ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រសួង​ការ​បរទេស​សហរដ្ឋអាមេរិក​ប្រតិកម្ម​នឹង​ការ​សម្រេច​របស់​កម្ពុជា​ដែល​ហាម​បក្ស​ជំទាស់​មិន​ឱ្យ​ឈ​រឈ្មោះ​បោះឆ្នោត


រូបឯកសារ៖ អ្នក​គាំទ្រ​​គណបក្ស​ភ្លើង​ទៀន ដង្ហែ​ក្បួន​​​កាល​ពី​ថ្ងៃ​ទី​២១ ខែ​ឧសភា ឆ្នាំ​២០២២ អំឡុង​​ថ្ងៃ​ដំបូង​​នៃ​យុទ្ធនាការ​ឃោសនា​បោះឆ្នោត​​សម្រាប់​ការ​បោះឆ្នោត​ឃុំសង្កាត់ឆ្នាំ ២០២២។
រូបឯកសារ៖ អ្នក​គាំទ្រ​​គណបក្ស​ភ្លើង​ទៀន ដង្ហែ​ក្បួន​​​កាល​ពី​ថ្ងៃ​ទី​២១ ខែ​ឧសភា ឆ្នាំ​២០២២ អំឡុង​​ថ្ងៃ​ដំបូង​​នៃ​យុទ្ធនាការ​ឃោសនា​បោះឆ្នោត​​សម្រាប់​ការ​បោះឆ្នោត​ឃុំសង្កាត់ឆ្នាំ ២០២២។

ក្រោយការ​សម្រេច​របស់​ក្រុមប្រឹក្សា​ធម្មនុញ្ញ​កម្ពុជា​ដែល​បដិសេធ​ចោល​បណ្តឹង​របស់​គណបក្ស​ភ្លើង​ទៀន​ ទាក់​ទង​នឹង​ការ​ចុះបញ្ជី​ឈ្មោះ​គណបក្ស​និង​បេក្ខជន​នៅ​ស្ថាប័ន​រៀប​ចំការ​បោះ​ឆ្នោតជាតិកាលពីថ្ងៃ​ព្រហស្បតិ៍​ម្សិល​មិញនោះ ក្រសួង​ការ​បរទេស​សហរដ្ឋអាមេរិក​បាន​ប្រតិកម្មភ្លាមៗ​ ដោយស្នើ​ឱ្យ​អាជ្ញាធរ​កម្ពុជា​កែប្រែ​សេចក្តី​សម្រេច​របស់​ខ្លួន។ នេះ​បើ​តាម​សេចក្តី​ថ្លែង​ការណ៍​របស់​អ្នកនាំពាក្យ​ក្រសួង​ការ​បរទេស​សហរដ្ឋ​អាមេរិក​ ដែល​វីអូអេ​បាន​ទទួល។

ក្រុម​ប្រឹក្សា​ធម្មនុញ្ញ​ដែល​ជា​ស្ថាប័ន​រដ្ឋ​កំពូល​មួយ​របស់​កម្ពុជា​ បាន​សម្រេច​មិន​អនុញ្ញាត​ឱ្យ​គណ​បក្ស​ភ្លើង​ទៀន ​និង​គណបក្ស​នយោបាយ​មួយទៀត​ដែល​គេ​មិន​សូវ​ស្គាល់​ ចូល​រួម​ការ​បោះឆ្នោត​ខែ​កក្កដា​ខាង​មុខ​ ដោយ​លើក​ហេតុផល​ថា ពាក្យ​បណ្តឹង​របស់​គណបក្ស​ទាំង​ពីរ​ធ្វើ​ឡើង​ដោយ​ខុស​នឹង​គតិ​ច្បាប់​។

សេចក្តី​ប្រកាស ​ចុះ​ថ្ងៃទី​ ២៥ ​ខែ​ឧសភា ​របស់​អ្នកនាំពាក្យ​ក្រសួង​ការបរទេស​សហរដ្ឋ​អាមេរិក​ លោក​ Matthew Miller បាន​លើក​ឡើង​ថា៖ «សហរដ្ឋអាមេរិក​មាន​កង្វល់​យ៉ាង​ជ្រាល​ជ្រៅ​ ដោយ​អាជ្ញាធរ​កម្ពុជា​ធ្វើ​ការ​ហាម​ប្រាម​គណបក្ស​ភ្លើង​ទៀន​ ដែល​ជា​គណបក្ស​ប្រឆាំង​ធំជាង​គេ​នៅ​ព្រះរាជាណា​ចក្រ​កម្ពុជា​ មិន​ឱ្យ​ចូលរួម​ក្នុង​ការ​បោះ​ឆ្នោត​ជាតិ​ នៅ​ខែកក្កដា​ ឆ្នាំ​ ២០២៣»។

