែលបានអំពាវនាវឲ្យមានការឈប់បាញ់គ្នាជាបន្ទាន់ ដកអាវុធធន់ធ្ងន់ ការឃ្លាំមើលពីអង្គការដើម្បីសន្តិសុខ និងកិច្ចសហប្រតិបត្តិការនៅអឺរ៉ុប ឬ (OSCE) លើកលែងទោសអ្នកដែលទាក់ទិននៅក្នុងការប្រយុទ្ធ ដោះដូរចំណាប់ខ្មាំងនិងអ្នកទោស ត្រួតត្រាពេញលេញព្រំដែនអ៊ុយក្រែន ដកកងទ័ពបរទេស បង្កើតចំណងទាក់ទងខាងសេដ្ឋកិច្ច និងសង្គមឡើងវិញ និងធ្វើការបោះឆ្នោតនៅក្នុងតំបន់ដែលមានជម្លោះ ស្ថិតនៅក្នុងចំណោមបទបញ្ញត្តិទាំងនោះ។ កិច្ចព្រមព្រៀងនោះ ក៏បានផ្តល់ឲ្យតំបន់ជាទីកន្លែងដែលពួកទាមទារបំបែករដ្ឋលម្អៀងប្រទេសរុស្ស៊ី មានអំណាចនៃការគ្រប់គ្រងដោយខ្លួនឯងដែលអាចមានការប៉ះពាល់ដល់ការសម្រេចរបស់រដ្ឋាភិបាលកណ្តាល។
ពួកមេដឹកនាំមកពីប្រទេសបារាំង អាល្លឺម៉ង់ រុស្ស៊ី និងអ៊ុយក្រែន មានវត្តមាន ហើយបានចេញសេចក្តីថ្លែងការណ៍គាំទ្រកិច្ចព្រមព្រៀងនោះ។ កិច្ចព្រមព្រៀងនោះ ក៏ត្រូវបានទទួលស្គាល់ដោយក្រុមប្រឹក្សាសន្តិសុខអង្គការសហប្រជាជាតិដែរ។
ក៏ប៉ុន្តែ បទបញ្ញត្តិភាគច្រើននៃកិច្ចព្រមព្រៀងនោះ មិនត្រូវបានអនុវត្តទេ ពីព្រោះតែរុស្ស៊ីទទូចថា ខ្លួនមិនបានទាក់ទិននៅក្នុងជម្លោះនោះ ដូច្នេះ ខ្លួនមិនអាចដកកងទ័ព ពីព្រោះតែ ខ្លួនមិនបានដាក់ពង្រាយកងទ័ពនៅទីនោះ។ នេះ បើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ រុស្ស៊ីទទូចថា កិច្ចព្រមព្រៀងណាក៏ដោយ ត្រូវតែធ្វើឡើងរវាងអ៊ុយក្រែន និងតំបន់ដែលមានជម្លោះ។ អ៊ុយក្រែន បានច្រានចោលការសន្ទនាជាមួយពួកទាមទាររដ្ឋ។
ទោះជាយ៉ាងណាក៏ដោយ បើតាមបណ្តាញទូរទស្សន៍ CNN ការប្រយុទ្ធដ៏អាក្រក់បំផុតភាគច្រើន បានបញ្ឈប់ ហើយអង្គការដើម្បីសន្តិសុខ និងកិច្ចសហប្រតិបត្តិការនៅអឺរ៉ុប ឬ (OSCE) ដែលយាមល្បាតនៅតំបន់នោះ បានរាយការណ៍ពីការរំលោភនៃការឈប់បាញ់គ្នា៕
ព័ត៌មានខ្លះនៃសេចក្តីរាយការណ៍នេះ ត្រូវបានដកស្រង់ពីទីភ្នាក់ងារព័ត៌មាន Reuters។
