ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សហរដ្ឋ​អាមេរិក​ស្នើ​ឱ្យ​អាស៊ាន​ខិតខំ​ធ្វើការ​ជួយ​ដល់​ពាណិជ្ជករ​អាមេរិកាំង


រូបឯកសារ៖ លោក ជុំ ប៊ុនរ៉ុង ឯកអគ្គរាជទូត​កម្ពុជា​ប្រចាំ​នៅ​រដ្ឋធានី​វ៉ាស៊ីនតោន បាន​ផ្តល់​បទ​សម្ភាសន៍​ឲ្យ VOA អំពី​ដំណើរ​ទស្សនកិច្ច​របស់​លោក John Kerry រដ្ឋ​មន្ត្រីការបរទេស​សហរដ្ឋ​អាមេរិក នៅ​ការិយាល័យ​របស់​លោក​នៅ​ក្នុង​រដ្ឋធានី​វ៉ាស៊ីនតោន កាល​ពីថ្ងៃ​អង្គារ ទី១៩ ខែ​មករា ឆ្នាំ​២០១៦។ (ម៉ែន គឹមសេង/VOA)

រដ្ឋបាល​លោក​ប្រធានាធិបតី​ដូណាល់ ត្រាំ ​ព្យាយាម​ធ្វើ​ឱ្យ​មាន​តុល្យភាព​ពាណិជ្ជកម្ម​​ជាមួយ​នឹង​ដៃគូ​ពាណិជ្ជកម្ម​នានា​​​និង​ជំរុញ​ឱ្យ​មាន​ការធ្វើ​ពាណិជ្ជកម្ម​ដោយ​សេរី​​និង​​ត្រឹមត្រូវ​តាម​ច្បាប់។

តំបន់​អាស៊ាន​នៅតែ​មាន​សារៈសំខាន់​ផ្នែក​ពាណិជ្ជកម្ម​និង​សន្តិសុខ​ចំពោះ​សហរដ្ឋ​អាមេរិក​ហើយ​មន្ត្រី​នានា​ជំរុញ​ឱ្យ​អាស៊ាន​ខិតខំ​ធ្វើការ​ដើម្បី​ឱ្យ​មាន​តុល្យភាព​ពាណិជ្ជកម្ម​ជាមួយ​នឹង​សហរដ្ឋ​អាមេរិក។​

លោក​ ជេហ្វ្រី ហ្គឺរីស​តំណាងរង​នៃ​ការិយាល័យ​ពាណិជ្ជកម្ម​សហរដ្ឋ​អាមេរិក​បាន​ថ្លែង​ប្រាប់​ដល់​តំណាង​ក្រុមហ៊ុន​អាមេរិកាំង​និង​អ្នកការទូត​អាស៊ាន​នៅឯ​ពិធី​ជួបជុំ​មួយ​ក្នុង​រដ្ឋ​ធានី​វ៉ាស៊ីនតោន​កាលពី​ថ្ងៃព្រហស្បតិ៍​សប្តាហ៍​មុនថា៖​

«នៅពេល​ដែល​យើង​ក្រឡេកមើល​បណ្តា​ប្រទេស​នៅ​អាស៊ាន​ យើង​ឃើញ​ឱកាស​ដ៏ធំ​សម្បើម​ដើម្បី​ពង្រីក​ទំនាក់ទំនង​ពាណិជ្ជកម្ម​របស់​យើង​ បង្កើន​ការរីកចម្រើន​ការងារ​និង​សេដ្ឋកិច្ច​និង​ពង្រីក​ការនាំ​ចេញ​របស់​សហរដ្ឋ​អាមេរិក។ យើង​មាន​ចំណាប់​អារម្មណ៍​ថា​ក្នុង​ពេល​ធានា​ថា​អាស៊ាន​ពង្រឹង​សមាហរណកម្ម​ផ្ទាល់​ខ្លួន​តាម​រយៈ​សហគមន៍​សេដ្ឋកិច្ច​អាស៊ាន​គឺ​នៅ​បន្ត​ជា​ទីដៅ​ចំហរ ​សេរី​និង​ត្រឹមត្រូវ​សម្រាប់​ការនាំចេញ​និង​ការធ្វើ​ពាណិជ្ជកម្ម‍»។​

ទំហំ​បណ្តូរ​ពាណិជ្ជកម្ម​ទ្វេភាគី​អាស៊ាន​និង​សហរដ្ឋ​អាមេរិក​មាន​ចំនួន​២៧៣​ពាន់​លាន​ដុល្លារ។ សហរដ្ឋ​អាមេរិក​នាំ​ទំនិញ​និង​សេវាកម្ម​ទៅអាស៊ាន​បាន​ចំនួន​ជាង​១០០​ពាន់​លាន​ដុល្លារ​ដែលនៅ​មាន​អតុល្យភាព​ពាណិជ្ជកម្ម​ជាមួយ​នឹង​តំបន់​នេះ។ នេះ​បើ​តាម​តួលេខ​របស់​ក្រុមប្រឹក្សា​កិច្ចការ​ជំនួញសហរដ្ឋ​អាមេរិក-អាស៊ាន។