សេចក្តី​ថ្លែងការណ៍​របស់​លោក Matthew Miller ក៏​បាន​ឱ្យ​ដឹង​ពី​ជំហរ​របស់​សហរដ្ឋ​អាមេរិក ដែល​នឹង​មិន​បញ្ជូន​មន្ត្រី​មក​ឃ្លាំមើល​ការ​បោះ​ឆ្នោត​នៅ​ខែកក្កដា​នោះទេ​ ដែល​ជា​ផ្នែក​មួយ​នៃ​ដំណើរ​ការ​បោះឆ្នោត​ ដែល​អ្នក​ជំនាញ​ឯករាជ្យ​កម្ពុជា​ និង​អ្នក​តាម​ដាន​អន្តរជាតិ​ជាច្រើន​វាយ​តម្លៃ​ថា​ «គ្មាន​សេរីភាព​ និង​យុត្តិធម៌»។

សេចក្តីថ្លែង​ការណ៍​សង្កត់​ធ្ងន់​ថា៖ «យើង​ទទូច​សុំ​យ៉ាង​ខ្លាំង​ឱ្យ​អាជ្ញាធរ​កម្ពុជា​ធ្វើ​ការ​កែប្រែ​ ដើម្បី​ឱ្យ​ពលរដ្ឋ​របស់​ខ្លួន​អាច​ចូល​រួម​ក្នុង​លទ្ធិ​ប្រជាធិប​តេយ្យ​ពហុបក្ស​ និង​យុត្តិធម៌​ ស្រប​តាម​រដ្ឋ​ធម្មនុញ្ញ​នៃ​ប្រទេស​កម្ពុជា​ ហើយ​អាច​អនុវត្ត​សិទ្ធិ​របស់​គេ​ដោយ​សេរី​ ដែល​រួមមាន​ផង​ដែរ​នូវ​សិទ្ធិ​ក្នុង​ការ​ចង​ក្រង​ជា​ក្រុម​ សមាគម​ សិទ្ធិ​ក្នុង​ការ​ធ្វើ​ការ​ប្រមូល​ផ្តុំ​គ្នា​ដោយ​សន្តិវិធី​ និង​សិទ្ធិ​ក្នុង​ការ​បញ្ចេញ​មតិ​ដោយ​គ្មាន​ការ​ភ័យ​ខ្លាច​នឹង​ការ​សង​សឹក»។

​អ្នកនាំពាក្យ​ក្រសួង​ការបរទេស​សហរដ្ឋ​អាមេរិក​ លោក​ Matthew Miller ថ្លែងនៅក្នុងសន្និសីទសារព័ត៌មានមួយនៅក្រសួងការបរទេសសហរដ្ឋអាមេរិក ក្នុងរដ្ឋធានីវ៉ាស៊ីនតោន កាលពីថ្ងៃទី ២៥ ខែឧសភា ឆ្នាំ ២០២៣។ (Video grab/REUTERS)
​អ្នកនាំពាក្យ​ក្រសួង​ការបរទេស​សហរដ្ឋ​អាមេរិក​ លោក​ Matthew Miller ថ្លែងនៅក្នុងសន្និសីទសារព័ត៌មានមួយនៅក្រសួងការបរទេសសហរដ្ឋអាមេរិក ក្នុងរដ្ឋធានីវ៉ាស៊ីនតោន កាលពីថ្ងៃទី ២៥ ខែឧសភា ឆ្នាំ ២០២៣។ (Video grab/REUTERS)

