នៅថ្ងៃព្រហស្បតិ៍នេះ ក្រសួងការបរទេសវៀតណាមបាននិយាយការពារនយោបាយការបរទេសរបស់រដ្ឋាភិបាលក្រុងហាណូយ ក្រោយពីមានសំណួរទាក់ទងនឹងលិខិតចំហរបស់សមាជិកលេចធ្លោក្នុងបក្សកុម្មុយនិស្តវៀតណាម ដែលជំរុញឲ្យប្រទេសនេះបញ្ចប់ទំនាក់ទំនងជិតស្និទ្ធជាមួយប្រទេសចិន។
ថ្លែងនៅក្នុងសន្និសីទព័ត៌មានជាប្រក្រតីនៅរដ្ឋធានីហាណូយ លោក Le Hai Bing អ្នកនាំពាក្យនិយាយថា នយោបាយបច្ចុប្បន្នរបស់វៀតណាមមានគោលបំណងការពារឯករាជ្យភាព ម្ចាស់ការ និងពហុភាពនៃទំនាក់ទំនងអន្តរជាតិ។ លោក Binh និយាយថា ការអនុវត្តនយោបាយការបរទេសវៀតណាមបានរួមវិភាគទានច្រើនណាស់ក្នុងការលើកកម្ពស់ជំហររបស់វៀតណាមលើឆាកពិភពលោក ព្រមទាំងរួមចំណែកដល់ការអភិវឌ្ឍនិងការឆ្លុះបញ្ចាំងអំពីប្រទេសនេះ។
ក្នុងសប្តាហ៍នេះដែរ មានសមាជិកប្រហែល៦០នាក់នៃគណបក្សកុម្មុយនិស្តវៀតណាមបានបញ្ជូនលិខិតចំហទៅគណៈមជ្ឈឹមបក្សវៀតណាមដែលជាថ្នាក់កំពូលក្នុងបក្ស ដោយនិយាយថា រដ្ឋាភិបាលក្រុងហាណូយបានខាតបង់ច្រើនក្នុងការលះបង់ច្រើនពេកតាមការទាមទាររបស់ចិន។
លិខិតនេះធ្វើឡើងប៉ុន្មានសប្តាហ៍ប៉ុណ្ណោះក្រោយពីវិបត្តិការទូត ដែលបានកើតមានឡើងនៅកាលពីខែឧសភា នៅពេលដែលប្រទេសចិនបានដាក់ការដ្ឋានបូមខួងប្រេងនៅក្នុងដែនទឹកដែលវៀតណាមអះអាងថា នៅក្នុងបូរណភាពដែនដីរបស់ខ្លួនដែរនោះ។ រដ្ឋាភិបាលក្រុងប៉េកាំងបានដកការដ្ឋានខួងប្រេងវិញកាលពីដើមខែកក្កដានេះ ដើម្បីចេញពីខ្សល់ព្យុះ Typhoon។
សាស្ត្រាចារ្យ Tuong Lai ដែលធ្លាប់ធ្វើជាទីប្រឹក្សារបស់នាយករដ្ឋមន្ត្រីពីរនាក់ គឺជាបុរសម្នាក់នៅក្នុងចំណោមអ្នកចុះហត្ថលេខាក្នុងលិខិតចំហ ដែលផ្ញើទៅមេដឹកនាំកំពូលក្នុងរដ្ឋាភិបាលនេះ។
លោកនិយាយថា លិខិតនេះមានខ្លឹមសារខុសពីលិខិតមុនៗ ពីព្រោះគ្រប់ៗគ្នាដែលបានចុះហត្ថលេខាគឺជាសមាជិកនៃគណបក្សកុម្មុយនិស្ត។
ទំនាក់ទំនងការទូតរវាងប្រទេសចិននិងវៀតណាមក្នុងពេលពីរបីខែកន្លងមកនេះមានភាពតានតឹង ជាពិសេសក្រោយពីមានបាតុកម្មប្រឆាំងចិនដែលបានបណ្តាលឲ្យមានអំពើបះបោរក្នុងតំបន់ឧស្សាហកម្មនៅប្រទេសវៀតណាមកាលពីខែឧសភា ដែលបានបណ្តាលឲ្យកម្មករជនជាតិចិនជាច្រើននាក់ស្លាប់។ ប្រទេសចិនគឺជាដៃគូពាណិជ្ជកម្មធំបំផុតរបស់វៀតណាម។
លិខិតនោះក៏មានផ្តល់អនុសាសន៍ឲ្យរដ្ឋាភិបាលក្រុងហាណូយប្តឹងរដ្ឋាភិបាលក្រុងប៉េកាំងនៅតុលាការអន្តរជាតិតាមច្បាប់សមុទ្រអន្តរជាតិ។
លោក Tuong Lai និយាយថា ការឱនក្បាលទៅរកចិននេះធ្វើឲ្យ ប្រជាជនវៀតណាមបាត់បង់ទំនុកចិត្តលើគណបក្ស។
អ្នកស្រី Pham Chi Lan អាយុ៦៩ឆ្នាំ ដែលជាហត្ថលេខីម្នាក់ទៀត គឺជាអតីតអនុប្រធានសភាពាណិជ្ជកម្ម ឧស្សាហកម្មវៀតណាម និងជាអតីតសមាជិកក្រុមប្រឹក្សាស្រាវជ្រាវរបស់នាយករដ្ឋមន្ត្រី។ អ្នកស្រីនៅធ្វើជាទីប្រឹក្សារបស់ក្រសួងជាច្រើននៅឡើយ។
អ្នកស្រីនិយាយថា ប្រទេសវៀតណាមត្រូវធ្វើសមាហរណកម្មថែមទៀតជាមួយប្រទេសផ្សេងៗ ដូចជាឥណ្ឌា កូរ៉េខាងត្បូង ជប៉ុន និងប្រទេសផ្សេងទៀតនៅក្នុងសមាគមប្រជាជាតិអាស៊ីអាគ្នេយ៍ហៅកាត់ថា អាស៊ាន ដើម្បីចេញពីការពឹងផ្អែកលើប្រទេសចិន។
អ្នកស្រីនិយាយថា ប្រទេសវៀតណាមក៏ត្រូវអនុវត្តកំណែទម្រង់ស្ថាប័នដែរ។ ឧទាហរណ៍ ប្រសិនបើគណបក្សនៅតែចង់អភិវឌ្ឍទីផ្សារតាមសេដ្ឋកិច្ចផែនការរបៀបសង្គមនិយមដូចដែលប្រទេសនេះកំពុងធ្វើនៅពេលនេះ នោះនឹងមានការលំបាក។ និយមន័យនៃពាក្យនេះមិនច្បាស់លាស់ទេ។
លោក Tuong Lai និយាយថា គំនិតនេះមិនមានបំណងរំលំគណបក្សកុម្មុយនិស្តទេ ប៉ុន្តែដើម្បីកសាងគណបក្ស។ ប៉ុន្តែការកសាងនេះត្រូវមានកំណែទម្រង់។
លោកនិយាយថា បើយើងទុកដដែល មិនផ្លាស់ប្តូរទេ នោះគណបក្សនឹងដួលរលំ ព្រោះថា ជំនឿរបស់ពលរដ្ឋមានកម្រិតទាបណាស់»៕
លោកពិន ស៊ីសុវណ្ណប្រែសម្រួល
