ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាវុធ​នុយក្លេអ៊ែរ​​កូរ៉េ​ខាង​ជើង​នឹង​ត្រូវ​លុប​បំបាត់​ ក្រោយ​ពី​បាន​ចុះ​ហត្ថលេខា​កិច្ច​ព្រម​ព្រៀង​ក្នុង​សន្និសីទ​កំពូល


មេដឹកនាំ​កូរ៉េខាងជើង Kim Jong Un និង​លោក​ប្រធានាធិបតីអាមេរិក Donald Trump ចាប់ដៃគ្នា ក្រោយពីកិច្ចប្រជុំនៅសឹង្ហបុរី កាលពីថ្ងៃអង្គារ ទី១២ ខែមិថុនា ឆ្នាំ២០១៨។

លោក​ប្រធានាធិបតី​ស.រ.អា.​ Donald Trump ​ថ្លែង​ថា​ លោក​ Kim Jong Un ​មេ​ដឹកនាំ​កូរ៉េ​ខាង​ជើង​ ឥឡូវ​នេះ​មាន​ឱកាស​ដើម្បី​ធ្វើ​ឲ្យ​ជីវភាព​រស់នៅ​របស់​ជន​ជាតិ​កូរ៉េ​ខាង​ជើង​ល្អ​ប្រសើរ​ជាងមុន ​ហើយ​នាំ​ឲ្យ​មាន​សន្តិភាព​ជាប់​លាប់​លើ​ឧបទ្វីប​កូរ៉េ។

ក្នុង​កិច្ច​ព្រម​ព្រៀង​មួយ​ដែល​បាន​ចុះ​ហត្ថលេខា​កាល​ពី​ថ្ងៃ​អង្គារ ​នៅ​ក្នុង​ប្រទេស​សឹង្ហបូរី លោក ​Kim Jong Un ​បាន​បញ្ជាក់​ឡើង​វិញ​នូវ​ការ​តាំង​ចិត្ត​យ៉ាង​រឹង​មាំ​ និង​មិន​ងាករេ​របស់​លោក ​ដើម្បី​លុប​បំបាត់​កម្មវិធី​អាវុធ​នុយក្លេរអ៊ែរ​ទាំង​ស្រុង​នៅ​លើ​ឧបទ្វីប​កូរ៉េ។ ចំណែក​លោក​ប្រធានាធិបតី​ស.រ.អា. Donald Trump ​វិញ​ «បាន​ប្តេជ្ញា​ផ្តល់​ការ​ធានា​រ៉ាប់រង​ខាង​សន្តិសុខ​ដល់​ប្រទេស​កូរ៉េ​ខាង​ជើង»។​

«ថ្ងៃ​នេះ​ជា​ថ្ងៃ​ចាប់​ផ្តើម​ដំណើរការ​យ៉ាង​លំបាក​មួយ។ ​ភ្នែក​របស់​យើង​បើក​ចំហ​យ៉ាង​ធំ ​ ប៉ុន្តែ​សន្តិភាព​តែង​តែជា​រឿង​សម​ស្រប​នឹង​កិច្ច​ប្រឹង​ប្រែង​ ជាពិសេស​ក្នុង​ករណី​នេះ។​ បញ្ហាលុប់​បំបាត់​អាវុធ​នុយក្លេអ៊ែរ​នេះ​គួរ​តែ​បាន​ដោះ​ស្រាយ​ជា​ច្រើន​ឆ្នាំ​មុន។ ​បញ្ហា​នេះ​គួរត្រូវ​បាន​ដោះ​ស្រាយ​ជា​យូរ​មក​ហើយ ​ប៉ុន្តែ​យើង​កំពុង​ដោះ​ស្រាយនៅ​ពេល​នេះ»។​

លោក​ Trump ​បាន​ថ្លែង​ប្រាប់​អ្នក​រាយ​ការណ៍​ជូន​វីអូអេ ​គឺ​អ្នក​ស្រី Greta Van Susteren ​នៅ​ល្ងាច​ថ្ងៃ​អង្គារ​ថា​ «យើង​នឹង​លុប​បំបាត់​អាវុធ​នុយក្លេអ៊ែរ​នៅ​ប្រទេស​កូរ៉េ​ខាង​ជើង»។

លោក​ Trump ​បាន​ប្រកាស​ការ​ធ្វើ​សម្បទាន​មួយ​ឲ្យ​កូរ៉េ​ខាង​ជើង​ ដោយ​និយាយថា​ ស.រ.អា.នឹង​លុប​ចោល​អ្វី​ដែល​លោក​បាន​ហៅ​ថា ​ជា​ល្បែង​សង្គ្រាម​ជាមួយ​កូរ៉េ​ខាង​ត្បូង​ ដែល​ចំណាយ​ប្រាក់​ច្រើន ​ព្រម​ទាំង​នាំ​ឲ្យ​មាន​ការ​បង្ករឿង​ហេតុ​យ៉ាងខ្លាំង​ផង​នោះ។​

