ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អនាគត​បេសកកម្ម​បណ្តុះបណ្តាល​របស់​អាមេរិក​នៅ​អាហ្វហ្គានីស្ថាន​មិន​ប្រាកដ​ប្រជា​នៅ​ពេល​ការ​ដក​កងទ័ព​អាមេរិក​ចេញពី​អាហ្គានីស្ថាន​បាន​បញ្ចប់


រូបឯកសារ៖ ទាហាន​អាមេរិក​ម្នាក់ (ឆ្វេង) បាន​ចាប់រលាក់ដៃ​ជាមួយ​ទាហាន​អាហ្វហ្គានីស្ថាន ក្នុង​អំឡុងពេល​ធ្វើសមយុទ្ធ​មួយ​នៅ​ខេត្ត Helmand ប្រទេស​អាហ្វហ្គានីស្ថាន កាលពី​ថ្ងៃទី៥ ខែកក្កដា ឆ្នាំ២០១៧។

ជោគវាសនា​នៃ​កិច្ច​ខិតខំ​ប្រឹងប្រែង​អន្តរជាតិ​ក្នុង​ការ​បណ្តុះ​បណ្តាល​កម្លាំង​សន្តិសុខ​ជាតិ​អាហ្វហ្គានីស្ថាន​ កាន់តែ​មិន​ច្បាស់​លាស់​នៅពេល​ដែល​មន្រ្តី​ក្រសួង​ការពារជាតិ​អាមេរិក ​បង្ហាញ​អំពី​អាទិភាព​ផ្សេង​ទៀត​ ដោយ​នៅសល់​ប្រហែល​តែ​បីខែ​ទៀតដែល​សហ​រដ្ឋ​អាមេរិក​និង​កង​កម្លាំង​អង្គការ​អូតង់​ នឹង​បញ្ចប់​ការ​ដក​កងទ័ព​ចេញ​ពី​ប្រទេស​ដែល​ហែកហួរ​ដោយ​សង្គ្រាម​នេះ។​

បញ្ជាការ​កណ្តាល​សហ​រដ្ឋ​អាមេរិក​បាន​ឲ្យ​ដឹង​ថា បេសកកម្ម​បណ្តុះ​បណ្តាល​ណែនាំ​និង​ជួយ ​ដែល​ត្រូវ​បាន​អនុម័ត​នៅ​ខែ​មករា ​ឆ្នាំ​២០១៥​នោះ បាន​ជួយ​កង​កម្លាំង​អាហ្វហ្គានីស្ថាន​អស់​រយៈពេល​ជាច្រើន​ឆ្នាំ​ក្នុង​ការ​ផ្តល់​ជំនាញ​ ចាប់​ពី​ការរៀបចំថវិកា តម្លាភាព​ និង​ការ​ទទួល​ខុស​ត្រូវ​ដើម្បី​ពង្រឹង​កងកម្លាំង ​ពង្រឹង​និរន្តរភាព ការស៊ើបការណ៍​សម្ងាត់ ​និង​យុទ្ធសាស្ត្រ​ទំនាក់​ទំនង។

មន្រ្តី​ការពារ​ជាតិ​ម្នាក់​បាន​ប្រាប់ VOA ថា « ថ្មីៗ​នេះ​យើង​បាន​ចូលរួម​នៅក្នុង​ការ​បណ្តុះ​បណ្តាល​ទាំងអស់​ រួមជាមួយ​ដៃគូ​របស់​យើង»។

ការ​រំពឹង​ទុក​ដែល​ថា​ ការ​បណ្តុះ​បណ្តាល​នេះ​ នឹង​បន្ត​នៅ​ក្រៅ​ប្រទេស​បន្ទាប់​ពីការ​ដកកង​ទ័ព​នោះ​ ត្រូវ​បាន​ជំរុញ​យ៉ាង​ខ្លាំង​ដោយ​មេ​ដឹកនាំ​មួយ​ចំនួន​កាលពី​ថ្ងៃ​អង្គារ​ នៅពេល​ដែល​អគ្គ​លេខាធិការ​អង្គការ​អូតង់​លោក Jens Stoltenberg បាន​ប្រកាស​នៅ​ក្នុង​សេចក្តី​ថ្លែង​ការណ៍​មួយ​ថា​ អង្គការ​អួតង់​ កំពុង​សម្លឹង​រក​របៀប​ដែល​យើង​អាច​ផ្តល់​ការ​អប់រំ​និង​បណ្តុះ​បណ្តាល​យោធា​ នៅខាង​ក្រៅ​ប្រទេស​អាហ្វហ្គានីស្ថាន​ដោយ​ផ្តោត​លើ​កម្លាំង​ប្រតិបត្តិការ​ពិសេស»។​

ទោះយ៉ាង​ណា មន្រ្តី​ក្រសួង​ការពារ​ជាតិ​និយាយ​ថា អាទិភាព​របស់​ពួកគេ​ គឺ​នៅ​កន្លែង​ផ្សេង។​

លោក John Kirby អ្នក​នាំពាក្យ​ក្រសួងការពារជាតិ​ បាន​ប្រាប់​អ្នក​យក​ព័ត៌មាន​កាលពី​ថ្ងៃ​ពុធ​ថា «ឥឡូវ​នេះ​ការ​គាំទ្រ​សំខាន់​សន្តិសុខ​ជាតិ​អាហ្វហ្គានីស្ថាន​ កងកម្លាំងការពារ​ជាតិ​ និង​កង​កម្លាំង​សន្តិសុខ​ជាតិ​ គឺភាគច្រើន​តាម​រយៈ​មធ្យោបាយ​ហិរញ្ញ​វត្ថុ​ ដោយមាន​ការគាំទ្រ​ខាង​ផ្នែក​ភស្តុភា​ផ្នែកទ័ព​អាកាស ឧទាហរណ៍​ការ​ថែ​រក្សា​យន្ដហោះ»។

នៅ​ពេល​សួរអំពី​ការ​បណ្តុះបណ្តាល​ លោក​បន្ថែមថា​ «លើសពី​នេះ​ទៅ​ទៀត​ ខ្ញុំមិន​មាន​ការ​សម្រេច​ចិត្ត​លើ​គោល​នយោបាយ​ណាមួយ​ដើម្បី​និយាយ​ទេ»។ កាលពី​ខែមុន​លោក Mark Milley ឧត្តម​សេនីយ​កងទ័ព​ដែល​ជា​ប្រធាន​អគ្គ​សេនាធិការ​ចម្រុះ​ គ្រាន់​តែ​ប្រាប់​អ្នក​សារ​ព័ត៌មានថា​ ចេតនា​របស់​យោធា​ គឺ​ចង់​រក្សា​ស្ថានទូត​អាមេរិក​នៅ​អាហ្វហ្គានីស្ថាន​ឱ្យ​នៅ​បើក​ និង«បន្ត​គាំទ្រ​រដ្ឋាភិបាល​អាហ្វហ្គានីស្ថាន​កង​កម្លាំង​សន្តិសុខ​អាហ្វហ្គានីស្ថាន​តាមរយៈ​ជំនួយ​ហិរញ្ញវត្ថុ​និង​លុយ»៕

XS
SM
MD
LG