ប្រទេសកូរ៉េខាងត្បូងនិងប្រទេសអ៊ុយក្រែនបានឯកភាពគ្នាកាលពីថ្ងៃពុធលើការពង្រឹងកិច្ចសហប្រតិបត្តិការសន្តិសុខឱ្យកាន់តែស៊ីជម្រៅថែមទៀតដើម្បីឆ្លើយតបទៅនឹង «ការគំរាមកំហែង» ដែលបង្កឡើងដោយការពង្រាយកងទ័ពរបស់កូរ៉េខាងជើងនៅក្នុងប្រទេសរុស្ស៊ី។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP ដែលយោងលើការប្រកាសរបស់ខុទ្ទកាល័យប្រធានាធិបតីកូរ៉េខាងត្បូង។
សេចក្ដីប្រកាសនេះបានធ្វើឡើងបន្ទាប់ពីមានជំនួបរវាងប្រធានាធិបតីកូរ៉េខាងត្បូងលោក Yoon Suk Yeol និងរដ្ឋមន្ត្រីការពារជាតិអ៊ុយក្រែនលោក Rustem Umerov។ ជំនួបនេះបានធ្វើឡើងបន្ទាប់ពីប្រទេសទាំងពីរបានបង្ហាញក្ដីបារម្ភអំពីការពង្រាយកងទ័ពរាប់ពាន់នាក់របស់កូរ៉េខាងជើងនៅក្នុងប្រទេសរុស្ស៊ីភាគខាងលិច។
លោក Yoon បាន «បង្ហាញក្ដីសង្ឃឹមថា កូរ៉េខាងត្បូងនិងអ៊ុយក្រែននឹងធ្វើការជាមួយគ្នាដើម្បីរៀបចំវិធានការដ៏មានប្រសិទ្ធភាពនៅក្នុងការដោះស្រាយបញ្ហាគំរាមកំហែងផ្នែកសន្តិសុខដែលបង្កឡើងដោយកិច្ចសហប្រតិបត្តិការយោធារបស់កូរ៉េខាងជើងជាមួយនឹងរុស្ស៊ី»។ នេះបើតាមការបញ្ជាក់របស់ខុទ្ទកាល័យប្រធានាធិបតីកូរ៉េខាងត្បូង។
ខុទ្ទកាល័យប្រធានាធិបតីកូរ៉េខាងត្បូងបានបន្ថែមថា៖ «ភាគីទាំងពីរបានឯកភាពគ្នាបន្តការចែករំលែកព័ត៌មានអំពីការដាក់ពង្រាយកងទ័ពរបស់កូរ៉េខាងជើងនៅក្នុងប្រទេសរុស្ស៊ីនិងការផ្ទេរសព្វាវុធនិងបច្ចេកវិទ្យារវាងរុស្ស៊ីនិងកូរ៉េខាងជើង»។
ដំណើរទស្សនកិច្ចរបស់រដ្ឋមន្ត្រីការពារជាតិអ៊ុយក្រែនទៅកាន់ប្រទេសកូរ៉េខាងត្បូងនេះបានធ្វើឡើងបន្ទាប់ពីកូរ៉េខាងត្បូងបានផ្ដល់សញ្ញាថាខ្លួនអាចកែប្រែគោលនយោបាយជាយូរមកហើយអំពីការមិនផ្ដល់សព្វាវុធដល់ប្រទេសដែលកំពុងមានសង្គ្រាម ប៉ុន្តែមិនមានការលើកឡើងណាមួយអំពីការផ្គត់ផ្គង់សព្វាវុធនៅក្នុងសេចក្ដីថ្លែងការណ៍នោះទេ៕