ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

វៀតណាម​​ប្រតិកម្ម​​​នឹង​ការ​ថ្លែង​របស់​នាយក​រដ្ឋមន្ត្រី​សឹង្ហបុរី​ដែល​ថា ​វៀតណាម​ឈ្លាន​ពាន​កម្ពុជា


រូប Screenshot ពី​ទំព័រ​ហ្វេសប៊ុក​របស់​លោក Lee Hsien Loong នាយក​រដ្ឋ​មន្ត្រី​ប្រទេស​សិង្ហបុរី។ (Screenshot from PM Lee Hsien Loong Facebook Page)

បន្ទាប់ពី​មន្ត្រី​ជាន់​ខ្ពស់​កម្ពុជា​មាន​ប្រតិកម្ម​ចំពោះ​ការ​ថ្លែង​របស់​នាយក​រដ្ឋមន្ត្រី​សឹង្ហ​បុរី ​លោក Lee Hsien Loong​ ​​​ថា ​វត្តមាន​របស់​កងទ័ព​វៀតណាម​នៅកម្ពុជា​ក្នុង​ឆ្នាំ​​​១៩៧៩​ជា​​«ការ​ឈ្លានពាន​» រដ្ឋាភិបាល​វៀតណាម​ហៅ​ការ​ថ្លែង​នេះ​ថា ​ជា​ការ​សោក​ស្តាយ​និងនាំឲ្យ​មាន​ការ​យល់​ខុស​ពី​សាធារណ​ជន។

ក្រសួង​ការ​បរទេស​របស់វៀតណាម​បាន​បង្ហាញ​ការ​«សោក​ស្តាយ»ចំពោះការ​លើក​ឡើង​របស់​នាយក​រដ្ឋមន្ត្រី​សិង្ហបុរី​លោក Lee Hsien Loong ​នៅ​ក្នុង​កិច្ច​ប្រជុំ​កំពូល​សន្តិសុខ​ទ្វីប​អាស៊ី​និង​នៅ​ក្នុង​ទំព័រ​ហ្វេសប៊ុក​របស់​លោកកាលពី​សប្តាហ៍​មុន​ ដែល​ថា​ ការ​អន្តរាគមន៍​យោធា​របស់​កងទ័ព​វៀតណាម​នៅ​ឆ្នាំ​១៩៧៩​ជា​«ការ​ឈ្លាន​ពាន​របស់​វៀតណាម»​ទៅ​លើ​កម្ពុជា។​

អ្នក​នាំ​ពាក្យ​ក្រសួង​ការ​បរទេស​វៀតណាម ​អ្នកស្រី​ Le Thi Thu Hang​ បាន​ឆ្លើយ​តប​ជា​សាធាណៈនៅ​ថ្ងៃ​ទី៤ខែ​មិថុនា​ថា​ ការ​លើក​ឡើង​របស់​លោក​នាយក​រដ្ឋ​មន្ត្រី​សឹង្ហបុរី«មិន​បង្ហាញ​ពី​ការណ៍​ពិត​នៃ​ប្រវត្តិ​សាស្រ្ត​ដែល​នាំ​ឲ្យ​មាន​ការ​ប៉ះពាល់​អវិជ្ជ​មាន​លើ​ការ​យល់​ឃើញ​របស់​សាធារណ​ជន»។​

តាម​រយៈ​ គេហ​ទំព័រ​ក្រសួរ​ការ​បរទេស​វៀតណាម​ អ្នក​ស្រីបាន​លើក​ឡើង​ថា អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​បាន​ចេញ​សាល​ក្រម​លើ​ឧក្រិដ្ឋ​កម្ម​ប្រល័យ​ពូជ​សាសន៍​និង​ឧក្រិដ្ឋ​កម្ម​ប្រឆាំង​មនុស្ស​ជាតិ​ដែល​ប្រព្រឹត្ត​ដោយ​ខ្មែរ​ក្រហមកាល​ពីខែ​វិច្ឆិកា​ឆ្នាំ​មុន។​

«សាល​ក្រម​នេះ​គឺ​ជា​ភ័ស្តុតាង​ជាក់​ស្តែង​ចំពោះ​ការណ៍​ពិត​ជាប្រវត្តិ​សាស្ត្រ​ ហើយ​វា​ផ្តល់យុត្តិធម៌ និង​ប៉ះប៉ូវ​ការ​ខូចខាត​ដល់​ជនរង​គ្រោះ​ដែល​សាលក្រម​នេះ​ត្រូវ​បាន​ស្វាគមន៍​ដោយ​អង្គការ​សហ​ប្រជា​ជាតិ​ និង​សហគមន៍​អន្តរ​ជាតិ»។​

