នៅក្រោយពួកអ្នកវិទ្យាសាស្ត្រកំណត់ថាវីរុសកូរ៉ូណាទំនងជារាលដាលពីសត្វមកមនុស្ស ក៏មានសេចក្តីថ្លែងការណ៍ពីប្រទេសជាច្រើននៅទូទាំងទ្វីបអាស៊ីដែលសន្យាថានឹងហាមប្រាមការជួញដូរសត្វព្រៃ។ នៅពេលនេះទិន្នន័យបង្ហាញថា អាជ្ញាធរ យ៉ាងហោចណាស់ក្នុងប្រទេសវៀតណាមបានធ្វើតាមការសន្យានេះហើយបានពង្រឹងការហាមប្រាមនេះ។
អង្គការបរិស្ថានឈ្មោះការអប់រំសម្រាប់ធម្មជាតិវៀតណាម(Education for Nature Vietnam) ឲ្យដឹងថាក្នុងចំណោមករណីនៃការជួញដូរសត្វព្រៃដែលបានត្រូវបង្ក្រាបនៅក្នុងប្រទេសវៀតណាម ករណីដែលនាំឲ្យមានការចាប់ខ្លួនជនប្រព្រឹត្តល្មើសបានកើនឡើងដល់៩៧% ក្នុងពេល៦ខែដំបូង នៃឆ្នាំនេះ។ ពីឆ្នាំ២០១៥ ដល់ឆ្នាំ២០១៩ ចំនួននៃការចាប់ខ្លួនមានប្រមាណ៨៧%។ អ្នកវិទ្យាសាស្ត្រមានជំនឿថាការរាតត្បាតជាសាកលនៃជំងឺកូវីដ១៩ប្រហែលចាប់ផ្តើមនៅក្រោយមានការប៉ះពាល់រវាងមនុស្សជាមួយសត្វប្រចៀវឬសត្វពង្រូលដែលមានជំងឺនេះក្នុងប្រទេសចិន។ ប្រទេសវៀតណាមនិងប្រទេសឯទៀតៗក្នុងអាស៊ីអាគ្នេយ៍ជាកន្លែងឆ្លងកាត់នៃផលិតផលសត្វព្រៃខុសច្បាប់ទៅកាន់ប្រទេសចិន។ កាលពីប៉ុន្មានឆ្នាំថ្មីៗនេះប៉ូលិសបានរឹបអូសយកសត្វពង្រូលនិងសត្វអណ្តើកជិតផុតពូជ សត្វទោចនិងសត្វស្វាសមុខខ្មៅក្នុងប្រទេសវៀតណាម។
ម៉ឺងម៉ាត់ជាងមុន
អ្នកស្រី Bui Thi Ha នាយិការងនៃអង្គការបរិស្ថានការអប់រំសម្រាប់ធម្មជាតិវៀតណាមបាននិយាយថា៖ «ការធ្វើវិភាគដោយអង្គការអប់រំដើម្បីធម្មជាតិនៅវៀតណាមអំពីការចោទប្រកាន់ក្នុងតុលាការបង្ហាញអំពីអំណាចច្បាប់ព្រហ្មទណ្ឌបច្ចុប្បន្ននិងបង្ហាញអំពីការបង្កើនកិច្ចខិតខំប្រឹងប្រែងក្នុងការពង្រឹងច្បាប់ដោយប្រទេសវៀតណាមនិងតុលាការយុត្តិធ៌មព្រហ្មទណ្ឌដើម្បីបង្ក្រាបបទល្មើសព្រហ្មទណ្ឌខាងការជួញដូរសត្វព្រៃ» ដោយអ្នកស្រីនិយាយយោងដល់ច្បាប់ព្រហ្មទណ្ឌដែលបានត្រូវសើរើជាថ្មីក្នុងឆ្នាំ២០១៨។ អ្នកស្រីបាននិយាយថែមទៀតថា «ចាប់តាំងពីច្បាប់ថ្មីនេះបានចូលជាធរមានហើយជាពិសេសក្នុងឆ្នាំ២០២០នេះភ័ស្តុតាងនានាបង្ហាញថាឧក្រិដ្ឋកម្មនៃការជួញដូរសត្វព្រៃបានត្រូវយកចិត្តទុកដាក់ជាងមុនក្នុងប្រទេសវៀតណាម»។
ពួកអ្នកបរិស្ថាននិយាយថាចាប់តាំងពីមានការរាលដាលនៃវីរុសកូរ៉ូណាមក ការបង្ក្រាបការជួញដូរសត្វព្រៃមានភាពបន្ទាន់ជាងមុនដើម្បីបញ្ឈប់ប្រភពនៃជំងឺកូវីដ១៩ជាសក្តានុពលហើយនឹងការធ្វើឱ្យអន្តរាយដល់ពពួកសត្វព្រៃផងដែរ។ បណ្តាញ Facebook បានឆ្លើយតបដោយបានលុបចោលការបង្ហោះតាមអ៊ីនធឺណិតរាប់រយដែលប្រកាសលក់សត្វព្រៃនិងបំណែករាងកាយសត្វព្រៃដោយខុសច្បាប់ក្នុងអាស៊ីអាគ្នេយ៍។
នៅក្នុងប្រទេសវៀតណាម បន្ថែមលើកំណើននៃអត្រាចាប់ខ្លួន មានឧក្រិដ្ឋជនច្រើនជាងមុនបានត្រូវចាប់ខ្លួនញាត់ក្នុងគុក។ ទិន្នន័យប្រមូលផ្តុំដោយអង្គការការអប់រំដើម្បីធម្មជាតិវៀតណាមបានឲ្យដឹងថាក្នុងចំណោមករណីអ្នកជួញដូរសត្វព្រៃដែលត្រូវបានបញ្ជូនទៅតុលាការនោះ អត្រានៃការកាត់ទោសឱ្យជាប់គុកបានកើនឡើងដល់៦៨%ក្នុងឆ្នាំនេះ។ តួលេខនេះខុសខ្លាំងពីតួលេខពីឆ្នាំ២០១៥ ដល់ឆ្នាំ២០១៩ ដែលនៅពេលនោះតួលេខនេះមិនបានឡើងលើសពី ៤៧%ទេ។
រយៈពេលនៃការជាប់គុក
អង្គការអប់រំដើម្បីធម្មជាតិនៅវៀតណាមបាននិយាយនៅក្នុងការធ្វើវិភាគករណីចំនួន៥៥២ក្នុងពេល៥ឆ្នាំមុននេះថា៖ «ការណ៍នេះបង្ហាញថាតុលាការបានកាន់គោលជំហរមួយមានការប្តេជ្ញាខ្លាំងជាងមុនក្នុងការកម្ចាត់ឧក្រិដ្ឋកម្មជួញដូរសត្វព្រៃក្នុងឆ្នាំ២០២០ជាងក្នុងឆ្នាំមុនៗ»។
អង្គការនេះបានផ្តល់អនុសាសន៍ថាប្រទេសវៀតណាមគួរបញ្ឈប់ការជួញដូរសត្វព្រៃហើយបន្ទាប់មកគួរបង្វែរការយកចិត្តទុកដាក់ទៅលើពួកមេដឹកនាំការជួញដូរខុសច្បាប់នេះនិងពួកមន្ត្រីរដ្ឋដែលគាំទ្រពួកជនទាំងនេះ។អង្គការអប់រំដើម្បីធម្មជាតិនៅវៀតណាមបានថ្លែងថាប្រទេសក្នុងអាស៊ីអាគ្នេយ៍នេះក៏អាចផ្តោតការយកចិត្តទុកដាក់លើកំពង់ផែនិងអាកាសយានដ្ឋាននិងការលាងលុយទុច្ចរិតផងដែរ។
ប្រទេសវៀតណាមនិយាយថាខ្លួនធ្វើតាម«របៀបដោះស្រាយរបស់រដ្ឋាភិបាលទាំងមូល»។នាយករដ្ឋមន្ត្រីវៀតណាមលោក Nguyen Xuan Phuc បានបោះពុម្ពផ្សាយសេចក្តីណែនាំមួយកាលពីខែកក្កដាហាមប្រាមការដឹកជញ្ជូននិងការលក់ដូរផលិតផលសត្វព្រៃចូលក្នុងប្រទេស។បញ្ជារបស់នាយករដ្ឋមន្ត្រីរូបនេះក៏ចាត់ភារៈកិច្ចដល់ក្រសួងនានាចាប់តាំងពីក្រសួងការពារប្រទេសដោយឱ្យបង្កើនការយាមល្បាតតាមព្រំដែនរហូតដល់ក្រសួងសុខាភិបាលឱ្យពិនិត្យមើលឱសថស្ថានកុំឱ្យលក់បំណែករាងកាយសត្វព្រៃដោយខុសច្បាប់។
រដ្ឋអាជ្ញាបាននិយាយនៅក្នុងសេចក្តីថ្លែងការណ៍មួយថាខ្លួននឹងពង្រឹងសេចក្តីណែនាំនេះដោយបង្កើនការស៊ើបអង្កេតអំពីឧក្រិដ្ឋកម្មឆ្លងដែននិងដាក់កំហិត «ការដាក់ទណ្ឌកម្មធ្ងន់ធ្ងរលើពួកមេគំនិតនិងពួកមេដឹកនាំដែលបានរំលោភដោយប្រើតំណែងនិងអំណាចរបស់ពួកគេក្នុងការប្រព្រឹត្តឧក្រិដ្ឋកម្មទាំងនេះ»៕
ប្រែសម្រួលដោយ ឈឹមសុមេធ
