ក្រុមមេដឹកនាំប្រទេសកូរ៉េខាងជើង និងក្រុមមេដឹកនាំប្រទេសកូរ៉េខាងត្បូង នឹងរៀបចំកិច្ចប្រជុំលើកទី ៣ របស់ពួកគេនៅក្នុងទីក្រុងព្យុងយ៉ាង ប្រទេសកូរ៉េខាងជើងពីថ្ងៃទី ១៨ ដល់ថ្ងៃទី ២០ ខែកញ្ញានេះ។
លោក Chung Eui Yong ទីប្រឹក្សាសន្តិសុខជាតិរបស់ប្រធានាធិបតីកូរ៉េខាងត្បូងលោក Moon Jae In បានប្រកាសពីថ្ងៃបរិច្ឆេទនៃការប្រជុំនេះនៅថ្ងៃព្រហស្បតិ៍នេះ គឺក្នុងរយៈពេលមួយថ្ងៃក្រោយមកបន្ទាប់ពីលោកបានដឹកនាំគណៈប្រតិភូទៅកាន់ប្រទេសកូរ៉េខាងជើងដើម្បីសម្រេចលើការរៀបចំកិច្ចប្រជុំរវាងក្រុមមេដឹកនាំនៃប្រទេសទាំងពីរនេះ។
លោក Chung Eui Yong បាននិយាយថា លោក Moon Jae In និងមេដឹកនាំកូរ៉េខាងជើងលោក Kim Jong Un នឹងផ្ដោតលើវិធានការជាក់លាក់មួយចំនួន ដើម្បីសម្រេចឲ្យបាននូវការលុបបំបាត់អាវុធនុយក្លេអ៊ែរនៅឧបទ្វីបកូរ៉េ។
ទីភ្នាក់ងារព័ត៌មាន KCNA របស់រដ្ឋាភិបាលកូរ៉េខាងជើង បានចេញសេចក្ដីប្រកាសមួយនៅថ្ងៃព្រហស្បតិ៍នេះថា វាគឺជា «ឆន្ទៈរបស់លោក Kim Jong Un នៅក្នុងការលុបបំបាត់ទាំងស្រុងនូវគ្រោះថ្នាក់នៃជម្លោះប្រដាប់អាវុធ និងសេចក្ដីរន្ធត់នៃសង្គ្រាមចេញពីឧបទ្វីបកូរ៉េ និងប្រែក្លាយវាឲ្យទៅជាមូលដ្ឋាននៃសន្តិភាពគ្មានអាវុធនុយក្លេអ៊ែរ និងគ្មានការគំរាមកំហែងនុយក្លេអ៊ែរណាមួយ»។
កិច្ចប្រជុំនេះនឹងក្លាយជាកិច្ចប្រជុំទី ៣ រវាងលោក Moon Jae In និងលោក Kim Jong Un នៅក្នុងឆ្នាំនេះ។ កិច្ចប្រជុំពីរលើកកាលពីលើកមុនបានធ្វើឡើងនៅឯភូមិ Panmunjom នៅឯព្រំដែនរវាងប្រទេសកូរ៉េទាំងពីរ៕