រដ្ឋបាល​លោក​ប្រធានាធិបតី​ដូណាល់ ត្រាំ ​ព្យាយាម​ធ្វើ​ឱ្យ​មាន​តុល្យភាព​ពាណិជ្ជកម្មជាមួយ​នឹង​ដៃគូ​ពាណិជ្ជកម្ម​នានា​និង​ជំរុញ​ឱ្យ​មាន​ការធ្វើ​ពាណិជ្ជកម្ម​ដោយ​សេរីនិងត្រឹមត្រូវ​តាម​ច្បាប់។

លោក​ ជេហ្រ្វី​ ហ្គឺរីស​បាន​បន្ថែម​ថា៖

«សហរដ្ឋ​អាមេរិក​ធ្វើ​កិច្ចការ​ជាច្រើន​ឱ្យ​អាស៊ាន​បាន​ចូល​មក​ទីផ្សារ។ យើង​ត្រូវ​ការ​ឱ្យ​អាស៊ាន​ធ្វើ​កិច្ចការ​បន្ថែម​ទៀត​សម្រាប់​យើង​វិញ។ បញ្ហា​ពាណិជ្ជកម្ម​ខ្លះ​រវាង​សហរដ្ឋ​អាមេរិក​និង​អាស៊ានជា​បញ្ហា​ថ្មី​ហើយខ្លះទៀតមាន​យូរ​ហើយ។ ទោះបី​ជា​បញ្ហា​នោះ​ពាក់​ព័ន្ធ​នឹង​ការនាំចូល​ផលិតផល​កសិកម្ម​ទៅ​ប្រទេស​ថៃ ​ការរារាំង​យានយន្ត​នៅ​វៀតណាម ​តម្រូវការ​មូលដ្ឋាន​នៅ​ឥណ្ឌូនេស៊ី​ឬ​របាំង​ពាណិជ្ជករ​រហូត​ដល់​សេវា​ទូទាត់​អេឡិកត្រូនិក​នៅ​ប្រទេស​ជាច្រើន​ក៏ដោយ​ក៏​យើង​នឹង​ធ្វើការ​ជាមួយ​នឹង​ដៃគូ​អាស៊ាន​របស់​យើង​ដើម្បី​ដោះស្រាយ​បញ្ហា​ទាំងនេះ​ឱ្យ​បាន​ជោគជ័យ​ដើម្បី​ផល​ប្រយោជន៍​យើង​ទាំង​ពីរ‍»។​

អាស៊ាន​គឺ​ជា​តំបន់​មាន​ការ​រីក​ចម្រើនដ៏​លឿនដែល​មាន​ផលទុនសរុប​ចំនួន​ជាង២,៥​លាន​លាន​ដុល្លារ​ហើយ​គឺជា​ដៃគូ​ពាណិជ្ជកម្ម​ដ៏ធំ​ទីបួន​របស់​សហរដ្ឋ​អាមេរិក​បន្ទាប់ពី​ចិន ​កាណាដា​ និង​ម៉ិកស៊ិក។

លោក វ៉ាឃីន កាស្ត្រូ អ្នកតំណាងរាស្រ្ត​ប្រចាំ​រដ្ឋ​តិចសាស​ដែលមកពី​ខាង​គណបក្ស​ប្រជាធិប​តេយ្យនិង​ជា​ប្រធាន​ក្រុម​អ្នកតំណាងរាស្ត្រ​ទទួល​បន្ទុកកិច្ចការ​អាស៊ាន​បាន​ចាត់​ទុកថា​តំបន់​អាស៊ាន​មាន​សារៈ​សំខាន់​ស្មើ​នឹង​ដៃគូ​ពាណិជ្ជកម្ម​ដទៃទៀត​ដែល​មាន​ដូច​ជា​ជប៉ុន ​អូស្រ្តាលី ​និង​ឥណ្ឌា​ដែល​រដ្ឋបាល​លោក​ប្រធានាធិបតី​ដូណាល់ ត្រាំ​កំពុងតែ​លើកដម្កើង​ដែរ។

