សហរដ្ឋអាមេរិកនឹងចាប់ផ្តើមការសន្ទនាកម្រិតខ្ពស់ផ្នែកយុទ្ធសាស្ត្រមួយជាមួយប្រទេសដែនកោះ Solomon នៅក្នុងខែកញ្ញាខាងមុខនេះដើម្បីដោះស្រាយពីបញ្ហាព្រួយបារម្ភខាងផ្នែកសន្តិសុខទៅវិញទៅមក និងលើកកម្ពស់លើវិស័យសុខភាពសាធារណៈ ហិរញ្ញវត្ថុ និងបញ្ហាដទៃផ្សេងៗទៀត។
ការជំរុញផ្នែកការទូតរបស់សហរដ្ឋអាមេរិកនៅពេលថ្មីៗនេះកើតមានឡើងក្រោយពីប្រទេស Solomon បានចុះហត្ថលេខាលើកិច្ចព្រមព្រៀងសន្តិសុខមួយជាមួយចិនដែលមន្ត្រីអាមេរិកហៅថាជាការខ្វះតម្លាភាពទាំងស្រុង។
ឧបការីក្រសួងការបរទេសសហរដ្ឋអាមេរិកទទួលបន្ទុកកិច្ចការអាស៊ីប៉ាស៊ីហ្វិកនិងអាស៊ីខាងកើតលោក Daniel Kritenbrink បាននិយាយថា៖ «ខ្ញុំគិតថា វាមានភាពច្បាស់លាស់ដែលថា មានមនុស្សតិចតួចប៉ុណ្ណោះនៅក្នុងចំណោមមជ្ឈដ្ឋានដ៏តូចមួយដែលបានឃើញកិច្ចព្រមព្រៀងនោះ»។
លោក Kritenbrink បានប្រាប់ក្រុមអ្នកសារព័ត៌មាននៅក្នុងកិច្ចប្រជុំតាមទូរស័ព្ទកាលពីយប់ថ្ងៃចន្ទថានាយករដ្ឋមន្ត្រីកោះ Solomon លោក Manasseh Sogavare ត្រូវបានគេដកស្រង់សម្តីជាសាធារណៈដោយនិយាយថា «លោកអាចចែករំលែកខ្លឹមសារលម្អិតនៃកិច្ចព្រមព្រៀងនោះបាន ប្រសិនបើមានការយល់ព្រមពីខាងភាគីចិន ដែលខ្ញុំគិតថាជាប្រភពនៃការព្រួយបារម្ភផងដែរ»។
លោក Kritenbrink និងអ្នកសម្របសម្រួលរបស់សេតវិមានសម្រាប់តំបន់ឥណ្ឌូប៉ាស៊ីហ្វិកលោក Kurt Campbell បានដឹកនាំគណៈប្រតិភូអាមេរិកមួយក្រុមដែលរួមមានមន្ត្រីមួយចំនួននៃក្រសួងការពារជាតិអាមេរិកចូលរួមផងនោះបានទៅធ្វើទស្សនកិច្ចក្នុងប្រទេសហ៊្វីជី ប៉ាពូ អាស៊ីនូវែលហ្គីណេ និងប្រទេសដែនកោះ Solomon កាលពីសប្តាហ៍មុន។
ក្នុងកិច្ចប្រជុំដែលមានរយៈពេល១ម៉ោងកន្លះរវាងមន្ត្រីអាមេរិក និងនាយករដ្ឋមន្ត្រី Sogavare និងមន្ត្រីមួយចំនួនរបស់ដែនកោះនោះកាលពីថ្ងៃទី២២ ខែមេសាកន្លងទៅនេះ សហរដ្ឋអាមេរិកបានបញ្ជាក់យ៉ាងច្បាស់ថា ខ្លួននឹងឆ្លើយតបវិញដ៏សមស្របចំពោះការប៉ុនប៉ងបង្កើតមូលដ្ឋានយោធាមួយនៅក្នុងប្រទេស Solomon ក្រោមកិច្ចព្រមព្រៀងថ្មីៗជាមួយចិននោះ។
មន្ត្រីអាមេរិកបានបដិសេធមិនធ្វើការបញ្ជាក់លម្អិតនៅពេលសួរថា តើអាមេរិកនឹងអាចធ្វើសកម្មភាពយោធាដែរឬទេ ប្រសិនបើចិននៅតែព្យាយាមបង្កើតមូលដ្ឋានយោធារបស់ខ្លួននៅកោះ Solomon នោះ។
ដោយលើកឡើងពីឥរិយាបទមិនសមរម្យជាប្រព័ន្ធរបស់ចិនដែលមានតាំងពីការទាមទារផ្ទៃទឹកខុសច្បាប់រហូតដល់ការបង្កើតទីតាំងយោធាក្នុងតំបន់ជម្លោះដែនទឹកនិងរហូតដល់ការពាក់ព័ន្ធនឹងការនេសាទខុសច្បាប់និងគ្មានច្បាប់ទម្លាប់នោះ លោក Kritenbrink បាននិយាយថា គោលបំណងរបស់សហរដ្ឋអាមេរិកគឺធ្វើការប្រាស្រ័យទាក់ទងឱ្យបានច្បាស់លាស់អំពីក្តីបារម្ភជុំវិញកិច្ចព្រមព្រៀងសន្តិសុខរវាង Solomon និងចិន។
អ្នកនាំពាក្យក្រសួងការបរទេសចិនលោក Wang Wenbin បាននិយាយក្នុងទីក្រុងប៉េកាំងកាលពីថ្ងៃចន្ទម្សិលមិញថា «ការនិយាយស្មានៗដែលថាចិននឹងបង្កើតមូលដ្ឋានយោធារបស់ខ្លួននៅកោះ Solomon ជាការប្រឌិតព័ត៌មានក្លែងក្លាយ»។ លោក Wang បានបញ្ជាក់ថាកិច្ចព្រមព្រៀងសន្តិសុខរវាងចិននិងកោះ Solomon មានលក្ខណៈ«បើកចំហ តម្លាភាព ត្រឹមត្រូវ ស្របច្បាប់និងគ្មានកំហុស»។
លោក William Gallo ប្រធានការិយាល័យរបស់វីអូអេនៅទីក្រុងសេអ៊ូល រួមចំណែកដល់សេចក្តីរាយការណ៍នេះ៕