លោក​ Trump ​បាន​ថ្លែង​ថា ​លោក Kim ​បាន​ប្រាប់​លោក​ថា ​កូរ៉េ​ខាង​ជើង​បាន​បំផ្លាញ​កន្លែង​សាក​ល្បង​អាវុធ​កាំ​ជ្រួច​យ៉ាង​ធំមួយ​ ដោយ​ទទួល​ស្គាល់​ថា​ អត្ថាធិប្បាយ​របស់​លោក​ Kim ​ជា​ជំហានមួយ​ឆ្ពោះ​ទៅ​រក​ផ្លូវ​ត្រូវ។​

ប្រទេស​ទាំង​២​បាន​ប្តេជ្ញា​ចិត្ត​ធ្វើ​ការ​ប្រឹង​ប្រែង​ដើម្បី​កសាង​សន្តិភាព​ជាប់​លាប់​មួយ​នៅ​លើ​ឧបទ្វីប​កូរ៉េ ​ដើម្បីបង្កើត​ចំណង​ទាក់​ទង​ថ្មី​រវាង​ស.រ.អា.និង​កូរ៉េ​ខាង​ជើង ​និង​ដើម្បី​ស្វែង​រក​អដ្ឋិធាតុ​របស់​ឈ្លើយ​សឹក ​និង​បុគ្គលិក​យោធា ​ដែល​បាន​បាត់​ខ្លួន​ក្នុង​សមរ​ភូមិ។​

ភាគី​ទាំង​២​ថែម​ទាំង​បាន​សន្យា​ថា ​នឹង​ធ្វើ​ការ​ចរចាគ្នា​ជា​បន្ត។ ​លោក​ Kim ​បាន​ថ្លែង​ថា ​ការ​ផ្លាស់ប្តូរ​នឹង​កើត​ឡើង។

«យើង​បាន​ធ្វើ​កិច្ច​ប្រជុំ​ជា​ប្រវត្តិ​សាស្ត្រ​មួយ ហើយ​ប្រុង​ប្រៀប​បំភ្លេច​អតីតកាល​ចោល ហើយ​យើង​នឹង​ចុះ​ហត្ថលេខា​លើ​ឯកសារ​ប្រវត្តិ​សាស្ត្រ​នេះ។ ​ពិភព​លោក​នឹង​ឃើញ​ការ​ផ្លាស់​ប្តូរ​ដ៏ធំ​មួយ‍»។​

លោក Trump ​និង ​លោក Kim ​បាន​អរគុណ​គ្នា​ទៅ​វិញ​ទៅមក ​ចំពោះ​កិច្ច​ប្រជុំ​កំពូល​ ហើយ​លោក ​Trump បាន​ថ្លែង​ថា ​លោក​ប្រាកដ​ជា​នឹង​អញ្ជើញ​លោក ​Kim ​ទៅ​បំពេញ​ទស្សនកិច្ចនៅ​សេតវិមាន។​

លោក​ Trump ​ថែម​ទាំង​បាន​ថ្លែង​អំណរគុណ​ចំពោះ​មេ​ដឹកនាំ​ចិន ​ជប៉ុន ​និង​ កូរ៉េខាង​ត្បូង ​ចំពោះ​ជំនួយ​របស់​ពួក​គេ​ក្នុង​ការ​គាំ​ទ្រ​ដល់​កិច្ច​ប្រឹង​ប្រែង​ ដើម្បី​ឲ្យ​មាន​សន្តិភាព​ជាប់​លាប់​នៅ​លើ​ឧបទ្វីប​កូរ៉េ។​

ស្រប​ពេល​ជា​មួយ​គ្នា​នេះ ​លោក​រដ្ឋ​មន្ត្រី​ការ​បរទេស​ស.រ.អា.​ Mike Pompeo ​បាន​ថ្លែង​ថា​ ទណ្ឌកម្ម​សេដ្ឋកិច្ច​នឹង​នៅ​មាន​ជា​បន្ត ​រហូត​ដល់ពេល​ណា​កូរ៉េ​ខាង​ជើង​លុបចោល​កម្មវិធី​អាវុធ​ប្រល័យ​លោក​របស់​ខ្លួន​ ដោយ​ពេញ​លេ​ញ​ និង​អាច​ត្រួត​ពិនិត្យ​បាន។​ លោក​បន្ថែម​ទៀត​ថា ​«បើ​សិនជា​កិច្ច​ការ​ការទូត​មិន​បោះ​ជំហាន​ទៅ​រក​ផ្លូវ​ត្រូវ​ទេ​នោះ ​ទណ្ឌកម្ម​សេដ្ឋ​កិច្ច​នឹងកើន​ឡើង៕

ប្រែ​សម្រួល​ដោយ​លោក ប៉ូច រាសី

XS
SM
MD
LG