«ខ្ញុំ​ជឿថា​តំបន់​អាស៊ាន​នឹង​ក្លាយ​ជា​តំបន់​ជោគជ័យ​ក្នុង​សម័យ​នេះ។ ពលរដ្ឋ​សកម្ម​និង​វ័យក្មេង​ចំនួន​៦៥០​លាន​នាក់​ក្នុង​តំបន់​នេះ​ សេដ្ឋកិច្ច​ដែល​មាន​ការច្នៃប្រឌិត​ដែល​ឡើង​ជិត​ដល់​៣លាន​លាន​ដុល្លារ​ និង​ទីតាំង​ដ៏​សំខាន់​ចំ​ច្រក​ពាណិជ្ជកម្ម​គឺ​នឹង​នាំ​ឱ្យ​តំបន់​នេះ​មាន​ជោគជ័យ។ សហរដ្ឋអាមេរិក​ត្រូវ​តែ​គាំទ្រ​និង​ធ្វើ​ជា​ផ្នែក​មួយ​នៃ​ភាពជោគជ័យ​នេះ‍»។​

អាស៊ាន​នៅ​មាន​ទីផ្សារ​ខុសៗគ្នា​ ការអភិវឌ្ឍ​សេដ្ឋកិច្ច​មិន​ស្មើគ្នា​និង​វប្បធម៌​នយោបាយ​ចម្រុះ​ហើយ​មាន​ប្រវត្តិ​នៃ​ការគោរព​សិទ្ធិមនុស្ស​មិន​ល្អ​ក្នុង​ប្រទេស​មួយ​ចំនួន​ដូច​ជា​ភូមា ​ហ្វីលីពីន ​វៀតណាម​និង​កម្ពុជា​ជាដើម។

លោក​ វ៉ាឃីន កាស្ត្រូ​ យល់ថា​ការអភិវឌ្ឍ​សេដ្ឋកិច្ច​ក៏​មិន​អាច​ចោល​បញ្ហា​សិទ្ធិ​មនុស្ស​ដែរ។

«យើង​មិនអាច​នៅស្ងៀម​លើ​បញ្ហា​សិទ្ធិ​មនុស្ស​និង​បាន​និយាយ​ជា​សាធារណៈ​ថា​ក្នុង​នាម​ជា​សហ​ប្រធាន​នៃ​ក្រុមការងារ​ទទួល​បន្ទុក​កិច្ចការ​អាស៊ាន​ ខ្ញុំ​ចង់​ជួយ​អភិវឌ្ឍ​និង​ពង្រឹង​ទំនាក់​ទំនង​នៅក្នុង​សភា​សម្រាប់​ប្រជាជាតិ​អាស៊ាន​ប៉ុន្តែ​យើង​ក៏​ត្រូវ​តែ​ហ៊ាន​និយាយ​និង​ប្រាប់​ពួកគេ​នៅ​ពេល​ណា​ដែល​មាន​ការរំលោភ​សិទ្ធិ​មនុស្ស​ដែរ‍»។​

ប្រទេស​ចិន​ក៏​កំពុងតែ​ពង្រីក​ឥទ្ធិពល​ទាំង​នយោបាយ​និង​សេដ្ឋកិច្ច​ពាណិជ្ជកម្ម​នៅ​តំបន់​អាស៊ាន​ផង​ដែរ។

លោក​ ជុំ ប៊ុនរ៉ុង​ ឯកអគ្គរាជទូត​កម្ពុជា​ប្រចាំ​នៅ​រដ្ឋ​ធានី​វ៉ាស៊ីនតោន​មើល​ឃើញ​ថា​ នេះ​ជាឱកាស​ល្អ​សម្រាប់​តំបន់​នេះ​ព្រោះ​ជា​ការប្រកួត​ប្រជែង​មួយ។

«ហ្នឹង​វា​ល្អ​ទាំងអស់​គ្នា។ កាលណា​យើង​មាន​អ្នកវិនិយោគ​ចូលច្រើន​ការប្រជែងគ្នា​ដើម្បី​យក​ឈ្នះ​យក​ចាញ់​ហ្នឹង​ដើម្បី​យក​ចំណេញ​រៀងៗ​ខ្លួន​វាល្អ​សម្រាប់​កម្ពុជា​យើង​ហើយ​វា​ក៏ល្អ​សម្រាប់​គេ​ដែរ។ បើ​គេ​ឃើញ​ថា​យើង​ជាដៃ​គូល្អ​ហើយ​គេមិនអាច​នឹង​ឱ្យ​ដៃ​គូ​ហ្នឹង​ធ្លាក់​ទៅ​អ្នក​ណាផ្សេងទៀត​ទេ។​ វៀលែង​តែ​យើង​មិន​ស្វាគមន៍​គេ។ បើ​យើង​ស្វាគមន៍​ទាំងអស់​គឺ​គេ​ទេ​ដែល​ទៅ​ក្រោយ​គេ​គឺបាន​ផលប្រយោជន៍​ក្រោយ​គេ​អីចឹង​ទៅ‍»។​

