សហរដ្ឋអាមេរិកកាលពីថ្ងៃពុធបានប្រកាសថា ខ្លួននឹងរៀបចំធ្វើសមយុទ្ធយោធាជាមួយកូរ៉េខាងត្បូងឡើងវិញនៅឆ្នាំក្រោយ ដែលការណ៍នេះបានបង្ហាញឲ្យឃើញថាល្បែងសង្គ្រាមមិនមែនជាឧបសគ្គរារាំងដល់ដំណោះស្រាយការទូតជុំវិញការបញ្ចប់កម្មវិធីនុយក្លេអ៊ែររបស់កូរ៉េខាងជើងនោះទេ។
រដ្ឋមន្រ្តីការពារប្រទេសអាមេរិកលោក Jim Mattis បានថ្លែងថា សមយុទ្ធយោធាដែលមានឈ្មោះថា Foal Eagle ជាមួយទីក្រុងសេអ៊ូលនឹងរៀបចំធ្វើឡើងនៅរៀងរាល់រដូវផ្ការីកនៅប្រទេសកូរ៉ខាងត្បូង ប៉ុន្តែនឹងត្រូវកាត់បន្ថយទំហំនៃប្រតិបត្តិការនៅក្នុងឆ្នាំ២០១៩។
លោកមិនបាននិយាយលម្អិតអំពីការកាត់បន្ថយទំហំនៃការធ្វើសមយុទ្ធយោធានៅឆ្នាំក្រោយនេះទេ ប៉ុន្តែលោកបានថ្លែងថា ការកាត់បន្ថយនេះគឺជាកិច្ចប្រឹងប្រែងរបស់សម្ព័ន្ធមិត្តទាំងពីរភាគីដើម្បីលើកទឹកចិត្តឲ្យមានការចរចាបន្តទៀតរវាងសហរដ្ឋអាមេរិកនិងកូរ៉េខាងជើងជុំវិញកម្មវិធីនុយក្លេអ៊ែររបស់ក្រុងព្យុងយ៉ាង។
លោក Mattis បានថ្លែងថាសមយុទ្ធយោធា Foal Eagle ត្រូវបានរៀបចំធ្វើឡើងបន្តិចបន្តួចប៉ុណ្ណោះដើម្បីរក្សាទំនាក់ទំនងក្នុងកម្រិតមួយដែលនឹងមិនប៉ះពាល់ដល់ទំនាក់ទំនងការទូតរវាងប្រទេសទាំងពីរ។
នាពេលកន្លងមកកូរ៉េខាងជើងតែងតែជំទាស់ទៅនឹងការធ្វើសមយុទ្ធយោធារវាងសហរដ្ឋអាមេរិកនិងកូរ៉េខាងត្បូង ដោយកូរ៉េខាងត្បូងចាត់ទុកថា ការធ្វើសមយុទ្ធយោធានេះគឺជាការគំរាមកំហែងដល់ប្រទេសជាតិរបស់ខ្លួន។
រដ្ឋបាលលោក ត្រាំ សង្ឃឹមថាកម្មវិធីនុយក្លេអ៊ែររបស់កូរ៉េខាងជើងនឹងត្រូវបញ្ចប់នៅត្រឹមចុងអាណត្តិទីមួយរបស់លោក ត្រាំ នៅខែមករា ឆ្នាំ២០២១៕