វីអូអេ​បាន​ទាក់ទង​អ្នក​នាំពាក្យ​ក្រសួង​ការបរទេស​កម្ពុជា​លោក អាន សុខខឿន​ តាម​ប្រព័ន្ធ​ទំនាក់​ទំនង​តេឡេ​ក្រាមកាល​ពី​ព្រឹក​ថ្ងៃ​សុក្រ​ តែ​អ្នកនាំពាក្យ​រូបនោះ​មិន​ផ្តល់ការ​អត្ថាធិប្បាយ​ភ្លាមៗទេ​ ទៅ​នឹង​ប្រតិកម្ម​របស់​ក្រសួង​ការបរទេស​សហរដ្ឋ​អាមេរិក​ ពាក់​ព័ន្ធ​នឹង​បញ្ហា​របស់​គណបក្ស​ភ្លើង​ទៀន​ និង​ការ​បោះឆ្នោត​ជាតិ​ឆ្នាំ​ ២០២៣។

លោក​ថា ក្រសួង​នឹង​ចេញ​សេចក្តី​ថ្លែង​ការណ៍​ព័ត៌មានមួយ​តប​ទៅនឹង​សេចក្តី​ថ្លែង​ការណ៍​របស់​ក្រសួង​ការបរទេស​សហរដ្ឋ​អាមេរិក​នៅ​ថ្ងៃ​សុក្រ​នេះ។​

ក្រសួង​ការបរទេស​កម្ពុជា​ធ្លាប់​ប្រតិកម្ម​ម្តង​ហើយ​ទៅ​នឹងអ្នក​រិះ​គន់ និង​ស្ថានទូត​ប្រទេស​ប្រជា​ធិប​តេយ្យ​មួយចំនួន​ប្រចាំ​នៅ​កម្ពុជា​ ទាក់ទិន​ការ​សម្រេច​របស់​គណៈ​កម្មាធិការ​ជាតិ​រៀបចំ​ការ​បោះ​ឆ្នោត​ (គ.ជ.ប)​ ដែល​មិន​អនុ​ញ្ញាត​ឱ្យគណបក្ស​ភ្លើង​ទៀន​ចុះ​បញ្ជី​ចូលរួម​ប្រកួត​ប្រជែង​ការ​បោះ​ឆ្នោត ដោយ​ក្រសួង​អះអាង​ថា​ នេះ​ជា​កំហុស​របស់​គណបក្ស​ជំទាស់​មួយ​នេះ មិន​មែន​ជា​ការ​ប្រព្រឹត្ត​លម្អៀង​របស់​ គ.ជ.ប ទៅ​គណបក្ស​ណា​មួយ​ឡើយ។

សេចក្តី​ថ្លែងការណ៍​របស់​ក្រសួងការ​បរទេស​កម្ពុជា​ ចុះ​ថ្ងៃទី​ ១៦​ ខែឧសភា​ បាន​សរសេរ​ថា៖ «អវត្ត​មាន​របស់​គណបក្ស​នយោបាយ​មួយ​ពីដំណើរ​ការ​បោះឆ្នោត​ ដោយ​សារ​ការ​ធ្វេស​ប្រហែស​មិន​គោរព​ច្បាប់​ ពុំ​បាន​ប៉ះ​ពាល់​ដល់​ភាព​សេរី​ ពហុបក្ស​ និង​ប្រជា​ធិប​តេយ្យ​របស់​កម្ពុជា​ឡើយ ព្រោះ​អ្នក​បោះ​ឆ្នោត​នៅ​តែ​អាច​ជ្រើស​រើស​ដោយ​សេរី​ នូវ​គណបក្ស​នយោបាយ​មួយ​ក្នុង​ចំណោម​គណបក្ស​ប្រកួត​ប្រជែង​គ្នា​ យ៉ាង​តិច​ចំនួន​ ១៨»។

សជិក​គណៈកម្មា​ធិការ​នាយក​របស់គណបក្ស​ភ្លើង​ទៀន​លោក​ គង់ រ៉ៃយ៉ា នៅ​តែចង់​ឃើញ​វត្តមាន​របស់គណ​បក្សជំទាស់​នៅ​ក្នុង​ការបោះ​ឆ្នោត​នា​ខែ​កក្ក​ដា​ខាង​មុខ​ព្រោះ​លោក​ជឿថា​ គណបក្ស​នេះ​អាច​ជួយ​ធានា​បាន​នូវ​ការ​រស់​រាន​មាន​ជីវិត​នៃ​លទ្ធិ​ប្រជាធិតេយ្យ​នៅ​កម្ពុជា។