រដ្ឋបាល​លោក​ប្រធានាធិបតីត្រាំ​បាន​ដក​សហរដ្ឋ​អាមេរិក​ចេញ​ពី​កិច្ច​ព្រមព្រៀង​ពាណិជ្ជកម្ម​ឆ្លង​មហា​សមុទ្រ​ប៉ាស៊ីហ្វិក(TPP) ​ដែល​ធ្វើឡើង​ក្នុង​រដ្ឋបាល​លោក​ប្រធានាធិបតី​ ប៉ារ៉ាក់ អូបាម៉ា​ រវាង​សហរដ្ឋ​អាមេរិក​ជាមួយ​នឹង​ប្រទេស​ចំនួន​១១​ផ្សេង​ទៀត​នៅតាម​តំបន់​អាស៊ី​និង​មហា​សមុទ្រ​ប៉ាស៊ីហ្វិក។​

លោក​ អាឡិចសាន់ឌ័រ ហ្វេលមែន ​អគ្គនាយក​ប្រតិបត្តិ​នៃ​ក្រុមប្រឹក្សា​កិច្ចការ​ជំនួញ​សហរដ្ឋ​អាមេរិក-អាស៊ាន​យល់​ថា កិច្ចព្រមព្រៀង​TPP​នេះ​មាន​សារៈ​ប្រយោជន៍។

«ពួក​យើង​នៅ​ឯ​ក្រុមប្រឹក្សា​កិច្ចការ​ជំនួញ​សហរដ្ឋ​អាមេរិក​-អាស៊ាន​ជឿលើ​ការធ្វើ​ពាណិជ្ជកម្ម​សេរី​និង​ត្រឹមត្រូវ​និង​កិច្ចព្រមព្រៀង​TPP​ថា​ជា​កិច្ចព្រមព្រៀង​ពាណិជ្ជកម្ម​ដ៏ល្អអស្ចារ្យ​ហើយ​យើង​សង្ឃឹម​ថា​សហរដ្ឋ​អាមេរិក​នឹង​ពិចារណា​វិលត្រឡប់​ចូលវិញ​ជាមួយ​នឹង​ប្រទេស​១១ទៀត។ លោក​ប្រធានាធិបតី​ក៏​បាន​និយាយ​ដល់​បញ្ហា​នេះ​ថា​លែង​ជា​បញ្ហា​ដែល​លោក​ដកចេញ​ពី​តុ​ទៀត​ហើយ​ហើយ​យើង​ក៏​ស្វាគមន៍​កិច្ច​ព្រមព្រៀង​ទ្វេភាគី​ផងដែរ។ កិច្ចព្រមព្រៀង​ជាមួយ​នឹង​ប្រទេស​ហ្វីលីពីន​ហាក់​ដូច​ជា​ទទួល​បាន​ការចាប់​អារម្មណ៍​ខ្លាំង​នៅពេល​បច្ចុប្បន្ន​នេះ។ ប៉ុន្តែ​ក៏​មាន​បញ្ហា​ប្រឈម​សម្រាប់​ភាគី​ទាំងពីរ​ក្នុង​កិច្ចព្រមព្រៀង​ពាណិជ្ជកម្ម​សេរី​រវាង​សហរដ្ឋ​អាមេរិក​និង​ហ្វីលីពីន។ ដូច្នេះ​យើង​មាន​សុទ្ធិដ្ឋិនិយម​ប៉ុន្តែ​បើទោះបី​ជា​មាន​ឬ​គ្មាន​កិច្ច​ព្រមព្រៀង​ពាណិជ្ជកម្ម​គឺ​យើង​នឹង​នៅ​បន្ត​ប្រកួត​ប្រជែង​និង​បន្ត​ធ្វើពាណិជ្ជកម្ម​បាន​ល្អដែរ‍»។​

សហរដ្ឋ​អាមេរិក​បាន​បង្កើត​ទំនាក់ទំនង​ជាមួយ​នឹង​អាស៊ានជាង​៤០ឆ្នាំ​ហើយ។ លោក​ប្រធានា​ធិបតី​ដូណាល់​ ត្រាំ​បាន​ចូលរួម​ក្នុង​ពិធី​រំលឹក​ខួបលើក​ទី​៤០​នៅ​ទីក្រុង​ម៉ានីល​ប្រទេស​ហ្វីលីពីន​កាលពីខែ​វិច្ឆិកា​ឆ្នាំ​មុន​ដែល​គូស​បញ្ជាក់​ពី​ការចាប់​អារម្មណ៍​របស់​រដ្ឋបាល​របស់​លោក​ក្នុង​តំបន់​នេះ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG