ប្រធានអង្គការសុខភាពពិភពលោក បានព្រមានថា វិសមធម៌នៃការចែកចាយវ៉ាក់សាំងកូវីដ១៩ កំពុងតែអូសបន្លាយការរាតត្បាតជំងឺកូវីដ១៩ ឲ្យកាន់តែយូរ និងថាវិបត្តិនេះ នឹងពុំអាចបញ្ចប់ទេ លុះត្រាតែលែងមានការឆ្លងរាលដាលវីរ៉ុសកូរ៉ូណានៅតាមបណ្តាប្រទេសទាំងអស់។ លោក Tedros Adhanom Ghebreyesus បានថ្លែងបែបនេះនៅក្នុងសុន្ទរកថាបើកមហាសន្និបាតសុខភាពពិភពលោកលើកទី៧៤។
ប្រធានអង្គការសុខភាពពិភពលោក លោក Tedros Adhanom Ghebreyesus កាលពីថ្ងៃចន្ទកន្លងទៅនេះ បានថ្លែងកោតសរសើរសេចក្តីក្លាហានរបស់បុគ្គលិកបម្រើការក្នុងវិស័យសុខាភិបាល និងថែទាំសុខភាពទាំងអស់ដែលបានបម្រើការយ៉ាងអង់អាចសង្រ្គោះជីវិតមនុស្សរាប់លាននាក់ ដោយប្រថុយនឹងគ្រោះថ្នាក់ដល់ជីវិតខ្លួនឯង។
លោកបានប៉ាន់ប្រមាណថា មានមនុស្ស១៥០.០០០នាក់ បានស្លាប់ ដោយសារតែពួកគេខ្វះសម្ភារៈការពារខ្លួននិងវ៉ាក់សាំងប្រឆាំងជំងឺកូវីដ១៩ ដែលអាចជួយសង្គ្រោះជីវិតពួកគេបាន។
លោក បានទម្លាក់កំហុសលើប្រទេសអ្នកមានមួយចំនួនដែលគិតតែប្រមូលទិញវ៉ាក់សាំងប្រឆាំងកូវីដ១៩សង្រ្គោះជីវិតទុក និងបន្តអូសបន្លាយរោគរាតត្បាតឱ្យកាន់តែយូរ។ លោកបានបញ្ជាក់ថា ជាង៧៥ភាគរយនៃវ៉ាក់សាំងគ្រប់ប្រភេទទាំងអស់ដែលគេបែងចែកដល់ប្រទេសចំនួន១០ មានតែ២ភាគរយប៉ុណ្ណោះ បានទៅដល់ប្រទេសក្រីក្រ។
លោកបានចាត់ទុកវិសមធម៌នៃការបែងចែកវ៉ាក់សាំងជារឿងគួរឱ្យអៀនខ្មាស់មួយ។ លោកបានបន្តថា វាពុំទំនងសោះដែលប្រទេសមួយក្រុមតូចដែលជាអ្នកផលិត និងទិញយកវ៉ាក់សាំងស្ទើរទាំងអស់ កំពុងគ្រប់គ្រងជោគវាសនាប្រទេសដទៃទៀតក្នុងលោកពិភពលោក។ លោកបាននិយាយបន្ថែមទៀតថា ស្ថានភាពសាកលលោកបែបនេះ មានលក្ខណៈផុយស្រួយខ្លាំងណាស់ ហើយប្រទេសអ្នកមានពុំគួររីករាយនឹងសមត្ថភាពខ្លួនក្នុងការប្រយុទ្ធប្រឆាំងនឹងជំងឺបែបនេះឡើយ។
លោក Tedros Adhanom Ghebreyesus បានថ្លែងដូច្នេះថា៖
«មិនត្រូវមានប្រទេសណាមួយចាត់ទុកថាខ្លួនលែងមានគ្រោះថ្នាក់ ដោយសារតែចំនួនវ៉ាក់សាំងដែលខ្លួនមាននោះឡើយ...។ មេរោគនេះបំប្លែងខ្លួនជាបន្តបន្ទាប់។ ការប្រែប្រួលអ្វីមួយនាពេលអនាគត អាចនឹងធ្វើឱ្យវិធានការរបស់យើងលែងមានប្រសិទ្ធភាព ហើយនឹងអាចទាញយើងឲ្យត្រឡប់ទៅស្ថានភាពដើមវិញ»។
លោក Tedros និយាយថា រឿងធំបំផុតដែលនាំឱ្យមានរោគរាតត្បាតនេះ គឺដោយសារតែពុំមានសាមគ្គីភាពជាសាកល និងពុំមានការចែករំលែកទិន្នន័យ ព័ត៌មាន មេរោគបង្កជំងឺ ប្រភព និងបច្ចេកវិទ្យា។ លោក Tedros Adhanom Ghebreyesus បានថ្លែងបន្តទៀតថា៖
«យើងអាចដោះស្រាយភាពទន់ខ្សោយនេះបាន តាមរយៈការបេ្តជ្ញារួមគ្នារវាងប្រទេសជាតិនានា និងការបង្កើតគ្រឹះដ៏រឹងមាំសម្រាប់កិច្ចសហការដ៏ប្រសើរមួយ។ អនុសញ្ញាស្តីពីការត្រៀមខ្លួននិងឆ្លើយតបប្រឆាំងរោគរាតត្បាតអាចដោះស្រាយបញ្ហាប្រឈមទាំងអស់នេះ ដូចដែលខ្ញុំបានគូសបញ្ជាក់រួចហើយ។ វាជាកិច្ចព្រមព្រៀងអន្តរជាតិដែលតំណាងឱ្យប្រទេសនិងប្រជាជនទាំងអស់»។
ក្នុងចំណោមកិច្ចពិភាក្សានានានៅក្នុងមហាសន្និបាតនេះ គេត្រូវគេរំពឹងថា នឹងមានកិច្ចពិភាក្សាអំពីការចាប់ផ្តើមចរចាលើការបង្កើតអនុសញ្ញាប្រឆាំងរោគរាតត្បាតក្របខ័ណ្ឌច្បាប់ដើម្បីត្រៀមខ្លួនឱ្យកាន់តែប្រសើរសម្រាប់បង្ការនិងប្រឆាំងការផ្ទុះឆ្លងមេរោគ។
មកដល់ពេលនេះ អនុសញ្ញាទប់ស្កាត់ថ្នាំជក់ក្នុងក្របខ័ណ្ឌអង្គការសុខភាពពិភពលោក គឺជាអនុញ្ញាតែមួយគត់ដែលធ្លាប់បានពិភាក្សាក្រោមការរៀបចំរបស់អង្គការសុខភាពពិភពលោក៕
ប្រែសម្រួលដោយលោក កោះ សុគន្ធី