ការ​ឆ្លើយ​តប​នេះ​បាន​កើត​ឡើង​បន្ទាប់​ពី​ប្រតិកម្ម​មន្ត្រី​កម្ពុជា​ ដែល​តែង​ចាត់​ទុក​ព្រឹត្តិ​ការណ៍​ប្រវត្តិ​សាស្ត្រ​នេះ​ថា​ជា​ការ​ជួយ​រំដោះ​កម្ពុជា​ពី​របប​ខ្មែរ​ក្រហម។ ភាគី​វៀតណាម​មាន​ប្រតិកម្ម​ចំពោះការលើក​ឡើង​របស់​លោក​ Lee Hsien Loong​ នាយក​រដ្ឋមន្ត្រីប្រទេស​សឹង្ហបុរី ដែល​បាន​ហៅ​វត្ត​មាន​កងទ័ពវៀតណាម​នៅ​ក្នុង​ប្រទេស​កម្ពុជា​ក្នុង​ឆ្នាំ​១៩៧៩​នោះ​ថា ​ជា«ការ​ឈ្លាន​ពាន​របស់​វៀតណាម»​នៅ​ខណៈ​លោក​ថ្លែង​សុន្ទរកថា​បើក​វេទិកា​ Shangri-La Dialogue ​នៅ​ក្នុង​ប្រទេស​សឹង្ហបុរី។​

អ្នក​ប្រវត្តិ​សាស្រ្តកម្ពុជា​យល់​ថា​ ការ​ជជែក​ដេញ​ដោល ​ដែល​កើត​មាន​ក្រោយ​ការ​ថ្លែង​របស់​នាយក​រដ្ឋមន្ត្រី​រូប​នេះ​ ឆ្លុះ​បញ្ចាំង​ថា​ ការ​សិក្សា​ប្រវត្តិ​សាស្រ្ត​នៅ​ក្នុង​តំបន់អាស៊ាន​មិន​មាន​ការ​យល់ព្រម​ជារួមនោះ​ទេ។​

លោកឆាំង យុ នាយក​មជ្ឈ​មណ្ឌល​ឯកសារ​កម្ពុជា​ បាន​ឲ្យ​ដឹង​ថា ​ដរាប​ណា​អាស៊ានមិនទាន់​ធ្វើ​សមាហរណ​កម្ម​ប្រវត្តិ​សាស្រ្ត​ ហើយ​បន្ត​ងាក​ចេញ​ពី​បញ្ហា​សិទ្ធិ​មនុស្ស​ នោះ​អាស៊ាន​ទាំងអស់​នឹង​បន្ត​ប្រឈម​នឹង​បញ្ហា​នេះ។​

«ដូច​នេះ​ បើ​សិន​ជា​ការ​ចងចាំ​នេះមិន​ស៊ី​ចង្វាក់ ហើយ​វា​មាន​ការ​បន្ទរ​សំឡេង​នយោបាយ ​ខ្ញុំ​គិត​ថា​ វា​អាច​មាន​ការរង្គៀស​ចិត្ត​ក្នុង​ការ​បង្រួប​បង្រួម​ប្រទេស​ជា​សមាជិក​អាស៊ាន។​ ​ខ្ញុំ​គិត​ថា​ ជា​ការ​ចាំបាច់​ដែរក្នុង​ការ​ឲ្យ​សហគមន៍​អាស៊ាន​ផ្នែក​សិទ្ធិ​មនុស្សគួរតែ​មាន​ជាកម្មវិធីក្តី ​ជា​កាតព្វ​កិច្ចក្តី ​ដែល​អប់រំពី​បញ្ហា​នេះ»។​

លោកបាន​បន្ថែម​យ៉ាង​ដូច្នេះ​ថា៖​

«អ្វី​ដែល​ជា​ការ​ជជែក​គ្នា​ថា ​តើ​ជា​ការ​រំដោះ​ ឬ​ជា​ការ​ឈ្លាន​ពានហ្នឹង ​ខ្ញុំ​គិត​ថា​ ​ គួរ​តែ​លើក​យក​មក​បង្រៀន​ និង​ពិភាក្សាតាម​លក្ខណៈ​វិទ្យា​សាស្រ្ត​នៅ​ក្នុង​សាលា​រៀន»។​

លោក​មាន​ប្រសាសន៍​បន្ត​ទៀត​ថា​ លោកពុំមាន​ការ​ភ្ញាក់ផ្អើល​ចំពោះ​ការ​លើក​ឡើងនេះ​ទេ​ ​ព្រោះ​លោក​យល់​ថា​ ប្រទេស​សឹង្ហ​បុរីមិន​សូវ​ផ្តោត​ការ​យក​ចិត្ត​ទុក​ដាក់​លើការ​អប់រំ​ប្រជា​ពលរដ្ឋអំពី​ចំណេះ​ដឹង​ប្រវត្តិ​សាស្រ្ត​និង​បញ្ហា​សង្គម​សាស្ត្រ ជា​អទិភាព​ទេ​ តែ​សឹង្ហបុរី​ជា​ប្រទេស​ដែល​ផ្តល់​អាទិភាព​លើវិស័យ​សេដ្ឋ​កិច្ច​ និង​ជំនួញ​ជា​ធំ។​

