ប្រធានអយ្យការអមតុលាការព្រហ្មទណ្ឌអន្តរជាតិ (ICC) បានស្នើចៅក្រមកាលពីថ្ងៃពុធឱ្យចេញដីកាចាប់ខ្លួនមេដឹកនាំរបបយោធាមីយ៉ាន់ម៉ាពីបទឧក្រិដ្ឋប្រព្រឹត្តិលើជាតិសាសន៍ភាគតិចរ៉ូហ៊ីងយ៉ា (Rohingya) កាន់សាសនាអ៊ិស្លាមក្នុងប្រទេសមីយ៉ាន់ម៉ា។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន AP។
លោកនាយឧត្តមសេនីយ៍ Min Aung Hlaing ដែលបានដណ្តើមអំណាចពីមេដឹកនាំជាប់ឆ្នោតអ្នកស្រី Aung San Suu Kyi ក្នុងរដ្ឋប្រហារមួយនៅឆ្នាំ ២០២១ ត្រូវបានចោទប្រកាន់ពីបទឧក្រិដ្ឋកម្មប្រឆាំងមនុស្សជាតិចំពោះការបណ្តេញចេញនិងការធ្វើទុក្ខបុកម្នេញជាតិសាសន៍រ៉ូហ៊ីងយ៉ា។
ប្រជាជនជិតមួយលាននាក់បានបង្ខំចិត្តចូលទៅក្នុងប្រទេសបង់ក្លាដែសដើម្បីគេចពីអ្វីដែលគេហៅថាជាយុទ្ធនាការបំបាត់ជាតិសាសន៍ដែលក្នុងនោះមានដូចជាការរំលោភសេពសន្ថវៈទ្រង់ទ្រាយធំ ការសម្លាប់ និងការដុតផ្ទះសម្បែងជាដើម។
ប្រធានអយ្យការអមតុលាការ ICC លោក Karim Khan បានថ្លែងក្នុងសេចក្តីថ្លែងការណ៍មួយចេញពីជំរំជនភៀសខ្លួនមួយក្នុងប្រទេសបង់ក្លាដែសថា លោកមានបំណងស្នើសុំដីកាចាប់ខ្លួនថ្នាក់ដឹកនាំមីយ៉ាន់ម៉ាជាច្រើននាក់ទៀតក្នុងពេលឆាប់ៗខាងមុខនេះ។
លោក Khan បាននិយាយទៀតថា៖ «ក្នុងការធ្វើដូច្នេះ យើងរួមទាំងដៃគូទាំងឡាយរបស់យើងនឹងបង្ហាញថាជាតិសាសន៍រ៉ូហ៊ីងយ៉ានឹងមិនត្រូវបានបំភ្លេចចោលទេ និងថាដូចប្រជាជនទាំងអស់នៅជុំវិញពិភពលោកដែរ ពួកគេសមនឹងទទួលបានការការពារពីច្បាប់»។
សំណើនេះបានធ្វើឡើងក្នុងពេលប៉ុន្មានថ្ងៃក្រោយមកបន្ទាប់ពីក្រុមឧទ្ទាមដ៏ខ្លាំងមួយបានដណ្តើមកាន់កាប់ទីក្រុងពាណិជ្ជកម្មដ៏សំខាន់មួយនៅប៉ែកឦសានមីយ៉ាន់ម៉ាជាប់ព្រំដែនជាមួយចិន។ ការដណ្តើមបានទីក្រុងដែលជាកន្លែងជីករ៉ែកម្រដ៏ត្រូវប៉ាន់មួយនេះគឺជាបរាជ័យមួយទៀតរបស់របបយោធាមីយ៉ាន់ម៉ា៕