លោក​ថ្លែង​ថា៖ «សម្រាប់​ខ្ញុំៗ​យល់​ថា ​គណបក្ស​ភ្លើង​ទៀន​គឺ​ជា​គណបក្ស​ប្រឆាំង​ធំ​ជាង​គេ​នៅ​ក្នុង​ប្រទេស​កម្ពុជា​ ហើយ​ការ​ចូល​រួម​របស់​គណបក្ស​ភ្លើង​ទៀន​នៅ​ក្នុង​ការ​បោះ​ឆ្នោតឆ្នាំ​ ២០២៣​ ដែល​ជា​ការ​បោះ​ឆ្នោត​ជ្រើស​តាំង​តំណាង​រាស្ត្រ​ហ្នឹង​ គឺ​វា​ពិត​ជាមាន​សារ:សំខាន់​ខ្លាំង​ណាស់​ ដើម្បី​ធានា​ឱ្យ​បាន​នូវ​ការ​គោរព​លទ្ធិ​ប្រជាធិបតេយ្យ​នៅ​ក្នុង​ប្រទេស​កម្ពុជា»។

ព្រឹទ្ធ​បុរស​រង​នៃ​កម្មវិធី​ថ្នាក់​បរិញ្ញាបត្រ ​និង​ការ​អភិវឌ្ឍ​នៃ​សាកល​វិទ្យាល័យ ​Arizona State University លោក​ អ៊ា សុផល ប្រាប់​វីអូអេ​តាម​សារ​អ៊ីមែល​នៅ​ថ្ងៃ​សុក្រនេះ​ថា សេចក្តី​ថ្លែង​ការណ៍​នេះ​គឺតិច​តួច​បំផុត​ដែល​អាមេរិក​អាច​ធ្វើ​បាន​ ហើយ​ថា មាន​តែ​ការ​ធ្វើសកម្មភាព​ទេ​ ទើបមាន​ឥទ្ធិពល​ខ្លាំងជាង​ពាក្យសម្តី។​ លោក​បន្ថែម​ថា​ អាមេរិក​អាច​ធ្វើ​បាន​ច្រើន​លើស​ពី​នេះ​ ហើយ​អ្វី​ដែល​ត្រូវ​តែ​ធ្វើនោះ​គឺ​ «ការ​ដាក់​ទណ្ឌ​កម្ម​ឱ្យ​ចំគោលដៅ​ និង​ទណ្ឌកម្ម​ផ្សេង​ៗទៀត»។

លោក​បាន​អត្ថាធិប្បាយ​ជា​ភាសា​អង់​គ្លេស​និង​ត្រូ​វប្រែ​សម្រួល​ជា​ខេមរភាសា​តាម​ន័យ​ដើម​ថា៖ «គណបក្ស​ភ្លើងទៀន​ក៏ដូច​ជាគណបក្ស​ប្រឆាំង​ដទៃ​ទៀត​មិន​ត្រូវ​អស់​សង្ឃឹមទេ ចំពោះ​អនាគ​ត​លទ្ធិ​ប្រជាធិបតេយ្យ​នៅកម្ពុជា​ឡើយ។ ប្រជាធិបតេយ្យ​កំពុង​ឆ្ពោះមក​កាន់​កម្ពុជា​ហើយ។ វាមិន​អាចមក​ដល់​នៅ​ក្នុង​ខែ​កក្ក​ដាខាង​មុខនេះ​ទេ ប៉ុន្តែអ្នក​ទោស​ថ្ងៃនេះ​អាចក្លាយ​ជានាយក​រដ្ឋមន្ត្រី​នៅ​ថ្ងៃអនាគត។ គណបក្ស​ភ្លើង​ទៀន​គួរតែ​បន្តរក​ការគាំទ្រ​ មិន​ថា​ពី​ខាងក្នុង​ប្រទេស​ឬក្រៅ​ប្រទេស​ឡើយ»។

លោក​បន្ថែម​ថា ​គណបក្ស​ភ្លើង​ទៀន​គួរ​តែ​រក្សា​គំនិត​គិត​ថា​ សូម្បី​តែ​សហភាព​សូវៀត​ ក៏​បានរលត់​រលាយ​ទៅ​ ហើយ​បាន​សល់​នៅ​ត្រឹម​តែ​អតីតកាល​របស់​ខ្លួន​ប៉ុណ្ណោះ៕

XS
SM
MD
LG