សាស្រ្តាចារ្យ​ប្រវត្តិ​សាស្រ្ត​កម្ពុជា​ និង​ប្រវត្តិ​សាស្រ្ត​អន្តរជាតិ​ លោកសំបូរ ម៉ាណារ៉ា​មាន​ប្រសាសន៍​ថា ការ​បក​ស្រាយ​អំពី​ប្រវត្តិ​សាស្ត្រក្នុង​អំឡុង​ឆ្នាំ​១៩៧៩​ ថា​ជា«ការ​ឈ្លាន​ពាន»ឬ​ជា​«ការ​រំដោះ»ក្រោយ​ប្រទេស​កម្ពុជា​រួច​ផុត​ពី​របប​ប្រល័យ​ពូជសាសន៍​មាន​តាំងពី​យូរ​ណាស់​មក​ហើយ។

«បុន្តែ​សម្រាប់​ថ្ងៃ​ដែល​យើង​និយាយ​ពី​ការ​មក​ដល់​នៃ​ការ​កងទ័ព​វៀតណាម​នៅ​ពេល​នោះ​ ខ្ញុំ​យល់​ថា​ គឺ​ជា​ការ​ចាំ​បាច់​មួយ​ដែល​ប្រទេស​យើង​ត្រូវការ​បញ្ចប់​ការ​សម្លាប់​មនុស្ស​ ព្រោះ​យើង​បាន​ដឹង​ហើយ​ថា​ ​ប្រទេស​យើង​មាន​វិបត្តិ​បែប​នេះ»។​

លោក​ថា ការ​លើក​ឡើង​របស់លោក​នាយក​រដ្ឋ​មន្ត្រីសឹង្ហបុរី​ជា​ទស្សន​បុគ្គល និង​មិនមែនជា​តំណាង​អាស៊ាន​នោះ​ទេ ដូច្នេះ​វា​គួរតែ​មិន​ប៉ះពាល់​ដល់​ទំនាក់​ទំនង​ប្រទេស​សមាជិក​អាស៊ាន ឬ​តម្លៃ​អាស៊ាន​នោះ​ទេ។​

«បើ​ទោះ​ជា​លោក​ជា​នាយក​រដ្ឋមន្ត្រី​ក៏ដោយ​ ​ជា​ទស្សន​របស់​បុគ្គល​ម្នាក់មិន​អាច​ធ្វើ​ឲ្យ​មាន​ការ​បាត់​បង​នូវ​តម្លៃ​ដែល​ធ្វើឲ្យ​មានភាតរ​ភាព​ ឬ​អធិប​តេយ្យ​ភាព ឬ​គំនិត​ឯក​រាជ្យ​និយម​របស់​ប្រទេស​និមួយៗ​ក្នុង​តម្លៃ​ជា​សមាជិក​របស់​អាស៊ាន​នោះ​ទេ»។​

ការ​ថ្លែង​របស់​នាយក​រដ្ឋមន្ត្រី​សឹង្ហ​បុរី​នេះ​នាំ​ឲ្យ​មាន​ប្រតិកម្ម​លើបណ្តាញ​សង្គម។នៅ​លើ​ទំព័រ​ហ្វេសប៊ុក​របស់​លោក​មាន​ការ​ចុច«ខឹង»​ចំនួន១៩០០០​ដង​លើ​ការ​ថ្លែង​«ការ​ឈ្លាន​ពាន​របស់​វៀតណាម»។​ ហើយ​ការ​ចុច​ប្រតិកម្ម​ទៅ​នឹង​ការ​ថ្លែង​របស់​លោក​ទូទៅ​មាន២៦​០០០​ដង។​

អ្នក​ប្រើ​ប្រាស់​បណ្តាញ​សង្គម​ជនជាតិ​វៀតណាម​ម្នាក់​សរសេរ​ថា៖​ «ប្រទេស​វៀតណាម​និង​សឹង្ហ​បុរី​មាន​មិត្តភាព​ដ៏ល្អ​មុន​ពេល​លោក​នាយក​រដ្ឋមន្ត្រី​បាន​ថ្លែង​បែប​នេះ។ ​កាលពី​អតីត​កាល​ ​ទាហាន​ស្ម័គ្រ​ចិត្ត​ពី​វៀតណាម​បាន​បូជា​ឈាម​និង​ឆ្អឹង​របស់​ពួកគេក្នុងកំឡុង​ពេល​នៃ​ការ​រំលំ​របប​ប្រល័យ​ពូជសាសន៍​ប៉ុលពត​ និង​នាំ​សន្តិភាព​មក​កម្ពុជា»៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG