នៅក្នុងរោងចក្រមួយនៅក្រៅទីក្រុង Ho Chi Minh ដែលផលិតស្បែកជើងអត្តពលិក Nike លោក Can ផ្តល់សេវាសន្តិសុខនៅពេលកូនគាត់លេងនៅជិតទីនោះ។ ការណ៍នេះមានឡើងដោយសារក្រុមហ៊ុនគាត់បានកសាងកន្លែងថែទាំកុមារមួយនៅជិតរោងចក្រដែលជាផ្នែកមួយនៃនិន្នាការថ្មីមួយនៃការគិតជាថ្មីអំពីការថែទាំកុមារក្នុងប្រទេសវៀតណាម។ នៅពេលដែលមនុស្សបីជំនាន់រស់នៅជាមួយគ្នាក្នុងផ្ទះតែមួយមិនសូវមានច្រើនដូចពីមុន ឪពុកម្តាយមិនទំនងជាមានជីដូនជីតានៅជាមួយដើម្បីថែទាំពួកកូនៗទេនៅពេលពួកគេទៅធ្វើការ។
ក្រុមហ៊ុនដែលបង់ប្រាក់សម្រាប់សេវានេះនិងការដោះស្រាយឯទៀតៗខាងការថែទាំកុមារនិយាយថាវិធានការទាំងនេះជួយឱ្យពួកគេអាចសន្សំប្រាក់បាន។
លោក Eric Lee ដែលជាអ្នកចាត់ចែងកិច្ចការធនធានមនុស្សនៅឯក្រុមហ៊ុន Taekwang Vina ដែលជាក្រុមហ៊ុនផលិតស្បែកជើងកាក់ស្មានថាក្រុមហ៊ុនលោកបានខាត១លានដុល្លារក្នុងមួយឆ្នាំដោយសារអត្តវត្តមានមិនបានគ្រោងទុកមុនរបស់និយោជិត។
លោក Lee បាននិយាយថា«ការបើកកន្លែងថែទាំកុមារបានជួយរោងចក្រយើងកាត់បន្ថយអវត្តមានបុគ្គលិកបាន២០ភាគរយ»។ លោកបានថ្លែងបន្តថា«មានអត្ថប្រយោជន៍ច្រើនជាងឧបសគ្គហើយយើងជឿថាការថែទាំកុមារជាផ្នែកសំខាន់មួយនៃយុទ្ធសាស្ត្រធ្វើឱ្យក្រុមហ៊ុនលូតលាស់»។
បើតាមសាជីវកម្មហិរញ្ញវត្ថុអន្តរជាតិ IFC ថា ការសន្សំប្រាក់បែបនេះជួយបញ្ចុះបញ្ចូលក្រុមហ៊ុនថា ពួកគេគួរធ្វើឱ្យប្រាកដថាក្រុមបុគ្គលិកមានការថែទាំកុមារ។ អង្គការ IFC បាននិយាយនៅក្នុងសេចក្តីរាយការណ៍មួយកាលពីខែសីហាថា ក្រៅពីសីលធម៌នៃការមានការថែទាំកុមារ វិធានការនេះ ថែមទាំងជួយទាក់ទាញបុគ្គលិកល្អៗ បង្កើនផលិតភាព និងបង្កើនការពេញចិត្តរបស់បុគ្គលិកផងដែរ។
ក្រុមហ៊ុនដែលមិនអាចកសាងកន្លែងថែទាំកុមារបានក៏បានផ្តល់ការលើកទឹកចិត្តឯទៀតៗដែរ។ ការលើកទឹកចិត្តទាំងនេះមានរួមបញ្ចូលការផ្តល់ប្រាក់ជំនួយបន្ថែមប្រចាំខែសម្រាប់ជួយពួកបុគ្គលិកបង់ប្រាក់សម្រាប់ការថែទាំកុមារ ការឈប់ធ្វើការដោយមានប្រាក់ខែនៅពេលសម្រាលកូន ការធ្វើការពីផ្ទះ និងការធ្វើការតាមម៉ោងដែលអាចបត់បែនបាន ឬជម្រើសចម្រុះ។
ពួកនិយោជិតក្នុងប្រទេសវៀតណាមបានសុំឱ្យមានជម្រើសទាំងនេះច្រើនជាងមុនដោយសារសង្គមមានការប្រែប្រួល។ កាលពីមុនពួកឳពុកម្តាយដែលជាអ្នកធ្វើការធ្លាប់តែរស់នៅជាមួយឳពុកម្តាយពួកគេផ្ទាល់ដែលជួយថែទាំពួកចៅៗ ដើម្បីឱ្យឳពុកម្តាយកុមារទាំងនេះអាចទៅធ្វើការបាន។ ក៏ប៉ុន្តែជីដូនជីតាជាច្រើន នាំគ្នាសម្រេចចិត្តចាកចេញពីផ្ទះរបស់កូន ទៅរស់នៅកន្លែងផ្សេងវិញ។ ពួកឳពុកម្តាយឯទៀតៗជាអ្នកធ្វើការចំណាកស្រុកដែលរស់នៅឆ្ងាយពីជីដូនជីតានៅក្នុងក្រុងកំណើតរបស់ពួកគេ។
លោក Can ដែលជាបុគ្គលិកសន្តិសុខ គ្មានជម្រើសឱ្យឳពុកម្តាយគាត់ជួយថែទាំកូនគាត់ទេ។ ដូច្នេះគាត់យល់ថាមានការស្រួលក្នុងចិត្តនៅពេលធ្វើការដោយដឹងថាមានគេជួយថែទាំកូនគាត់មិនឆ្ងាយពីកន្លែងគាត់ធ្វើការ។
លោក Can បាននិយាយអំពីកន្លែងថែទាំកុមាររបស់រោងចក្រថា«ខ្ញុំមានអារម្មណ៍ថា ពួកគ្រូបង្រៀនជួយថែទាំកូនខ្ញុំដោយពិតប្រាកដ។ ការប្រាស្រ័យទាក់ទងជាមួយឳពុកម្តាយមានភាពល្អប្រសើរហើយពួកអ្នកចាត់ចែងកិច្ចការនៅទីនោះមានតម្លាភាព»។
លោក Kyle Kelhofer ជាអ្នកចាត់ចែងកិច្ចការរបស់សាជីវកម្ម IFC សម្រាប់ប្រទេសវៀតណាម កម្ពុជានិងឡាវ។ លោកបាននិយាយថា«កន្លែងធ្វើការដែលគិតគូរចំពោះគ្រួសារ»បែបនេះអាចធ្វើឱ្យពួកនិយោជកមានប្រៀបជាងក្រុមហ៊ុនដទៃក្នុងការជួលបុគ្គលិកល្អបានច្រើន។ វិនិយោគបរទេសកើនឡើងច្រើនក្នុងប្រទេសវៀតណាមនាំឱ្យមានការប្រជែងច្រើនជាងមុនក្នុងចំណោមក្រុមហ៊ុនក្នុងការជ្រើសរើសបុគ្គលិក។ បើតាមរបាយការណ៍របស់សាជីវកម្ម IFC ថា នៅពេលណាក្រុមហ៊ុនផ្តល់ការគាំទ្រដូចជាការថែទាំកុមារជាដើម ក្រុមហ៊ុនទាំងនេះមានទំនងច្រើនក្នុងការទាក់ទាញនិងរក្សាទុកបុគ្គលិកល្អៗបាន។
លោក Eric Lee ដែលជាអ្នកចាត់ចែងកិច្ចការខាងធនធានមនុស្ស នៅក្រុមហ៊ុន Taekwang Vina ដែលជាក្រុមហ៊ុនផលិតស្បែកជើងបាននិយាយថាអត្ថប្រយោជន៍ឯទៀតៗនៅក្នុងការថែទាំកុមារ គឺការបន្ថយអត្រានៃការផ្លាស់ប្តូរការងារក្នុងក្រុមហ៊ុនលោក។ ក្រុមហ៊ុន Taekwang Vina បាននិយាយថាកិច្ចខិតខំប្រឹងប្រឹងប្រែងទាំងនេះក៏កែលម្អទំនាក់ទំនងរបស់ខ្លួនជាមួយអាជ្ញាធរក្នុងមូលដ្ឋាននិងកេរ្តិ៍ឈ្មោះរបស់ផងខ្លួនក្នុងចំណោមក្រុមហ៊ុននានាផងដែរ។
លោក Kyle Kelhofer ដែលជាអ្នកចាត់ចែងកិច្ចការរបស់សាជីវកម្ម IFC សម្រាប់ប្រទេសវៀតណាម កម្ពុជានិងប្រទេសឡាវបាននិយាយថា៖ «នៅពេលសាលារៀននិងកន្លែងថែទាំកុមារបានបិទទ្វារនៅពេលមានការរាតត្បាតជាសាកលនៃជំងឺកូវីដ១៩មានការច្បាស់លាស់ថា ផលិតភាពជាប់ពាក់ព័ន្ធយ៉ាងជិតស្និទ្ធជាមួយការថែទាំកុមារ។ យើងមិនអាចភ្លេចបានទេថានៅពេលជិតដល់ការរើបចេញពីវបត្តិកូវីដ១៩ មានឱកាសសម្រាប់ធុរកិច្ចក្នុងប្រទេសវៀតណាមមានប្រៀបក្នុងការប្រកួតប្រជែងនិងធ្វើឱ្យប្រទេសនេះមានភាពប្លែកពីគេក្នុងការដាក់បញ្ចូលការគាំទ្រខាងការថែទាំកុមារសម្រាប់និយោជិត»៕
ប្រែសម្រួលដោយលោក ឈឹម សុមេធ
